¿Kʼãrẽa Daizezebara iduaribibʉ zʉbʉriara?

¿JEOWARA SÃWŨÃBɄ DAYIRÃ ZɄBɄRIABɄ AKɄBɄDERA?

Rosa: Ka Sofía. Kʼãrẽ bia mʉ̃a bʉta bʉ deda ũdusi baera.

Sofía: Mʉ̃sida sobiabʉ bʉta ũdusi baera.

Rosa: Nãã zebarisidera bedʼeasi sãwũã Daizezera sopʉabʉta dayirã zʉbʉria ũdubʉde.a Bʉa mʉ̃aʼa jarabarisi naweda maʉ̃ bedʼeata widibarisita, bʉ papa asidentaside. ¿Iyira sãwũã wã?

Sofía: Edaʉde bia bʉ, mamina edaʉde bia bʉ ẽ. Idira wiña bia wã.

Rosa: Wãrĩnu edaʉde zare dayi kʼãwũã kayabʉitara bia bʼaira.

Sofía: Wãrĩnu. Mʉ̃a edaʉde widibari kʼai sõbeda kʼãwũã zʉbʉria bʼai dayirãra.

Rosa: Biga kʼãwũã widira. Semana berabariside jarasida naʉ̃ ʉ̃rʉ bedʼeaita, Daizezebara kʼãrẽa iduaribibʉta zʉbʉriara, iya zarea barabʉbʉrʉ kʼãwũã maʉ̃ bedʼea zroma jõbita?

Sofía: Ãjã, mʉ̃ara kĩrãbebʉ maʉ̃ra.

Rosa: Mʉ̃a maʉ̃ ʉ̃rʉ Daizeze Bedʼeade ũdubi nãã, bedʼeakĩrãbʉ semana berabariside kʼãrẽ ʉ̃rʉ bedʼeadata.

Sofía: Ãjã, jarada.

Rosa: Nããra bedʼeasida, naweda Daizeze ode badaba widibasita kʼãrẽa kʼãwũãbʉta zʉbʉriara. Daizezebara maʉ̃ kʼarea iyira kʼẽã ẽ basi akʉza jara ẽ basi ĩjã erbai waebʉta.

Sofía: Wãrĩnu, mʉ̃ara kʼawua ẽ basi maʉ̃ra.

Rosa: Adewara kʼawuasida Daizezebara kãga ẽãta ẽbẽrarã zʉbʉriabʉra. Daizeze Bedʼeaba jarabʉ iya ũdubaside iyi pʉwʉrʉ zʉbʉriabʉta iyisida abarika zʉbʉriabasi.b Dayirãba maʉ̃ ʉ̃rʉ kʼawuabʉrʉde dayirãra so aduʼabʉ, ¿bʉmabida?

Sofía: Wãrĩnu.

Rosa: Adewara kʼawuasida Daizezebara nejõma oseabʉta akʉza iya zʉbʉria jõbikĩrãbʉdera oseabʉ.

Sofía: Mʉ̃a maʉ̃trʉ bia ũrĩ ẽ. Mawũẽra iya zareata erbʉbʉrʉ mawũã zʉbʉria jõbita ¿kʼãrẽa iduaribibʉ zʉbʉriara?

¿KʼAIBA JARABASI WÃRĨNURA?

Rosa: Nãã akʉdayi Génesis libroba kʼãrẽ jarada ʉ̃rʉ. ¿Bʉara ũrĩbarika Daizezeba Adánʼa akʉza Evaʼa neta ko ẽ baita jaradara?

Sofía: Ãjã, mʉ̃ religione jaradiasida maʉ̃ra. Daizezeba jarasi netata ko ẽ bamarẽã, mamina ãyara ũrĩ ẽ basi, ãya Daizeze bedʼeata ũrĩ ẽ basi baera maʉ̃ netara kosida.

Rosa: Biga panʉsi baera, akʉdaya kʼãrẽta berabarisita Daizezeba maʉ̃ bedʼea jarai naweda. Akʉza akʉdayi kʼãrẽta berabarisita ãya mawũã odadeba ẽbẽrarã idi ewade kʼãwũã zʉbʉriabʉme. ¿Bʉara akʉkĩrãbʉka Génesis 3:1-5 bayeda?

