Kʼãrẽta kʼawuapanʉ Jesúsba panta diadadeba

1. Ẽbẽrarã Daizeze Bedʼeaba jara ũrĩbibʉrabara, ¿sãwũã akʉpanasi panʼra?

ẼBẼRARÃ Daizeze Bedʼeaba jarabʉraitara panʼra jipade yibia basi, ãyara naʉ̃ra mejãcha kokĩrãbasi (Gén. 14:18; Luc. 4:4). Naʉ̃ panʼra jipade yibia basi baera edaʉde Daizeze Bedʼeabara yiko ʉ̃rʉ bedʼeaita zokʼabʉ bedʼea panta (Mat. 6:11). Ẽbẽrarãba panta audre ũdukʼawuabʉ baera Jesúsbara naʉ̃neba miõba okata osi dos bese (Mat. 16:​9, 10). Akʉdaya naʉ̃ra nebʉradebemata aba Juan yi zroma 6de jarabʉta, mõbe akʉdaya dayirãbara kʼãrẽta kʼawuaseapanʉta maʉ̃neba.

2. ¿Sõbeda nesidasida yiko mejãcha diaita?

² Jesús kʼaidubemaraba Daizeze Bedʼea jaradiapanʉta jõma aribaebʉrʉdera ãyira mejãcha mapaesida, maʉ̃ kʼarea Jesúsba ãyira edesi jãbade pʉwʉrʉ Betsaida kʼawa miõ neẽãbʉma (Mar. 6:​7, 30-32; Luc. 9:10). Ãyi mama panʉne ẽbẽrarã mejãcha jʉ̃ẽsida. Ẽbẽrarã mawũã ũdui Jesúsbara bia edasi, ãyaʼa kãga ũdubisi akʉza jaradia jʉ̃drʉsi Daizeze Nokʼo ʉ̃rʉ, adewara yi kayabʉrata bebikʉasi. Ẽbẽrarã mama panʉne ewari kiʉi Jesús kʼaidubemaraba ãyirai widisida kʼãrẽta kobigaita maʉ̃ra ẽbẽrarã. Ʉ̃kʉrʉ ẽbẽrarã jʉ̃ẽnapeadarabara ãyi kʼaidu abasi yikota, mamina ʉ̃kʉrʉbara jʉrʉ wãibarabasi (Mat. 14:15; Juan. 6:​4, 5). Maʉ̃nera, ¿kʼãrẽta osi Jesúsbara?

JESÚSBA PAN WIÑA BɄDEBA ẼBẼRARÃ MEJÃCHA NIDIASI

3. Jesúsbara iyi kʼaidubemara, ¿kʼãrẽta omarẽã jarasi ẽbẽrarãbari? (Akʉra poto yi nããrabemata).

³ Jesúsba iyi kʼaidubemara jarasi: «Wãnaĩrã nesidʼa ẽã, marãba nekʼobigaudua» (Mat. 14:16). Mamina neẽbasi ẽbẽrarã mejãcha sãwũã nidiaira basi baera yumakẽrãta 5 mil, maʉ̃ awuara wẽrãrata akʉza wũãwũã zakerata jʉachara 15 mil basi baibara (Mat. 14:21). Andrésba kʼãwũã jarasi: «Kũrãta za bʼʉba pan juesoma erubʼʉta cebada omata erubʼʉa, bʼedasidʼa ũme erubʼʉa, mawũãmina ¿naʉ̃ sãwũãĩpe bioitara? (Juan 6:9). Maʉ̃ panʼra sebada oma basi akʉza mejãcha bale ẽ basibaibara, adewara bedasida bisiamapei badabasibaibara akʉza kʉyibasibaibara. Mamina maʉ̃ panbara akʉza maʉ̃ bedabara ẽbẽrarã jõma aribae ẽ baibasi ẽbẽrarã mejãcha basi baera.

4. Juan 6:​11-13 bayeda jarabʉdebara, ¿kʼãrẽta kʼawuapanʉ? (Akʉra potota).

⁴ Jesúsbara ẽbẽrarãta bia edakĩrãbasi baera ãyaʼa jarasi poajãrã ʉ̃rʉ jewedadamarẽã (Mar. 6:​39, 40; akʉra Juan 6:​11-13). Daizeze Bedʼeaba jarabʉ pan dedekasidera akʉza beda dedekasidera Jesúsbara nããrara Jeowaʼa yiwidʼisita biga diaita maʉ̃ yiko kʼarea. Iya maʉ̃ oira yibia basi, wãrĩnubaira maʉ̃ yikora Jeowaba diasi baera. Naʉ̃ba dayirãʼa kĩrãbebibʉ dayirãsida nekoi nããra Jeowaʼa yiwidʼibarata, dayi dobabʉta mawũã ẽ bʉrʉ wuaberabawara nekonʉmʉbʉsida. Tẽã Jesúsba jarasi maʉ̃ yikora dedekadamarẽã ẽbẽrarã. Ẽbẽrarãra jãwũãñena nekosida. Ẽbẽrarã mawũã jõma nidiasidʉ jõ ẽ basi yikora, aramaʉ̃ta Jesúsba iyi kʼaidubemara jarasi maʉ̃ yikora ãba jʉrepeda kