¿Kʼãrẽa Jesu trʉ̃ne yiwidʼibara?
JESUBA jaradiabasidera jaradiabasi sãwũã yiwidʼibara ʉ̃rʉ. Jesu ewari basidera religion nokʼorãra ode yiwidʼibasi wuabemara ẽbẽrarãba ũdudamarẽã. Ãya kãgabasi baera wuabemara ẽbẽrarãba jipa kʼẽrẽpabʉta ũdudamarẽã. Iyabaʉ bedʼeata jarabasi dããra dayima nesidabʉ kĩrãkʼa, iyabaʉ bedʼeata dããra jaraita Daizezeba ũrĩmarẽã (Mateo 6:5-8). Jesuba jaradiasi maʉ̃ra yibia ẽãta, maʉ̃ba kʼarebasi ẽbẽrarãba kʼawuadamarẽã yiwidʼibʉrʉde kʼãrẽta oẽ baibarata.
Jesubara bari jara ũrĩbi ẽ basi sãwũã yiwidʼibarata. Jesuba jaradiasi dayi yiwidʼibʉrʉdera widibarata Daizeze trʉ̃ neneẽã bamarẽã, zemarẽã iyi Nokʼota akʉza iya kãgabʉta omarẽã. Adewara jaradiasi dayirãba kʼarebata nesidabʉbʉrʉ Daizezeʼa widimarẽã (Mateo 6:9-13; Lucas 11:2-4). Zokʼasi yizara dayirã jaradiaita widida ʉ̃rʉ widimarẽã ĩjã erbaita, eda krĩcha bʼaita, mawũã Jeowaba dayirã yiwidʼibʉta ũrĩmarẽã (Lucas 11:5-13; 18:1-14). Iya odadeba ũdubisi iya jaradara wãrĩnuta (Mateo 14:23; Marcos 1:35).
Wãrĩnu Jesuba mawũã ũrãgʼa diadadeba iyi kʼaidupanʉrata kʼarebasi, ãyi yiwidʼira audre bia oita. Jesubara diamasi iyi bei nãã, nekʼãrẽ audre yibiata jaradiasi sãwũã yiwidʼi ʉ̃rʉ.
Jipade sãwũã awuara yiwidʼibarabasita
Jesubara maʉ̃ diamasira iyi kʼaidupanʉrata so zarea diasi. Maʉ̃ ewaridebasidebʉrʉ, yibiabasi baera maʉ̃ bedʼea yiwidʼi jaraita. Iya jarasi: «Mʉ̃ yi ora, yi wãrĩnura akʉza yi bebʉra. Mia abaʉta Zezeidʉ jʉ̃ẽbe ẽ mʉ̃neba oda ẽ bʉrʉ». Akʉza tẽã naʉ̃ta jarasi: «Jõma kʼãrẽ mʉ Zezea widʼibʉdata mʉneba widʼibʉdara mʉã aribʼaeya, aramaʉ̃ne mʉ Zezeta zhi zromata ũdukʼawadʼamarẽã mʉ zhi Warradʼeba». Naʉ̃ bedʼea jõbita iya jarasi: «Wadʼi marãbara mʉnebara kʼãrẽ widʼidʼa ẽã. Kʼãrẽ widʼiudua, mobedʼeba jidadʼaya, aramaʉ̃ne marã jipadʼe sobia bʼeaya» (Juan 14:6, 13, 14; 16:24).
Maʉ̃ bedʼea jaradara yibiabasi. Disionario abaʉba naʉ̃ta jarasi: «Jipade sãwũã awuara yiwidʼibarabasita». Jesubara maʉ̃ba jarakĩrãkʉa ẽ basi iyabʉrʉ yiwidʼidaita, awuarabʉrʉ jarakĩrãbasi iyideba yiwidʼidaita.
Mamina Daizezebara ewari jõmaʉ̃nẽ ũrĩbʉ iyi ode kʼẽrẽpapanʉra yiwidʼira (1 Samuel 1:9-19; Salmo 65:2). Ẽbẽra abaʉba Daizezeba iyi yiwidʼita ũrĩmarẽã kãgabasibʉrʉ, ĩjãibarabasi Daizezeba Israel pʉwʉrʉra jidadata. Tẽã Salomón ewaribaside ẽbẽrarãbara ĩjãibarabasi Daizezeba jidasita templora, mama sakripisiota odamarẽã (Deuteronomio 9:29; 2 Crónicas 6:32, 33). Israelitarãra ewari jõmaʉ̃nẽ yiwidʼi ẽ baibasi Daizezeʼa nãã yiwidʼibada kĩrãkʼa. Pabloba jarasi sakripisio diabʉta akʉza ley diabʉra ũdubisita Daizezeba nebia diaita, mamina bia ũdubi ẽ basi wãrĩnu kʼãrẽ diaita (Hebreos 10:1, 2). Leyba kʼãrẽ diadaba jaraibarabasi kʼãrẽ wãrĩnuta berabarita (Colosenses 2:17). Maʉ̃ kʼarea poaga 33 dayirã ewarideba ʉ̃ta, nesida ẽ basi Moisésba ley jarada oita, mawũã Jeowa kʼawa bʼaita, awuarabʉrʉ Jesuba jaradatrʉ ũrĩbarabasi leybara iyi ʉ̃rʉ jarabasi baera (Juan 15:14-16; Gálatas 3:24, 25).
Trʉ̃ aba audre yi zroma wuabemara trʉ̃ira
Jesuba nekʼãrẽta osi mawũã dayirãta Jeowa kʼawa bamarẽã. Iya yizata aba jarasi iyira neũdukʼawua bia kĩrãkʼabʉta o ewabʉde, mawũã Daizezeba dayirã yiwidʼita panʉmarẽã. ¿Kʼãrẽa Jesubara mawũã kʼarebaseabʉ?
