¿Kĩrãbebʉka?
Naʉ̃ poagade Jarakabʉ ʉ̃tʉ zedara, ¿jõma bia akʉsika? Akʉra panʉseabʉ kʼawuaita nama edre widibʉta:
¿Kʼãrẽta jarakĩrãbʉ krĩcha yiwidi erbaibara? (Romanos 12:2).
Naʉ̃bara jarakĩrãbʉ ẽ ewari abapai nebia oita, awuarabʉrʉ akʉibarata dayi sode kʼãrẽtabʉta akʉza nekʼãrẽ jõma oibarata Jeowaba zokʼabʉde bʼaita, maʉ̃ta dayirãbara badua obʼaibara (w23.01, pagina 8 akʉza 9).
¿Kʼãrẽa kʼawuakĩrãpanʉ dayirãbara Daizeze Bedʼeade propesia jarabʉra idi ewade aripe berabarinʉmʉra?
Dayirãbara kʼawuakĩrãbʉ naʉ̃ drʉade berabarinʉmʉra naʉ̃ba kʼawuabibʉ baera Daizeze Bedʼeade propesiabʉra aripe berabarinʉmʉta (1 Cor. 1:10) (w23.02, pagina 16).
¿Kʼãrẽne awuarabʉ Jesu buru kʼoedara iyi kʼaidubemara buru kʼoedaʉ̃mera?
Jesubara iyi bebʉra Jeowaʼa diaita nesida ẽ basi, akʉza nemitia oka baera nesida ẽ basi Jeowaʼa jaraita kĩrãduamarẽã iya nemitia obʉta (w23.03, pagina 5).
¿Sãwũã iduaribiseabʉ wuabemarasi komentario diamarẽã?
Mejãcha bedʼea ẽ baita akʉza komentario diabʉde wua eda jara ẽ baita (w23.04, pagina 23).
Isaías 35:8de bedʼeabʉ Neneẽãbʉ O ʉ̃rʉ ¿kʼãrẽbasi maʉ̃ra?
Jeowaba trʉ̃gasi Babilonianeba Jerusalénʼenabʉ ota «Neneẽãbʉ O». ¿Idi ewadebida Jeowabara o mawũãbʉta erbʉka? Mawũã, poaga 1919deba ẽbẽrarã mejãchaʉta Babilonia Zromaneba ãĩ wãsida. Mawũã wãita neneẽãbʉ ode, jõmaʉ̃ta maʉ̃ ode panaibara (w23.05, pagina 15-19 bayeda).
¿Kʼãrẽ wẽrãra ũme wãrĩnubʉ kĩrãkʼabʉ ʉ̃rʉ bedʼeabʉ Proverbios 9dera?
Naʉ̃nera bedʼeabʉ yuwẽrã buru bia ʉ̃rʉ akʉza yuwẽrã bia krĩchabʉ ẽã ʉ̃rʉ (Prov. 9:1, 6, 13, 18) (w23.06, pagina. 22-24 bayeda).
¿Sãwũã ũdubisi Jeowaba eda krĩchabʉta akʉza so zʉbʉria akʉbʉta Lotʼʉ̃me bedʼeasidera?
Iyi angeleraneba Jeowaba Lotʼa jarasi katumaena mĩrʉ wãmarẽã. Lotʼra mejãcha perabasi baera Jeowaʼa widisi iduaribimarẽã iyita akʉza yi mebẽrãbawara wãita Zóar pʉwʉrʉeda. Maʉ̃ne Jeowaba Lotʼra idu wãbisi (w23.07, pagina 21).
¿Kʼãrẽta oseabʉ bʉ kimaba ẽbẽra ãkadabʉta akʉbʉbʉrʉ?
Kĩrãbera Jeowaba krĩcha ẽãta bʉ kimaba mawũã obʉta bʉa bia akʉ ẽ basi baera. Zarea ora audre Jeowa kʼawa bʼaita, bʉa mawũã obʉbʉrʉ naʉ̃ba kʼarebayi aduʼa sentita (w23.08, pagina 14-17 bayeda).
¿Kʼãrẽba kʼarebai ibiade panʉita ẽbẽrarã dayirãba ĩjãbʉ ʉ̃rʉ imitia bedʼeapanʉra?
Edaʉde yibia ẽbẽrarãba daya mawũã widibʉrʉdera, naʉ̃ba kʼarebabʉ baera kʼawuaita ãya kʼãrẽta krĩchabʉta akʉza krĩcha ẽ baita ãya mawũã opanʉta dayirã kĩrʉbita. Dayirãbara ewari jõmaʉ̃nẽ krĩchaibara ibiade panʉita (w23.09, pagina 17).
¿Kʼãrẽta kʼawuaseapanʉ María yizadeba?
Maríaba jʉrʉsi kʼareba wuabemaraneta, widisi Gabrielʼa jaradiamarẽã iya sãwũã oita, Jeowaba zarea diasi María Gabrieldeba akʉza Elizabetdeba. Dayirãbida zarea ũduseabʉ mebẽrã kongregasionebemaneba (w23.10, pagina 15).
¿Jeowaba panʉbʉka mʉ̃ yiwidʼibʉra?
Dayirã Jeowa yiwidʼibʉrʉdera iyara krĩchabʉ kʼãrẽne abarikabʉta dayirãba widibʉta iya nekʼãrẽ oita krĩchabʉme (Jer. 29:12). Ẽbẽrarãba yiwidʼipanʉ Jeowaʼa iyabaʉ ʉ̃rʉ, mamina Jeowabʉrʉ kʼawuabʉ sãwũã panʉita ãyi aba abakaʉʼa (w23.11, pagina 21 akʉza 22).
Romanos 5:2 bedʼeabʉ dayirãba nebia jʉ̃ãbʉ ʉ̃rʉ, ¿kʼãrẽa bersikulo 4de jẽda bedʼeabʉ maʉ̃ ʉ̃rʉ?
Bʉa naʉ̃ ũrĩsidera krĩchasibaibara mawũã ẽjũã biade bʼaira kʼãĩmokʼãrã kĩrãkʼa bʉta akʉza maʉ̃ra wãrĩnu berabari ẽãta. Mamina bʉa Jeowa audre kʼawua wãne akʉza Daizeze Bedʼeade iya nebia weya abʉ ʉ̃rʉ audre ũdukʼawua wãne, ĩjãsi bʉa nebia jʉ̃ãbʉra aripe berabarita (w23.12, pagina 12 akʉza 13).