Ĩjãta erbaibara Jeowaba nebia diaita jarada ʉ̃rʉ
«Ĩjãibara jarakĩrãbʉ, […] dayirãba ĩjãita wãrĩnu berabarita daya jʉ̃ãbʉta, krĩchaita wãrĩnubʉta dayirãba ũduda ẽ mina» (HEB. 11:1).
1. ¿Dayirãra sãwũã baseabʉ ĩjãpanʉbʉrʉ?
ẼBẼRARÃ jõmaʉ̃ba ũdubida ẽ ĩjãbʉta (2 Tes. 3:2). Mamina Jeowabara iyaʼa yiwidʼikĩrãpanʉara diabʉ ĩjãita (Rom. 12:3; Gál. 5:22). Dayirãbara biga dia kʼawuaibara Daizezeba dayirã ĩjãta diabʉ baera.
2, 3. (1) ¿Kʼãrẽ nebiata ũduseabʉ ĩjãpanʉbʉrʉ? (2) ¿Kʼãrẽta panʉi naʉ̃ artikulodera?
2 Jeowabara diasi dayirãbari beimarẽã yi warrata, mawũã iyi ʉ̃rʉ ĩjãpanʉra nekayirua kĩrãduaita. Dayirãba Jesús ʉ̃rʉ ĩjãpanʉbʉrʉ mawũãra Daizeze neũdukʼawua baseabʉ akʉza ewari jõmaʉ̃nẽ baseabʉ (Juan 6:44, 65; Rom. 6:23). Jeowara dayirãʉ̃mera jipa ẽbẽra bia, dayirãra nekayirua omiamina akʉza beibaritabʉmina. Iya ũdusi nebiata oseapanʉta (Sal. 103:10). Maʉ̃ kʼarea Jesús ʉ̃rʉ jaradiasi akʉza kʼãrẽa beidata. Dayirãba Jesús ʉ̃rʉ ĩjãbʉta ũdubiside akʉza iyi kʼaidubema baside mamaʉ̃ba ʉ̃ta ewari jõmaʉ̃nẽ bʼaita jʉ̃ãpanʉ (akʉra 1 Juan 4:9, 10).
3 ¿Mamina kʼãrẽta audre kʼawuaseapanʉ ĩjã bʼai ʉ̃rʉ? Dayirãba ĩjãkĩrãbʉbʉrʉ, ¿bari kʼawuaibaraka Daizezeba dayirã kʼarea kʼãrẽ odata mawũã ẽ bʉrʉ ʉ̃ra zeide kʼãrẽta oita? Mawũã ẽ, awuarabʉrʉ nekʼãrẽ awuara oibara. Akʉdadrʉ kʼãrẽta oibarata.
SOIDUBA ŨDUBIBARA ĨJÃBɄTA
4. ¿Kʼãrẽta oibara ĩjãbʉbʉrʉ?
4 Daya Daizeze ʉ̃rʉ akʉza Jesús ʉ̃rʉ ĩjãbʉta ũdubibʉbʉrʉ bari kʼawua ẽ baibara ãya dayirã kʼarea kʼãrẽ odadrʉ akʉza ʉ̃ra zeide kʼãrẽta oita. Awuarabʉrʉ soiduba okĩrãpanʉ ãya dayirã omarẽã jaradata akʉza kʼarebakĩrãbʉ awuru ẽbẽrarãba ãyita ũdukʼawuadamarẽã. Pabloba jarasi: «Bʉyi iba Jesústa Nokʼota jarara, Daizezeba beudʼata piradrʉbidʼata sodʼeba ĩjãrã bʉra ẽdrʉya. Mawũã sodʼeba ĩjãbʉrʉra bedʼea ne ẽã bʼʉya, mawũã dazhi iba jarabʉrʉra ẽdrʉbiya» (Rom. 10:9, 10; 2 Cor. 4:13).
5. (1) ¿Kʼãrẽa arigʉ yibia ĩjã bʼaira? (2) Yizata jara ũrĩbira kʼãrẽa yibiata daya ĩjãbʉ zarea erbaita.
