¿Kʼãrẽta oibara buru kʼoeita?

1, 2. Wabida waebʉbʉrʉ buru kʼoeita, ¿kʼãrẽa krĩcha zroma oẽ baibara? (Akʉra poto yi nããrabemata).

BɄTA buru kʼoeita krĩchabʉbʉrʉ maʉ̃ra jipade yibia. ¿Bʉmara bʉra buru kʼoeseabʉka? Mawũã krĩchabʉbʉrʉ bedʼeara zõrãrãbawara, mawũã tẽã asamblea zebʉrʉde buru kʼoeseabʉ. Bʉa mawũã ora mejãcha sobiabayi Jeowaba kãgabʉta obʉ baera.

² ¿Bʉaʼa jarasidaka wabida nekʼãrẽ oibarata buru kʼoeita? Mawũã ẽ bʉrʉ, ¿bʉyikʉza krĩchabarika wabida waebʉta? Maʉ̃ kʼarea mejãcha krĩcha orãra, bʉra buru kʼoeseabʉ zõrãrãbʉsida mawũã ẽ bʉrʉ warrarabʉsida.

«¿KʼÃRẼBA BʼE ẼBAIPE MɄ̃ BURU KʼOEIRA?»

3. (1) ¿Kʼãrẽ bedʼeata widisi yumakẽrã Etiopíadebemabara Felipeʼara? (Hech. 8:36, 38). (2) ¿Kʼãrẽ bedʼeata widiseapanʉ maʉ̃neba?

³ (Akʉra Hechos 8:36, 38). Yumakẽrã Etiopíadebemaba nokʼo wẽrãita trajabʉba Felipeʼa widisi: «¿Kʼãrẽba bʼe ẽbaipe mʉ buru kʼoeira?». Naʉ̃ yumakẽrãra buru kʼoekĩrãbasi mamina, ¿wãrĩnu buru kʼoeseabasika iyira?

4. ¿Sãwũã ũdubisi yumakẽrã Etiopíadebemabara audre kʼawuakĩrãbasita?

⁴ Naʉ̃ yumakẽrã Etiopíadebemara «wãsi Jerusalénʼena Daizezeʼa yiwidʼide» (Hech. 8:27). Naʉ̃ba ũdubibʉ naʉ̃ yumakẽrãra judiora religione edabasita, iyara Escrituras Hebreasdeba kʼawuasibaibara Jeowa ʉ̃rʉra, mamina audre kʼawuakĩrãbasi. Felipeba naʉ̃ yumakẽrã ode ũduside, ũdusi propesia Isaíasba jaradata lenʉmasita (Hech. 8:28). Naʉ̃ yumakẽrãbara audre kʼawuakĩrãbasi Daizeze Bedʼeara, maʉ̃ kʼarea kĩrãkita akʉbasi.

5. ¿Kʼãrẽta osi yumakẽrã Etiopíadebemabara iya kʼawuadadebara?

⁵ Naʉ̃ yumakẽrã Etiopíadebemara nokʼo wẽrã Candaceita trajabasi «maʉ̃ba jõma zokʼabasi maʉ̃ yuwẽrã platara» (Hech. 8:27). Mawũẽra naʉ̃ yumakẽrãra mejãcha nekʼãrẽ obasi. Mawũãsidu ewari jʉrʉbasi Daizeze Bedʼea ʉ̃rʉ kʼawuaita akʉza oũdubita iya kʼawua wãta. Maʉ̃ kʼarea naʉ̃ yumakẽrãra Etiopíadeba Jerusalénʼena wãsi Jeowa yiwidʼita templode, maʉ̃ra wawarabasimina akʉza plata gastaibarabasimina, wãsi Jerusalénʼena Jeowaʼa yiwidʼita.

6, 7. ¿Yumakẽrã Etiopíadebemabara sãwũã audre kãga wãsi Jeowara?

