¿Kʼãrẽta oseabʉ bʉ kimaba ẽbẽra ãkadabʉta akʉbʉbʉrʉ?

• «Mʉ̃mara mʉ̃ kimara awurume ãĩ babʉrʉ kĩrãkʼabasi».

• «Mʉ̃ra kʼãrẽita zeri ẽ kĩrãkʼa sentisi akʉza biakiru ẽãta».

• «Mʉ̃mara yãrã jarabe ẽ basi mʉ̃ sãwũã berabarinʉmʉra, maʉ̃ba doba zʉbʉriabasi».

• «Mʉ̃mara Jeowaba mʉ̃ ʉ̃rʉra krĩcha ẽ basi».

Naʉ̃ra bedʼeaba ũdubibʉ yuwẽrã kʼãrẽaba zʉbʉriabʉta yi kimaba ẽbẽra ãkadabʉ akʉbʉde. Akʉza yi kimaba maʉ̃ akʉbʉta dããrababʉrʉ, yuwẽrãbara krĩchaseabʉ yi kima ʉ̃rʉ ĩjãbe ẽãta. Yuwẽrã abaʉba jarasi: «Mʉ̃a mʉ̃yikʉza widisi ‹¿kʼai naʉ̃ yumakẽrã mʉ̃ kʼawabʉra? ¿Bʉka nekʼãrẽ awuru iya mʉ̃aʼa waidide jara ẽãta?›».

Naʉ̃ artikulora osida yuwẽrã yi kimaba ẽbẽra ãkadabʉ akʉbʉita.a Jara ũrĩbiyi ũrãgʼa Daizeze Bedʼeadebemata iyi aduʼa sentibita, ĩjãmarẽã Jeowabara iyira akʉbʉta akʉza audre iyi kʼawa bamarẽãbʉta.b

¿KʼÃRẼTA OSEABɄ BɄ KIMABA ẼBẼRA ÃKADABɄTA AKɄBɄBɄRɄ?

Bʉa jõma kʼawua ẽ mina bʉ kimaba kʼãrẽta oita akʉza kʼãrẽta oẽ baita. Nekʼãrẽ oseabʉ aduʼa bʼaita akʉza aukʼara krĩcha zroma oẽ baita. Krĩchara naʉ̃ta.

Krĩcharãra bʉ kʼarea mawũã berabarisita. Yuwẽrãba krĩchaseabʉ yi kimaba odara mawũã osita iya bia akʉ ẽ basi baera. Alicebarac krĩchabasi iyira yi kimaitara kima bia ẽãta akʉza biakiru ẽãta. Iyikʉza widisi: «¿Kʼãrẽa mʉ̃ kimabara akʉkĩrã awuru wẽrãrata mʉ̃ta akʉi kʼaude?». Ʉ̃kʉrʉ wẽrãrãra krĩcha zroma opanʉ, krĩchapanʉ baera ãya sãwũã panʉbʉrʉba audre bedʼea zroma ũduseabʉta. Danielleʼba jarabʉ: «Mʉ̃a krĩchasi mʉ̃ kʼãwũã mejãcha kĩrʉbʉba mʉ̃ juwa jidabʉra ãrĩ wãta».

Bʉsida abarika sentibʉbaibara, mamina kĩrãbera Jeowaba krĩcha ẽãta bʉ kimaba mawũã obʉta bʉa bia akʉ ẽ basi baera. Santiago 1:14​ba jarabʉ: «Aba abakaʉba kʼãrẽ krĩcha erbʉba, edebʉ iya kãgabʉ oita» (Rom. 14:12; Filip. 2:12). Awuarabʉrʉ Jeowaba akʉbʉ bʉ iyiare kʼẽrẽpabʉta (2 Crón. 16:9).

Yuwẽrãbara krĩchaseabʉ yi kimaba ẽbẽra ãkadabe akʉbʉta iyira biakiru ẽ baera, mamina maʉ̃ra wãrĩnu ẽ. Naʉ̃ ʉ̃rʉ bia kʼawuabʉba jarabʉ ẽbẽrarã ãkadabʉ akʉbʉbara maʉ̃ta obʉta ãya mejãcha kãga baera mia erkʼãĩta.

Aukʼara krĩcha zroma orãra. Catherineba jarabʉ yi kimaba ẽbẽra ãkadabʉ akʉbasi baera, iyira aduʼa senti ẽ basita. Francesba jarabʉ: «Mʉ̃a kʼawua ẽãne mʉ̃ kima samabʉta, mejãcha krĩcha zroma obʉ akʉza ewaridera krĩcha okiubʉ». Akʉza awuru mebẽrãba jarabʉ ãyira mejãcha pera sentibʉta mebẽrãʉ̃mebʉde, krĩchapanʉ baera ãya kʼawuabʉta yi kimaba kʼãrẽ obʉta. Adewara ʉ̃kʉrʉra doba sentipanʉ krĩchapanʉ baera mia abaʉba ũrĩ ẽãta ãyi sãwũã sentibʉra.