Dayirã jõmaʉ̃ta nekayirua omia baera, dayirãkʉzaʉbara obe ẽ maʉ̃ nekayirua ãĩ bʉeira akʉza mawũã Jeowa kʼawa bʼaita, Daizezera neneẽãbʉ baera (Romanos 3:20, 24; Hebreos 1:3, 4). Jesura ẽbẽrarã bari beisi baera osi ẽbẽrarã nekayiruata ãĩ bʉeita (Romanos 5:12, 18, 19). Ẽbẽrarã aba Jeowa nãã jaigʉa ẽã baseabʉ akʉza Jeowa kʼawa baseabʉ wãrĩnu ĩjãta ũdubibʉbʉrʉ Jesu beida ʉ̃rʉ. Adewara iyi trʉ̃ne yiwidʼibʉbʉrʉ (Efesios 3:11, 12).
Dayirã Jesu trʉ̃neba yiwidʼibʉrʉdera ĩjãta ũdubibʉ nekʼãrẽ ũbeade: (1) Jesuta dayirãbari beisi baera Jeowaba kĩrãduabʉ dayirã nekayiruata. (2) Jeowaba iyita jẽda piradrʉbisi baera iyira dayirã sumo saserdote, maʉ̃ kʼarea kʼarebaseabʉ dayirã kayiruata kĩrãduamarẽã. (3) Iyira o kĩrãkʼabʉ mawũã iyideba Jeowata orraseabʉ baera (Juan 1:29; 14:6; Hebreos 4:14, 15).
Jesu trʉ̃neba yiwidʼibʉde ũdubipanʉ Jesuʼa wawiata. Maʉ̃ oira yibia, Jeowaba kãgabʉ baera «Jesu trʉ̃neba jõmaʉ̃ta sãkokode bʼaita [...] akʉza jõmaʉ̃ba kĩrãkita kʼawuadamarẽã Jesukristo dayirã Nokʼota, mawũã Daizeze ʉ̃rʉ ibia bedʼeabita» (Filipenses 2:10, 11). Jesu trʉ̃neba yiwidʼibʉrʉdera ũdubibʉ Jeowara audre yi zromata iya diasi baera iyi warrata dayirãbari (Juan 3:16).
Yiwidʼibʉrʉdera ʉ̃rʉ bʼaibʉrʉ yiwidʼi ẽ baibara, awuarabʉrʉ soiduba obaibara
Daizeze Bedʼeabara Jesu trʉ̃ra kĩrãtana diabʉ, mawũã ũdubita Jesura kʼãrẽaba yibiata. Daizeze Bedʼeaba maʉ̃ trʉ̃ bio diabʉba kʼarebabʉ kʼawuaita iya kʼãrẽ ozebʉrʉta, kʼãrẽ obʉta akʉza kʼãrẽ oita dayirã kʼarea (akʉra rekuadrota «Jesu kʼãrẽ trajo yibia obʉta»). Wãrĩnu Jeowabara Jesuʼa diasi zareata, mawũã iya zokʼamarẽã ʉ̃tʉ akʉza naʉ̃ drʉade (Filipenses 2:9; Mateo 28:18).a
Oi baera oibara ẽ
Kʼawuasida dayirã yiwidʼibʉrʉdera yiwidʼibarata Jeowaʼa Jesu trʉ̃neba, mawũã Jeowaba ũrĩmarẽã (Juan 14:13, 14). Dayirã yiwidʼibʉrʉde akʉza Jesu trʉ̃neba jõbibʉrʉdera kʼãrẽ ẽ kĩrãkʼa akʉ ẽ baibara. ¿Kʼãrẽa mawũã akʉbe ẽ?
Bari jaradaita. Nekʼãrẽ nẽdobariba karta bʉbʉrʉdera, maʉ̃ jõbodoarera iyara bʉbʉ edrera: «sobia bʉbʉ». Mamina iyara maʉ̃ bedʼeara bari bʉbʉ mawũã soiduba oẽ. Maʉ̃ba dayirã yiwidʼibʉrʉdera Jesu trʉ̃neba jõbibʉrʉde soiduba oibara, mawũã maʉ̃ kartade bʉ kĩrãkʼa oẽ baibara. Maʉ̃ kʼarea badua yiwidʼibʉrʉdera ʉ̃rʉ bʼaibʉrʉ yiwidʼi ẽ baibara, awuarabʉrʉ soiduba obaibara (1 Tesalonicenses 5:17; Salmo 119:145).
Yiwidʼibʉde Jesu trʉ̃neba jõbibʉrʉdera, ¿kʼãrẽta oibara bari ʉ̃rʉbʉrʉ yiwidʼibʉta ũdubi ẽ baita? Krĩchadadrʉ Jesu sãwũãbʉta, kʼãrẽta ozebʉrʉta akʉza kʼãrẽta oita. Jeowaʼa yiwidʼibʉrʉdera biga diaibara iyaʼa akʉza Jeowaba kʼãwũã diasi baera iyi warrata dayirãbari. Dayirãba maʉ̃ta opanʉbʉrʉ audre ĩjãta ũdubidayi Jesuba naʉ̃ bedʼea jarada ʉ̃rʉ: «Jõma kʼãrẽ mʉ Zezea mʉneba widʼibʉdara izha marãã diaya» (Juan 16:23).
a Diccionario expositivo de palabras del Antiguo y del Nuevo Testamento exhaustivo de W. E. Vineba jarabʉ «trʉ̃» bedʼea griegodera jarakĩrãbʉ zokʼabʉta, sãwũãbʉta, kʼãrẽne trajabʉta, kʼãrẽaba yi zromata, zareabarabʉta akʉza kʼãrẽaba yibiata.