YI 08
Bʉra Jeowa neũdukʼawuara baseabʉ
¿Kʼãrẽa Jeowabara kãgabʉ bʉa iyita biʼia ũdukʼawuamarẽã? Bʉa bia ũdukʼawuara Jeowaba kʼãrẽ bia erbʉta, nekʼãrẽ sãwũã biʼia obʉta akʉza bʉita nekʼãrẽ oita krĩchabʉta, bʉra iyi neũdukʼawua bakĩrãñi. Mamina, ¿wãrĩnu Jeowa neũdukʼawuara baseabʉka? (Akʉra Salmo 25:14). ¿Kʼãrẽta oibara bʉta Jeowa neũdukʼawua bʼaira? Daizeze Bedʼeaba panʉbʉ nama widibʉta, iya jarabʉ kʼãrẽa yibiata Jeowa neũdukʼawua bʼaira.
1. ¿Jeowabara kʼãrẽta diakĩrãbʉ bʉaʼa?
«Daizeze kʼaita bʼaidua, mawũãra iyira mara kʼaita baya» (Santiago 4:8). ¿Kʼãrẽta jarakĩrãbʉ naʉ̃ bedʼeabara? Jeowata bʉ neũdukʼawua bakĩrãbʉta. Ʉ̃kʉrʉba krĩchapanʉ neũdukʼawua ba be ẽãta ẽbẽra daya ũdu ẽ ʉ̃mera akʉza audre zarea bʼaita Daizeze neũdukʼawua bʼaita, ẽbẽraba ũduda ẽ baera. Mamina Jeowaba amaesi Daizeze Bedʼeata maʉ̃neba jõma kʼawuamarẽã iyi ʉ̃rʉ, mawũã iyita orradamarẽã. Daizeze Bedʼea lebʉrʉdera Daizezeba jaradata lepanʉ, naʉ̃ba Jeowa neũdukʼawuara babibʉ dayirãba iyira ũduda ẽ mina.
2. Bʉa neũdukʼawua erbʉdebemara, ¿kʼãrẽa Jeowatrʉ bʉ neũdukʼawuara bia baseabʉ audre?
Jeowabara bʉra kãga wuabema ẽbẽraba kãgai audre. Jeowaba kãgabʉ bʉra sobiabamarẽã akʉza iyita jʉrʉmarẽã ewari jõmaʉ̃nẽ. Bʉara «bʉ bedʼea zromara jõma jarada» iyara bʉta krĩchabʉ baera (1 Pedro 5:7). Jeowabara ewari jõmaʉ̃nẽ iyi neũdukʼawuarãra kʼarebabʉ, so zarea diabʉ akʉza ãyi bedʼeata ũrĩbʉ (akʉra Salmo 94:18, 19).
3. ¿Jeowabara iyi neũdukʼawuarãra sãwũã bamarẽã kãgabʉ?
Jeowabara ẽbẽra jõmaʉ̃ta kãga, «mamina iyira neũdukʼawua bia ẽbẽrarã kʼẽrẽpabʉmera» (Proverbios 3:32). Jeowabara kãgabʉ iyi neũdukʼawuarabara odamarẽã iyima biabʉta akʉza oda ẽ marẽã iya kãga ẽãta. Ʉ̃kʉrʉ ẽbẽraba krĩchapanʉ, ba be ẽ baita Jeowaba kãgabʉde. Mamina Jeowabara kʼawuabʉ dayirãba sainʉ oseabʉta akʉza akʉbʉ dayirã zarea obʉta iya zokʼabʉ oita (Salmo 147:11; Hechos 10:34, 35).
AUDRE BIʼIA KʼAWUADADRɄ
Audre kʼawuadayi sãwũã Jeowa neũdukʼawua bʼaita akʉza kʼãrẽa Jeowatrʉ neũdukʼawua biata wuabema neũdukʼawuaira.
4. Abrahánʼra Jeowa neũdukʼawuabasi
Daizeze Bedʼeaba Abrahán ʉ̃rʉ jara ũrĩbibʉba, dayirãʼa kʼawuabibʉ kʼãrẽta jarakĩrãbʉta Daizeze neũdukʼawua bʼaira. Akʉra Abrahán ʉ̃rʉ Génesis 12:1-4, mõbe naʉ̃ta panʉidua:
¿Kʼãrẽta jarasi Jeowabara Abrahánʼa?
¿Kʼãrẽ bedʼea biata jarasi Jeowabara Abrahánʼa?
¿Kʼãrẽta osi Abrahánbara Jeowaba iyaʼa bedʼea jarada tẽãra?