5 Ewari jõmaʉ̃nẽ bakĩrãbʉbʉrʉ wãrĩnu ĩjã bʼaibara akʉza zarea bʼaibara. Ĩjã bʼaira bakuru zake kĩrãkʼabʉ. Dayirã ĩjãra ne u zake kĩrãkʼa bʉ. Maʉ̃ ne u bia pãwãramarẽãra baniata badua diadaibara, maʉ̃ta oẽ bʉrʉ beiseabʉ ne ura. Maʉ̃ kĩrãkʼa dayirãba ĩjãbʉra zarea erbaibara akʉza ewariza waribibara (2 Tes. 1:3; Tito 2:2; Luc. 22:32; Heb. 3:12).
DAIZEZE BEDʼEABA JARABɄDERA KʼÃRẼ ĨJÃ BʼAIBARA
6. Hebreos 11:1 ba jarabʉ ĩjã bʼaira nekʼãrẽ ũme erbʉta, ¿saʉ̃ maʉ̃rãra?
6 Hebreos 11:1 (akʉra) nekʼãrẽ ũmene ũdubibʉ kʼãrẽta jarakĩrãbʉta ĩjã bʼaita. Nããra jarabʉ: «Dayirãba ĩjãita wãrĩnu berabarita daya jʉ̃ãbʉta». Dayirãba nekʼãrẽ ʉ̃ra zeide jʉ̃ãpanʉra naʉ̃: jõma nekayiruara jõñi akʉza aranʉbai panañi drʉa biade. Yi ũmeta. Daizeze Bedʼeaba jarabʉ ĩjã bʼaira naʉ̃ta: «Krĩchaita wãrĩnubʉta dayirãba ũduda ẽ mina». Bʉ nekʼãrẽ wãrĩnubʉta dayirãba ũduda ẽ mina. Bari jaradaita: Jeowata, Jesústa, angelerata akʉza Daizeze nokʼo ʉ̃tʉbʉta (Heb. 11:3). ¿Sãwũã ũdubiseabʉ wãrĩnu ĩjãseabʉta maʉ̃ra ũduda ẽ mina? Ũdubiseapanʉ dayirãba kʼãrẽ obʉdeba akʉza kʼãrẽ jarabʉdeba.
7. ¿Sãwũã Noé yizaba dayirã jaradiabʉ kʼãrẽta jarakĩrãbʉta ĩjã bʼaibara? (Akʉra poto yi nããrabemata).
7 Noé yizaba ũdubibʉ kʼãrẽta jarakĩrãbʉta ĩjã bʼaira. Apostol Pabloba jarasi Jeowabara Noéʼa jarabarisita ʉ̃ra zeide kʼãrẽ berabarita. Maʉ̃bara jarakĩrãbasi nekʼãrẽ awabida ũdu ẽãta. Noéba Jeowata sobiabikĩrãbasi baera osi jãba zromata, mawũã iyi mebẽrãsida mama eda ẽdrʉdamarẽã (Heb. 11:7). Noéba Jeowa bedʼeata ũrĩsi baera parãsi jãba zromata. Iyi de kʼawa panʉraba widisibaibara kʼãrẽa obʉta maʉ̃ jãba zromara. Mʉ̃a kʼawuaita Noéʼra mama chupea ba ẽ basibaibara, awuarabʉrʉ jara ũrĩbisikĩrã kʼãrẽa obʉta. Daizeze Bedʼeaba jarabʉ iyira nejaradiabaribasita (2 Ped. 2:5). Iya jara ũrĩbisi ẽbẽrarã Daizezeba kue zromata weita mawũã ẽbẽrarã kayiruara jõbita. Iya jarasibaibara Jeowaba iyaʼa jarada kĩrãkʼa «Mʉ̃ara jõma jõbiyi zokʼaipanʉrãra, naʉ̃ drʉara nemitiaba birasi baera. Mʉ̃ara kue zromata weyi mawũã doba birayi jõma naʉ̃ drʉara, adewara jõma makenañi bajã edre zokʼaibʉta. Jõma naʉ̃ drʉadebʉra makiniñi». Maʉ̃ tẽã Noébara jara ũrĩbibarabasi ẽbẽrarã kʼãrẽta oibarata ãyi ẽdrʉita. Jeowabara jarabarisi eda jãba zromane eda baribarata (Gén. 6:13, 17, 18).
8. ¿Kʼãrẽta jarasi Santiagoba ĩjã bʼai ʉ̃rʉra?
