1924 Maʉ̃neba sien poagaba

RADIODEBA JARADIA JɄ̃DRɄSIDA

Mebẽrã Beteldebemarãra poaga ababayeda trajasida emisora radio WBBR parãpanʉta Staten Island, Nueva Yorkde. Nããrãra ãyara bakuruta tʉsida akʉza maʉ̃ta jõma ãĩ bʉesida, mawũã maʉ̃ drʉade deta ũme parãita. Aba mama trajadamarẽã, yi ababemata yi ẽbẽrarã mama trajapanʉrata panamarẽã. Maʉ̃ tẽãra ãya makinata jʉrʉsida radiodeba bedʼea jʉ̃drʉita, mamina ãyara ʉ̃kʉrʉ bedʼea zromata ũdusida.

Mebẽrãba kʼawuasida naʉ̃ emisora antena bʉeira zarea bʼaita. Naʉ̃ antenara drazoara 91 metro chuasi baera, maʉ̃ antena awuantaira nesidabasi bakururata ũme, naʉ̃ bakururãra ʉ̃ta 61 metro chuaibarabasi, maʉ̃ oira zarebasi. Mebẽrãba maʉ̃ nãã oakʉsidadera obe ẽ basi mamina ãya kʼawuapanasi Jeowaba kʼarebaita ãyira, maʉ̃ kʼarea mama pai idubʉda ẽ basi, tẽã ãya oakʉbʉrʉdera bia osida. Calvin Prosser, maʉ̃ne trajadaba kʼãwũã jarabʉ: «Daiba naweda antena bʉeakʉside bia osidabʉrʉ krĩchakasida maʉ̃ra daibʉrʉ biʼia osita». Mamina mebẽrãbara ãyikʉza krĩchai kaude kʼawuapanasi ãyira Jeowaba kʼarebasita, maʉ̃ kʼarea biga diasida Jeowaʼa. Mamina ãyi bedʼea zromara mama pai ba ẽ basi.

Maʉ̃ poagadera radiora jõmaʉ̃ba erba ẽ basi, maʉ̃ba radio deba bedʼeaita yi makinara edaira zarebasi. Mamina mebẽrãba ũdusida makina aba yumakẽrã abaʉba parãnata mõbe maʉ̃ta edasida maʉ̃ yi zokʼamabasimina. Ãyara mikropono edai kaude telepono mikroponota zokʼasida. Ewari aba, febrerode diamasi radiode kʼãrẽ jaranʉmʉ ũrĩnʉmʉ kʼawuaita mebẽrãbara trãsida trãbi Daizeze Nokʼo ʉ̃rʉ bedʼeabʉta. Ernest Loweba nebʉrabʉ maʉ̃ ewaride kʼãrẽta berabarisita, mebẽrãra trãpanasi, maʉ̃ne mebẽã Rutherfordbab trʉ̃si iya mebẽrã trãpanʉta radiodeba ũrĩnʉmasi baera Brooklynʼne, maʉ̃ra mebẽrã badamaebara wawara chuasi, 25 kilometro.

Maʉ̃ne mebẽã Rutherfordʼba jarasi: «Chupeaidua, marara mejãcha buya onʉmʉ, dayima michi miãgʉanʉminabari kĩrãkʼa jʉrabarabʉ». Aramaʉ̃ta mebẽrãra chuwẽã totosi. Ãyira maʉ̃ kʼarea wiña perapanasi, mamina kʼawuapanasi ãyi bedʼeara radiodebara ũrĩnʉmʉta.

24 febrero poaga 1924de, radiodeba bedʼeakata bedʼea jʉ̃drʉside mebẽã Rutherfordʼba naʉ̃ta jarasi: «Naʉ̃ opicina emisora radiora osida Jesúsba zokʼa amenata odaita», adewara jarasi: «Naʉ̃ opicina emisora radioba kʼarebadayi ẽbẽrarãba Daizeze Bedʼeata audre bia ũrĩnamarẽã akʉza kʼawuadamarẽã dayirãra naʉ̃ ewari jõbodoare panʉta».

Maʉ̃ ewaride radio oira jipade yibia basi. Naʉ̃ emisora radio WBBRʼra 33 poaga bayeda zokʼasida Daizeze Bedʼeadebema jara ũrĩbita ẽbẽrarã.

