¿Kʼãrẽta osi Jeowaba dayirã nemitiadeba akʉza beideba ẽdrʉbita?

1, 2. (1) ¿Kʼãrẽta jarakĩrãbʉ nemitiabara akʉza dayirãra maʉ̃neba sãwũã ẽdrʉseabʉ? (Akʉra nota «Kʼãrẽta jarakĩrãbʉ»). (2) ¿Kʼãrẽta kʼawuadai naʉ̃ artikulodera akʉza yi wuarebema artikulora naʉ̃ karta Jarakabʉ debemane? (Akʉra «Lepanʉraita» naʉ̃ kartade).

JEOWABA dayirã kʼãrẽãba kãgabʉ kʼawuaira krĩchaibara iya kʼãrẽta ozebʉrʉta dayirã nemitiadeba akʉza beideba ẽdrʉbita. Nemitiaraa jipade nejʉra zroma kĩrãkʼabʉ, naʉ̃nebara mia abaʉta ẽdrʉbeda ẽ, wãrĩnubaira ẽbẽrarã jõmaʉ̃ta nemitia omiara, maʉ̃ba kayirua opanʉ akʉza beipanʉ (Rom. 5:12). Mamina dayirãbara biʼia kʼawuapanʉ Jeowaba ẽdrʉbita maʉ̃ nemitiadeba.

² 6 mil poaga ba Jeowaba ẽbẽrarã kʼareba zebʉrʉta nemitia omiamina iyi neũdukʼawua bia badamarẽã, ¿kʼãrẽa mawũã ozebʉrʉ Jeowabara? Iyara maʉ̃ta obʉ ẽbẽrarãta mejãcha kãgabʉ baera. Jeowaba ẽbẽrarã parãsideba ya ũdubi zebʉrʉ iya ẽbẽrarã kʼãrẽaba kãgabʉta, ẽbẽrarãta mawũã kãgabʉ baera nekʼãrẽ mejãcha ozebʉrʉ ẽbẽrarãba nemitia obʉrʉde akʉza jẽda iyima zedamarẽã. Jeowabara biʼia kʼawuabʉ nemitiabara beiʼeda edebʉta. Wãrĩnubaira Jeowabara kãga ẽ dayirã beimarẽãra awuarabʉrʉ kãgabʉ ewari jõmaʉ̃nẽ panamarẽã (Rom. 6:23). Jeowabara bʉsida mawũã bamarẽã kãgabʉ. Naʉ̃ artikulode bedʼea ũbea kʼawuadayi: ¿Kʼãrẽta osi Jeowabara ẽbẽrarã nebiata jʉ̃ãbita? ¿Nawedara ẽbẽrarãbara kʼãrẽta opanasi Jeowa kʼawa bʼaita nemitia omiamina? akʉza ¿Jesúsba kʼãrẽta osi dayirã nemitiadeba ẽdrʉbita?

¿KʼÃRẼTA OSI JEOWABARA ẼBẼRARÃ NEBIATA JɄ̃ÃBITA?

3. ¿Kʼãrẽta berabarisi ẽjũã kĩrãwãreãnẽra?

³ Jeowaba Adán Evaʉ̃me parãsidera kãgabasi ãyira mejãcha sobiapanamarẽã maʉ̃ kʼarea ẽjũã biʼia kirude bʉsi ãyira adewara juwa jidabisi akʉza nekʼãrẽ omarẽã jarasi, ãyaʼa jarasi naʉ̃ drʉata ẽbẽrarãba biradamarẽã akʉza naʉ̃ drʉa jõma ẽjũã kĩrãwãreã babidamarẽã. Jeowabara ãyaʼa jarasi nekʼãrẽ aba oda ẽ marẽã akʉza Jeowabara ãyaʼa jarasi iyi bedʼeata ũrĩna ẽ bʉrʉ bei basita. Diaruba sewasi ãyira. Diarubara kãga ẽ basi Daizezera mia ãyisida kãgaba ẽ basi, mamina ãyara Jeowa bedʼeata ũrĩ kaude ũrĩsida Diaru bedʼeata, maʉ̃ tẽã aripe berabarisi Jeowaba jaradata, ãyira zõnabape, kayape beisida (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Jeowabara kʼãrẽa jʉra nemitiara akʉza kʼãrẽa kʼarebabʉ dayirãta nemitiadeba ẽdrʉita? (Romanos 8:​20, 21).