5. ¿Jeowabara kʼãrẽta omarẽã kãgabʉ iyi neũdukʼawuaraba?
Jõmaʉ̃ba erbakĩrãbʉ neũdukʼawua biarata.
¿Bʉara bʉ neũdukʼawuara sãwũã bamarẽã kãgabʉ?
Akʉra 1 Juan 5:3, mõbe naʉ̃ta panʉidua:
¿Kʼãrẽta kãgabʉ Jeowaba iyi neũdukʼawuaraba odamarẽã?
Jeowaba zokʼabʉta ũrĩra, daya aña obʉta idubʉibara. Akʉra Isaías 48:17, 18, mõbe naʉ̃ta panʉidua:
¿Kʼãrẽa kãgabʉ Jeowabara iyi neũdukʼawuaraba ãya aña obʉta idubʉdamarẽã?
Neũdukʼawua biabara, dayirã jarabʉ kʼãrẽta oibarata kayirua berabari ẽ marẽã akʉza sãwũã bia wãita. Jeowabida abarika jarabʉ iyi neũdukʼawuara.
6. Jeowabara kʼarebabʉ iyi neũdukʼawuarãra
Jeowabara kʼarebabʉ iyi neũdukʼawuaraba awuantadamarẽã bedʼea zroma zebʉrʉde. Akʉra BIDEOTA, mõbe naʉ̃ta panʉidua:
Naʉ̃ bideodera, ¿Jeowabara sãwũã kʼarebasi naʉ̃ wẽrãra iyi krĩcha mitiadeba akʉza sopʉabʉdeba?
Akʉra Isaías 41:10, 13, mõbe naʉ̃ta panʉidua:
¿Kʼãrẽta oita jarabʉ Jeowaba iyi neũdukʼawuara jõmaʉ̃bari?
Bʉmara, ¿Jeowara neũdukʼawua bia baseabʉka? ¿Kʼãrẽa mawũã krĩchabʉ?
Neũdukʼawuarãra daya nesidabʉde dayi kʼawabʉ. Abarika Jeowasida dayirãba nesidabʉdera dayi kʼawabʉ.
7. Jeowa neũdukʼawua bʼaira ũrĩbara iya jarabʉta akʉza iyiʉ̃me bedʼeaibara
Dayi neũdukʼawuaʉ̃me audre neũdukʼawua bayi ãyibawara bedʼeapanʉbʉrʉ. Akʉra Salmo 86:6, 11, mõbe naʉ̃ta panʉidua:
¿Sãwũã bedʼeaseapanʉ Jeowaʉ̃mera?
¿Jeowara dayirãʉ̃mera sãwũã bedʼeabʉ?
Dayirãra Jeowaʼa bedʼeabʉ yiwidʼipanʉneba, iyisida dayirã bedʼeabʉ Daizeze Bedʼeadeba.
Ʉ̃KɄRɄBA KRĨCHAPANɄTA: «Mia kʼai ẽbẽrata Daizeze neũdukʼawua ba be ẽ».
¿Kʼãrẽ testota le ũrĩbiseabʉ dayirãbara ũdubita Jeowa neũdukʼawua baseabʉta?
KĨRÃBEITA
Jeowara bʉ neũdukʼawua bakĩrãbʉ akʉza iya kʼarebayi bʉa iyita orramarẽã.
Panʉnadrʉ
¿Sãwũã kʼarebabʉ Jeowabara iyi neũdukʼawuara?
¿Kʼãrẽa Jeowabara jarabʉ iyi neũdukʼawuara ãya nãã aña obadata idubʉdamarẽã?
Bʉmara, ¿Jeowaba jʉ̃ãbʉka jõma aripe omarẽã iyi neũdukʼawuarabara? ¿Kʼãrẽa mawũã krĩchabʉ?
JɄRɄDA AUDRE KʼAWUAITA
¿Kʼãrẽ nebiata ũduseabʉ Daizeze neũdukʼawua bʼaibara?
«¿Kʼãrẽa yibia Jeowa ũdukʼawuaira?» (Jarakabʉ, 15de febrerode 2003de)
Kʼawuara sãwũã Daizeze neũdukʼawua bʼaita
Kʼawuara kʼãrẽa wẽrã abaʉba jarabʉta Jeowa neũdukʼawua babʉrʉba iyi bebʉra bia babisita.
Ũrĩra kʼaseapanʉta ʉ̃kʉrʉ warraraba Jeowa ʉ̃rʉ.
¿Kʼãrẽta oibara Jeowa dayirã neũdukʼawua bia bamarẽã? (1:46)