1921 Maʉ̃neba Sien Poagaba

1 ENERO Watch Tower 1921ba naʉ̃ta widisi: «¿Naʉ̃ poagadera Daizeze Bedʼea Kʼawuabarirabara kʼãrẽta odaibara?». Maʉ̃ widira panʉbasi Daizeze Bedʼeadeba Isaías 61:1, 2de, jarabʉ: «Jeowabara mʉ̃ta jʉrʉsi bedʼea biata edemarẽã ẽbẽrarã urumʉ̃rʉpanʉʼa» «jarakaita poaga Jeowaba ibiade jʉ̃ãbʉ ʉ̃rʉ akʉza Daizeze yõ ewari ʉ̃rʉ».

NEJARADIABARIRA ZOWAĨNĨGɄA ERPANɄTA

Daizeze Bedʼea Kʼawuabarirabara wuabemara jaradiaita zowaĩnĩgʉata erpanaibarabasi. Ãyara «bedʼea biata» jaradiaibarabasi baera akʉza jaradiaibarabasi «Daizeze yõ ewarisida».

Mebẽã John Hoskin Canadádebemara arigʉ nejaradiabari biabasi pẽwãpanasimina. Poaga 1921ne mebẽãbara ũdusi ebangelikora pastorta. Mebẽã Hoskinbara maʉ̃ pastorʼʉ̃me bedʼeaside jarasi: «Daizeze Bedʼea ʉ̃rʉra ibia bedʼeaibarata, edaʉde bedʼea abarika ze ẽ mina, neũdukʼawua kĩrãkʼa bedʼeaibarata». Mamina ibiade bedʼeaikaude awuara berabarisi. Mebẽã Hoskinbara jarasi: «Maʉ̃ pastorʼʉ̃me bedʼeanʉmaside, jipa kĩrʉ totosita akʉza iyi wãbʉrʉdera puerta bera ãrĩsita kĩrʉbiba».

Pastorba jarasi: «Wãra jaradiade ẽbẽrarã Daizeze odebʉ ẽãraʼa». Mebẽã Hoskinbara abarika imitia panʉ ẽ basi. Iyara krĩchasi: «Mʉ̃mara, mʉ̃ra bedʼeanʉmasi ẽbẽra Daizeze odebʉ ẽ ʉ̃me».

Nrʉema maʉ̃ pastorbara ẽbẽrarã iyi iglesiade eda wãpanʉʼa mʉ̃ ʉ̃rʉ jarasi: «Mʉ̃ra jipa sewa nebʉra omiata akʉza mʉ̃ta pʉwʉrʉde ẽbẽra baduba ũdudara, põgaba batadaibarabasita». Mebẽã Hoskinʼra mawũã jarasidaidu jipa pera ẽ basi, awuarabʉrʉ audre jaradiasi ẽbẽrarã kabanaʼa Daizeze Bedʼea ʉ̃rʉ. Mebẽãba jarasi: «Mʉ̃ra mejãcha sobiabʉ maʉ̃ pʉwʉrʉde ẽbẽra bioʼa jaradiasi baera. Amiña ʉ̃kʉrʉ ẽbẽrarãbara mʉ̃aʼa jarasida: Bʉra wãrĩnu Daizeze odebema, maʉ̃ kʼãrẽa bʉa nekʼãrẽ baduta nesidabʉbʉrʉ daiʼa jarada».

DOBAɄBA AKɄZA MEBẼRÃBAWARAɄBA DAIZEZE BEDʼEA Ʉ̃RɄ KʼAWUAITA

Daizeze ʉ̃rʉ audre kʼawuadamarẽã, Daizeze Bedʼea Kʼawuabarirabara ¡Despertad! kartade eda bʉsida bedʼea widibʉta akʉza panʉbʉta Daizeze Bedʼeadeba. Akʉza warraraitara basi programa «Juvenile Bible Study» (Español bedʼeade Estudio bíblico para los jóvenes), maʉ̃ne edabasi bedʼeara widibʉta. Yibariraba ãyi warrarabawaraʉba ãbaʉba akʉdamarẽã. Yibarirabara widipanasi ãyi warrarãra, mõbe kʼarebapanasi maʉ̃ widibʉra Daizeze Bedʼeade jʉrʉdamarẽã. Bari jaraita ʉ̃kʉrʉ widibasi: «¿Daizeze Bedʼeabara sõbe libro erbʉ?», maʉ̃ra zare ẽ basi kʼawuaita. Maʉ̃ awuara warrara zowaĩnĩgʉa erpanamarẽã widipanasi: «¿Kristiano wãrĩnuʼarabara jʉ̃ãbaibaraka pẽwãnamarẽã?».

Daizeze Bedʼea Kʼawuabariraitara libro audre kʼawuabarita osida, maʉ̃ libro trʉ̃ra «Estudios avanzados sobre el Plan Divino de las Edades», maʉ̃nera widita mejãcha erbasi. Maʉ̃ra jidasida libro yi nããrabema Estudios de las Escrituras debemaneba. Maʉ̃ kʼareba ũmeba ẽbẽra mejãchaʉta kʼarebasi. Mamina 21 diciembre 1921ne jarasida maʉ̃ra widita wua oda ẽ baita. ¿Kʼãrẽa?