⁴ Jeowabara naʉ̃ nebʉrara Daizeze Bedʼeade bʉ kʼãrẽ dayirãba biʼia kʼawuadamarẽã iya kʼãrẽa jʉrata nemitiara, Jeowabara nemitiara jʉra naʉ̃ba dayirãta iyideba jĩga babibʉ baera akʉza beiʼeda edebʉ baera (Is. 59:2). Maʉ̃ta mawũã kʼawuabʉ baera Diarubara kãgabʉ dayirãbida nemitiata odamarẽã adewara maʉ̃ kʼarea Adán Evaʉ̃mera iyara sewasi. Adán Evaʉ̃meba Diaru bedʼea ũrĩsidadera Diarubara krĩchasi Jeowaba ẽbẽrarãita kʼãrẽ oita krĩchabʉra aripe berabari ẽ baita, mamina wãrĩnubaira Diarubara biʼia kʼawua ẽ basi Jeowaba ẽbẽrarã kʼãrẽaba kãgabʉra, mamina Jeowabara ẽbẽrarãita kʼãrẽ oita krĩchabʉra kĩrãdua ẽ basi, awuarabʉrʉ iya ẽbẽrarãra mejãcha kãgabʉ baera mesera jʉrʉsi sãwũã nebiata jʉ̃ãbita maʉ̃ra ẽbẽrarã (akʉra Romanos 8:​20, 21). Jeowabara kʼawuabasi ẽbẽrarã Adán akʉza Evadeba zedarabara ʉ̃kʉrʉba ũdubibasita iyita kãgapanʉta akʉza iyi kʼarebata jʉrʉdaibasita nemitiadeba ẽdrʉita. Jeowara Zeze bia baera iyara jʉrʉsi ẽbẽrarã sãwũã ẽdrʉbita nemitiadeba akʉza sãwũã iyi kʼawa babita, ¿sãwũã osi maʉ̃ra?

5. ¿Adán Evaʉ̃meba nemitia osidadera kʼãrẽta jarasi Jeowabara ẽbẽrarã nebia jʉ̃ãbita? (Génesis 3:15).

⁵ (Akʉra Génesis 3:15). Jeowaba ẽbẽrarã nebia jʉ̃ãbikĩrãbʉ baera wãna jarasi Diarura beaita akʉza jarasi kʼãrẽta oita ẽbẽrarã nemitiadeba ẽdrʉbita. Daizezeba jara ũrĩbisi zeibasita ẽbẽra aba Diaru beaita akʉza Diaruba kʼãrẽ mitia ozebʉrʉra jõma ara oita (1 Juan 3:8). Maʉ̃ ẽbẽra Diaru beaira zʉbʉriaibarabasi, iyira zʉbʉriasi Diaruba beabiside, maʉ̃ mawũã berabaribʉrʉ ũduira Jeowaitara mejãcha pʉa bʼaibasi, mamina Jeowabara iduaribisi maʉ̃ ẽbẽrasida mawũã zʉbʉria marẽã akʉza iyisida mawũã zʉbʉriasi ẽbẽrarãta ẽdrʉmarẽã nemitiadeba.

¿NAWEDARA ẼBẼRARÃBARA KʼÃRẼTA OSIDA JEOWA KʼAWA BʼAITA NEMITIA OMIAMINA?

6. ¿Kʼãrẽta osida Abelba, Noéba akʉza awuru ẽbẽrarã Jeowa ʉ̃rʉ ĩjãbadaraba iyi kʼawa bʼaita?