Bʉta mawũã sentibʉbʉrʉ naʉ̃ra kayirua ẽ. Mamina bʉa maʉ̃ ʉ̃rʉ badua krĩchabʉbʉrʉ maʉ̃ba zʉbʉriabiseabʉ. Maʉ̃ kʼarea zarea ora audre Jeowa kʼawa bʼaita, bʉa mawũã obʉbʉrʉ naʉ̃ba kʼarebayi aduʼa sentita (Sl. 62:2; Efes. 6:10).

Daizeze Bedʼeade ũdubʉ nebʉra wẽrãra mejãcha krĩcha zroma obada ʉ̃rʉ akʉza jara ũrĩbibʉ ãya sãwũã so zareata ũdusita Jeowaʼa yiwidʼipanasi baera, bʉa naʉ̃ ʉ̃rʉ lebʉbʉrʉ naʉ̃ba mejãcha kʼarebayi. Bari jaraita Anara mejãcha krĩcha zroma obasi iyi sãwũã berabarinʉmʉ kʼarea, mawũãsidu iyi yiwidʼida tẽã aduʼabesi, Jeowaba iyi bedʼea zroma waidide ara oẽ basimina (1 Sam. 1:10, 12, 18; 2 Cor. 1:3, 4).

Jʉrʉda zõrãrã kongregasionebema kʼarebata, «maʉ̃ra aba abaka mĩrʉbari kĩrãkʼabayi pũadrʉdeba [akʉza] mĩrʉbari kĩrãkʼabayi nãgʉ zromaneba» (Is. 32:2, nota). Ãya jaraseabʉ bedʼeamarẽã mebẽã wẽrã aba, bʉaʼa ũrãgʼa bia diaseabʉme (Prov. 17:17).

¿BɄA BɄ KIMA KʼAREBASEABɄKA?

¿Bʉa kʼarebaseabʉka bʉ kimara ẽbẽrarã ãkadabe akʉ ẽ marẽã? Mawũãbaibara. Daizeze Bedʼeaba jarabʉ nejʉra audre zareabarabʉme yõira, nesidata ẽbẽra ũme (Ecl. 4:9-12). Ẽbẽrarã naʉ̃ ʉ̃rʉ kʼawuabʉba jarabʉ kima barapanʉrãta yiya kʼarebapanʉbʉrʉ naʉ̃ba kʼarebaita wua akʉ ẽ baita ẽbẽrarã ãkadabeta akʉza jẽda yiya ĩjãita.

Mamina maʉ̃ra mawũã berabariyi yi ẽbẽra ãkadabe akʉbʉta zarea obʉbʉrʉ maʉ̃ idubʉita. ¿Jeowaʼa widisika zarea diamarẽã akʉza zõrãrã kʼarebata jʉrʉsika? (2 Cor. 4:7; Sant. 5:14, 15). ¿Nekʼãrẽ obʉka ẽbẽrarã ãkadabe akʉ ẽ baita? ¿Jʉra kʼawua akʉbʉka selularde kʼãrẽta akʉbʉta? (Prov. 27:12). ¿Bʉra awurua idu yi kʼarebabikĩrãbʉka? Mawũãbʉrʉ bʉra kʼarebaseapanʉ.

Akʉdaya yizata aba. Feliciara juwa jidasi Ethanʼʉ̃me, iyi kʉ̃rabasiedara jipade akʉkĩrãbasi ẽbẽrarã ãkadabeta. Feliciabara ibiade ũrĩbʉ yi kimaba jarabʉrʉde sãwũã sentibʉta ẽbẽrarã ãkadabe akʉkĩrãbʉde. Ethanba jarabʉ: «Mʉ̃ara soiduba jarabʉ mʉ̃ kimaʼa mʉ̃ sãwũã sentibʉra akʉza iya kʼarebabʉ mʉ̃a maʉ̃ta akʉ ẽ marẽã. Adewara kʼarebabʉ internetʼne nemejãcha akʉ ẽ marẽã». Wãrĩnu bʼaira Feliciara sopʉabʉ yi kimaba ẽbẽrarã ãkadabe akʉkĩrãbʉdera. Mamina iya jarabʉ: «Mʉ̃ mawũã kĩrʉbʉba kʼareba ẽ iya ẽbẽrarã ãkadabe akʉkĩrã ẽ marẽã. Mamina mʉ̃ kimaba bia krĩchabʉrʉde iya kʼãrẽ obʉta, zarea obʉ maʉ̃ oẽ baita mawũã mʉ̃sida sopʉabi ẽ bʼaita».

