¿Kʼãrẽta kʼawuaseapanʉ Jesuba miõba okata oũdubidadebara?

DAIZEZE Bedʼeaba Jesu naʉ̃ drʉade kʼãrẽ obada ʉ̃rʉ jarabʉrʉdera zokʼa ẽ basi bedʼea «milagro». Bedʼea griega dyʹna·mis edaʉde tradusipanʉ «milagro» (miõba okata), maʉ̃ bedʼeabara jarakĩrãbʉ zarea (Lucas 8:46), oseabʉta akʉza zareabarabʉta (Mateo 11:20; 25:15). Yumakẽrã maʉ̃ ʉ̃rʉ mejãcha kauchuba jarabʉ maʉ̃ bedʼea milagroba «ũdubibʉ kʼãrẽ obʉta akʉza nekʼãrẽneba maʉ̃ opanʉta, maʉ̃ miõba okara ũdubibʉ Daizeze zareata».

Bʉ awuru bedʼea griegata maʉ̃ bedʼeara teʹras. Maʉ̃ bedʼeara tradusipanʉ «nekʼãrẽ ũdudakata» (Juan 4:48; Hechos 2:19). Naʉ̃ bedʼeaba ũdubibʉ ẽbẽrarãra sãwũã sentipanʉta maʉ̃ miõba oka ũdubʉrʉde. Ẽbẽrarãba akʉza Jesu kʼaidupananaraba, Jesuba nekʼãrẽ miõba oka obasidera ãyira kĩrãmigapanasi (Marcos 2:12; 4:41; 6:51; Lucas 9:43).

Awuru bedʼea griego bedʼeadera naʉ̃ta iyi: se·meiʹon (señal) Maʉ̃ bedʼeara zokʼasi jaraita Jesuba miõba oka oda ʉ̃rʉ. Yumakẽrã Robert Deffinbaughʼba jarabʉ: «Maʉ̃ bedʼeara yibia ũdubibʉ baera kʼãrẽa yibiata maʉ̃ milagrora (miõba okata). Maʉ̃ miõba okaba ũdubibʉ wãrĩnuta Jesu ʉ̃rʉ».

¿Maʉ̃ra osidaka ẽbẽrarã sewaita mawũã ẽ bʉrʉ Daizeze zareadeba?

Daizeze Bedʼeadera ũdubibʉ Jesuba nekʼãrẽ miõba oka odara Daizeze zareadeba obasita. Mawũã oẽ basi ẽbẽrarã sewaita akʉza ẽbẽrarã aña krĩchabita. Yiza aba ũdubibʉ sãwũã Jesuba zokʼasita Daizeze zareata, iya ẽbẽra wawabada bia oside (Lucas 9:37-43). Daizezera zareabarabʉ baera iyitara zare ẽ miõba oka oira akʉza «iyira mejãcha zarea erbʉ» (Isaías 40:26). Iyara jõma oseabʉ.

Ebangelioraba jarabʉ Jesubara miõba okara oũdubisita 35, mamina wãrĩnu bʼaira bia kʼawua ẽ sõbe oũdubidara. Mateo 14:14​de jarabʉ: «Jesús jãbadʼeba udʼubʼaebʉrʉdʼe kʼabanata ũdui ãzhi sozuburiape bʼebikuasia ãzhidʼebema kʼaya bʼeta». Mamina naʉ̃ testodera jara ẽ ẽbẽrarã kʼãrẽaba bebikʉadata.

Maʉ̃ra miõba oka odadeba Jesubara ũdubisi iyira wãrĩnu Daizeze Warrata akʉza Dayirã ẽdrʉbibarita, Daizeze Bedʼeaba jarabʉ Jesubara maʉ̃ra jõma ũdubisita Daizeze zareadeba. Apostol Pedroba, naʉ̃ta jarasi «Daizezebara izhidʼeba nʉmʉta kʼawuabibʉrʉta marãne edʼa ũdudʼakʼata bio osia izhidʼeba, maʉ̃ marãbara kʼawua bʼea» (Hechos 2:22). Adewara Pedrobida Jesu ʉ̃rʉ maʉ̃ta jarasi: «Sãwũã jidasita iyi jaure zareadeba akʉza zareata diasita [Jesu], adewara iyira naʉ̃ drʉade nebia owãsita bebikʉabʉde Diaruba zʉbʉriabibʉrata, Daizezeta iyiʉ̃mebasi baera» (Hechos 10:37, 38).