⁶ Yumakẽrã Etiopíadebemabara Felipe kʼarebadeba nekʼãrẽ bio kʼawuasi, maʉ̃ne kʼawuasi kʼaita Dayirã ẽdrʉbibarira (Hech. 8:34, 35). Naʉ̃ yumakẽrãra sobiasibaibara iya kʼawuaside Jesuba kʼãrẽta osita iyibari. ¿Kʼãrẽta osi iyara maʉ̃ kʼareara? Jipa idubʉsi judiora religionʼra, Jeowata akʉza Jesuta kãgabʉ baera buru kʼoesi akʉza Jesu kʼaidubemarabasi. Felipeba akʉsi naʉ̃ yumakẽrãra buru kʼoeseabʉta, maʉ̃ kʼarea buru kʼoebisi.

⁷ Bʉabida yumakẽrã Etiopíadebema kĩrãkʼa obʉbʉrʉ, buru kʼoeseabʉ akʉza iya widida kĩrãkʼa bʉa jaraseabʉ: «¿Kʼãrẽba bʼe ẽbaipe mʉ buru kʼoeira?». Kʼawuadayi sãwũã iyide kĩrãkʼa oseapanʉta: Iyara kʼawua wãsi akʉza oũdubisi iya kʼawua wãta, adewara audre kãga wãsi Jeowata.

AUDRE KʼAWUA WÃRA

8. Juan 17:3​bara, ¿bʉaʼa kʼãrẽta omarẽã jarabʉ?

⁸ (Akʉra Juan 17:3). ¿Naʉ̃ bedʼea Jesuba jaradaba kʼarebasika Daizeze Bedʼea kʼawuakĩrãita? Mejãchaʉta mawũã berabarisi. Naʉ̃ bedʼeaba dayirã jarabʉ audre kʼawua wãseabʉta Daizeze wãrĩnuara ʉ̃rʉ (Ecl. 3:11). Dayirã ewari jõmaʉ̃nẽbidade audre kʼawua wãnañi Jeowa ʉ̃rʉ, maʉ̃ba kʼarebayi audre Jeowa kʼawa bʼaita (Sal. 73:28).

9. Daizeze Bedʼea nãã kʼawua jʉ̃drʉda tẽãra, ¿kʼãrẽta oibara?

⁹ Dayirã jõmaʉ̃ba Daizeze Bedʼeara kʼawua jʉ̃drʉpanʉ yi bedʼea zareabʉ ẽ deba. Pabloba ebreora karta bʉdade jara ẽ basi dayirãba nãã kʼawua jʉ̃drʉdara zeri ẽ basita, awuarabʉrʉ naʉ̃ra wũãwũãba ju dobidabari kĩrãkʼabʉta (Heb. 5:12; 6:1). Mamina Pablobara kristianorãra jarasi zarea oibara audre bia kʼawuaita Daizeze Bedʼea ʉ̃rʉ. ¿Kãgaka bʉa Daizeze Bedʼea kʼawua wãra? ¿Audre kʼawua wãkĩrãbʉka Jeowa ʉ̃rʉ akʉza iya kʼãrẽta kãgabʉta?

10. ¿Kʼãrẽa ʉ̃kʉrʉraitara zare estudiaita?

¹⁰ Ʉ̃kʉrʉitara zare estudiaita mamina, ¿bʉara kolegiodera bʉ kʼawuasika akʉza le kʼawuasika? ¿Bʉitara zareabasika estudia kʼawuaita? Mawũã ẽ bʉrʉ, ¿kãgabasika bʉa estudiaira? Bʉita zarebʉrʉ, kĩrãbera Jeowara jipa buru biata, iya biʼia jaradiaseabʉ bʉaʼa.

11. ¿Sãwũã ũdubibʉ Jeowabara bʉ Nejaradiabari Biata?

¹¹ Jeowaba jarabʉ iyira «bʉ Nejaradiabari [Biata]» (Is. 30:20, 21). Jeowara mesera kĩrʉ ẽ, ẽbẽra bia akʉza so borekea akʉbʉ, iyara akʉbʉ ẽbẽrarãba ãyi sode kʼãrẽ nebiata erbʉta (Sal. 130:3). Iyara widi ẽ dayirãba obe ẽãde wueta, kĩrãbera iya parãsita dayirã buru morrora (Sal. 139:14). Jeowaba dayirãra parãsi audre kʼawuakĩrã bamarẽã, Jeowaba kãgabʉ dayirãra sobiapanamarẽã dayirãba kʼawuapanʉneba, maʉ̃ kʼarea kãgabʉ dayirãba audre kʼawuakĩrãnamarẽã iyi Bedʼeata (1 Ped. 2:2). Maʉ̃ kʼarea ewari jʉrʉda Daizeze Bedʼea leita akʉza badua lebara bʉa jʉrʉda ewaride (Jos. 1:8). Jeowa kʼarebadeba audre lekĩrã wãñi Daizeze Bedʼeara akʉza audre kʼawuadayi iyi ʉ̃rʉ.

