YI 40
¿Kʼãrẽta oseapanʉ Jeowaba dayirãta jaigʉa ẽã akʉmarẽã?
Krĩchara yi papaba yi wũãwũã kolegio eda wãmarẽã bia akʉbʉta akʉza jaigʉa ẽã bʉta. Maʉ̃ba ũdubibʉ yibarirabara iyira kʼãrẽãba krĩchabʉta. Abarika dayirã Zeze Jeowabida kãgabʉ dayirã bʉmae jaigʉa ẽã bamarẽã akʉza dayirã krĩchasida. Mawũã jaigʉa ẽãbʉba kʼarebabʉ dayirãra bia baita akʉza Jeowa trʉ̃ ʉ̃rʉ ibia bedʼeabiseabʉ.
1. ¿Sãwũã dayirãba nekʼãrẽ erbʉ jaigʉa ẽã erbaira?
Jeowaba jarabʉ dayirãra: «Neneẽã panaibara» (1 Pedro 1:16). Dayirã jaigʉa ẽã baira kʉibarata, dayi wua sʉgʉibarata, dera ara oibarata akʉza dayirãba nekʼãrẽ jõma erbʉta jaigʉa ẽã erbaibarata. Dayirãta mawũã jaigʉa ẽãbʉbʉrʉ, wuabemara Jeowa ʉ̃rʉ ibia bedʼeabiyi (2 Corintios 6:3, 4).
2. ¿Kʼãrẽta oda ẽ baibara jaigʉa ẽã baira?
Daizeze Bedʼeaba jarabʉ: «Dayi kakuata neneẽã erbaibara akʉza dayi krĩchara kayirua neẽã erbaibara» (2 Corintios 7:1). Maʉ̃ kʼarea dayi kakuata akʉza dayi krĩcha ãrĩbibʉta opanʉ ẽ. Dayirãba kãgapanʉ baera Jeowa sobia bamarẽã dayi krĩchapanʉneba, zarea opanʉ nekayirua ʉ̃rʉ krĩcha ẽ baita (Salmo 104:34). Adewara bedʼeapanʉne imitia bedʼeada ẽ akʉza ijaramia kayiruata oda ẽ (akʉra Colosenses 3:8).
¿Kʼãrẽba Jeowabara dayirãra jaigʉa ũduseabʉ? Dayirãba sigarriyo dobʉbʉrʉ akʉza chirua kayirua bʉratʉmata dobʉbʉrʉ, Jeowabara dayirãra jaigʉa ũduyi, maʉ̃ba okĩrãpanʉ ẽ. Maʉ̃ta oda ẽ bʉrʉ, dayirã bebʉta wãrĩnu kãgabʉta ũdubipanʉ akʉza mawũã kaya ẽ bayi. Jeowaba bia akʉmarẽã, dayi kakua tãpanʉ ẽ (masturbarse) akʉza ẽbẽra ãkadabe ãyiʉ̃me kʼãĩkĩrãita akʉpanʉ ẽ (Salmo 119:37; Efesios 5:5). Maʉ̃ iduaribita zareamina Jeowaba kʼarebakĩrãbʉ (akʉra Isaías 41:13).
AUDRE BIʼIA KʼAWUADADRɄ
Akʉdaya sãwũã dayirã ne jaigʉa ẽã erbaiba Jeowa ʉ̃rʉ ibia bedʼeabibʉ akʉza sãwũã nemitia iduaribiseabʉ.
3. Jaigʉa ẽã baideba Jeowa ʉ̃rʉ ibia bedʼeabibʉ
Jeowa jaradadeba Israel pʉwʉrʉʼa ũdubibʉ iya kʼãrẽta krĩchabʉta jaigʉa ẽã bai ʉ̃rʉ. Akʉra Éxodo 19:10 akʉza 30:17-19, mõbe naʉ̃ta panʉidua:
Naʉ̃ testoba jarabʉdebara, ¿kʼãrẽta ũdubibʉ Jeowaba krĩchabʉta jaigʉa ẽã bai ʉ̃rʉ?
¿Kʼãrẽ oiba ewari jõmaʉ̃nẽ kʼarebaseabʉ dayi jaigʉa ẽ baita?
Jaigʉa ẽ baita zarea oibara. Jaigʉa ẽã baseabʉ plata erbʉmina akʉza plata neẽ mina. Akʉra BIDEOTA, mõbe naʉ̃ta panʉidua:
Dayirãba nekʼãrẽ erbʉmae jaigʉa ẽã erpanʉbʉrʉ ẽbẽrarãba akʉbʉ nãã, ¿maʉ̃ba kʼarebaika ãyira Jeowa wawiadamarẽã? ¿Kʼãrẽã?
4. Nekayiruata wua orara
Jeowaba kʼarebaseabʉ nekʼãrẽ badu nemitia obʉ idubʉita.
Bʉa nekʼãrẽ sigarriyodebemata dobʉbʉrʉ bʉa kʼawuabʉ maʉ̃ iduaribira jipa zarea baita. Bʉa krĩchara maʉ̃ obʉdeba bʉ kʼãrẽ berabarinʉmʉta maʉ̃ba kʼarebaseabʉ maʉ̃ iduaribita. Akʉra Mateo 22:37-39, mõbe bedʼeaidua sãwũã chirua kayirua bʉratʉma dobʉrʉde:
Jeowadeba jĩga babisebʉta.
bʉ mebẽrãra adewara ẽbẽra bʉme panʉrãra kayababiseabʉta.