8 Santiagobida abarika bʉsi ĩjã bʼai ʉ̃rʉra. Iyara naʉ̃ta bʉsibaibara apostol Pabloba karta Hebreos bʉda tẽã. Santiagoba jarasi ĩjã bʼaira ũdubibʉta daya obʉdeba (Sant. 2:18). Iya jara ũrĩbisi ĩjã bʼaira abarikabʉ ẽãta Daizeze ĩjãiʉ̃mera. Angelera kayiruarabara kʼawuabʉ Daizezera bʉta, mawũãsidu ãyara ĩjãna ẽ, awuarabʉrʉ ãyira Daizeze ʉ̃rʉ panʉ (Sant. 2:19, 20). Maʉ̃ kʼarea yi ẽbẽra wãrĩnu Daizeze ʉ̃rʉ ĩjãbʉra nekʼãrẽ okĩrãbʉ Daizezeba kãgabʉ kĩrãkʼa oita, maʉ̃ta osi Abrahánba. Santiagoba bʉsi: «¿Ẽbẽra bia kĩrãkʼa akʉsida ẽka iya oda kʼarea dayirã zezera Abrahánʼra, yi warra Isaac altarde diada tẽã? Akʉra iya odaba ũdubisi iya ĩjãbʉta akʉza iya odaba audre zarea ĩjãbisi» Maʉ̃ tẽã Santiagoba jarasi dayirãba wãrĩnu ĩjãbʉbʉrʉ ũdubibarata nekʼãrẽ obʉdeba. Iya jarasi: «Mawũã, ãyi kakuata ĩñaba neẽbʉrʉ beibʉ, maʉ̃ kĩrãkʼa daya ĩjãbʉta ũdubi ẽ bʉrʉ beibʉ» (Sant. 2:21-23, 26).
9, 10. ¿Kʼãrẽta odaibara Jesústa ĩjãbʉta ũdubidaira?
9 Santiagoba ĩjãi ʉ̃rʉ 30 poaga bʉda berabarida tẽã Juanba bʉsi ebangelio aba akʉza kartarata ũbea. Juanbara biʼia kʼawuabasi kʼãrẽta ĩjãi erbaira ẽbẽrarã Daizeze Bedʼeaba bʉda kĩrãkʼa akʉza zokʼasi bedʼea griego bedʼeade maʉ̃bara jarakĩrãbʉ ĩjã bʼaita.
10 Bari jaradaita Juanba bʉsi: «Yi Warra wãrĩnu ĩjãbʉta ũdubidara ewari jõmaʉ̃nẽ baya, mamina yi Warra bedʼea ũrĩ ẽãra ewari jõmaʉ̃nẽ ba ẽã. Awuarabʉrʉ Daizeze kĩrʉbitrʉ iyi ʉ̃rʉ baya» (Juan 3:36 TNM). Jesús ʉ̃rʉ ĩjãita ũrĩbara iya zokʼabʉta (akʉra rekuadrota eda kʼãrẽta jarakĩrãbʉta). Dayirãba lera Juanba bʉdata eda jarabʉ Jesúsba jarada ʉ̃rʉ akʉza Jesúsba jarasi dayirãba iyide ĩjãra akʉza yi Zezede ĩjãra ewari jõmaʉ̃nẽ baseabʉta (Juan 3:16; 6:29, 40; 11:25, 26; 14:1, 12).
11. ¿Sãwũãbʉde ũdubiseabʉ biga diabʉta wãrĩnuta kʼawuasi baera?
11 Jeowabara zokʼasi iyi jaure zareata mawũã dayirãba biʼia kʼawuadamarẽã iyi ʉ̃rʉ akʉza yi warra ʉ̃rʉ, mawũã ĩjã bʼaita ãyi ʉ̃rʉ (akʉra Lucas 10:21). ¿Dayirãba sãwũã Jeowaʼa biga diaseabʉ iya dayirãbari nekʼãrẽ oda kʼarea? Biga diabʉde dayirãra Jeowa neũdukʼawua baseabʉ Jesúsdeba. Daizeze Bedʼeaba naʉ̃ta jarabʉ Jesús ʉ̃rʉ: «Yi nãã edebari akʉza Daya ĩjãbʉ audre ĩjãita kʼarebabʉra» (Heb. 12:2). Adewara nekʼãrẽ oibara dayirãba ĩjãbʉ audre zarea bamarẽã, ¿kʼãrẽta oibara? Yiwidʼibaibara akʉza badua Daizeze Bedʼeata akʉbaibara (Efes. 6:18; 1 Ped. 2:2).
