Jaradia wãbʉrʉde jaradiara nekʼãrẽ idi berabarinʉmʉ ʉ̃rʉ

Jesuba ẽbẽrarã jaradiabasidera jaradiabasi iyi ewaride kʼãrẽ berabaribʉ ʉ̃rʉ (Lu 13:1-5). Bʉabida zokʼaseabʉ ẽbẽrarã jaradiaita idi ewaride kʼãrẽ berabaribʉ ʉ̃rʉ. Bʉa jaraseabʉ plata sãwũã zarea ũdui ʉ̃rʉ, sãwũã yõ eaba wã ʉ̃rʉ, mawũã ẽ bʉrʉ drʉade neida berabaribʉ ʉ̃rʉ, maʉ̃ tẽã widiseabʉ bedʼea krĩchabiseabʉta. Bari jaraita: «¿Bʉmara, maʉ̃ra ewari jõmaʉ̃nẽ mawũã bʼaika?» mawũã ẽ bʉrʉ, «¿Bʉmara kʼaiba ara oseabʉ?». Maʉ̃ tẽã Daizeze Bedʼeade ũdubira maʉ̃ ʉ̃rʉ bedʼeabʉta. Mamina audre ũrĩkĩrãbʉbʉrʉ, ũdubira bideota mawũã ẽ bʉrʉ karta nekʼãrẽ jaradiabaridebemata ũdubira. Zarea odadrʉ ẽbẽrarã soidu jʉ̃ẽita akʉza nekʼãrẽ odadrʉ «bedʼea bia kʼarea» (1Co 9:22, 23).

¿Ẽbẽrarã bʉ kongregasion chumaebemabara kʼãrẽ bedʼea ʉ̃rʉ ũrĩkĩrã?