⁶ Jeowabara wiña wiñane kʼawuabisi ẽbẽrarãba kʼãrẽta oibarata iyi kʼawa bʼaita. Adánba Evaʉ̃meba nemitia oda tẽãra Abelbʉrʉ nããra ũdubisi Jeowa ʉ̃rʉ ĩjãbʉta, Abelba Jeowata mejãcha kãgabasi baera akʉza Jeowaba kãgabʉta okĩrãbasi baera sakripisiota diasi. Abelbara obejarata akʉbasi maʉ̃ kʼarea maʉ̃ra obejaranebemata jida kʼãrãpe diasi Jeowaʼa sakripisiode. ¿Kʼãrẽta osi Jeowabara? «Jeowabara ũdubisi kãgata iyira akʉza iyi oprendata» (Gén. 4:4). Tẽã awuru ẽbẽrarãba kʼãwũã Abelde kĩrãkʼa sakripisio diasidadera Jeowabara ũdubisi bia akʉbʉta ãya odara, bari jaraita Noéta (Gén. 8:​20, 21). Naʉ̃ba ũdubisi ẽbẽrarã nemitia omiamina Jeowa kʼawa baseabʉta akʉza Jeowaba kãgabʉta oseabʉta.b

7. ¿Kʼãrẽta kʼawuapanʉ Abrahánba iyi warrata sakripisiode diakĩrãbadadeba?

⁷ Basi awuru yumakẽrã Jeowa ʉ̃rʉ mejãcha ĩjãbʉta, maʉ̃ra Abrahán basi. Jeowaba Abrahánʼa widisi nekʼãrẽ iyita jipade zareabʉta omarẽã, widisi iyi warrata sakripisiode diamarẽã, maʉ̃ oira Abrahánʼitara jipade pʉa bʼaibasi mawũãsidu Abrahánbara diakĩrãne diaibasi yi warrara, mamina Abrahánba yi warra beaitanʉmʉne Jeowaba jarasi oẽ marẽã. Mamina Abrahánba odaba jõmaʉ̃ʼa ũdubisi Jeowabara iyi warrara diakĩrãne diaibasita ẽbẽrarãbari, ẽbẽrarãta mejãcha kãgabʉ baera (Gén. 22:​1-18).

8. Naweda sakripisio diabadaba, ¿kʼãrẽta ũdubisi? (Levítico 4:​27-29; 17:11).

⁸ Poaga bio berabarida tẽã Jeowaba israelitara leyta diasi, maʉ̃ne jarasi ãyaʼa sakripisiode diadamarẽã nedʉwʉrʉrata ãyi nemitia kĩrãduaita (akʉra Levítico 4:​27-29; 17:11). Maʉ̃ra sakripisioraba ũdubisi Jeowaba sakripisio audre yibiata diaibasita, naʉ̃ sakripisiora yibiabaibasi ẽbẽrarãta jipa ẽdrʉbibasi baera nemitiadeba. Daizezeba propetara bʉbisi dayirã ẽdrʉbi ʉ̃rʉ, ¿kʼai basi maʉ̃ra? Maʉ̃ra Daizeze Warrabasi. Daizezeba iyira mejãcha kãgabasi akʉza maʉ̃ra zʉbʉriape beibarabasi, abarika obeja zake zʉbʉria beabada kĩrãkʼa sakripisio diabʉdade (Is. 53:​1-12). Jeowabara iyi Warrata sakripisiode diasi ẽbẽrarã naʉ̃ drʉa jõmaʉ̃nẽbemata nemitiadeba ẽdrʉbita, iyara maʉ̃ra osi bʉta ẽdrʉbikĩrãbasi baera nemitiadeba.

¿JESÚSBA KʼÃRẼTA OSI DAYIRÃ NEMITIADEBA ẼDRɄBITA?

9. ¿Juan buru kʼoebibaribara kʼãrẽta kʼawuabisi? (Hebreos 9:22; 10:​1-4, 12).

⁹ Nããbema siglode poaga 29de Juan buru kʼoebariba naʉ̃ta jarasi: «Akaudua, kʼãʉ̃ta Oveja zake Daizezedʼea, naʉ̃bara kʼazhirua ne ẽã oya ẽjũãne zhãrã bʼeta» (Juan 1:29). Juanba maʉ̃ jaradaba ũdubisi Jesús basita Jeowaba dayirã ẽdrʉbita diaya adara, iya iyi bebʉta diaibasi. Jeowa Warrara zesi ẽbẽrarãta jipa ẽdrʉbita nemitiadeba akʉza beideba (akʉra Hebreos 9:22; 10:​1-4, 12).