Ũdubira bʉa ĩjã barabʉta, badua jaradiabʉde. (Akʉra poto 12)
12. ¿Kʼãrẽta odai ĩjãta erpanʉbʉrʉ?
12 Dayirãba ĩjãpanʉbʉrʉ Jeowaba nekʼãrẽ ʉ̃ra zeide weita oũdubidayi dayirãba obʉdeba. Bari jaradaita, Daizeze Nokʼota nãã bʉedayi akʉza bedʼeadayi maʉ̃ Nokʼo ʉ̃rʉ ẽbẽrarã, mawũã Jesús kʼaidubema badamarẽã. Nekʼãrẽ biata odayi ẽbẽrarã kʼarea, mamina audre dayirã mebẽrã kʼarea (Gál. 6:10). Dayirãra Jeowa neũdukʼawua bʼaira zarea odayi nekayirua oda ẽ baita (Col. 3:5, 8-10).
DAYIRÃTA TEITEA BʼAIRA JEOWA Ʉ̃RɄ ĨJÃTA ERBAIBARA
13. (1) ¿Kʼãrẽa yibia Daizeze ʉ̃rʉ ĩjã erbaira? (2) ¿Kʼãrẽta jarabʉ Daizeze Bedʼeabara ĩjã erbai ʉ̃rʉra akʉza kʼãrẽa?
13 Daizeze Bedʼeaba jarabʉ dayirãta ĩjãta neẽbʉrʉ mawũãra Daizezera sobiabibe ẽ. «Daizeze orrabʉbara ĩjãibara iyira wãrĩnubʉta akʉza iyi jʉrʉbʉara nebiata diabʉ» (Heb. 11:6). Daizeze Bedʼeaba jarabʉ dayirãba ĩjãta erbʉbʉrʉ teiteabʉta. ¿Kʼãrẽa maʉ̃ta jarabʉ Daizeze Bedʼeabara? Kristianorabara nããra ĩjãita erbaibara baera (Heb. 6:1). Mamina maʉ̃ ĩjã erbʉ awuara dayirã sode nekʼãrẽ biata erbaibara. Maʉ̃raba kʼarebai baera audre Daizeze neũdukʼawua bʼaita (akʉra 2 Pedro 1:5-7; Jud. 20, 21).
14, 15. ¿Kãgabara sãwũã kʼarebabʉ ĩjã erbaita?
14 Daizeze Bedʼea bʉdarabara mejãcha bʉsida ĩjã ʉ̃rʉ ¿maʉ̃ba jarakĩrãbʉka kristianoraitara maʉ̃ nebiatrʉ audre yibiata? Maʉ̃ta akʉdadrʉ.
15 Pablobara zokʼasi yizata mawũã bedʼeaita ĩjã ʉ̃rʉ akʉza kãgai ʉ̃rʉ. Iya jarasi ĩjãta erbʉbʉrʉ katuma aña bʉeita mamina kãgata neẽbʉrʉ mawũãra zeri ẽ (1 Cor. 13:2). Jesúsbara jarasi Daizezeba ley diaside nekʼãrẽ mejãcha omarẽã zokʼasi, mamina Jesúsba jarasi maʉ̃nebema ley audre yibiara Daizezeʼa kãga ũdubibarata (Mat. 22:35-40). Kãgabara kʼarebabʉ nekʼãrẽ awuara erbaita dayirã sode Jeowaʼa sobiabiseabʉta. Bari jaradaita, Daizeze Bedʼeaba jarabʉ kãgabara jõma ĩjãseabʉta. Naʉ̃ba ũdubibʉ kãgabara jõma ĩjãbibʉta Daizezeba iyi bedʼeade jarabʉta (1 Cor. 13:4, 7).
16, 17. (1) ¿Sãwũã ũdubibʉ Daizeze Bedʼeabara ĩjã erbaita akʉza kãga ũdubira audre yibiata? (2) Maʉ̃ranebema ũbeara, ¿saʉ̃ta audre yibia akʉza kʼãrẽa?
