Edén drʉara, ¿wãrĩnubasika mawũã ẽ bʉrʉ bari nebʉraka?
KRĨCHARA bʉ drʉa biʼiabʉmaebʉta. Mama bʉra kaya ẽãta, bʉ krĩchadera neẽ kʼãrẽba krĩcha zroma obibʉta akʉza maʉ̃ drʉadebʉ baera sobiabʉ. Drʉa kʼãwũã biabʉdera nekʼãrẽ kĩrãwãreãbʉta ũdubʉ.
Bari jaradaita: ne ura bia pawãrabʉta, chiruara biabʉta, ibana zakera bia trãbeta, neponora bia ponobʉta akʉza do zake bia drʉbʉta, mawũãbʉ drʉadera ¿kʼaita bakĩrã ẽ? Jõmaʉ̃ta bakĩrãpanʉ.
Ẽbẽrarã mejãchaʉba jarapanʉ nããbema ẽbẽra pananara basita naʉ̃ drʉa dayirãba jaratabeda kĩrãkʼabʉde. Dããraba judioraba, kristianoraba akʉza musulmaneraba jarasida ẽbẽra yibarira nããbemarata, Edén drʉa kĩrãwãreãnẽ panasita. Daizeze Bedʼeaba jarabʉ ãyira sobiapanasita, aduʼapanasita akʉza nedʉwʉrʉrabawara ãbapanasita. Adewara ãyira Daizeze neũdukʼawua biabasi akʉza Daizezeba ãyaʼa diasi ewari jõmaʉ̃nẽ panamarẽã maʉ̃ drʉa kĩrãwãreãnẽ (Génesis 2:15-24).
Awuru religionʼrabida jaradiabʉ drʉa kĩrãwãreã bada ʉ̃rʉra, bari jaradaita ẽbẽrarã religion induismodebemarabara adewara budismodebemarabara krĩchapanʉ maʉ̃ drʉa biara wãrĩnubasita akʉza maʉ̃ drʉa biadera ãyi nokʼotrʉ panasita. Akʉza religionʼra Áfricadebemarabida nebʉrapanʉ maʉ̃ drʉa kĩrãwãreãbada ʉ̃rʉra, maʉ̃ drʉa biara abarika Adán Eva drʉa biade bada kĩrãkʼa basita.
Religionʼra mejãchaʉba akʉza ẽbẽrarã pʉwʉrʉ biodebemaraba jarapanʉ nããra basita ẽjũã kĩrãwãreãta. Ẽbẽra nebʉrabari yi trʉ̃ Jean Delumeauʼba jarabʉ: «Pʉwʉrʉra nããrabema mejãchaʉba krĩchapanasi nãã chuasita ẽjũã kĩrãwãreãta. Mama neẽbasi kayata, krĩcha zroma oita, ãya jidakĩrãta jidabasi, ẽbẽra kayiruarãra neẽbasi akʉza yõta neẽbasi. Maʉ̃ kʼarea idibema ẽbẽrarãra sobia ẽãbʉ, mawũãbʉ drʉata aduasi baera akʉza ãyira maʉ̃ drʉa biade jẽda bakirabʉ».
¿Kʼãrẽa pʉwʉrʉra mejãchaʉba krĩchapanasi wãrĩnu drʉa biarabasita? ¿Kʼarea pʉwʉrʉra bioba mawũã maʉ̃ bedʼeara abarika jarabʉ? ¿Wãrĩnu chuasika Adán Evaʉ̃mera akʉza Edén drʉa kĩrãwãreãra?
Ʉ̃kʉrʉ ẽbẽrarãba krĩchapanʉ maʉ̃ drʉa bia badara bari nebʉrata. Ʉ̃kʉrʉ nokʼora religionʼradebemaba jarapanʉ Edén drʉa kĩrãwãreã Daizeze Bedʼeadera edabʉta bari yiza ʉ̃rʉ jara ũrĩbita.
Wãrĩnu Daizeze Bedʼeadebʉ nebʉrara yiza ʉ̃rʉ jara ũrĩbita. Bari jaradaita Jesús naʉ̃ drʉade basidera iyi kʼaidupanʉra nekʼãrẽ jaradiabʉrʉdera yizabara jaradiabasi, mamina Daizeze Bedʼeaba jara ẽ Edén drʉa kĩrãwãreãra bari nebʉrabasita, mawũã ẽ bʉrʉ sewidabasita, awuarabʉrʉ Daizeze Bedʼeaba jarabʉ Edén drʉa kĩrãwãreãra wãrĩnu bidabarisi. Krĩchara naʉ̃ta, maʉ̃ta wãrĩnu ẽ basibʉrʉ, ¿dayirãbara sãwũã ĩjãseabʉ Daizeze Bedʼeade eda nekʼãrẽ jarabʉra? Akʉdadrʉ naʉ̃ta, ¿kʼãrẽa ẽbẽrarãbara maʉ̃ nebʉra ʉ̃rʉra ĩjãna ẽ? akʉza ¿kʼarea maʉ̃ nebʉrara dayirãitara yibia?