Krĩchara kʼãrẽta oseabʉta bʉa nekʼayirua obʉra wua oẽ baita.a Akʉra BIDEOTA.
Akʉra Filipenses 4:13, mõbe naʉ̃ta panʉidua:
Bʉmara, Daizeze Bedʼea akʉiba, yiwidiba akʉza ãba yi jʉrebarimae wãiba, ¿kʼarebaseabʉka bʉa nekayirua obʉ idubʉita? ¿Kʼãrẽa mawũã jarabʉ bʉara?
5. Zarea ora nekayirua oẽ baita akʉza maʉ̃ ʉ̃rʉ krĩcha ẽ baita
Akʉra Colosenses 3:5, mõbe naʉ̃ta panʉidua:
Ẽbẽra ãkadabe akʉita ãyiʉ̃me kʼãĩkĩrãita, dayi kakua tãita akʉza mensajedeba poto zokʼaita ẽbẽra ãkadabe akʉmarẽã, ¿sãwũã kʼawuapanʉ Jeowabara mitia akʉbʉta?
¿Bigachuka daya Jeowa widita dayi krĩcha jaigʉa ẽã baita? ¿Kʼãrẽa?
Akʉra sãwũã krĩcha kayirua krĩcha ẽ baita. Akʉra BIDEOTA.
Jesubara yizata jarasi ũdubita dayirãta jaigʉa ẽã bakĩrãpanʉbʉrʉ, nekʼãrẽ oibarata. Akʉra Mateo 5:29, 30, mõbe naʉ̃ta panʉidua:
Jesubara maʉ̃ba jarakĩrãku ẽ basi dayikʉza mãrĩbarata awuarabʉrʉ jarakĩrãbasi zarea oibarata nekayirua oẽ baita. ¿Kʼãrẽta oibara nekayirua krĩcha ẽ baita?b
Bʉta zarea obʉbʉrʉ wua nekayirua oẽ baita Jeowabara akʉbʉ bʉa obʉra. Akʉra Salmo 103:13, 14, mõbe naʉ̃ta panʉidua:
Nemitia obʉbʉrʉ, ¿naʉ̃ bersikuloraba kʼarebaseabʉka wua nekayirua oẽ baita? ¿Kʼãrẽa?
Mapaerãra dayi baebʉrʉba taʉdogo ẽ
Daya nekayirua nãã obada obʉrʉde krĩchaseabʉ dayirã zeri ẽãta. Krĩchara naʉ̃ta, ẽbẽra aba wẽbanʉmʉne tenẽdrʉyi, maʉ̃ba jarakĩrãkʉ ẽ iyira jẽda jĩrʉneba wẽbaibarata. Maʉ̃ta abarikʼabʉ, kayiruata jẽda odara, maʉ̃ba jarakĩrãkʉ ẽ bʉa nekʼãrẽ jõma ozebʉrʉra zeri ẽãta, Jeowa kʼarebadeba wua nekayirua oẽ bayi.
Ʉ̃KɄRɄBA KRĨCHAPANɄTA: «Mʉ̃a dããraba baera obʉta, maʉ̃ta idubʉ be ẽ».
¿Kʼãrẽ testota ũdubiseabʉ maʉ̃ ẽbẽraʼa maʉ̃ nekayiruara idubʉseabʉta Jeowa kʼarebadeba?
KĨRÃBEITA
Dayi kakuata akʉza dayi krĩchata jaigʉa ẽã erbʉbʉrʉ, Jeowata sobiabiyi.
Panʉnadrʉ
¿Kʼãrẽa yibia jaigʉa ẽã baira?
¿Kʼãrẽta oibara dayi kakua jaigʉa ẽã erbaita?
¿Kʼãrẽta oibara jaigʉa ẽã erbaita daya krĩchabʉta akʉza daya obʉta?
JɄRɄDA AUDRE KʼAWUAITA
Dayirã nekʼarẽ mejãcha neẽ mina, ¿kʼãrẽta oseabʉ jaigʉa ẽ baita?
Akʉra bʉta kʼãrẽba kʼarebaseabʉta sigarriyo do ẽ baita.
Ẽbẽrarã ãkadabe akʉbʉba maʉ̃me kʼãĩta krĩchaiba akʉra kʼãrẽta berabariseabʉta.
«Ẽbẽra ãkadabe akʉita ãyiʉ̃me mia erkʼãĩkĩrãita, ¿kayirua ẽka?» (Jarakabʉ, 1ne agostode 2013de)
Akʉra kʼãrẽta osita yumakẽrã aba ẽbẽra ãkadabe ãyiʉ̃me kʼãĩ krĩchai idubʉita.
a «Sãwũã wua sigarriyo do ẽ baita» maʉ̃ra kʼarebayi sãwũã sigarriyo idubʉita, naʉ̃ra jʉrʉseabʉ «Jʉrʉda audre kʼawuaita» abʉmae.
b Kʼawuakĩrãbʉbʉrʉ kʼãrẽta oseabʉta bʉyikʉza wua tã ẽ baita, akʉra «¿Mʉ̃yikʉza tãbʉta idubʉseabʉka?» librode (Lo que los jóvenes preguntan. Respuestas prácticas [volumen 1], capítulo 25).