16 Daizeze Bedʼeaba jarabʉ kãgata akʉza ĩjã erbaiʉ̃mera arigʉ yibiata. Maʉ̃ kʼarea ẽbẽrarã Daizeze Bedʼea bʉdarabara maʉ̃ra ʉ̃rʉ bedʼeabʉrʉdera ãba jarabʉ. Bari jaradaita Pabloba naʉ̃ta jarasi kristianora: «Jʉ̃ibara trʉ̃ãne jʉ̃bari ĩjãinebemata, kãgadebemata» (1 Tes. 5:8). Akʉza Pedroba naʉ̃ta jarasi Jesús ʉ̃rʉ: «Maraba iyira ũduda ẽ basimina kãgapanʉ. Idibida ũduda ẽ mina iyi ʉ̃rʉ ĩjãpanʉ akʉza arigʉ sobiapanʉ» (1 Ped. 1:8). Santiagobida jarasi Daizezebara jʉrʉsita ẽbẽrarã nekʼãrẽ neẽãbʉta mawũã mejãcha ĩjãta erpanamarẽã, mawũã Daizeze Nokʼode panamarẽã Daizezeba diaya asi baera iyi kãgapanʉra (Sant. 2:5). Akʉza Juanba jarasi Daizezeba naʉ̃ta omarẽã zokʼasita: «Ĩjãta erbaibara iyi warra Jesucristo trʉ̃ne. Adewara yiya kãgadaibara iya zokʼada kĩrãkʼa» (1 Juan 3:23).
17 Pabloba jarasi dayirã ewaridera erpanaibarata kãgata, jʉ̃ãita akʉza ĩjãita. Mamina maʉ̃ranebema ũbeara yi audre yibiara kãga (1 Cor. 13:13). ¿Kʼãrẽa Pablobara jarasi kãgara audre yibiata? Ʉ̃ra zeide dayirãbara nesida ẽ bai baera ĩjãi erbaira, dayirãra jõmaʉ̃ta ẽjũã kĩrãwãreãnẽ bʼai baera. Mamina dayirãbara erbaibara kãgata maʉ̃ra ũdubi baera Daizezeʼa akʉza wuabemara ẽbẽrarã. Maʉ̃ kʼarea dayirã kãgara audre waribibara ewariza.
JEOWABARA IYI PɄWɄRɄARA NEBIATA DIABɄRɄ ĨJÃTA ŨDUBIBɄ BAERA
18, 19. ¿Dayirãba ĩjãta erpanʉ baera kʼãrẽ nebiata berabaribʉ, maʉ̃ kʼarea kʼaiʼabʉrʉ biga diaseapanʉ?
18 Daizeze odepanʉrabara idu yi edebibʉ Daizeze jaure zarea, maʉ̃ kʼarea wãrĩnu ĩjãta ũdubipanʉ Daizeze Nokʼo ʉ̃rʉ akʉza iyiarepanʉ. Adewara yiya kãgabʉta ũdubipanʉ (Gál. 5:22, 23). Maʉ̃ kʼarea naʉ̃ drʉa jõmaʉ̃nẽ 8 millones mebẽrãra aduʼapanʉ akʉza ãbapanʉ kongregasione. Maʉ̃ba ũdubibʉ ĩjã erbaita akʉza kãga ũdubita maʉ̃ra arigʉ yibiata.
19 Daizeze pʉwʉrʉra ãbapanʉ iya kʼarebabʉ baera. Maʉ̃ kʼarea iyi ʉ̃rʉbʉrʉ ibia bedʼeadaibara (Is. 55:13). Daizezeʼa biga diapanʉ kʼãwũã ĩjãbibʉdeba ẽdrʉbibʉ baera (Efes. 2:8). Ẽbẽrarã mejãcha kʼareba wãñi Jeowabara iyi ʉ̃rʉ ĩjãpanamarẽã, zeyi ewari ẽbẽrarã Jeowaʼa yiwidʼidaita, nekayirua oka bʼaita akʉza sobia bʼaita. Maʉ̃ ewari zeyeda Jeowaba jarabʉ ʉ̃rʉ ĩjãbaibara.