Jesukristo dayirã akʉbariare panadrʉ

1. ¿Idi ewadera kʼãrẽta kãgabʉ Jeowabara?

IDI ewadera Jeowabara kãgabʉ bedʼea bia Daizeze Nokʼo ʉ̃rʉ naʉ̃ drʉa jõmaʉ̃mae jaradiamarẽã (Mar. 13:10; 1 Tim. 2:3, 4). Mawũã jaradiaira Jeowadeba zebʉ, maʉ̃ra iyitara yibia baera jidasi yi Warrata dayirã akʉmarẽã. Yi jaradiapanʉrabara biʼia opanʉ baera dayirãba ĩjãseabʉ Daizeze ewari zebʉrʉdera Jeowara mejãcha sobiaita maʉ̃ trajo kʼarea (Mat. 24:14).

2. ¿Kʼãrẽta akʉdayi naʉ̃ artikulodera?

² Naʉ̃ artikulode akʉdayi Jesuba sãwũã zokʼabʉta «iyi nezokʼara jipabʉra akʉza bia krĩchabʉrata» dayirãʼa nekʼãrẽ Daizezedebemata diamarẽã akʉza jaradiamarẽã sãwũã daucha jaradiaita Daizeze bedʼeata naʉ̃ drʉa jõmaʉ̃mae (Mat. 24:45). Adewara akʉdayi sãwũã aba abakaʉba kʼarebaseabʉta Jesuta akʉza nezokʼara jipabʉra akʉza bia krĩchabʉrata.

JESUBA AKɄBɄ SÃWŨÃ DAIZEZE BEDʼEA JARADIAPANɄTA

3. ¿Kʼãrẽta zokʼamarẽã diasi Jesuara?

³ Jesuba akʉbʉ sãwũã Daizeze bedʼea jaradiapanʉta, ¿maʉ̃ra sãwũã kʼawuapanʉ? Iyi ʉ̃ta wãi nãã, ãba yi jʉresi yi kʼaidubemabawara katuma Galileade mõbe naʉ̃ta jarasi: «Daizezebara zareata mʉãã diasia jõma mʉã erunʉmamarẽã ʉ̃tre nʉmʉta druadʼe nʉmʉta». Akʉza jarasi: «Mawũẽ wãũdua, mobe ĩjãnamarẽã mʉnebemata jaraudua druaza zhãrã jõmaʉ̃ã» (Mat. 28:18, 19). Maʉ̃ba ũdubibʉ Jeowaba Jesuʼa zarea diasita akʉmarẽã Daizeze bedʼea jaradiapanʉta.

4. ¿Sãwũã kʼawuapanʉ Jesubara idibasidu akʉbʉta Daizeze bedʼea jaradiabʉra?

⁴ Jesuba jarasi Daizeze bedʼeara naʉ̃ drʉa jõmaʉ̃mae jaradiadaibasita akʉza iyi kʼaidubemaraʼa jarasi: «Mʉrã marã bawara ewariza bʼaya ẽjũã jõñeẽna» (Mat. 28:20). Naʉ̃ bedʼeaba ũdubibʉ Jesubara idibasidu akʉnʉmʉta Daizeze bedʼea sãwũã jaradiapanʉta.

5. ¿Sãwũã kʼarebapanʉ bedʼea Salmo 110:3de jarabʉ aripe berabarimarẽã?

⁵ Jesubara kʼawuabasi naʉ̃ drʉa jõbodoarera mejãcha bʼaibasita ẽbẽrarã Daizeze bedʼea jaradiapanʉrata akʉza kʼawuabasi aripe berabaribasita naʉ̃ bedʼeata: «Bʉa bʉ gorogororata zokʼabʉrʉde bʉ pʉwʉrʉrabara okĩrãnañi bʉa jarabʉta» (Sal. 110:3). Bʉa bedʼea bia Daizezedebemata jaradiabʉbʉrʉ kʼarebabʉ Jesuta akʉza iyi nezokʼara jipabʉra akʉza bia krĩchabʉrata, adewara kʼarebabʉ maʉ̃ propesia aripe berabarita. Daizeze bedʼeara jaradiapanʉ naʉ̃ drʉa jõmaʉ̃mae, mamina edaʉde bedʼea zromata ũdupanʉ.

6. ¿Saʉ̃ yi nããbema bedʼea zroma dayirãba ũdupanʉra Daizeze bedʼea jaradiapanʉne?