10. ¿Jesúsbara sãwũã ũdubisi iyira nemitia omiara jʉrʉde zesita?

¹⁰ Jesúsbara audre kʼarebakĩrãbasi ẽbẽrarã ãya nemitia oda kʼarea sopʉapanʉrata akʉza naʉ̃rata trʉ̃ basi iyi kʼaidubema bamarẽã. Jesúsbara kʼawuabasi audrera ẽbẽrarãbara bedʼea zromata ũdupanʉta akʉza zʉbʉriapanʉta ãya kayirua oda kʼarea, maʉ̃ kʼarea Jesúsbara audrera kʼarebakĩrãbasi ẽbẽrarã ãya nemitia oda kʼarea zʉbʉriapanʉrata. Jesúsba naʉ̃ta jarasi: «Yi neneẽãpanʉrabara medikoeda wãira nesida ẽ, mamina yi kayapanʉrãra medikoeda wãibara» adewara iya jarasi iyira ze ẽ basita ẽbẽrarã nebia obe jʉrʉde awuarabʉrʉ zesita yi kayirua opanʉra jʉrʉde (Mat. 9:​12, 13). Maʉ̃ta ũdubisi ẽbẽra wẽrã iyi jĩrʉma jẽgabada nemitia kĩrãduaside (Luc. 7:​37-50). Jesúsbara wãrĩnuta jaradiasi ẽbẽra wẽrã samaritanaʼa kʼawuabasimina naʉ̃ ẽbẽra wẽrãra iyi kimaʼaraʉ̃me bʉ ẽãta (Juan 4:​7, 17-19, 25, 26). Dayirãra nemitia omia kʼarea beipanʉ, maʉ̃ba Jeowaba Jesúsʼa zareata diasi wẽrãrata, yumakẽrãrata akʉza wũãwũãrata jẽda piradrʉbimarẽã (Mat. 11:5).

11. ¿Ẽbẽrarã nemitia omiarabara kʼãrẽa orrakĩrãdebasi Jesúsʼra?

¹¹ Ẽbẽrarã nemitia omiarabida orrakĩrãdebasi Jesúsʼra, dayirãbara kʼawuapanʉ kʼãrẽa, Jesúsbara ẽbẽrarã so zʉbʉria akʉbasi (Luc. 15:​1, 2). Adewara Jesúsbara ẽbẽrarã bedʼea biata jarabasi akʉza biga diabasi iyi ʉ̃rʉ ĩjãbʉta ũdubipanasi baera (Luc. 19:​1-10). Jesúsbara Jeowade kĩrãkʼa wuabemara so zʉbʉria akʉbʉta ũdubisi (Juan 14:9). Jesúsba ẽbẽrarã sãwũã edadaba ũdubibʉ Jeowabara ẽbẽrarãra nemitia omiamina mejãcha kãgata akʉza so borekea akʉbʉta adewara kʼarebakĩrãbʉta nemitiadeba ẽdrʉita. Jesúsbara kʼarebabasi ẽbẽrarã nemita opanʉraba ãya nekʼãrẽ aña obʉta idubʉkĩrãmarẽã akʉza iyi kʼaidu bamarẽã (Luc. 5:​27, 28).

12. ¿Kʼãrẽta jarasi Jesúsba iyi sãwũã bei ʉ̃rʉ?

¹² Jesúsbara kʼawuabasi iyira awurura bari beita. Iyara iyi kʼaidubemara badua jarabasi iyira sewadaibasita akʉza bakurude ʉ̃tʉ juwa kachi jirabʉdai basita (Mat. 17:22; 20:​18, 19). Jesúsbara kʼawuabasi iyita beira naʉ̃ drʉade nemitiabʉra jipa jõibasita, Juanba akʉza awuru propetaraba jarada kĩrãkʼa adewara jarasi iyi beida tẽãra iyima weibasita ẽbẽrarã naʉ̃ drʉa jõmaʉ̃nẽbemata (Juan 12:32). Yi ẽbẽrarã Jesús ʉ̃rʉ ĩjãbʉta ũdubibʉratrʉ akʉza Jesús kʼaidubema babʉratrʉ Jeowaba kãgabʉde baseabasi akʉza maʉ̃ratrʉ nemitiadeba jipa ẽdrʉseabasi (Rom. 6:​14, 18, 22; Juan 8:32). Jesúsbara zowaĩnĩgʉabʉta ũdubisi akʉza mejãcha zʉbʉriaibarabasimina diasi iyi bebʉta dayirã bari (Juan 10:​17, 18).