RELIGION ZERI ẼÃNEBEMA NOKʼORABA KʼÃRẼ SEWIDA JARADIAPANɄTA ŨDUBISIDA

Julio 1924de, Daizeze Bedʼea Kʼawuabarirara ãba yi jʉresida asamblea Columbus, Ohiode. Maʉ̃ asamblea edara jʉ̃ẽsida ẽbẽrarã drʉa awuara awuarakadebemata, ãyara iyabaʉ diskursota bedʼea biode ũrĩseabasi, naʉ̃ra bedʼearane: Árabe, ingle, franse, aleman, griego, hungaro, italiano, lituano, polako, ruso akʉza ukranianebema bedʼeata. Ẽbẽrarãba maʉ̃ asambleade ʉ̃kʉrʉ diskurso diabʉra radiode ũrĩseabasi adewara mebẽrãba widisida periodiko opanʉa maʉ̃ asambleade kʼãrẽ jarabʉta bʉseabʉ kʼawuaita.

Jueves 24 juliode, ẽbẽrarã 5 mil audrebʉba Daizeze Bedʼeata jaradia wãsida, ãyara 30 mil librora dedekasida akʉza ẽbẽrarã majãchaʉa Daizeze Bedʼeata kʼawuabi jʉ̃drʉsida. The Watch Tower kartaba jarasi asamblea ewaridera maʉ̃ ewaritrʉ audre yibia basita.

Viernes 25 juliode, mebẽã Rutherfordba iyi diskursode lesi karta aba jara ũrĩbibʉta nokʼora religionraba kʼãrẽ sewidata jaradiapanʉta. Mebẽã Rutherfordba maʉ̃ne jarasi politikora nokʼoraba, religion nokʼoraba akʉza empresa zromanebemaraba iduaribida ẽ basita ẽbẽrarãba wãrĩnuta kʼawuadamarẽã Daizeze Nokʼo ʉ̃rʉ akʉza sãwũã maʉ̃ Daizeze Nokʼoba nebiata weita ẽbẽrarãita. Adewara jarasi naʉ̃ra ẽbẽrarãbara aña krĩchapanasita ãyira Sociedad de Nacionesʼarebasi basi, krĩchapanasi baera Daizeze Nokʼoba maʉ̃neba zokʼanʉmʉta nama egorode. Daizeze Bedʼea Kʼawuabibarirabara mejãcha zowaĩnĩgʉa bʼaita nesidapanasi mawũã ẽbẽrarã jara ũrĩbita maʉ̃ ʉ̃rʉ.

Tẽã, The Watch Tower kartaba jarasi asamblea Columbusde odabara mejãchade kʼarebasita mebẽrãba ĩjãbʉ audre zarea erbaita akʉza mebẽrã zowaĩnĩgʉa panamarẽã Daizeze bedʼea jaradiaita, ãyi pẽwãpanʉmina. Leo Clausba jarasi: «Asamblea jõna tẽãra daira mejãcha sobiapanasi akʉza maʉ̃ bedʼeata awurura jaradiakĩrãsi».

Octubrede, Daizeze Bedʼea Kʼawuabibarirabara dedeka jʉ̃drʉsida karta mebẽã Rutherfordba ledata, naʉ̃ kartade jarabasi religion nokʼoraba kʼãrẽ sewida jaradiabʉta. Pʉwʉrʉ zake Cleveland Oklahomane mebẽã Frankba maʉ̃ra kartarata jõma dedekasi, mamina iyara 20 minuto jʉ̃ãibarabasi awuru mebẽrãba iyita eda jʉ̃ẽnamarẽã, mamina iyara mama piki jʉ̃ãbe ẽ basi, basi baera ʉ̃kʉrʉ ẽbẽrarãba iyi pẽwãbarabʉta maʉ̃ karta zakeba kʼãrẽ jarabʉ kʼarea. Maʉ̃ kʼarea iyira iglesia bʉmae mĩrʉ̃si. Iya maʉ̃ iglesiade mĩõ neẽãnʉmʉta ũdui yi jaradiabari Daizeze Bedʼeade bʉesi karta aba akʉza jewedabari aba abakaʉde bʉesi maʉ̃ra kartarãra, iyira maʉ̃ iglesiadebara mesera ãĩ wãsi maʉ̃ta okʼãrãpe, mamina waidide jʉ̃ãĩbarabasi baera ewari erbasi awuru iglesiara ũmene wãita akʉza iyaba oita.