⁶ Yi bedʼea zroma nããrabemara naʉ̃, Daizeze bedʼeara idu jaradiabida ẽ, Daizeze ʉ̃rʉ ĩjã ba kʼãrãpe i kayirua bedʼeabʉraba akʉza politikoraba, adewara religion nokʼoraba sewidata jarapanʉ Daizeze bedʼea jaradiabʉ ʉ̃rʉ. Dayirã mebẽrãba akʉza dayirãʉ̃me trajapanʉraba ũrĩnara maʉ̃ra ẽbẽrarãba jarapanʉta, kãgada ẽ bayi dayirãba Daizeze bedʼea jaradiadamarẽã. Ʉ̃kʉrʉ drʉadera dayirã nejʉrarabara pẽwãpanʉ, popanʉ akʉza karselʼeda bʉepanʉ. Dayirãra maʉ̃ kʼarea krĩcha zroma obeda ẽ Jesuba jarasi baera: Mara jõmaʉ̃ta: «juradʼaya mʉ kʼarea» (Mat. 24:9). Dayirã mawũã jʉrapanʉba ũdubibʉ Jesude kĩrãkʼa opanʉta akʉza Jeowaba dayirã biʼia akʉbʉta (Mat. 5:11, 12). Diaruba zokʼabʉ dayirãta pẽwãnamarẽã, mamina iyira Jesuira mejãcha zarea barabʉ ẽ. Jesu kʼarebadeba Daizeze bedʼeara naʉ̃ drʉa jõmaʉ̃mae jaradiapanʉ.

7. ¿Kʼãrẽba ũdubibʉ Apocalipsis 14:6, 7ba jarabʉra aripe berabarinʉmʉta?

⁷ Yi ababema bedʼea zromara, naʉ̃ drʉa jõmaʉ̃mae ẽbẽrarã bedʼea awuara awuaraka bedʼeapanʉ. Jesuba apostol Juanʼa ũdubidaba jara ũrĩbisi naʉ̃ drʉa jõmaʉ̃nẽ bedʼea awuara awuarakabʉba iduaribi ẽ baibasita Daizeze bedʼea jaradiaita (akʉra Apocalipsis 14:6, 7). ¿Kʼãrẽta opanʉ maʉ̃ bedʼea zroma ũdubʉidu Daizeze bedʼea jaradia wãita? Dayirã pagina internetʼne jw.org de bʉepanʉ kartara bedʼea 1.000 audre awuara awuarakabʉta, adewara Zõrãrã Burubiaraba iduaribisida bedʼea 700 audre tradusidamarẽã libro Bʉra ewari jõmaʉ̃nẽ sobia baseabʉ. Maʉ̃ra yibia Daizeze Bedʼea kʼawuabi jʉ̃drʉita akʉza bʉ bideorata ũrĩ ẽ bʉraita, adewara kartara brailede dauberrebʉraita. Mawũã obʉba ẽbẽra mejãchaʉba Daizeze Bedʼea ʉ̃rʉ kʼawuaseapanʉ. Dayirãba ũdupanʉ propesiara sãwũã aripe berabarinʉmʉta: Ẽbẽrarã «bedʼea awuara awuarakachubeba pʉwʉrʉ biodebemaba» kʼawuapanʉ wãrĩnuta Daizeze Bedʼea ʉ̃rʉ (Zac. 8:23; Sof. 3:9). Naʉ̃ra wãrĩnu berabaribʉ Jesuba biʼia akʉbʉ baera.

8. ¿Daizeze bedʼea idibasidu jaradiapanʉne, kʼãrẽta ũdupanʉ?

⁸ Idi ewadera 8 millone audre bʉ Daizeze organizasione panʉrata, maʉ̃rãra 240 pʉwʉrʉ awuara awuarakadeba zebʉ. Akʉza poagaza mejãcha buru kʼoepanʉ. Daizeze pʉwʉrʉde ẽbẽrarã mejãchabʉmina, audre yibia ãya kʼãrẽ nebia ũdubipanʉta. Ãya maʉ̃ra ũdubipanʉ Daizeze Bedʼeaba jarabʉ kĩrãkʼa «krĩcha yiwidita» erpanʉ baera (Col. 3:8-10). Ãyidebema mejãchaʉba idubʉsida ãya nãã obadata. Bari jaraita, yõmiabadata, ãyi kakua aña obadata akʉza wuabemara mitia akʉbadata. Aripe berabarinʉmʉ propesia Isaías 2:4ba jarabʉta: «Wua yõ kʼawuada ẽ bayi». Zarea opanʉbʉrʉ nebiata oita, ẽbẽrarãta zekĩrãnañi Daizeze organizasionma, adewara ũdubidayi dayirãra wãrĩnu Jesu kʼaidupanʉta (Juan 13:35; 1 Ped. 2:12). Naʉ̃ra jõma aripe berabaribʉ Jesuba kʼarebabʉ baera.

