¿Mebẽrã Daizeze odebʉra ẽ soidu sãwũã jʉ̃ẽbita?

JESÚSBA naʉ̃ bedʼeata jarasi ẽbẽra iyi kʼaidu bakĩrãbada: «Wãra bʉ deda. Bʉ mebẽrãma wãra akʉza jõma jarada Jeowaba bʉ kʼarea kʼãrẽta osita akʉza sãwũã so zʉbʉria ũdubisita bʉaʼa». Jesúsba naʉ̃ bedʼea jaraside basibaibara pʉwʉrʉ Gadara, maʉ̃ra basi pusa Galilea barẽare. Maʉ̃ bedʼea Jesúsba jaradara ũdubibʉ daya kãgabʉ ʉ̃rʉ jarakĩrãbʉta dayirã mebẽrã (Mar. 5:19).

Idi ewadebida ʉ̃kʉrʉ kulturadera ãyi sãwũãbʉta jarakĩrãbʉ yi mebẽrã. Maʉ̃ kʼarea ẽbẽra aba Daizeze ode wãra iya kʼãrẽ kʼawuabʉ ʉ̃rʉ jarakĩrãbʉ yi mebẽrãra. ¿Maʉ̃ra sãwũã oseapanʉ? Dayirã mebẽrãnebemaba Daizeze ʉ̃rʉ ĩjã ẽ bʉrʉ, mawũã ẽ bʉrʉ awuru religionebʉbʉrʉ, ¿kʼãrẽta oseapanʉ Daizeze Bedʼeata ãyi soidu jʉ̃ẽbita?

«DAIBARA ŨDUSIDʼA ZHÃRÃ ẼDRɄBIRA»

Siglo nããrabemane Andrésba nããra kʼawuasi Jesúsʼra Dayirã ẽdrʉbibaribasita, ¿iyara maʉ̃ra kʼaiʼa mesera bʼai jarasi? «Andrésbara naara zhi mebea Simónta jʉrʉ wãpe ũdui mawũãsia: Daibara ũdusidʼa zhãrã Ẽdrʉbira». Maʉ̃are Pedrota edesi Jesús badaidu, mawũã iyisida Jesús kʼaidu babaribasi (Juan 1:35-42).

6 poaga berabarida tẽã Pedrora chuasi Jope pʉwʉrʉde. Mama jarasida iyaʼa wãmarẽã Cesareaeda, mawũã jaradiamarẽã gorogorora nokʼoʼa, yi trʉ̃ Cornelio. Iyi jʉ̃ẽside, ¿kʼaita ũdusi? Daizeze Bedʼeaba jarabʉ: «Corneliobara ãzhira jʉ̃ã bʼasia trʉ̃kuape zhi mebẽrãta dewara izhi bawara zhibiarãta» (Hech. 10:22-33).

¿Kʼãrẽta kʼawuapanʉ Andrésba akʉza Cornelioʉ̃meba, yi mebẽrã sãwũã edada ʉ̃rʉra?

Ãyi ũmebara bari iduaribi ẽ basi yi mebẽrãba ãyikʉza Daizeze ʉ̃rʉ ũdu kʼawua zemarẽã, awuarabʉrʉ zarea osida. Andrésbara zarea osi yi mebẽrãba Jesús ũdukʼawuadamarẽã, waya Corneliobara ãba jʉredasi yi mebẽrãta Pedroba jarabʉta ũrĩnamarẽã. Mamina ãyiʉ̃mebara oẽbasi yi mebẽrãba ajuerzade Daizezeʼa ũdu kʼawua zemarẽã akʉza kristianora bamarẽã. Maʉ̃nebara, ¿kʼãrẽta kʼawuapanʉ? akʉza ¿sãwũã ãyide kĩrãkʼa oseapanʉ? Ãya bedʼeaseabʉ wiña Daizeze Bedʼeadebema yibiata, mawũã ẽ bʉrʉ awuru mebẽã Jeowa ʉ̃rʉ Kʼawuabipanʉrãta ũdukʼawuabiseabʉ. Mamina ãyaʼa kʼawua jidabibara Daizeze ʉ̃rʉ kʼawuakĩrãbʉta. Bia kʼawuaita sãwũã jaradiaseabʉta dayirã mebẽrã akʉdaya yiza aba: juwa jidapanʉra aba ãyi trʉ̃ra Jürgen akʉza Petra, maʉ̃ra Alemanianebema.

