Religion zeri ẽãbara imitia bedʼeabibʉ Daizeze ʉ̃rʉ

Daizezera kãga, mamina religionʼraba Daizeze ʉ̃rʉ jaradiapanʉbʉrʉ, ¿kʼãrẽa nekayiruata mejãcha opanʉ? Religionʼra zeri ẽã baera. Ãya jaradiapanʉneba akʉza opanʉneba imitia bedʼeabibʉ Daizeze ʉ̃rʉ. ¿Sãwũã imitia bedʼeabi zebʉrʉ ãyara? ¿Maʉ̃ kʼareara sãwũã sentibʉba Daizezera? ¿Kʼãrẽta oi iyara maʉ̃ba?

1. ¿Sãwũã religion zeri ẽãba jaradiabʉba imitia bedʼeabibʉ Daizeze ʉ̃rʉ?

«Daizezedʼebemata wãrãnebemane nʉmeãĩkʼadʼe sewadʼebemane nʉmeã» mawũã obʉ religion zeri ẽãba (Romanos 1:25). Bari jaraita, religion zeri ẽã mejãchaʉba ẽbẽra jaradia ẽ saʉ̃ta Daizeze trʉ̃ra, mamina Daizeze Bedʼeabara jarabʉ zokʼamarẽã iyi trʉ̃ra (Romanos 10:13, 14). Religion nokʼorabara jarabʉ zʉbʉria berabaribʉrʉdera Daizezeba mawũã berabarimarẽã kãgabasita. Mamina naʉ̃ra jipa sewida. Nemitia jõma berabaribʉra Daizezedeba ze ẽ (akʉra Santiago 1:13). Naʉ̃ sewa nebʉradeba ẽbẽra mejãchaʉta jĩgabʉ Daizezedeba.

2. ¿Sãwũã religion zeri ẽãba obʉba imitia bedʼeabibʉ Daizeze ʉ̃rʉ?

Religion zeri ẽãbara bia edada ẽ ẽbẽrarã Jeowaba edabʉ kĩrãkʼa. Daizeze Bedʼeaba jarabʉ «ãyi nemitia obʉra ʉ̃tʉ bajãinu jʉ̃ẽbʉ» (Apocalipsis 18:5). Religionʼrãra dããraba politikade eda zebʉrʉta akʉza yõ are panʉ, adewara ẽbẽrata beamarẽã opanʉ akʉza maʉ̃ta bia akʉpanʉ. Ʉ̃kʉrʉ nokʼo religionʼrãra plata mejãcha barabʉ akʉza ãyi kʼaidubemaraʼa plata widibʉ ãyi aduʼa bʼaita. Ãya obʉba ũdubibʉ Daizeze ũdukata, mawũẽra, ¿sãwũã ãyira Daizezeare bedʼeadai nemitiata opanʉbʉrʉ? (akʉra 1 Juan 4:8).

3. ¿Daizezera sãwũã sentibʉ religion zeri ẽãba obʉ akʉbʉdera?

Bʉa kãga ẽ bʉrʉ religion zeri ẽãba obʉta, krĩchara Jeowa sãwũã sentibʉta. Iyara mejãcha kãga ẽbẽrarã mamina mejãcha kĩrʉbʉ nokʼora religionʼrabawara, ãya obʉdeba imitia bedʼeabibʉ baera Daizeze ʉ̃rʉ akʉza bia edada ẽ baera ãyi kʼaidupanʉta. Daizezeba jarabʉ religion zeri ẽãra jõma makenaita akʉza «wuara ũdudakabayi maʉ̃ra» (Apocalipsis 18:21). Aranʉ jõma makenañi religion zeri ẽãrãra (Apocalipsis 18:8).

AUDRE BIʼIA KʼAWUADADRɄ

4. Jeowabara religion jõma bia akʉ ẽ

Mejãchaʉba krĩchapanʉ, bʉa badu religion jidabʉrʉba Daizezema edebʉta. Mamina, ¿maʉ̃ra wãrĩnuka? Akʉra Mateo 7:13, 14, mõbe naʉ̃ta panʉidua:

• Daizeze Bedʼeaba jarabʉdera, ¿bʉta ewari jõmaʉ̃nẽ bakĩrãbʉbʉrʉ saʉ̃ ode wãibara?

