Jesúsbara ẽbẽra kayabʉta sábadode bebisi

Pariseorabara jʉrabasi Jesúsʼra akʉza jʉrʉpanasi sãwũã beadaita. Pariseorabara jarapanasi Jesúsbara bebikarabasita ẽbẽrarã sábado ewaride. Sábado ewaride Jesúsbara ũdusi yumakẽrã daʉberreabʉta ode platata widibasita. Jesúsba jarasi iyi kʼaidupanʉra: «Akʉra sãwũã Daizeze jaure zareaba kʼarebaseabʉta naʉ̃ yumakẽrãra». Jesúsbara egorota iyi ibaba sʉrrʉa okʼãrãpe maʉ̃ yumakẽrã dabʉma chiratʉsi. Jesúsba jarasi: «Wãra Siloam pozoidu mõbe bʉ dabʉta sʉgʉra». Yumakẽrãba osi baera Jesúsba jarada kĩrãkʼa ũdu totosi.

Maʉ̃ kʼarea ẽbẽrarã kĩrãmiga kʼãrãpe jarasida: «¿Naʉ̃ basika daʉberreabʉ plata widibadara?». Yumakẽrãba jarasi: «Mʉ̃ra daʉberrea tosida». Ẽbẽrarãba widisida: «¿Kʼãrẽa bʉara atiara ũdubʉpe?». Yumakẽrãbara nebʉrasi iyi kʼãrẽ berabaridata, maʉ̃ kʼarea ẽbẽrarãbara pariseorabʉidu edesida.

Yumakẽrãba jarasi pariseora: «Jesúsbara iyi ibaba egorota chiratʉ kʼãrãpe mʉ̃ dabʉma chiratʉsi, mõbe jarasi kĩrã sʉgʉde wãmarẽã. Mʉ̃a iyi bedʼeata ũrĩsi baera mʉ̃ara atiara ũdubʉ». Pariseoraba jarasida: «Jesúsba ewari sábadode bebisibʉrʉ iyi zareara Daizezedeba ze ẽ basi». Mamina awuru ẽbẽrarãba jarapanasi: «Naʉ̃ zareata Daizezedeba ze ẽ basibʉrʉ, ¿iyara sãwũã bebisi daʉberreabʉra?».

Pariseorabara yumakẽrã yibarirata widisida: «¿Kʼãrẽa atiara bʉ warrabara ũduseabʉ?». Parioseorabara jarapanasi Jesús ʉ̃rʉ ĩjãbʉra, sinagogadeba ãĩ bʉedaita, maʉ̃ kʼarea yumakẽrã yibarirãra mejãcha perapanasida. Maʉ̃ kʼarea jarasida: «Daibara kʼawuada ẽã. Iyaʼa wididua». Parioserabara nekʼãrẽ mejãcha widisida. Yumakẽrãba jarasi: «¿Mʉ̃ara jõma jaratabe ẽka maraba wididara? ¿Kʼãrẽa akʉza widinʉmʉ?». Pariseorãra mejãcha kĩrʉedape ãyi bʉdebara ãĩ jʉretasida.

Tẽã Jesúsbara maʉ̃ yumakẽrãta widisi: «¿Bʉara wãrĩnu ĩjãbʉka Dayirã ẽdrʉbibari ʉ̃rʉra?». Yumakẽrãba panʉsi: «Mʉ̃a kʼawuasibʉrʉ iyira kʼaita, ĩjãbʉta ũdubikasi». Jesúsba jarasi: «Mʉ̃ yi Ẽdrʉbibarira». Jesúsbara yumakẽrã daʉberrea bia edasi, bebisi akʉza kʼarebasi ĩjã erbamarẽã, ¿bʉmara Jesúsbara bia osika?