Petrara Daizeze Bedʼea akʉda tẽã, bʉrʉ kʼoe zesi Jeowa ʉ̃rʉ Kʼawuabipanʉrã bʼaita, mamina yi kimara gorogorora nokʼobasi maʉ̃bara kãga ẽ basi Petraba kʼãrẽ jidadara. Mamina ewari berabari wãne iya kʼawuasi Jeowa ʉ̃rʉ Kʼawuabipanʉrãbara wãrĩnuta jaradiabasita, maʉ̃ kʼarea iyira buru kʼoe zesi tẽã, atiara iyira kongregasione zõrãrã. ¿Naʉ̃ mebẽãba kʼãrẽta jaradiabʉ dayirã, dayirã mebẽrã soidu jʉ̃ẽbita?

Jürgenba jarabʉ: «Mejãcha zarea oraidua daya ĩjãbʉ kĩrãkʼa ãyabida ĩjãnamarẽã akʉza aukʼara jaradiarãra Daizeze Bedʼea ʉ̃rʉ, bʉa maʉ̃ta ora ãyara kʼawuakĩrã zeyi Daizeze ʉ̃rʉra. Akʉza yibia mebẽrã kongregasionebemara ũdukʼawuabita akʉza ũdudamarẽã mebẽrãra ãyi bʉira awuarabʉ ẽãta. Bʉa maʉ̃ta ora ãyara wiña wiñane Daizeze ʉ̃rʉ kʼawua zeseabʉ».

Apostol Pedroba akʉza Cornelio mebẽrãba, mesera Daizeze oeda zesida. Mamina ʉ̃kʉrʉra ewari bio edesi Daizeze ode bʼaita.

JESÚS MEBẼRÃTA

Jesús mebẽrã ʉ̃kʉrʉbara iyi ʉ̃rʉ ĩjã zesida iya jaradiabaside. Bari jaradaita, apostol Santiagota akʉza Juanʼʉ̃mera yi primorabasibaibara adewara yi papa Saloméra yi tiabasibaibara. Daizeze Bedʼeaba jarabʉ: «Dewara wũẽrãrã bio bʼeasia Jesús kʼareba bʼeta ãzha ne erubʼeba». Naʉ̃ra wẽrãra biobʉdebemara, maʉ̃ne edabasibaibara Salométa (Luc. 8:1-3).

Mamina Jesús mebẽrã ʉ̃kʉrʉbara iyi ʉ̃rʉra nããrãra ĩjã ẽ basibaibara. Jesús iyi buru kʼoeside poaga aba berabarida tẽã, ẽbẽrarãta ãba yi jʉresidabaibara deda iya jarabʉ ũrĩta. «Yi mebẽrãba naʉ̃ta ũrĩside aramaʉ̃ta jʉrʉ wãsida ededaita, ãya jarabasi: ‹Iyira kĩrãnemanʉmʉ›». Maʉ̃ poaga bio berabarida tẽã yi mebẽrãba widiside iyi sama wãita, iyara kʼãrẽ panʉ ẽ basi, ¿kʼãrẽa panʉ ẽ basi? «Wãrĩnubaira yi mebẽrãbara ũdubida ẽ basi iyi ʉ̃rʉ ĩjãpanʉra» (Mar. 3:21; Juan 7:5).