JESUBA JIDABɄ NEZOKʼATA

9. Mateo 24:45-47 bayeda jarabʉdera, ¿kʼãrẽta berabarita jarasi Jesubara ewari jõbodoarera?

⁹ (Akʉra Mateo 24:45-47). Jesuba jarasi ewari jõbodoarera jidaita «nezokʼara jipabʉra akʉza biʼia» krĩchabʉrata nekʼãrẽ Daizezedebema diamarẽã. Maʉ̃ba jʉ̃ãbʉ naʉ̃ra nezokʼarãra idibasidu zarea trajadamarẽã. Jesubara jidasi ẽbẽrarã ʉ̃ta wãiranebemata wiña, «yiko diamarẽã nekʼobari ũmadaʉde» Jeowa odepanʉra akʉza ẽbẽrarã yi Daizeze ʉ̃rʉ kʼawuakĩrãpanʉra. Naʉ̃ra ẽbẽrabara krĩchada ẽ ãyira wuabemaraba «ĩjãbʉ yibarita» (2 Cor. 1:24). Awuarabʉrʉ kʼawuapanʉ Jesubʉrʉ zokʼabʉta iyi pʉwʉrʉra (Is. 55:4).

10. ¿Saʉ̃ libro potodebʉba kʼarebasi bʉa Daizeze ũdukʼawuaita?

¹⁰ 1919deba yi nezokʼa jipabʉrabara kartarata mejãcha opanʉ ẽbẽrarãba kʼawuadamarẽã Daizeze ʉ̃rʉ. 1921ne nezokʼa jipabʉba osi ingle bedʼeade libro El Arpa de Dios, ẽbẽrarã Daizeze Bedʼea jara ũrĩbita. Ewari awuara wãne librorasida awuara owãsida naʉ̃ra librorãra naʉ̃ra basi: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Qué enseña realmente la Biblia?, ¿Kʼãrẽta jaradiabʉ Daizeze Bedʼeabara?, mawũã ẽ bʉrʉ Bʉra ewari jõmaʉ̃nẽ sobia baseabʉ. Naʉ̃ra librorãra osida dayirãba ẽbẽrarãta Daizezema wemarẽã akʉza maʉ̃ra librorãra diapanʉ dayirãba nesidabʉ ewaride.

11. ¿Kʼãrẽa yibia dayirã jõmaʉ̃ba erbaita nekʼãrẽ Daizezedebemata?

¹¹ Daizeze ʉ̃rʉ kʼawuapanʉrabʉrʉ nesidabʉ ẽ Daizeze ʉ̃rʉ biʼia kʼawuaira, jõmaʉ̃ba nesidapanʉ Daizeze ʉ̃rʉ biʼia kʼawuaira. Apostol Pabloba bʉsi: «Yiko biara ẽbẽrarã biʼia kʼawuabʉraita». Akʉza jarasi daya kʼawuada obʉba kʼarebayi kʼawuaita «kʼãrẽta biata akʉza kʼãrẽta bia ẽãta» (Heb. 5:14). Idi ewadera ẽbẽrarã mejãchaʉba nemitiata obʉ baera, edaʉde zarea baseabʉ Daizezeba zokʼabʉ aripe oita. Mamina Jesuba nekʼãrẽ Daizezedebemata diabʉ dayirãta zarea panamarẽã. Jesu kʼarebadeba yi nezokʼa jipabʉbara obʉ akʉza dedekabʉ nekʼãrẽ Daizezedebemata.

12. ¿Kʼãreta ozebʉda Jesude kĩrãkʼa Daizeze trʉ̃ ʉ̃rʉ ibia bedʼeaita?

¹² Dayirãbara Daizeze trʉ̃ ʉ̃rʉ ibia bedʼeabibʉ Jesuba obada kĩrãkʼa (Juan 17:6, 26). Bari jaraita, 1931ne jidasida trʉ̃ Jeowa ʉ̃rʉ Kʼawuabipanʉrãta. Mawũã ũdubipanʉ kãgapanʉta Jeowa trʉ̃ta akʉza maʉ̃ trʉ̃ra dayirãitara audre yibiata (Is. 43:10-12). Octubre iyabaʉ poagade Daizeze trʉ̃ra ʉ̃tʉ ze jʉ̃drʉsi naʉ̃ karta ingle bedʼeade yi nããbema paginane. Adewara Traducción del Nuevo Mundo, naʉ̃bara Daizeze trʉ̃ra iyi bʉeibaramae bʉesi. Dayirãba obʉra awuarabʉ wuabemara religionba obʉira, ãyara ãĩ bʉebʉ baera Daizeze trʉ̃ra ãyi Daizeze Bedʼeadeba.

JESUBA DAUCHA ERBɄ IYI KʼAIDUPANɄRATA

13. ¿Kʼãrẽba ĩjãbibʉ idi ewadera Jesuba zokʼanʉmʉta «nezokʼara jipabʉrata akʉza biʼia» krĩchabʉrata? (Juan 6:68).

