Lepanʉraba widipanʉta
¿Kʼãrẽa yumakẽrã «Fulano» abadaba jarasi biga ẽ bʼaita iya nekʼãrẽ bia erbʉra awuru juwade amaeita? (Rut 4:1, 6).
¿Kʼãrẽta berabaribasi yumakẽrã abaʉta wũãwũã neẽãbʉta beira? ¿Kʼãrẽta berabarikasi iyi drʉara? akʉza ¿kʼaiba erbakasi iyi apeyidora wũãwũãta neẽbasibʉrʉ? Maʉ̃ bedʼea widibʉra Jeowaba Moisésʼa ley diadaba panʉsi.
¿Kʼãrẽta berabaribasi drʉara yibarita beisibʉrʉ? Mawũã ẽ bʉrʉ ¿nekʼãrẽ neẽbepe nẽdo bʉesibʉrʉ awurua? Maʉ̃ra, yi mebẽãba mawũã ẽ bʉrʉ yi mebẽrãnebemaba edaseabasi jẽda, mawũã ãyi mebẽrãne erpanaita maʉ̃ drʉara (Lev. 25:23-28; Núm. 27:8-11).
¿Kʼãrẽta opanasi maʉ̃ yumakẽrãta beira iyi apeyido aribia erpanaita? Yi apeyido aribia erpanaira, yi mebẽãra juwa jidaibarabasi yi mebẽã bada kimaʉ̃me, Rut berabarida kĩrãkʼa. Yumakẽrã yi mebẽã beida kimaʉ̃me juwa jidadara wũãwũã baraseabasi maʉ̃ wẽrãʉ̃me, mamina maʉ̃ wũãwũãra iyide ẽ basi, awuarabʉrʉ maʉ̃ wũãwũãra yi mebẽã beidade bʼaibasi, mawũã yi mebẽã beidaba nekʼãrẽ bia erbadara maʉ̃ wũãwũãba erbaibasi iyi juwade. Jeowaba mawũã zokʼadadeba yi pẽdrabida nebiata ũdubasi (Deut. 25:5-7; Mat. 22:23-28).
Krĩchadaya Noemí ʉ̃rʉ. Iyira juwa jidasi yumakẽrã Elimélec abadaʉ̃me. Noemí kima Elimélecta akʉza iyi wũãwũãra ũmepanʉta beiside, maʉ̃neba ʉ̃ta neẽbasi kʼaiba akʉita iyira (Rut 1:1-5). Iyi jẽda Judáeda jʉ̃ẽside Noemíba iyi ãĩgʉ Rutʼa jarasi Boaz jaramarẽã iyi drʉata jẽda edaita, Boazʼra Elimélec mebẽrãnebemabasi baera (Rut 2:1, 19, 20; 3:1-4). Mamina Boazba kʼawuasi yumakẽrã abachuta, iyi trʉ̃ra «Fulanobasi», maʉ̃ yumakẽrãra Noemí mebẽrãnebemaira audre yi kʼaitabemabasi. Maʉ̃bʉrʉ jẽda edaibarabasi maʉ̃ drʉara (Rut 3:9, 12, 13).
Mawũãra nawedara «Fulanobara» kʼarebakĩrãbasi Noemíra (Rut 4:1-4). Fulanoba naʉ̃ drʉara jẽda erbaira, edaibarabasi iyi plataba. Mamina iyira maʉ̃ kʼareara krĩcha oẽbasi Noemíra yõdrarabasi baera wũãwũãra toita, maʉ̃ba iya kʼawuabasi maʉ̃ drʉara iyide bʼaita. Maʉ̃ kʼarea iya krĩchasi Noemíʉ̃me juwa jidaira bigabasita iyita.
Mamina tẽãne Fulanobara krĩchasi maʉ̃ drʉa jẽda edaira biga ẽ basita, iya kʼawuasi baera Rutʼʉ̃me juwa jidaibarabasita. Iya jarasi: «Jẽda edabe ẽ mʉ̃ara, mʉ̃a aduaseabʉ baera mʉ̃a jõma erbʉta» (Rut 4:5, 6). ¿Kʼãrẽa krĩchasi jẽda eda ẽ baita?
Rutʼta Fulanoʉ̃me juwa jidabasibʉrʉ mawũã ẽ bʉrʉ badu awuru yumakẽrãʉ̃me juwa jidasibʉrʉ, maʉ̃ra wũãwũãrabara Elimélec drʉara ãyidebakasi. ¿Sãwũã jõma aduaseabasi Fulanoba erbadara? Daizeze Bedʼeabara jara ẽ, mamina dayirãba nama akʉseabʉ kʼãrẽa mawũã berabariseabasita.
Yi nããbemata, iya Elimélec drʉata edasibʉrʉ, wãrĩnu bʼaira maʉ̃ drʉara iyide ẽ bakasi, iyi platara ewara aduakasi. Awuarabʉrʉ maʉ̃ drʉara Rut wũãwũãrane bakasi.
Yi ũmeta, iyara ne diaibarabasi akʉza akʉibarabasi Noemíta Rutʼʉ̃me.
Yi ũbeata, Fulanota Rutʼʉ̃me wũãwũãra barasidabʉrʉ, maʉ̃ra wũãwũãrabara yi dedeka jidaibarabasi Fulano drʉasida, Fulanoba wũãwũãra erbʉbawaraʉba.
Yi kimareta, Fulanoba iya wũãwũãrata awuara erba ẽ basibʉrʉ iyide arata, iya Rutʼʉ̃me wũãwũãra tobʉrʉrabara, ãyidebakasi Elimélec drʉata akʉza Fulano drʉasida. Iyara iyi drʉara jõma aduakasi akʉza naʉ̃ra wũãwũãrabara Elimélec trʉ̃trʉ erpanakasi iyi trʉ̃ta erpanai kaude. Iya maʉ̃ jõma adu ẽ baya jarasi Boazbʉrʉ jẽda edamarẽã maʉ̃ra. Boazba maʉ̃ra osi Elimélec apeyidota adua ẽ bamarẽã (Rut 4:10).
Fulanoitara audre yibiabasi iyi apeyido yi wũãwũãraba erpanaita akʉza iya nebia erbaita. Fulanora iyikʉza krĩchabasi. Iyi trʉ̃ aribia erbai kaude Fulano trʉ̃ra jipa kĩrãduasida. Adewara aduasi Dayirã ẽdrʉbibarira iyi mebẽrãneba zei badata, mamina Boazbʉrʉ erbesi maʉ̃ nebiara. Fulanobara wuabemarata kʼarebakĩrã ẽ basi baera, nebiata aduasi (Mat. 1:5; Luc. 3:23, 32).