¿Kʼãrẽta kʼawuapanʉ Jesúsba iyi mebẽrã sãwũã edadadeba? Jesúsʼra kĩrʉ ẽ basi yi mebẽrãba jaraside iyi kĩrãnemabʉta. Iyi jẽda piradrʉside so zarea diasi yi mebẽrã, mõbe yi ũdubisi yi mebẽã Santiagoʼa. Mawũã ũdubidaba wãrĩnu ãyaʼa ĩjãbisi Jesúsʼra dayirã ẽdrʉbibarita. Maʉ̃rãra basi wuabemara kristianora kʼẽrẽpabʉbawara, ãyira ãbabasi Jerusalénʼne, maʉ̃ra ʉ̃rʉbida zesi Daizeze jaure zareara. Maʉ̃ tẽã Santiagoʼa akʉza Judásʼa diasida ãya odamarẽã nekʼãrẽ audre yibiata (Hech. 1:12-14; 2:1-4; 1 Cor. 15:7).

Ʉ̃KɄRɄBA AUDRE NESIDABɄ EWARITA DAIZEZE Ʉ̃RɄ KʼAWUAITA

Nããrabema siglo berabarida kĩrãkʼa idibema dayirã mebẽrãnebema ʉ̃kʉrʉbida ewari mejãcha nesidabʉ Daizeze ʉ̃rʉ kʼawua zeita. Akʉdaya Roswitha yizata, iyira katolikabasi, mamina yi kimara Jeowa ʉ̃rʉ Kʼawuabibari zesi 1978de. Iya mejãcha ĩjãbasi iya kʼawuabʉ ʉ̃rʉ, maʉ̃ kʼarea kãga ẽ basi yi kima buru kʼoe zeside Jeowa ʉ̃rʉ Kʼawuabipanʉrã bʼaita. Mamina poaga berabari wãne iyi krĩchara awuara besi, kʼawuasi baera Jeowa ʉ̃rʉ Kʼawuabipanʉrãbara wãrĩnuta jaradiabʉta, maʉ̃ba buru kʼoe zesi 2003de. ¿Kʼãrẽa iyi krĩchara awuara besi? Iyi kimaba sãwũã edada kʼarea: iya yi kimaʼa bia eda ẽ basidera, maʉ̃ kʼarea kĩrʉ ẽ basi, awuarabʉrʉ iduaribisi iyita iyikʉza awuara krĩchamarẽã. ¿Roswithabara dayirãra kʼãrẽ ũrãgʼata diabʉ? «Mejãcha kĩrʉbita ũdubi ẽ bʉrʉ akʉza jʉ̃ã kʼawuabʉbʉrʉ nekʼãrẽ biata mejãcha ũduseabʉ».

Monika buru kʼoesi 1974de akʉza yi wũãwũãra ũmepanʉta iyi 10 poaga berabarida tẽã buru kʼoe zesi, yi kima Hansbara iduaribisi Daizeze ʉ̃rʉ kʼawuamarẽã, mamina iyi buru kʼoe zesi poaga 2006de. Iya naʉ̃ krĩchabʉrʉdera kʼãrẽ ũrãgʼata diabʉ dayirã: «Jeowaʉ̃me kʼẽrẽpa bara akʉza bʉa ĩjãbʉta iduaribirãra». Hansʼra kʼarebasi iya ũdubasi baera yi mebẽrãba mejãcha kãgabʉta, adewara yi mebẽrãbara jʉ̃ãbasi ewari abaʉde iyabida wãrĩnuta kʼawua zemarẽã.

ÃYIRA ADUʼABASI WÃRĨNUTA KʼAWUABASI BAERA

Ewari aba Jesúsba jarasi wãrĩnura, bania dayi ewari jõmaʉ̃nẽ babibʉ kĩrãkʼabʉta (Juan 4:​13, 14). Daya ẽbẽra iyita obisia ẽ bʉrʉ, ajuerzade dobi ẽ, mamina iya bania obisiabʉde dokĩrãbʉbʉrʉ aduʼa baseabʉ. Maʉ̃ kĩrãkʼa okĩrãpanʉ dayirã mebẽrã kʼarea. Aukʼara Daizeze Bedʼea jaradia ẽãne. Daizeze Bedʼeaba jarabʉ: «Yi ẽbẽra so aripe obʉbara bia krĩchabʉ panʉi nãã» akʉza jarabʉ: «Burubiabʉ sobara iyi ira biʼia bedʼeabibʉ akʉza iyi bedʼeadeba ĩjãbibʉ wuabemara». ¿Maʉ̃ ũrãgʼara sãwũã oseapanʉ dayirãbara? (Prov. 15:28; 16:23.)

