Lepanʉraba Widipanʉta

¿Kʼãrẽa 2 Samuel 21:7-9 bayeda jarabʉ Davidba so borekea akʉsita Mefibósetʼta, mamina tẽã jarabʉ Davidba diasita Mefibósetʼra beadamarẽã?

Ẽbẽraba naʉ̃ testo lebʉrʉde naʉ̃ta widiseabʉ. Mamina wãrĩnubaira basi ẽbẽra ũme iyabaʉ trʉ̃ erbʉta: Mefibóset. Dayirãbara naʉ̃ nebʉra ʉ̃rʉ krĩchadara nebia kʼawuaseabʉ.

Nokʼo Saúlbara warra siete erbasi, maʉ̃ awuara kau ũme erbasi. Yi warra nããbemara Jonatánbasi, maʉ̃ tẽã awuru warra erbasi, yi trʉ̃ra Mefibósetʼta. Mamina tẽã yi warra Jonatánta warra barasi, iya trʉ̃gasi Mefibóset. Mawũẽra naʉ̃ba jarakĩrãbasi Saúl warrata akʉza yi nietoba iyabaʉ trʉ̃ta erbasita.

Mamina, ¿kʼãrẽa Davidbara diaisi iyi gorogorora beadamarẽã? Gabaonitarara basi israelitarabawara, mamina ewari aba nokʼo Saúlba jʉra jʉ̃drʉsi gabaonitarata, maʉ̃ kʼãrẽa iya jõma beakĩrãbasi, mamina Saúlbara mawũã obe ẽ basi. Josué ewaride israelitarara bedʼea abarika zesida baera gabaonitabawara yõna ẽ baita (Jos. 9:3-27).

Saúlbara maʉ̃ta bia kʼawuabasimina akʉza wawiaibarabasimina iyara beakĩrãbasi gabaonitarara. Maʉ̃ kʼarea Saúlta yi mebẽrãbawara miabeamiabasida (2 Sam. 21:1). Davidba zokʼa jʉ̃drʉside ʉ̃kʉrʉ gabaonita beida ẽãba jarasida kʼãrẽta sãwũã berabarisita. Aramaʉ̃ta Davidba widisi, kʼãrẽta oseabʉta Saúlba mawũã nemitia oda kʼarea. Ãyara platara widida ẽ basi, awuarabʉrʉ widisi diamarẽã Saúl warra sietebʉta (Núm. 35:30, 31). Davidbara mawũã osi ãya widikʉde (2 Sam. 21:2-6).

Maʉ̃ ewaridera Saúlta akʉza yi warra Jonatánta yi beimabasi. Mamina Jonatán warra Mefibósetʼra zokʼaibasi. Iyira wũãwũã zakedaʉba arrengabasi, maʉ̃ kʼarea wãbe ẽ basi gabaonita bea baramʉnera yi zezona Saúlʼʉ̃me. Adewara Davidʼra bedʼea abarika zesi Jonatánʼʉ̃me, ewari jõma akʉbaita yi mebẽrãra, maʉ̃ kʼarea Davidbara akʉibarabasi Mefibósetʼta (1 Sam. 18:1; 20:42). Daizeze Bedʼeabara jarabʉ naʉ̃ta David ʉ̃rʉ: «Mamina nokʼoba so borekea akʉbasi Mefibósetʼta (Jonatán warrata, Jonatánʼra Saúl warrabasi). Davidta Jonatánʼʉ̃me bedʼea abarika zesida Jeowa daidu» (2 Sam. 21:7).

Mawũẽra osi gabaonitaraba wididata, diasi Saúl warra ũme, maʉ̃ne basi Mefibósetʼta akʉza Saúl nietora juesomabʉta (2 Sam. 21:8, 9). Mawũã Davidbara ara osi Saúlba nemitia odara.

Leybara jarabasi warrarara bei ẽ baibarabasita yibariraba nemitia oda kʼareara. Naʉ̃ba dayirãʼa ũdubibʉ, Saúl warra ũmebʉta akʉza yi nieto juesomabʉta beisibʉrʉ naʉ̃raba kʼarebasidabaibara Saúlba nemitia omarẽã. Akʉza naʉ̃ leyba jarabasi, ẽbẽra aba abaka bei barabasita iya nemitia oda kʼarea (Deut. 24:16). Naʉ̃ba dayirãʼa krĩchabibʉ Saúl mebẽrã sietebʉra beisidata ãyabida gabaonitarata beasida baera. Mawũã berabarisi ãya nemitia oda kʼarea.

Mawũẽrã, ¿kʼãrẽta jaradiabʉ naʉ̃ba? Miõba jarabe ẽ: «Mʉ̃a nemitia osi wuabemaba omarẽã jarasi baera». Awuarabʉrʉ jõmaʉ̃ba odaibara naʉ̃ testoba jarabʉde: «Biʼia akʉra bʉ jĩrʉba sama nebʉta, mawũãra bʉra ode bia wãñi» (Prov. 4:24-27; Efes. 5:15).