Akʉra BIDEOTA, mõbe naʉ̃ta panʉidua:

BIDEO: ¿Jõma religionʼra Daizezebara bia akʉbʉka? (wiña ũdubibʉ) (3:22)

• ¿Daizeze Bedʼeabara jarabʉka Daizezebara religionʼra mejãchaʉta bia akʉbʉta?

5. Religion zeri ẽãbara Daizeze kãgata ũdubida ẽ

Religionʼra mejãchaʉba Daizeze ʉ̃rʉ imitia bedʼeabibʉ, ¿sãwũã? Yõta kʼarebabʉde. Yiza aba kʼawuadaita, Akʉra BIDEOTA. Mõbe naʉ̃ta panʉidua:

BIDEO: Religionʼraba odata yõ zroma ũme berabariside (2:22)

• ¿Yõ zroma ũme berabarisidera religionʼra mejãchaʉta kʼai are panasi?

• ¿Bʉara sãwũã krĩchabʉ ãya oda ʉ̃rʉra?

Akʉra Juan 13:34, 35 akʉza 17:16. Mõbe naʉ̃ta panʉidua:

• ¿Jeowara sãwũã sentibʉba religionʼrata yõne edapanʉ kʼarea?

• Religion zeri ẽãrabara nemitiata ozebʉda akʉza Daizeze kãgata ũdubida ẽ. ¿Bʉara kʼãrẽta ũdubari religionʼraba obʉta ũdubita naʉ̃ra wãrĩnuta?

6. Daizezebara ẽbẽrarãra religion zeri ẽãneba ẽdrʉbikĩrãbʉ

Akʉra Apocalipsis 18:4,a mõbe naʉ̃ta panʉidua:

• Daizezebara ẽbẽrarãra religion zeri ẽãba sewabʉdeba ẽdrʉbikĩrãbʉ. ¿Bʉara sãwũã krĩchabʉ?

7. Audre ũdukʼawuara Daizezearata

Religion zeri ẽãba mitiata opanʉ kʼarea, ¿bʉara Daizezera bia akʉ ẽ baibaraka? Krĩchara warra abaʉba yi zeze ũrãgʼa biata ũrĩ ẽ badata, iyira wãñi dedaʉba mama mejãcha zʉbʉria berabariyi. ¿Maʉ̃ kʼãrẽa krĩchaika iyi zʉbʉriadara yi zezeba onʉmʉta?

• ¿Religion zeri ẽãba nemitia obʉra Daizezeba zokʼabʉka mawũã omarẽã? ¿Mawũã ãya mitia obʉ kʼarea iduaribibaraka Daizeze ʉ̃rʉ audre kʼawuaita?

KĨRÃBEITA

Religion zeri ẽãbara Daizeze trʉ̃ ʉ̃rʉ imitia bedʼeabibʉ ãya jaradiabʉdeba akʉza obʉdeba. Maʉ̃ kʼarea Jeowabara makenañi.

Panʉnadrʉ

• ¿Kʼãrẽta krĩchabʉ bʉara religionʼraba jaradiabʉta akʉza obʉ ʉ̃rʉra?

• ¿Kʼãrẽta krĩchabʉ Jeowabara religion zeri ẽã ʉ̃rʉra?

• ¿Kʼãrẽta oi Daizezebara religion zeri ẽãra?

JɄRɄDA AUDRE KʼAWUAITA

Daizezebara religionʼra mejãchaʉta kãga ẽ naʉ̃ bedʼea ũme kʼarea, akʉra saʉ̃ta.

«¿Badu religionba Daizeze kʼawa babiseabʉka?» (Artikulo jw.org)

¿Kʼãrẽa Jeowabara kãgabʉ ẽbẽra ãba zeda kʼãrãpe iyaʼa yiwidʼidamarẽã?

«¿Nesidapanʉka religion erbaita?» (Artikulo jw.org)

Saserdote abaʉba iyi religionba mitia obʉta ũdu wãsimina, jʉrʉsi wãrĩnuta Daizeze ʉ̃rʉ.

«Saserdote abaʉta iyi religioneba ãĩ wãsi» (¡Despertad!, febrerode 2015de)

Dããraba religionʼraba sewa nebʉrata jara zebʉrʉta Daizeze ʉ̃rʉ akʉza ẽbẽra ĩjãbibʉta Daizezera kayiruata akʉza ẽbẽra kãga ẽãta. Akʉdaya samaʉ̃ba zesita sewa nebʉra ũbea.

«Sewa nebʉrabara Daizezedeba jĩgababibʉ» (Jarakabʉ, 1ne noviembrede 2013de)