Jesúsʼra do ʉ̃rʉ tai

Jesúsbara ẽbẽrarã kayapanʉrãra bebiseabasi akʉza beidarata jẽda piradrʉbiseabasi. Adewara pʉãdrʉ zromata akʉza kue zromata taʉbiseabasi. Jesús iyi katumane yiwidʼida tẽã, iya ũdusi nãgʉta puza Galileade. Iyi apostolerãra jãbadebasi akʉza zarea opanasi jãba barru wã ẽ bamarẽã. Jesúsʼra maʉ̃ katumaneba ze kʼãrãpe puza ʉ̃rʉ teiba wãsi jãba oũbʉma, maʉ̃ta apostoleraba ũduside mejãcha perasida. Aramaʉ̃ta Jesúsba jarasi: «Mʉ̃ra Jesús, peraraidua».

Pedroba jarasi: «Bʉta wãrĩnu Jesúsbʉrʉ, mʉ̃ta trʉ̃ra bʉidu jʉ̃ẽmarẽã». Jesúsba jarasi: «¡Zera!». Aramaʉ̃ne Pedrora maʉ̃ jãbadeba puza ʉ̃rʉ taiba wãsi Jesúsma jʉ̃ẽita, iyi audura mejãchabasimina pʉãdrʉ zromata. Mamina iyi Jesús kʼaita babʉrʉde Pedrobara iyi audu akʉbʉrʉba mejãcha perasi, sentisi iyira eda tabʉsita. Aramaʉ̃ta jʉrasi: «¡Jesús, kʼarebara mʉ̃ra!». Jesúsbara juwama jida kʼãrãpe jarasi: «¿Bʉara kʼãrẽa ĩjã ẽpe bʉa oseabʉta?».

Jesústa Pedroʉ̃mera jãbade baribʉrʉde pʉãdrʉ zromara taʉ totosi. ¿Bʉmara sãwũã krĩchasidaba apostolerãra? Ãya jarasida: «Bʉra wãrĩnu Daizeze Warra».

Jesúsba maʉ̃ ewaride odara, tẽã abarika osi. Ewari aba Jesúsʼra iyi apostolerabawara jãbade wãbasi, mamina Jesúsʼra kʼãĩsi. Mawũã Jesús kʼãĩnʉmʉena pʉãdrʉta akʉza kueta mejãcha zesi. Puza mejãcha waribʉrʉba jãbara baniaba birabʉsawasi. Aramaʉ̃ne apostolerãra Jesúsʼa mejãcha jʉrasida: «¡Nejaradiabari, daira beibodoa! ¡Kʼarebara daira!». Jesúsʼra piradrʉ kʼãrãpe jarasi maʉ̃ puzaʼa: «¡Taʉra!». Mawũã kue zromata, pʉãdrʉ zromata akʉza maʉ̃ jãbama zaʉzaʉbaridata taʉ totosi. Aramaʉ̃ta Jesúsbara iyi apostolera widisi: «¿Marabara ĩjãta ũdubipanʉ ẽka?». Maʉ̃ne ãyirai bedʼea totosida: «Pʉãdrʉba akʉza puzaba ũrĩbʉ Jesúsba kʼãrẽa jarabʉra». Apostolerabara kʼawuasida Jesústa ĩjãbasibʉrʉ kʼãrẽa peraira neẽbasita.