Sofía: «Jeowaba nedʉwʉrʉ jõma odadebemata damabʉrʉ mesera sewabasi, aramaʉ̃ta jarasi yuwẽrã: ‹¿Wãrĩnuka Daizezeba jaradara mara neta ko ẽ bamarẽã ẽjũã kĩrãwãreãnẽ jõmabʉra?›. Aramaʉ̃ta, yuwẽrãba jarasi damaʼa: ‹Neta ẽjũã kĩrãwãreãnẽbʉra koseapanʉ. Mamina ẽjũã kĩrãwãreã ẽzadra bakurude netabʉra, Daizezeba jarasi: Maʉ̃nebemara kobe ẽ, mia kʼãrẽsida tõbaribe ẽ bei ẽ marẽã›. Aramaʉ̃ta damaba jarasi yuwẽrãʼa: ‹Wãrĩnu baira bʉra bei ẽ baya. Daizezebara kaʉbʉ maʉ̃ kobʉrʉ ewaridera daʉ ogadrʉtotoita akʉza Daizeze kĩrãkʼa bʼaita, ũdukʼawuaita saʉ̃ta yibiata akʉza saʉ̃ta yibia ẽãta›».

Rosa: Biga. Atia akʉda kʼãrẽta jarakĩrãbʉta maʉ̃ra bersikuloraba. Nãã jarasi damara bedʼeasita Evaʉ̃me. Adewara Daizeze Bedʼeaba jarabʉ Diarura bedʼeasita damaneba.c Iya widisi Evaʼa Daizezeba kʼãrẽta omarẽã zokʼasita maʉ̃ bakuru koi ʉ̃rʉ. ¿Daizezebara kʼãrẽta jarabarisi Adán Evaʼa maʉ̃ netadebemata kora?

Sofía: Daizezebara jarasi beita.

Rosa: Wãrĩnu mawũã. Mamina maʉ̃ tẽã Diaruba sewidata jarasi Daizeze ʉ̃rʉ. Diaruba jarasi: «Marara bei ẽ bayi». Diaruba maʉ̃ bedʼea jaraside ũdubikĩrãbasi Daizezera sewa nebʉrʉ omiata.

Sofía: Mʉ̃a maʉ̃ bedʼeara ũrĩkabasi jipa.

Rosa: Diaruba jarasi Daizezera sewa nebʉrʉ omiata, mamina wãrĩnu kʼawuaita ewari bio berabaribarabasi. ¿Kʼawuabʉka kʼãrẽa?

Sofía: Wãrĩnu bʼaira kʼawua ẽ mʉ̃a.

Rosa: Krĩchara naʉ̃ta. Ewari aba mʉ̃a bʉaʼa jarayi mʉ̃ra audre zarea barabʉta bʉira. ¿Bʉa sãwũã ũdubiseabʉ mʉ̃a jarabʉra wãrĩnu ẽãta?

Sofía: Ũdubiseabʉ nekʼãrẽ zʉgʉa jiraedabʉrʉde.

Rosa: Wãrĩnu. Jʉrʉibara nekʼãrẽ mejãcha zʉgʉabʉta mawũã ũdubidaita kʼaiba jiraedaseabʉta maʉ̃ra. Mawũã kʼawuaseapanʉ kʼaita audre zarea barabʉta.

Sofía: Idibʉrʉ kʼawuadogo.

Rosa: Mamina mʉ̃a maʉ̃ jarai kaude jarara bʉra sewa nebʉrʉ omiata, mawũãra zarebayi ũdubita kʼaita wãrĩnu bedʼeabʉta, ¿bʉmabida?

Sofía: Wãrĩnu mawũãra zarebayi.

Rosa: Bʉa ũdubita bʉra sewa nebʉrʉ omia ẽãta, bari kʼãrẽ zʉgʉaba jiraeda ẽ baibara.

Sofía: Wãrĩnu.

Rosa: Bʉa ũdubira bʉra wãrĩnu sewa nebʉrʉ omia ẽãta, wuabemara ũdubibara ewari berabari wãne bʉa kʼãrẽ obʉdeba. Mawũã ũdubiyi bʉra sewa nebʉrʉ omia ẽãta.

Sofía: Bʉa jarabʉra wãrĩnu.

Rosa: Akʉza jẽda akʉdaya Génesis nebʉrata. ¿Diarubara jarasika iyira audre zarea barabʉta Daizezeira?

Sofía: Mawũã ẽ.

Rosa: Daizezebara ũdubiseabasi iyira Diaruira mejãcha zarea barabʉta. Maʉ̃ kʼarea Diarubara jarabarisi Daizezera sewa nebʉrʉ omiata. Iya Evaʉ̃me bedʼeaside, jarabʉrʉ kĩrãkʼa asi: «Daizezera sewa nebʉrʉ omia, mʉ̃abʉrʉ wãrĩnuta jarabʉ».

