Juanba Jesúsʼita ota ara obʉ

Juanʼra Zacarías akʉza Elisabet wũãwũãbasi. Jeowaba iyira propeta babisi akʉza zokʼasi ẽbẽrarã jarakamarẽã arakʼaitabata Dayirã ẽdrʉbibari zeita. Mamina iyi pʉwʉrʉrane akʉza sinagogarane jaradiai kaude, drʉa ibʉawabʉdebʉrʉ jaradiasi. Ẽbẽra mejãchaʉba Jerusalénʼnebemaba akʉza Judeadebemaba ũrĩ wãpanasi Juanba jaradiabʉta. Juanba jarabasi ãya nekayirua obʉta iduaribibarata, mawũã Daizeze sobiabita. Maʉ̃ kʼarea ẽbẽra mejãchaʉba iduaribisida ãya nekayirua obadara akʉza Juanbara ãyira buru kʼoebisi Jordán dode.

Juanʼra nekʼãrẽ mejãcha bara ba ẽ basi. Iyara kameyo kara omata jʉ̃basi akʉza adichichita kobasi, adewara kũrabari kũata. Ẽbẽrarãbara iyi ʉ̃rʉ audre kʼawuakĩrãpanasi. Pariseora ʉ̃ta krĩchapanʉraba akʉza saduseorabida akʉ jʉ̃ẽsida iyira. Mawũẽra Juanba jarasi ãyaʼa: «Marabara iduaribibara nekayirua opanʉra akʉza nekʼãrẽ awuara ojʉ̃drʉibara. Marara ʉ̃ta krĩchapanʉ, jarapanʉ baera Abrahán warrarata, mamina maʉ̃bara jarakĩrãkʉ ẽ marara Daizeze warrarata».

Ẽbẽrarã mejãchaʉba Juanʼa widipanasi: «¿Dayirãbara kʼãrẽta oibara Daizeze sobiabira?». Iya panʉbasi: «Maraba wuata erpanʉbʉrʉ yi wua neẽãbea diaidua». ¿Kʼauchuka kʼãrẽa iya mawũã jarasita? Juanba kãgabasi iyi kʼaidupanʉraba kʼawuadamarẽã Daizeze sobiabira wuabemarata kãgaibarata.

Akʉza jarasi pʉwʉrʉdebema nokʼoita plata widibarira: «Ẽbẽrarãta sewaraidua akʉza wãrĩnuta jaraidua». Gorogorora jarasi: «Sewa nebʉrata jararaidua akʉza platabaribida ĩjãraidua nekayirua oita».

Saserdoterabida akʉza lebitarabida akʉ jʉ̃ẽsida Juanʼra, mõbe jarasida: «Ẽbẽra jõmaʉ̃ba kʼawuakĩrãpanʉ bʉra kʼaita». Juanba jarasi: «Mʉ̃ara drʉa ibʉawabʉde Jeowa ʉ̃rʉ jaradiabʉ, propeta Isaíasba jarada kĩrãkʼa».

Ẽbẽrarãbara ũrĩkĩrãdebasi Juanba jaradiabʉra. Akʉza mejãchaʉba kʼawuakĩrãpanasi iyira Dayirã ẽdrʉbibari kʼawuaita. Maʉ̃ kʼarea Juanba jarasi: «Aranʉbai zeyi mʉ̃ audre zarea barabʉta. Mʉ̃ara mia kʼãrẽsida wẽãine bʉ ẽã jĩrʉne jʉ̃bʉra. Mʉ̃ara buru kʼoebibʉ baniaba, mamina ʉ̃ra zeibara buru kʼoebiyi Daizeze jaure zareadeba».