Yuwẽrã abaʉba kãgabʉbʉrʉ yi kimaba Daizeze Bedʼeata ũdu kʼawua zemarẽã, bedʼeai nãã krĩchabʉ. Ũdubi ẽ baibara iyira jipa kʼẽrẽpabʉta. Maʉ̃ta obʉbʉrʉ bedʼeai nãã bia krĩchayi akʉza yi mebẽrãbawara aduʼabayi. Iyi nãã bia bedʼeaira yuwẽrãbara naʉ̃ta iyikʉza widibara: «¿Kʼãrẽ ewaride mʉ̃ kimara aduʼabʉ bedʼeaita? ¿Kʼãrẽta lekĩrã?¿Kʼãrẽ ʉ̃rʉ bedʼeakĩrã, balon jemene barabʉ ʉ̃rʉ, siensia ʉ̃rʉ, mawũã ẽ bʉrʉ politika ʉ̃rʉ? ¿Mʉ̃a sãwũã wawia ũdubiseabʉ iya kʼãrẽ ĩjãbʉ ʉ̃rʉ akʉza kʼãrẽ krĩchabʉ ʉ̃rʉ? Mamina, ¿sãwũã bedʼeaseabʉ Daizeze Bedʼea ʉ̃rʉ?».

Kʼawuasida dayirã mebẽrã soidu jʉ̃ẽbira aukʼara Daizeze Bedʼea ʉ̃rʉ jaradia ẽ baibarata. Mamina maʉ̃ awa oẽ baibara, dayirãba jarabʉta oũdubibara.

DAYIRÃBA NEKʼÃRẼ BIA OŨDUBIBɄTA

Jürgenba jarabʉ: «Bʉa ewariza jarabʉra oũdubibara, mawũã bʉ mebẽrãba kʼawuayi bʉa jarabʉra wãrĩnuta, ãya jara ẽ mina». Hansʼra buru kʼoesi 30 poaga yi kima buru kʼoeda tẽã iya jarabʉ: «Ũdubibara daya obʉdeba kʼẽrẽpabʉta, mawũã dayirã mebẽrã Jeowa ʉ̃rʉ Kʼawuabipanʉrã ẽãba ũdudamarẽã wãrĩnu Daizeze Bedʼeabara dayi bebʉra awuara babiseabʉta». Dayirãba Daizeze Bedʼea kʼawua zesidera, dayirã bebʉra audre bia besi akʉza nebiata obesi, maʉ̃ta ũduseabʉ dayirã mebẽrãbara.

Apostol Pedroba naʉ̃ ũrãgʼata diasi wẽrãra yi kima Daizeze odebʉ ẽã: «Yuwẽrã kima barabebara ũrĩbara mara kima bedʼeara, ʉ̃kʉrʉba Daizeze Bedʼea ĩjã ẽ bʉrʉ, marabara ĩjãbiseabʉ mia kʼãrẽ bedʼea jara ẽã mayi sãwũã bʉdeba ãya bʉta ũdusi baera kʼẽrẽpabʉta akʉza wawia ũdubibʉta. Bari bia yoba ẽ baibara ãĩbʉrʉ (buda kape, nekʼãrẽ oro oma jʉ̃bʉde akʉza wua bia jʉ̃bʉde), awuarabʉrʉ bʉ sotrʉ biabaibara, bʉra aduʼabaibara akʉza urumʉ̃rʉãbaibara, naʉ̃ra Daizeze dabʉ nããra yibia baera» (1 Ped. 3:1-4).