Sofía: Wãrĩnu maʉ̃ra.

Rosa: Daizezera buru bia baera kʼawuabasi iya ewarira idu berabaribibarabasita, mawũã ũdubita kʼaiba wãrĩnu jarabʉta.

NEKʼÃRẼ AUDRE YIBIATA

Sofía: ¿Eva beisidera ũdubisi ẽka Daizeze jaradara wãrĩnubasita?

Rosa: Wãrĩnu, mamina Diaruba mama jarabaridara mamapai taʉ ẽ basi. Akʉra kʼãrẽta jarabʉta bersikulo 5de. ¿Kʼãrẽta berabarita jarasi akʉza Diarubara Evara?

Sofía: Maʉ̃ netata kora iyi dabʉra ogadrʉ totoita.

Rosa: Wãrĩnu, maʉ̃ netata kora jarasi Daizeze kĩrãkʼa bʼaita, kʼawua bʼaita saʉ̃ta kayiruata akʉza saʉ̃ta nebiata. Maʉ̃ba jarakĩrãbasi Daizezebara kʼãrẽ nebiara jãrĩbʉta ẽbẽrarãneba.

Sofía: Idibʉrʉ ũrĩdogo.

Rosa: Jipa maʉ̃ra sewa nebʉrʉ omia zromabasi.

Sofía: ¿Sãwũã mawũãra? Mawũãra ũrĩ ẽ dogo mʉ̃ara.

Rosa: Diarubara jarabarisi Evaʼa akʉza ẽbẽrarã jõmaʉ̃ʼa Daizezeʼa idu yi zokʼabi ẽ bʉrʉ audre bia wãita. Maʉ̃ kʼarea Jeowabara iduaribisi ewarita mejãcha berabarimarẽã, mawũã ũdubita Diaruba jarabʉra wãrĩnuta mawũã ẽ bʉrʉ sewidata. Maʉ̃ kʼarea iduaribisi Diaruba zokʼamarẽã ewari biobayeda. Naʉ̃ drʉara Daizezebara zokʼa ẽ, awuarabʉrʉ Diaruba zokʼabʉ, maʉ̃ kʼarea mejãcha ũdupanʉ zʉbʉriata.d Mamina erbʉ bedʼea biata.

Sofía: ¿Saʉ̃ maʉ̃ bedʼea biara?

Rosa: Daizeze Bedʼeaba jarabʉ bedʼea biata Daizeze ʉ̃rʉ. Jarapanʉ Daizezera dayirã kʼawabʉta dayirã mejãcha zʉbʉriapanʉne. Akʉdaya kʼãrẽta jarasita nokʼo Davidba, Salmo 31:7de. Iyira mejãcha zʉbʉriasi poaga biobayeda. Akʉra kʼãrẽta jarasita. ¿Bʉa lekĩrãbʉka?

Sofía: Nama jarabʉ: «Bʉ kãga jõka baera mʉ̃ra mejãcha sobiabayi, bʉa mʉ̃ zʉbʉriata ũdubʉ baera kʼawuabʉ mʉ̃ sãwũã sopʉabʉta».

Rosa: David mejãcha zʉbʉriabasimina aduʼabasi Jeowaba akʉbasi baera iyi sãwũã berabarinʉmʉta. Jeowabara kʼawuabʉ bʉ kʼãrẽaba zʉbʉriabʉra, akʉza bʉ sãwũã sentibʉta krĩcha zroma obʉde wuabemaraba kʼawua ẽ mina, ¿maʉ̃ba bʉra sãwũã sentibibʉ?

Sofía: Aduʼa sentibʉ.

Rosa: Adewara Daizeze Bedʼeaba jarabʉ dayirãra ewari jõmaʉ̃nẽ kʼãwũã zʉbʉria ẽ baita. Adewara jarabʉ Daizezeba Diarura beaita akʉza Diaruba nekʼãrẽ kayirua oda jõma ãĩ bʉeita. Bʉ idi kʼãwũã zʉbʉriabʉta, bʉ papa kʼãwũã zʉbʉriabʉsida iyara ãĩ bʉeyi. Bʉara kãgabʉrʉ wuabemara semanane akʉza jẽda zeseabʉ mʉ̃ra. Maʉ̃ne ũdubiseabʉ, ¿kʼãrẽa wãrĩnu ĩjãseapanʉta dayirãbara Daizezebara jõbita zʉbʉriara?e

Sofía: Mʉ̃itara biga bayi.