12. ¿Kʼãrẽa yibia dayidoba estudiabʉrʉde Jesu sãwũãbada ʉ̃rʉ kʼawuaita?

¹² Ewari jʉrʉda pikãga krĩchaita Jesu sãwũãbada ʉ̃rʉ akʉza iya jaradiabada ʉ̃rʉ. Naʉ̃ ewari jõbodoarera Jeowaita trajaiba kʼarebayi Jesude kĩrãkʼa oiba (1 Ped. 2:21). Jesuba kʼawuabasi iyi kʼaidupanʉrabara bedʼea zromara ũdudaita (Luc.14:27, 28). Mawũãsidu kʼawuabasi wãrĩnu iyi kʼaidupanʉrãra bia wãita (Juan 16:33). Iyi kĩrãkʼa audre kʼawua wãra Jesu sãwũãbada ʉ̃rʉ, mõbe krĩchara oũdubita bʉ sãwũãbʉdeba.

13. ¿Kʼãrẽta wididaibara Jeowaʼa akʉza kʼãrẽa?

¹³ Bari krĩchade kʼawua kʼãrãpe erbaibara ẽ, awuarabʉrʉ audre kʼawuadaibara Jeowa ʉ̃rʉ akʉza nebia oũdubibara, bari jaraita iyaʼa kãga ũdubibara akʉza iyi ʉ̃rʉ ĩjãibara (1 Cor. 8:1-3). Bʉa kʼawua wãne Jeowa widira audre ĩjãbimarẽã iyi ʉ̃rʉ (Luc. 17:5). Iyara soiduba panʉñi dayirãba mawũã widipanʉra. Dayirãba audre Jeowa ũrĩ kʼawua wãba, audre ĩjãbiyi iyi ʉ̃rʉ akʉza audre bia owãnañi Jeowaba zokʼabʉta (Sant. 2:26).

ORA BɄA KʼAWUA WÃTA

14. ¿Pedrobara kʼãrẽneba jara ũrĩbisi yibiata oita dayirãba kʼawua wãra? (Akʉra potota).

¹⁴ Apostol Pedrobara Jesu kʼaidupanʉra jarasi kʼãrẽa bigata oita ãya kʼawuabarabʉta. Iyira maʉ̃nera Noé nebʉra ʉ̃rʉ bedʼeakʉasi. Jeowaba Noéʼa jarasi kue zromata weita ẽbẽra kayiruara makenaita. Noéra iyi mebẽrãbawarara ẽdrʉ ẽ baibasi bari kʼawuabʉdeba kue zromata zeita. Pedrora bedʼeakʉasi kue zroma zei nãã kʼãrẽta berabarisita. Iya jarasi «jãba zroma maparañena» (1 Ped. 3:20). Noéba bari ũrĩ ẽ basi, awuarabʉrʉ osi iya ũrĩnata, jãba zromata parãsi yi mebẽrãbawaraʉba (Heb. 11:7). Pedrobara jarasi Noéba odara dayi buru kʼoei kĩrãkʼabʉta. Iya jarasi: «Buru kʼoeibara atiara marasida ẽdrʉbibʉ» (1 Ped. 3:21). Bʉa atia nekʼãrẽ jõma obʉra buru kʼoei kʼarea, jaraseapanʉ maʉ̃ra Noéba yi mebẽrãbawaraʉba oda kĩrãkʼabʉta ãya jãba zroma parãnʉmaside.

15. ¿Kʼãrẽta oibara soiduba jẽda krĩchaita?