LIBRO YIWIDITA

Libro karta *El Arpa de Dios* ingle bedʼeade.

Karta zakeba jarabʉta kʼãrẽta leibarata.

Karta zakerata bedʼea widibʉ edabʉta.

Mebẽrã yi nãã edebʉbara krĩchapanasi yi ʉ̃rabʉrʉ Daizeze Bedʼea kʼawuanʉmʉrabara nesidapanasita arare arare kʼawuadamarẽã. Maʉ̃ kʼarea ãyara noviembre 1921de osida libro The Harp of God (1925de español bedʼeade osida El Arpa de Dios). Ẽbẽrarã Daizeze Bedʼea ʉ̃rʉ audre kʼawuakĩrãpananabara libro erba kʼãrãpe bʉbisida ãyi trʉ̃ta, mawũã kʼawua jʉ̃drʉita, maʉ̃ kurso trʉ̃ra The Harp Bible Study Course. Maʉ̃ librodeba maʉ̃ra ẽbẽrarãbara biʼia kʼawuabaibarabasi «Daizezebara kʼãrẽ nebiata azekĩrãbʉ» ʉ̃rʉ. Mamina ãyara dobaʉba kʼawuaibarabasi ãyi deda. ¿Sãwũã dobaʉba Daizeze Bedʼea ʉ̃rʉ kʼawuaibarabasi?

Ẽbẽrarãba libro jidabasidera maʉ̃ libroeda ãba diapanasi karta zaketa, maʉ̃ne jarabasi kʼãrẽ paginarata leibarabasita. Awuru semananera ãyaʼa diapanasi awuru karta zaketa, maʉ̃ne widibasi bedʼearata iya leda ʉ̃rʉ akʉza maʉ̃ jõita jarapasi kʼãrẽta leibarabasita awuru semananera.

Mawũã obasi 12 semanabayeda, maʉ̃ra karta zakerata zõrãrãba akʉza mebẽã kayapanʉraba zokʼapanasi. Mebẽã Anna Gardner (Pensilvania) Estados Unidosdebemaba kĩrãbebʉ: «Mʉ̃ mebẽã Thaylera wãbe ẽ basi, mawũãsidu libro El Arpa de Dios dedeka jʉ̃drʉsidadera, mʉ̃ mebẽãʼa jarasida karta zaketa bʉmarẽã, mawũã audre jaradiaseabasi Daizeze ʉ̃rʉ, semanaza karta zakerata zokʼaibarabasi baera». Semana 12 berabarida tẽã, mebẽrãbara ẽbẽrarã libro erpanana deidu akʉ jʉ̃ẽbasi audre jaradiaita.

TRAJO MEJÃCHA OIBARATA

Poaga 1921 jõbodoarera mebẽã Joseph Rutherfordʼbara mebẽrã kongregasionebema jõmaʉʼa zokʼasi karta aba, maʉ̃ne jarasi: «Ewari jõbodoare jaradia zebʉrʉmina, naʉ̃ poagade jaradiabʉ kĩrãkʼara jaradiadakabasita». Akʉza iya jarasi: «Audre nesidapanʉ nejaradiabarirata». Mawũã aripe osida mebẽrãbara. Poaga 1922dera mebẽrãra perada ẽ basi jaradia wãita Daizeze Nokʼo ʉ̃rʉ.

Neũdukʼawuara zowaĩnĩgʉa erbʉta

Daizeze Bedʼea Kʼawuabarirabara yiya yi kʼarebapanʉneba yiya yi kãgata ũdubisida akʉza ãyira bedʼea zroma zebʉrʉdebida mebẽãra kĩrãkʼa panasi, naʉ̃ nebʉraba jara ũrĩbibʉ kĩrãkʼa (Prov. 17:17).

Martes 31 mayo 1921ne Masacre Racial berabarisi pʉwʉrʉ abaʉde yi trʉ̃ Tulsa (Oklahoma) Estados Unidosdebemata. Maʉ̃ ewaride ẽbẽra paima aba karselde bʉesidata, jarasida baera maʉ̃ ẽbẽraba ẽbẽra wẽrã torroabʉta neida okĩrãbasita. Maʉ̃ kʼarea 1.000 ẽbẽrarã torroabʉta yõena zesida ẽbẽrarã paimaraʉ̃me, maʉ̃ yõra audre eda bawãsi ẽbẽra paima drʉadera, Greenwoodbasi maʉ̃ pʉwʉrʉra. Mama 1.400 deta akʉza de nenedobariramae jõma zrʉgasida. Jenenenabara jarasida ẽbẽrarã 36 beikʉasita mamina audre beiseabasita.