Mayirai bedʼeaiba kʼarebayi yumakẽrãba akʉ ẽ marẽã ẽbẽrarã ãkadabeta akʉza kʼarebayi yuwẽrãba jẽda ĩjãmarẽã iyi kima ʉ̃rʉ. Mawũã yumakẽrãba jara ũrĩbibʉbʉrʉ iyi samabʉta, kʼãrẽta obʉta, neẽbayi kʼãrẽ merabʉra.

¿Bʉ kimara mawũã berabarinʉmʉka? ¿Naʉ̃ artikulo  ʉ̃rʉ bedʼeaseapanʉka? Bʉ kimaba zarea oibara ẽbẽrarã ãkadabe akʉ ẽ baita mawũã bʉa iyi ʉ̃rʉ jẽda ĩjãmarẽã. Bʉa kʼawuakĩrãbʉbʉrʉ bʉ kimara sãwũãbʉ ʉ̃rʉ, iyira kĩrʉ ẽ baibara maʉ̃ kʼarea, awuarabʉrʉ zarea oibara kʼawuaita bʉ sãwũã sentibʉta. Akʉza yuwẽrãbara kʼarebaibara yi kimaba maʉ̃ta jẽda akʉ ẽ marẽã akʉza iyi ʉ̃rʉ jẽda ĩjãibara. Ãyi ũmeba kʼawuaibara kʼãrẽba obʉta ẽbẽraba akʉkĩrãmarẽã ẽbẽrarã ãkadabeta akʉza kʼãrẽta oibara maʉ̃ wua akʉ ẽ baita.d

Bʉta krĩcha zroma obʉbʉrʉ bʉ kimaʉ̃me maʉ̃ ʉ̃rʉ bedʼeabʉrʉde bedʼeakai kʼarea, bedʼeara zõrãrã bʉa ĩjãbʉme kʼarebamarẽã. Kʼawuabara bʉ kimaba ẽbẽra ãkadabʉ idubʉsimina, ewari mejãcha berabaribʉta bʉa ĩjãita iyi ʉ̃rʉ. Paerãra. Akʉra kʼãrẽne bʉ kimaʉ̃me audre bia wãta. Ewari berabari wãne bʉ kimaʉ̃me audre bia wãñi (Ecl. 7:8; 1 Cor. 13:4).

IYA MAɄ̃TA JẼDA AKɄRA

Bʉ kimaba ẽbẽrarã ãkadabe jẽda akʉra, ¿maʉ̃ba jarakĩrãbʉka iyara soiduba jẽda krĩcha ẽ basita? Mawũã ẽ. Iya ewari jõmaʉ̃nẽ zarea oibara baera maʉ̃ jẽda akʉ ẽ baita. Poaga mejãcha berabaribʉmina iyara jẽda akʉseabʉ maʉ̃ra. Maʉ̃ kʼarea mejãcha zarea oibara nekʼãrẽ oẽ baita maʉ̃ jẽda akʉita (Prov. 28:14; Mat. 5:29; 1 Cor. 10:12). Iyara iyi «sãwũã krĩchabʉra jipa awuara oibara» akʉza «[jʉraibara] yi kayiruara», bari jaraita ẽbẽrarã ãkadabe akʉbʉta akʉza dayikʉza tãita (Efes. 4:23; Sl. 97:10; Rom. 12:9). Bʉa zarea obʉbʉrʉ idubʉseabʉ maʉ̃ kayirua obʉta.e

Mamina, bʉ kimaba idubʉkĩrã ẽ bʉrʉ iya kayirua obʉta, bʉra sopʉaseabʉ akʉza kĩrʉseabʉ. Mawũãsidu jʉrʉda aduʼa bʼaita Jeowa kʼarebadeba (1 Ped. 5:7). Audre Jeowa kʼawabara iyi ʉ̃rʉ kʼawuabʉdeba akʉza maʉ̃ ʉ̃rʉ krĩchabʉdeba, adewara iyaʼa yiwidʼibʉdeba. Bʉa maʉ̃ta ora iyira bʉ kʼawabayi. Isaías 57:15ba jarabʉ kĩrãkʼa, Jeowara ẽbẽrarã sopʉabʉ kʼawabʉ. Zarea ora audre kristiano bia bʼaita. Zõrãrã kʼarebata jʉrʉda. Akʉza jʉ̃ãra bʉ kimara badu ewaride awuara bʼaita (Rom. 2:4; 2 Ped. 3:9).