¿Kʼawuabasika?

¿Daizeze Bedʼea bʉsi ewaridera sãwũã kʼawuapanasi sõbede jʉ̃drʉbasita jedekota akʉza poagata?

EBREORÃRA Jeowaba Drʉa bia diaya adamaebaside, ãyara kʼawuapanasi poagara jʉ̃drʉdogota ãyi ne u jʉ̃drʉbʉrʉde. Maʉ̃ra dayirã ewaridera septiembre akʉza octubrede berabaribʉ.

Ẽbẽrarãbara jedeko abaʉba sõbe ewari abʉ kʼawuaira Jedekota akʉpanasi akʉza poaga abaʉba sõbe ewari abʉ kʼawuaita Ũmadaʉta akʉpanasi. Mamina poaga abaʉba ewari sõbe abʉ kʼawuaita akʉbe ẽ basi jedekodeba, naʉ̃bara ewari wiña abasi baera. Maʉ̃ba akʉibarabasi Jedeko akʉbʉdeba akʉza Ũmadaʉ akʉbʉdeba ewari abarika diamarẽã. Maʉ̃ abarika zebira naʉ̃ta oseabasi, ewarita audu bʉeseapanasi mawũã ẽ bʉrʉ maʉ̃ra ewarira waebʉrata ãba zebibasi jedeko awuruta bʉeita. Maʉ̃ mawũã obʉrʉba kʼarebabasi ewari jõmaʉ̃nẽ kʼawuaita sõbede ne uibarabasita akʉza poagaza iyabaʉ ewaride ne uita.

Moisés ewaridera Jeowaba jarasi iyi pʉwʉrʉʼa, poaga nekʼãrẽ Daizezedebema oira jʉ̃drʉibarabasita jedeko abibdeba mawũã ẽ bʉrʉ nisánʼneba. Dayirã ewaridera naʉ̃ra marzo akʉza abrilde jʉ̃drʉibarabasi (Éx. 12:2; 13:4). Naʉ̃ jedekode ãya opanasi piesta sebadadebemata (Éx. 23:15, 16).

Ẽbẽra naʉ̃ ʉ̃rʉ audre kʼawuabʉ yi trʉ̃ Emil Schürerba jarasi: «Ewari waebʉrata ãba zebi kʼãrãpe jedeko awuru bʉei kʼawuaira zare ẽ basi. Adewara jarasi, poagaza ũdubʉ ewari aba 12 ora ʉ̃nabʉta akʉza diamasita 12 orabʉta, maʉ̃ berabarida tẽã jedeko arigue wari ʉ̃tʉ zebʉrʉde jedeko Nisánʼne, opanasi Pascua piestara (14 Nisánʼne). Poaga jõbodoare ãya ũdubasibʉrʉ Pascua piestara wuarebema poagadera iyabaʉ ewari jedeko Nisánʼne bae ẽ baita, mama ãya kʼawuapanasi jedeko audu bʉeibarabasita mawũã daucha zemarẽã» (Historia del pueblo judío en tiempos de Jesús 175 a. C. - 135 d. C., traducción de J. Cosgaya y A. Piñero).

Jeowa ʉ̃rʉ Kʼawuabipanʉrãbara abarika opanʉ kʼawuaita, poagaza kʼãrẽ ewaride oita Jesuba iyi bei nãã yiko odata. Maʉ̃ra berabaribʉ marzo mawũã ẽ bʉrʉ abrilde, kalendario ebreodera 14 nisán. Poagaza naʉ̃ ewari zei nãã jarakapanʉ kongregasionza.a

Mamina, ¿sãwũã kʼawuapanasi ebreorabara jedeko aba sõbede jʉ̃drʉbasita akʉza sõbede jõbasita? Idi ewade dayirãbara akʉseabʉ kalendariota mawũã ẽ bʉrʉ selularde akʉseabʉ. Daizeze Bedʼea bʉsi ewaribasidera naʉ̃ kʼawuaira zareabasi.

Noé ewaribasidera krĩchapanasi jedeko abaʉbara ewari 30 abʉta (Gén. 7:11, 24; 8:3, 4). Mamina tẽã ebreora ewaritara jedeko abaʉbara ewari 30 aba ẽ basi. Ebreoraitara jedeko abara jʉ̃drʉbasi Jedeko yi zake ʉ̃tʉ zebʉrʉdeba.

Davidba Jonatánʼʉ̃meba bedʼeasida jedeko aba sõbede jʉ̃drʉbʉ ʉ̃rʉ, jarasidade, nu jedeko yizakera (1 Sam. 20:5, 18). Mawũẽra siglo 11de ẽbẽrarãba naena jʉachapanasi sõbe ewari berabaribasita jedeko yi zake berabaridadeba ababema ʉ̃tʉ zeiyeda. Mawũẽra, ¿sãwũã kʼawuapanasi israelitarabara sõbede jʉ̃drʉbasita jedeko aba? Misná, libroba erbʉ judiora ley jõma akʉza jara ũrĩbibʉ naʉ̃ta, Jedeko 7 bayeda Sanedrínʼra (juezʼra judiorata) ãba yi jʉrepanasi jedekoza ewari 30de. Ãya jarapanasi kʼãrẽ ewarideba jʉ̃drʉibasita yi wuarebema jedekora, ¿sãwũã kʼawuapanasi maʉ̃ra ãyara?

Yumakẽrãbara akʉpanasi sama ʉ̃tʉbʉta, mõbe mamaʉ̃ba akʉpanasi ʉ̃ta, ũduita Jedeko yi zake sõbede ʉ̃tʉ uruta. Ãya aba abakaʉba jarakapanasi Sanedrínʼa ãya ũdudata, mõbe ãyidebema bioba iyabaʉta ũdusibʉrʉ, Sanedrínba jarakabasi pʉwʉrʉʼa jedeko wuarebemara jʉ̃drʉibasita. ¿Mamina kʼãrẽta berabaribasi jãrãraba Jedeko yi zaketa ũdubi ẽ basibʉrʉ? Ãyara jarakapanasi pʉwʉrʉʼa naʉ̃ jedekodera ewari 30basita.

Misnába jara ũrĩbibʉ Sanedrínʼraba jarakabaside pʉwʉrʉra sõbede wuarebema jedeko jʉ̃drʉita ãyara tʉbʉta pʉreabipanasi katuma Olivosde, Jerusalén kʼawa. Adewara pʉwʉrʉ yi ʉ̃tʉbʉmaebida tʉbʉta pʉreabipanasi jõmaʉ̃ba kʼawuadamarẽã. Mawũã opanʉta tẽãne zokʼa jʉ̃drʉsida ẽbẽrata pʉwʉrʉra jarakadamarẽã. Mawũã jõmaʉ̃ba iyabaʉ ewaride oseabasi piestata.

Rekuadro naʉ̃ artikulodebemaba kʼarebaseabʉ bia ũrĩta sãwũãbasita jedekorata, yi piestarata akʉza sõbede ne uibarabasita israelitara ewaribasidera.