Maʉ̃ drʉade yõbaramasidera, chuasi mebẽã Richard Hillta, iya jarasi iyi pʉwʉrʉ Greenwoodʼde, ẽbẽrarã iyi kĩrãkʼa paimabʉta kʼãrẽta berabarisita. Iya jarasi: «Maʉ̃ ewaridera daira diamasi ãba yi jʉrepanasi. Ãba yi jʉrenʉmana tẽã daibara ũrĩsida põgata bata jirapanabarita». Nrʉema miércoles 1 junione wuabʉrʉ yõtabasi: «Ʉ̃kʉrʉba jarasida, marata beikĩrã ẽ bʉrʉ wãidua ẽbẽrarã kabanata jõma ãba jʉre erbaramʉma». Aramaʉ̃ta mebẽã Richard iyi kimabawara akʉza iyi wũãwũãra juesomabawara ẽbẽra paima kabanabʉma wãsida Tulsa. Mama nokʼorabara zokʼa bʉesida jenenerata yõbarabʉta taubidamarẽã, maʉ̃rabara akʉsida ẽbẽra paimara 3.000 panʉrata.

Mebẽã Arthur Clausʼra ẽbẽra torrobasi akʉza zowaĩnĩgʉabasi. Iya jarasi: «Mʉ̃a ũrĩside pʉwʉrʉ Greenwoodʼde, mejãcha yõbaramʉta akʉza deta babʉekʉabaramʉta, mʉ̃ara akʉ wãsi mebẽã Richard sãwũãbʉ kʼawuaita, iyira mʉ̃ neũdukʼawua biabasi».

Mebẽã Arthurʼra, Richard deda jʉ̃ẽsidera, ũdusi ẽbẽra torro mebẽã de kʼawabemata põgaeda edanʉmʉta, ẽbẽra mawũã põga abʉbara jarasi mebẽã Arthurʼa: «¿Bʉra kʼãrẽta onʉmʉ kamara?», mawũã jarasi iya krĩchasi baera mebẽã Arthurba babʉekĩrãbasita Richard deta.

Mebẽã Arthurba jarasi: «Mʉ̃a wiña bedʼeata aña jarasibʉrʉ, maʉ̃ ẽbẽrabara mʉ̃ra põgaba batabʉkasita. Mamina mʉ̃ara jarasi maʉ̃ ẽbẽraʼa: mʉ̃ra jipa Richard neũdukʼawuata, adewara zema bio zebasita iyi dedara». Maʉ̃ tẽã maʉ̃ ẽbẽraʉ̃meba Richard deta bia akʉsida babʉeda ẽ marẽã.

Arthur Clausba libro El Arpa de Dios zokʼasi Daizeze Bedʼea jaradiaita warrara 14 panʉra.

Maʉ̃ tẽã mebẽã Arthurbara ũrĩsi mebẽã Richard ẽbẽra kabana ãbabʉmae erbarabasita. Akʉza ũrĩsi gorogorora buru Barretʼba kartata bʉ ẽ basibʉrʉ miõta aña wãbe ẽ basita mamaʉ̃bara, mõbe Arthurʼba jarasi: «Mejãcha jʉrʉibarabasita gorogorora buru ũduita. Maʉ̃ gorogorora buru ũdusidera mʉ̃ara jarasi: Richardʼta iyi mebẽrãbawara deda edekĩrãbʉta. Mõbe gorogorora burubara jarasi: ¿Bʉa deda edera, ãya jõma nesidabʉra jõma diaika? Aramaʉ̃ta mʉ̃a jarasi: Ãya nesidabʉra jõma diaita».

Mõbe gorogorora buruba karta bʉda tẽã junea, mebẽã Arthurʼra wãsi ẽbẽrarã paima ãba yi jʉrepanʉma, mebẽã Richard akʉza iyi mebẽrãbawara jʉrʉde. Arthurʼba jarasi: «Mʉ̃ mainʉ jʉ̃ẽside gorogoro abaʉba jarasi: Wãrĩnu naʉ̃ kartara gorogorora buruba zokʼasika jipa. Adewara jarasi naʉ̃ ẽbẽrarãtrʉ nããra ãĩ wãñi wuabemaraira». Maʉ̃are mebẽã Arthurʼra yi ũdusi mebẽã Richardʼʉ̃me akʉza yi mebẽrãʉ̃me maʉ̃ tẽã mebẽãbara iyi deda jõma edesi.

Arthurbara kʼarebasi mebẽã Richardʼta yi mebẽrãbawara bebʉde ba ẽ marẽã. Mebẽã Arthurba odadeba yiza biata ũdubisi ẽbẽrarã akʉza mebẽrãra. Arthurba jarasi: «Ẽbẽra torro mʉ̃a põgaeda ũdudara, Daizeze Bedʼea kʼawua jʉ̃drʉsi. Ẽbẽrarãba mejãcha kʼawuakĩrãbasi Daizeze Nokʼo ʉ̃rʉ, ũdusida baera dayirãba jõma daucha akʉbʉta akʉza Jeowa pʉwʉrʉdera yiya yi kãga ũdubipanʉta».