Jesuba miõba oka oũdubidata jaradiaiʉ̃mera ãbabasi. Marcos 1:21-27 bayeda ũdubibʉ ẽbẽrarã sãwũãbasita Jesuba kʼãrẽ jaradiabadadeba akʉza iya miõba oka oũdubibadadeba. Wikakiru 22ba ũdubibʉ ẽbẽrarãra kĩrãmigasidata Jesuba bia jaradiasi baera akʉza wikakiru 27ba ũdubibʉ ãyira kĩrãmigasidata Jesuba ẽbẽra wawabada bia oside. Jesuba miõba oka oũdubidaba akʉza iya sãwũã jaradiadaba ũdubisi Jesura wãrĩnu Dayirã ẽdrʉbibarita.

Jesubara bari jara ẽ basi iyira Dayirã ẽdrʉbibarita, awuarabʉrʉ wãrĩnu ũdubisi iya odadeba akʉza jaradadeba, adewara iya miõba oka oũdubidadeba ũdubisi Jeowa zareata. Ẽbẽrarãba jaraside Jesuba zokʼabe ẽãta akʉza kʼãrẽ oi neẽãra, iya jarasi: «Mʉ̃a obʉra audre yi zroma Juanba obʉira, mʉ̃a obʉra mʉ̃ Zezeba omarẽã zokʼada, maʉ̃ba ũdubibʉ mʉ̃ra iya zokʼasita» (Juan 5:36).

¿Kʼãrẽba ũdubibʉ maʉ̃ra wãrĩnubasita?

¿Kʼãrẽba ũdubibʉ Jesuba miõba oka odara wãrĩnubasita? Maʉ̃ ʉ̃rʉ akʉdaya.

Jesuba miõba oka osidera oẽbasi wuabemaraba iyita bia akʉdamarẽã, iya maʉ̃ obasidera zarea osi ẽbẽrarãba kʼawuadamarẽã maʉ̃ra Daizezedeba zebasita. Jesuba ẽbẽra dauberreabʉ jẽda ũdubi nãã, iya jarasi naʉ̃ra iyara obasita «ũdudamarẽã Daizezeba kʼãrẽ oseabʉta» (Juan 9:1-3; 11:1-4).

Jaibanaraba ẽbẽra bebita nekʼãrẽ mejãcha zokʼabʉ akʉza nekʼãrẽ mejãcha widibʉ, adewara ʉ̃kʉrʉba magiata obʉ. Mamina Jesubara maʉ̃ra mawũã oẽbasi akʉza zokʼa ẽ basi nekʼãrẽ omata mawũã ẽbẽrarã bebita. Jesuba sainʉ oita kʼawuabasi baera ẽbẽrarã dauberreabʉ ũme bebiside, naʉ̃ta jarasi: «Mawũãnaĩ Jesúsbara sozuburiape dabʉ tõbʼarikuasia, maʉ̃ daucha ne ũdusidʼa, mawũẽ jʉ̃drʉsidʼa kʼaidʼu» (Mateo 20:29-34). Iya nekʼãrẽ mejãcha oẽbasi, maʉ̃ra ẽbẽrarã bebita. Iya miõba oka oũdubibaside akʉza maʉ̃ra yumakẽrã bia oside jõmaʉ̃ra dabʉ nãã obasi. Nekʼãrẽ awuara zokʼa ẽ basi mia ũnata, mia barrata, mia nekʼãrẽ omata. Idi ewade ẽbẽrarã miõba oka apanʉrabara jarauda ẽ kʼãrẽa maʉ̃ta obʉta (Marcos 5:24-29; Lucas 7:11-15).

Jesubara ẽbẽrarãra bebikʉasi ãya soiduba ĩjãbasi baera, mawũãsidu ʉ̃kʉrʉ ẽbẽrarãba iyi soiduba ĩjã ẽ basimina maʉ̃rasida abarika bebisi. Iyi Capernaum pʉwʉrʉde basieda ẽbẽrarãba «Jesúsma bio wesidʼa jai abʼeta. Mawũẽ bedʼeama abʼaʉba jaira ãĩ jʉrekuasia, jõma bʼebikuasia kʼayarãsidʼa» (Mateo 8:16).

Jesuba maʉ̃ miõba oka oũdubisidera bari oẽbasi ẽbẽrarãba akʉmarẽã awuarabʉrʉ osi ẽbẽrarã wãrĩnu kʼarebaita (Marcos 10:46-52; Lucas 23:8). Akʉza iyara maʉ̃ra oẽ basi mawũã nebia ũduita (Mateo 4:2-4; 10:8).

¿Kʼãrẽta kʼawuaseapanʉ ebangeliorane nebʉra jarabʉ ʉ̃rʉra?

Jesuba miõba oka oũdubidara wãrĩnu kʼawuapanʉ eda ebangeliora kimarebʉba jaradaba. ¿Bʉka kʼarea wãrĩnu ĩjãira? Bʉ wãrĩnu kʼãrẽa ĩjãira.