Pedrobara jarasi yuwẽrãʼa iya kʼãrẽ obʉdeba yi kimara Daizeze ode ba zeseabʉta. Mebẽã Christaba maʉ̃ ũrãgʼata ũrĩsi baera, iyara zarea obʉ yi kima soidu jʉ̃ẽita, iya maʉ̃ra ozebʉrʉ iyi buru kʼoedadeba 1972deba. Mebẽã Christa kima Jeowa ʉ̃rʉ Kʼawuabipanʉrãbawara Daizeze Bedʼea akʉbʉmina, wabida jida ẽ Daizeze ode bʼaita. Edaʉde ãba yi jʉrebarima wãbʉ akʉza mebẽrãbawara biabʉ, mamina mebẽrã kongregasionebemabara ajuerzade jara ẽ iyi Jeowa ʉ̃rʉ Kʼawuabipanʉrã ba zemarẽã, ¿kʼãrẽta obʉ Christabara iyi kima soidu jʉ̃ẽ bʼaita?

Iya panʉbʉ: «Mʉ̃ra zarea obʉ Jeowaba jarabʉ kĩrãkʼa bʼaita adewara zarea obʉ mʉ̃ kimasida Jeowa ʉ̃rʉ Kʼawuabipanʉrã ba zemarẽã mʉ̃a kʼãrẽ obʉdeba. Zarea obʉ mʉ̃ kima sobiabita, mamina iya Daizeze ʉ̃rʉ jarabʉ ẽ nããra, adewara wawiata ũdubibʉ iyidobaʉba jidamarẽã Daizeze ode wãita, mawũã ẽ bʉrʉ wã ẽ baita. Adewara jõma Jeowa juwade amaebʉ».

Christa yizaba ũdubibʉ yibiata kʼawuaita daya nekʼãrẽ obʉrʉde sãwũã oira. Iya ewari jʉrʉbʉ nekʼãrẽ oita Jeowaita, jaradia wãbʉ akʉza ãba yi jʉrebarima wãbʉ. Iya kʼawuabʉ yi kimara kãgata ũdubibarata, ewari jʉrʉibarata yi kimaʉ̃me ãba bʼaita akʉza akʉibarata. Dayirã jõmaʉ̃ba kãgata ũdubibara dayirã mebẽrã Daizeze odebʉ ẽã akʉza ũdubibara kʼãrẽaba oseabʉta. Daizeze Bedʼeaba jarabʉ: «Kʼãrẽ oira jõma ewari barabʉ». Maʉ̃ba jarakĩrãbʉ dayirãbara ewari jʉrʉibarata dayirã mebẽrã Jeowa odebʉ ẽ bawara ãba bʼaita, audre dayi kimaʉ̃me. Ãbabʉba kʼarebabʉ audre bia bedʼea kʼawuaita. Ãyita bia bedʼea kʼawuabʉbʉrʉ yi kimabara jiba ẽ bayi akʉza dobabʉta senti ẽ bayi (Ecl. 3:1).

KRĨCHADA Ẽ BAIBARA DAYIRÃ MEBẼRÃ DAIZEZE ODE BA ZE Ẽ BAITA

Holgerba jarabʉ: «Yibia dayirã mebẽrãba kʼawuamarẽã, dayirãba mejãcha kãgabʉta akʉza ãyi kʼarea yiwidʼibara». Holger zezera 20 poagabade babʉrʉde buru kʼoe zesi. Iyita abapai waebasi buru kʼoeita iyi mebẽrãnebemara. Christaba jarabʉ: «Mʉ̃a wãrĩnu jʉ̃ãbʉ mʉ̃ kimara ewari abaʉde Jeowa ʉ̃rʉ Kʼawuabipanʉrã ba zemarẽã». Ewari jõmaʉ̃nẽ bia krĩchabaibara dayirã mebẽrã Jeowa ʉ̃rʉ Kʼawuabipanʉrã ẽ ʉ̃rʉ. Krĩchada ẽ baibara ãyira Jeowa ʉ̃rʉ kʼawua ze ẽ baita.

Dayirãbara jʉrʉibara dayirã mebẽrãbawara bia bʼaita, adewara dayirãbara ãyaʼa ewari diaibara wãrĩnuta kʼawuamarẽã akʉza zarea odaibara ãyi soidu jʉ̃ẽmarẽã Daizeze Bedʼeata «mamina maʉ̃ra oidua ibiade akʉza wawiade» (1 Ped. 3:15).