Frankʼra mesera wẽba wãsi mebẽrãbawara yi ũduita jaradama, mamina iyira waidide pẽwãbarabʉ baera gasolina tʉbada jẽdare mĩrʉ̃si. Yumakẽrãra iyi pẽwãpanʉrãra karrude iyi mĩrʉ̃bʉ kʼawa berabarisi, mamina ũduda ẽ basi iyira. Maʉ̃ra yumakẽrãra berabarida audre ẽãne zesi mebẽrã iya jʉ̃ãbadata, aramaʉ̃ta Frankʼra ãyi kʼaidu wãsi.

Maʉ̃ra mebẽrãnebema abaʉba jarabʉ: «Dai maʉ̃ pʉwʉrʉdeba aña wãita, karrude iglesiara kĩrãbita berabaribʉrʉde ũdusida ẽbẽrarã iglesiaza 50 basita akʉza maʉ̃ra ẽbẽranebema ʉ̃kʉrʉba lebasita karta dia amaenapeadara akʉza ʉ̃kʉrʉba yi jaradiabarira ũdubipanasita. Baribʉrʉ daira mamaʉ̃ba mesera wãsi bedʼea zroma ũdui nãã, mejãchade biga diasida Jeowaʼa kʼarebasi baera ẽbẽrarã jara ũrĩbidaita maʉ̃ bedʼea ʉ̃rʉ akʉza jidada ẽ marẽã».

DAIZEZE BEDʼEA KʼAWUAPANɄRABA ZOWAĨNĨGɄA JARADIASIDA AWURU PɄWɄRɄDE

Awuru pʉwʉrʉranebida Daizeze Bedʼea kʼawuapanʉrabara zowaĩnĩgʉabʉta ũdubisida ẽbẽrarã jaradiaita. Bari jaraita, Franciade Józef Krettba jaradiasi ẽbẽrarã Polonianeba zedara, ãyira minane trajapanasi. Józef Krettba diskursota diaibasi, naʉ̃ diskurso trʉ̃ra «Aranʉ bai jẽda piradrʉyi ẽbẽrarã», maʉ̃ diskurso ũrĩ jʉ̃ẽnamarẽã mebẽrãbara ẽbẽrarã jarakasida, mamina saserdote abaʉba iyi iglesiadebemaraʼa jarasi maʉ̃ diskurso ũrĩne wãna ẽ marẽã, mamina ẽbẽrarãbara ũrĩna ẽ basi iyi bedʼeara, awuarabʉrʉ wãsida maʉ̃ diskurso ũrĩne, maʉ̃nera 5 mil audre jʉ̃ẽsida ẽbẽrarãra, yi sasordotesida jʉ̃ẽsi maʉ̃nera. Maʉ̃nera mebẽã Krettbara jarasi saserdoteʼa iya ĩjãbʉare bedʼeamarẽã, mamina saserdotebara oẽ basi maʉ̃ta. Maʉ̃ diskurso tẽã mebẽã Krettbara iya karta erbadara jõma dedekasi ẽbẽrarã, ũdusi baera naʉ̃rabara wãrĩnu kʼawuakĩrãbasita Daizeze ʉ̃rʉ (Amós 8:11).

Áfricade, Claude Brownba Daizeze Bedʼeata jaradia wãsi pʉwʉrʉ Costa de Oro eda (Ghana). Naʉ̃ mebẽãba diskurso diadaba akʉza iya kartara dedekadaba kʼarebasi ẽbẽrarãba wãrĩnu ʉ̃rʉ kʼawuadamarẽã. John Blankson, parmasia ʉ̃rʉ kʼawuabʉba ũrĩsi mebẽã Brownba diskurso diabʉta. Iya maʉ̃ ũrĩsidera kʼawuasi ũdusita wãrĩnuta, iya jarabʉ: «Mʉ̃ra mʉ̃a kʼawuada kʼarea mejãcha sobiabasi akʉza mʉ̃a kʼawuanʉmʉ ʉ̃rʉ wuabema ẽbẽrarã eskueladebemara jaradiabasi».

Ewari aba Johnbara akʉ jʉ̃ẽsi iglesia anglicanata, nama iya saserdoteʼa widisi Trinidad ʉ̃rʉ, iyara kʼawuasi Trinidad ʉ̃rʉ jaradiapanʉra sewidata. Iya Trinidad ʉ̃rʉ widisidera saserdotera mejãcha kĩrʉsi, iyaʼa jarasi: «Wãra namaʉbara bʉra Daizezede ẽ, bʉra Diarude».