Jesuba miõba oka oũdubisidera osi ẽbẽrarã mejãchabʉra nãã, maʉ̃ranebema ʉ̃kʉrʉta, ebangeliora bʉsidera wabida zokʼaipanasi. The Miracles and the Resurrection (Los milagros y la resurrección) libroba naʉ̃ta jarasi ẽbẽrarã ebangeliora bʉda ʉ̃rʉ: «Yibia ẽ jãraita ebangeliora bʉdabara aukʼara bʉsidata miõba oka oda ʉ̃rʉ, mawũã ãya jara ẽ baita wãrĩnu berabaridata akʉza mawũã mejãcha bedʼeaita religionʼrabʉ ʉ̃rʉ, ãya bia jʉrʉsi baera mawũã wãrĩnu bʉita».

Ẽbẽrarã judiora Jesu jʉrabadaraba akʉza iyi bedʼea ũrĩkĩrã ẽã badabara jipa jarakabasi Jesuba oda miõba okara berabari ẽ basita, ãyira wãrĩnu bʼaira bedʼeasi kʼaiba diasita Jesuʼara maʉ̃ zareara miõba oka oi ʉ̃rʉra (Marcos 3:22-26). Akʉza Jesu beida tẽã iyi nejʉrarabara jara ẽ basi, Jesuba miõba oka oda ʉ̃rʉra oẽbasita, awuarabʉrʉ iyi beida tẽã ẽbẽrarãra bedʼeasi iya miõba oka oda ʉ̃rʉ. Naʉ̃ba wãrĩnu ũdubibʉ Jesuba miõba oka odara, eda ebangeliorane bʉdapeadara wãrĩnu berabarisita, maʉ̃ kʼarea maʉ̃ne ĩjãseapanʉ.

¿Kʼãrẽ nebiata kʼawuaseapanʉ Jesu ʉ̃rʉ iya miõba oka odadeba?

Jesuba miõba oka oda ʉ̃rʉ krĩchabʉrʉdera krĩcha ẽ baibara bari iya sãwũã osita akʉza kʼãrẽa osita, awuarabʉrʉ krĩchaibara kʼãrẽta sentibasita iya maʉ̃ra okʉaside sãwũã ẽbẽrarãta so zʉbʉria akʉsita akʉza sãwũã ẽbẽra ʉ̃rʉ krĩchasita.

Atia akʉdaya aidaba kayabʉba kʼãrẽta jarasita Jesuʼa: «Bʉa krĩñabʉrʉ mʉrã nene ẽã bʼebirua», aramaʉ̃ta Jesubara soborekea akʉsi mõbe tõbari kʼãrãpe, naʉ̃ta jarasi: «Mʉ̃ara kãgabʉ. Neneẽã bara». Aramaʉ̃ta maʉ̃ yumakẽrãra jẽda biasi (Marcos 1:40-42). Naʉ̃ nebʉraba ũdubibʉ Jesubara miõba okara oũdubisita, wuabemarata wãrĩnu krĩchabasi baera.

Iyi ewari aba Naínʼena wãne ũdusi ẽbẽra aba joueda ededata, maʉ̃ra pẽdra wũãwũãta abapaibasi, Jesuba maʉ̃ ũdui soborekea akʉ kʼãrãpe maʉ̃ yuwẽrãʼa jarasi: «Jẽgarãrũã». Maʉ̃ tẽã jẽda piradrʉbisi maʉ̃ pẽdra wũãwũãta (Lucas 7:11-15).

Jesuba miõba oka oũdubidadeba kʼawuapanʉ iyara soborekea akʉbasita akʉza ẽbẽrarãra kʼarebakĩrãbasita. Mamina Jesuba miõba oka odara bari nebʉra ẽ. Hebreos 13:8ba jarabʉ: «Jesura nʉweda, idi akʉza ewari jõmaʉ̃nẽ iyabaʉbayi». Atiara Jesura ʉ̃tʉra Nokʼo, iyara miõba okata oũdubiyi naʉ̃ drʉade iya nãã obadaira. Aranʉ bʼai zokʼayi Jeowaba zarea diadata, mawũã Jeowaʉ̃me ẽbẽrarã kʼẽrẽpapanʉra bebikʉaita. Dai Jeowa ʉ̃rʉ Kʼawuabipanʉrãbara jaradiakĩrã jaradiapanʉ ʉ̃ra zeide kʼãrẽ berabarita.

[Poto]

Jesuba miõba oka oũdubidadeba ũdubisi Jeowa zareata

[Poto]

Jesubara ẽbẽrarãra mejãcha kãgabasi