¹⁵ ¿Kʼãrẽta oibara nããrãra? Soiduba jẽda krĩchadaibara nekayirua opananata (Hech. 2:37, 38). Dayirãba soiduba jẽda krĩchadara naweda nekayirua obadata, mawũãra wãrĩnu nekʼãrẽ awuara owãnañi. ¿Bʉara idubʉbarika Jeowaba nekʼãrẽ kãga ẽãra? ¿Idubʉsika tabako dobadata, i kayirua bedʼeabadata akʉza naweda kayirua obadata? (1 Cor. 6:9, 10; 2 Cor. 7:1; Efes. 4:29). Wabida maʉ̃ta idubʉ ẽ bʉrʉ, kʼareba widira bʉaʼa nejaradiabʉa, mawũã ẽ bʉrʉ zõrãrã kongregasionebemara. Bʉta wabida warrarabʉrʉ akʉza bʉ yibarira dedabʉbʉrʉ, ãyaʼa kʼareba widira maʉ̃ nemitia idubʉita akʉza buru kʼoeita.

16. ¿Kʼãrẽta oibara Daizezedebemata badua obʼaita?

¹⁶ Adewara yibia nekʼãrẽ Daizezedebema badua owãita. Maʉ̃ra jarakĩrãbʉ ãba yi jʉrebarima wãita akʉza komentario diaibara (Heb. 10:24, 25). Nejaradiabari babʉrʉdera badua jaradia wãbara, bʉa maʉ̃ta badua obidabʉrʉ ewariza sobiabayi (2 Tim. 4:5). Bʉta wabida warrarabʉrʉ bʉyikʉza widira: «¿Mʉ̃ yibariraba mʉ̃aʼa kĩrãbebibaraka mʉ̃ra wãibarata ãba yi jʉrebari eda, mawũã ẽ bʉrʉ jaradia wãibarata? ¿Mʉ̃yikʉzaʉba obʉka?». Bʉa naʉ̃ta bʉyikʉzaʉba obʉbʉrʉ, ũdubibʉ ĩjãbʉta akʉza biga diabʉta Jeowaʼa. Naʉ̃ba ũdubibʉ Daizezedeta obʉta, naʉ̃ba Jeowaʼa nebiata diabʉ kĩrãkʼabʉ (2 Ped. 3:11; Heb. 13:15). Jõma dayirãba Daizezeita nekʼãrẽ soiduba obʉra, Jeowaitara nebia kĩrãkʼabʉ (naʉ̃ testoʉ̃me akʉra 2 Corintios 9:7). Dayirãba maʉ̃ra opanʉ Jeowaita nekʼãrẽ biatrʉ diakĩrãde baera.

JEOWATA AUDRE KÃGA WÃRA

17, 18. ¿Kʼãrẽ nebiaba kʼarebayi bʉ buru kʼoeita akʉza kʼãrẽa? (Proverbios 3:3-6).

¹⁷ Bʉa nekʼãrẽ owãne buru kʼoei kʼarea, bedʼea zromasida ũduyi. Ʉ̃kʉrʉ ẽbẽrarãba kãgada ẽ bayi bʉ Daizeze ode wãira, maʉ̃ kʼarea ipidaseapanʉ, mawũã ẽ bʉrʉ pẽwãseapanʉ bʉ zʉbʉriabidaita (2 Tim. 3:12). Bʉ zarea obʉde nãã nekayirua obadata oẽ baita, mamina edaʉde jẽda oseabʉ, mawũã ẽ bʉrʉ bʉa krĩchaseabʉ Jeowaita okĩrãbʉra wabida waenʉmʉta, ¿kʼãrẽba kʼarebai pae ẽ baita? Jeowa kãga bʼaiba.

¹⁸ Jeowa kãga ũdubira jipade yibia (akʉra Proverbios 3:3-6). Jeowa kãgabʉba kʼarebayi bedʼea zroma zebʉrʉde awuantaita. Daizeze Bedʼeabara badua jarabʉ Jeowabara iyi odepanʉrãra kãga jõkata ũdubibʉ. Naʉ̃bara jarakĩrãbʉ Jeowabara jipa amae ẽ baita iyi odepanʉrãra akʉza ewari jõmaʉ̃nẽ kãga bʼaita (Sal. 100:5). Daizezebara bʉra iyizade parãsi (Gén. 1:26). ¿Sãwũã ũdubiseabʉ bʉara maʉ̃ kãgara?