13. ¿Sãwũã beisi Jesúsʼra akʉza kʼãrẽa maʉ̃ta iduaribisi Jeowaba? (Akʉra potota).

¹³ Jesúsʼra iyi neũdukʼawuadebema abaʉba sewasi akʉza iyi nejʉraraba jida edesida, mõbe iyaʼa imitia bedʼeasida, kayirua iya oda ẽãta osi asida adewara beade zokʼasida, mama iyira zʉbʉriabisida, ʉ̃kʉrʉ gorogororaba bakurude ʉ̃tʉ juwa kachi jirabʉsida mama beimarẽã. Mawũã mejãcha zʉbʉriasimina Jesúsʼra Jeoware kʼẽrẽpabasi, mamina Jeowara audre sopʉasi yi Warra mejãcha zʉbʉriabibaramʉ ũduside. Jeowaba yi Warra mejãcha kãgabasimina akʉza iyira zarea mejãcha erbasimina kʼãrẽ oẽ basi yi Warra maʉ̃neba ẽdrʉbira, ¿kʼãrẽa? Dayirãta mejãcha kãgabʉ baera. Jesúsba jarasi: «Daizezebara ẽbẽrarã mejãcha kãgabʉ baera diasi yi Warra aba bʉta iyidebema ĩjãbʉra bei ẽ bamarẽã, awuarabʉrʉ ewari jõmaʉ̃nẽ bʼaita» (Juan 3:16).

14. ¿Jesúsba iyi bebʉ diada kʼarea sãwũã sentibʉ bʉra?

¹⁴ Jesúsba iyi bebʉ kʼãwũã ẽbẽrarã bari diadaba ũdubibʉ Jeowaba Adán akʉza Evadeba zedara ẽbẽrarã kʼãrẽaba kãgabʉba, maʉ̃ba ũdubibʉ Jeowabara bʉsida mejãcha kãgata. Jeowabara yi Warra iya audre kãgata diasi akʉza yi Warra kʼarea mejãcha sopʉasi dayirãta ẽdrʉbita nemitiadeba. Bʉa maʉ̃ ʉ̃rʉ kʼawuabʉrʉdera, ¿bʉra sãwũã sentibʉ? (1 Juan 4:​9, 10). Jeowabara kãgabʉ dayirãba aba abaka nemitiadeba ẽdrʉdamarẽã.

15. ¿Dayirãbara kʼãrẽta odaibara Jesús beidaba kʼarebamarẽã?

¹⁵ Jeowaba yi Warrata dayirãbari beimarẽã zokʼadara jipade nebia zroma, naʉ̃ba kʼarebabʉ baera dayirã nemitia kĩrãduaita, mamina Jeowaba dayirã nemitia kĩrãduamarẽãra dayirãba nekʼãrẽ oibara, Jesúsba Juanʼʉ̃meba jara ũrĩbisida kʼãrẽta oibarata: «Soiduba jẽda krĩchaidua Daizeze Nokʼo zeira arakʼaita ba baera» (Mat. 3:​1, 2; 4:17). Dayirãra nemitia omia baera nesidapanʉ dayirãba nemitia oda kʼarea soiduba jẽda krĩchaita mawũã Jeowaba kãgabʉta opanaita akʉza Jeowa kʼawa panaita, mamina ¿kʼãrẽta jarakĩrãbʉ jẽda krĩchaibara? akʉza ¿naʉ̃ba sãwũã kʼarebabʉ dayirã Jeowaba kãgabʉde bʼaita? Yi wuarebema artikulode kʼawuadayi maʉ̃ ʉ̃rʉ.