¹³ Iyi nezokʼara jipabʉraneba Jesuba osi iyi kʼaidubemara Daizeze organizasione daucha bamarẽã, mawũã jõmaʉ̃ba daucha yiwidʼidamarẽã Daizezeʼa nama Egorode. ¿Kʼãrẽta krĩchabʉ bʉara naʉ̃ organizasion ʉ̃rʉra? Pedro kĩrãkʼa krĩchabʉbaibara Jesuʼa naʉ̃ta jaraside: «Nokʼó, ¿daira kʼaima wãĩpe? Bʉabʉrʉ bedʼeata erubʼʉa» bʼai jõ ẽ nebemata (Juan 6:68). ¿Kʼãrẽta berabarikasi dayirãra dayirã organizasionta ũdukʼawua ẽ basibʉrʉ? Maʉ̃ organizasioneba Jesuba dayirã diabʉ nekʼãrẽ Daizezedebemata akʉza dayirãʼa jaradiabʉ sãwũã nejaradiabari bia bʼaita. Adewara kʼarebabʉ nebiata owãita, mawũã Jeowaʼa sobiabita (Efes. 4:24).

14. Bʉ Daizeze organizasione bʼaibara, ¿sãwũã kʼareba zebʉrʉ naʉ̃ kaya COVID-19 nʉmʉnera?

¹⁴ Ewari zarea zebʉrʉdera Jesuba jaradiabʉ kʼãrẽta oita. Bari jaraita kaya COVID-19 jʉ̃drʉsidera, ẽbẽra mejãchaʉba kʼawua ẽ basi kʼãrẽta oita. Mamina Jesuba jaradiasi dayirãba kʼãrẽta oseabʉta. Dayirã organizasionba ũrãgʼasi ẽbẽra mejãcha bʉmae tapaboka jʉ̃marẽã akʉza wuabemaraneba jĩga bamarẽã, mawũã kaya ẽ baita. Akʉza zõrãrã kĩrãbebisida akʉdamarẽã yi nejaradiabariraba kʼãrẽta nesidabʉta akʉza sãwũã sentipanʉta (Is. 32:1, 2). Adewara Zõrãrã Burubiaba bedʼea jarabʉba ũrãgʼasi akʉza mejãcha zarea diasi dayirã.

15. ¿Naʉ̃ kayadera kʼãrẽta jaradiasida akʉza kʼãrẽ nebiata ũdupanʉ maʉ̃neba?

¹⁵ Naʉ̃ kayadera jaradiasida sãwũã oita ãba yi jʉreide akʉza jaradia wãine. Mesera ojʉ̃drʉsida ãya jaradata, ãba yi jʉresida internetʼneba akʉza telepononeba adewara kartaraneba jaradia jʉ̃drʉsida. Jeowaba mejãcha kʼareba zebʉrʉ dayirãba ozebʉrʉra. Sukursalʼraba jarasi Daizeze ʉ̃rʉ jaradiapanʉrãra audre eaba wãta. Naʉ̃ ewaridera mebẽrã mejãchaʉba jara ũrĩbibʉ ãya sãwũã Daizeze Bedʼea awurura jaradiabʉ ʉ̃rʉ (akʉra rekuadro «Jeowaba mejãcha kʼarebabʉ jaradiapanʉne»).

16. ¿Kʼãrẽta wãrĩnu soiduba ĩjãnañi dayirãbara?

¹⁶ Ʉ̃kʉrʉ mebẽrãba krĩchaseabasi Jeowa organizasionbara jʉra kʼawua bʼai ʉ̃rʉra aukʼara jaranʉmʉta. Mamina dayirãba ũdu zebʉrʉ ãya jaradiabʉra biga basita dayirãita (Mat. 11:19). Dayirãba bia krĩchabʉbʉrʉ Jesu dayirã akʉbariba kãgade bia edebʉta, wãrĩnu soiduba ĩjãnañi nekʼãrẽ ʉ̃ra zebʉrʉdebida Jeowaba akʉza Jesuʼʉ̃meba biʼia akʉita dayirãta (akʉra Hebreos 13:5, 6).

17. ¿Sãwũã sentibʉ bʉra Jesuba bia edebʉ kʼarea?

¹⁷ Mejãcha sobiapanʉ Jesuba dayirãta bia edebʉ baera. Dayirãbʉ organizasionera jõmaʉ̃ta daucha akʉpanʉ. Kʼãrẽ ẽ dayi awuru pʉwʉrʉdebemata, awuru kulturadebemata akʉza awuru bedʼea bedʼeabʉta. Dayirãra biʼia jaradiapanʉ Jeowa ʉ̃rʉ akʉza awurura sãwũã jaradiaibara ʉ̃rʉ. Akʉza dayirã aba abakaʉba zarea opanʉ nebia oita adewara wuabemara kãga ũdubita. Dayirãra mejãchade sobia baseapanʉ Jesuta dayirã akʉbari baera.