19. ¿Sãwũã biga diaibara Jeowaʼa bʉ bari kʼãrẽ ozebʉrʉ kʼarea? (Gálatas 2:20).

¹⁹ Nããra Jeowaʼa biga diaibara (1 Tes. 5:18). Ewariza bʉyikʉza widira: «¿Sãwũã ũdubi zebʉrʉ Jeowabara mʉ̃ra kãgabʉta?». Bʉ Jeowaʼa yiwidʼibʉrʉde iyaʼa biga diara akʉza jarada iya bʉ kʼãrẽne kʼarebasita, kʼawuara Jeowabara bʉra mejãcha kãgabʉta, adewara bʉaʼa nebia diakĩrãbʉta, abarika Pabloba kʼawuabada kĩrãkʼa Jeowabara iyira mejãcha kãgabʉta (akʉra Gálatas 2:20). Bʉyikʉza widira: «¿Mʉ̃ara wabida Jeowa kãgabʉta ũdubikĩrãbʉka?». Dayirãba Jeowa kãgabʉba kʼarebayi nemitia oẽ baita, adewara bedʼea zroma zebʉrʉta awuantadayi. Naʉ̃ba kʼarebayi bʉa ewariza Daizezedebema obʼaita adewara Jeowaʼa kãga ũdubi bʼaita ewariza.

20. ¿Kʼãrẽta oibara bʉ bebʉ Jeowaʼa diaita akʉza kʼãrẽa yibia maʉ̃ra?

²⁰ Jeowa mejãcha kãgabʉ baera bʉra iyaʼa soiduba yiwidʼiyi, maʉ̃ne jarayi bʉ bebʉra iyaʼa diaya abarita. Kĩrãbera bʉ bebʉ Jeowaʼa diabʉrʉdera iyiare ewari jõmaʉ̃nẽ baseabʉta, adewara bedʼea zroma ũdubʉrʉbʉsida, bʉra iyiare baseabʉ. Edaʉde dayirãba krĩcha jidabʉrʉdera yibiata jidapanʉ, mamina audre yibia bayi dayirãba krĩcha jidadara dayi bebʉ Jeowaʼa diaita (Sal. 50:14). Diarubara nekʼãrẽ jõma oyi bʉa Jeowata kãga ẽ marẽã, adewara iyiʉ̃me kʼẽrẽpa ba ẽ marẽã. Diarua yi edebirãra (Job 27:5). Jeowaba mejãcha kãgabʉba kʼarebayi bʉ bebʉ Jeowa diaside bʉa kʼãrẽ oya adade aripe oita akʉza audre Jeowa kʼawa bʼaita.

21. ¿Kʼãrẽa dayi buru kʼoebʉrʉdera ʉ̃rabʉrʉ ojʉ̃drʉdogo Daizezeba zokʼabʉta?

²¹ Bʉ bebʉ Jeowaʼa diada tẽã bedʼeara zõrãrã kongregasionebemabawara bʉ buru kʼoei ʉ̃rʉ. Mamina kĩrãbera bʉ buru kʼoebʉrʉbara jarakĩrãbʉta ʉ̃rabʉrʉ Jeowaba zokʼabʉ ojʉ̃drʉita akʉza maʉ̃ra ewari jõmaʉ̃nẽ obʼaita. Maʉ̃ba kʼãwũãena yibiabayi Jeowa soiduba kãgaita. Krĩchara nekʼãrẽ oita ewariza Jeowa audre kãga wãita, mawũã obʉbʉrʉ naʉ̃ba buru kʼoebiyi. Bʉ buru kʼoebʉrʉ ewaridera mejãchade yibiabayi, mamina mamaʉ̃ba ʉ̃ta ʉ̃rabʉrʉ ojʉ̃drʉdogo Daizezeba zokʼabʉta. Maʉ̃ kʼarea bʉa Jeowata akʉza Jesu kãgabʉra ewariza audre kãga wãibara.