Tẽã deda jʉ̃ẽbʉrʉde Johnbara kartata bʉ diabʉesi saserdoteʼa, naʉ̃ kartade jarabasi saserdoteba iya Trinidad ʉ̃rʉ ĩjãbʉta jara ũrĩbimarẽã jõmaʉ̃ra kĩrãbita, saserdotebara iyaʼa jarasi wãmarẽã propesor iyi eskuela zokʼabʉidu, mainʉ jʉ̃ẽbʉrʉde yi propesorbara iyaʼa widisi kartara wãrĩnu iya diabʉesi kʼawuaita saserdoteʼa.

Aramaʉ̃ta Johnba panʉsi: «Mawũã, mʉ̃a diabʉesi».

Propesorbara Johnʼa jarasi awuru kartata bʉ dia bʉemarẽã saserdoteʼa widita iya jaradata kĩrãduamarẽã, aramaʉ̃ta Johnba saserdoteʼa bʉsi:

«Mʉ̃ propersorba jarasi bʉaʼa widimarẽã mʉ̃a nãã jarada bedʼeata kĩrãduaita, mʉ̃a maʉ̃ra okĩrãbʉ mamina bʉa jõmaʉ̃ra kĩrãbita jarara bʉa jaradiabʉra sewidata».

Propesorba Johnʼa widisi: «¿Wãrĩnu maʉ̃ta bʉkĩrãbʉka bʉara?».

Aramaʉ̃ta Johnba jarasi: «Mawũã, wua kʼãrẽta bʉi neẽ mʉ̃ara».

Propesorba Johnʼa jarasi: «Bʉta kʼãwũã saserdote ʉ̃rʉ imitia bedʼeabʉbʉrʉ namaʉ̃bara wãibara, naʉ̃ saserdotera nokʼorabara iglesia jidadadebema baera».

Aramaʉ̃ta Johnba jarasi: «Profe, bʉa daiʼa bedʼea jaradianʉmʉne daiba ũrĩ ẽ dogodera bʉaʼa widipanʉ bʉa audre jara ũrĩbimarẽã, ¿bʉmabida?».

Yi propesorba jarasi: «Mawũã».

Johnba jarasi: «Maʉ̃ta berabarisi kaʉ̃ saserdoteʉ̃me, mʉ̃a iya bedʼea jaradianʉmʉ ʉ̃rʉ widisi audre kʼawuakĩrãbʉ baera, iya mʉ̃a wididata panʉ ẽ basibʉrʉ, ¿mʉ̃ara kʼãrẽa widibara kĩrãduamarẽã, mʉ̃a jaradara kayirua ẽ basibʉrʉ?».

Wãrĩnubaira Johnʼra iyi eskueladebara jʉretada ẽ basi akʉza karta bʉ dia bʉe ẽ basi saserdoteʼa Johnba jarada kĩrãduaita.

AUDRE OKĨRÃPANASI JEOWAITA

The Watch Tower kartaba naʉ̃ poaga ʉ̃rʉ kʼãwũã jarasi: «Davidbara jarasi Jeowaba iyaʼa zarea diaita yõena wãita, dayirãbida abarika jaraseapanʉ (Salmo 18:39). Naʉ̃ne ũdusida sãwũã Jeowaba kʼarebasita iya zokʼabʉta bia odamarẽã akʉza kristianora kʼẽrẽpapanʉraba sãwũã sobiade jaradiapanʉta bedʼea biata».

Naʉ̃ poaga jõbodoare mebẽrãbara jʉrʉsida sãwũã audre jaradia wãita ẽbẽrarã, maʉ̃ kʼarea Chicagode osida awuru opisina emisoradeta. Maʉ̃ opisina trʉ̃ra WORD basi, ingle bedʼeadera naʉ̃bara jarakĩrãbasi DAIZEZE BEDʼEATA, naʉ̃nera zokʼasida makina audre zarea barabʉta ẽbẽrarã jĩgabʉraba ũrĩnamarẽã Daizeze Nokʼo ʉ̃rʉ radiodeba. Maʉ̃ radiode jarabʉra Canadádebemabida ũrĩseabasi.

Poaga 1925de Jeowaba mejãcha kʼarebasi Daizeze Bedʼea Kʼabibariraba audre biʼia ũrĩnamarẽã Apocalipsis 12ba jarabʉta. Maʉ̃ testo ʉ̃rʉ nekʼãrẽ yiwidi kʼawuasidera ʉ̃kʉrʉba idubʉsida Daizeze ode panʉta, mamina mejãchaʉta sobiasida kʼawuasida baera ʉ̃tʉ kʼãrẽta berabarisita akʉza maʉ̃ kʼarea nama egorode kʼãrẽta berabarisita.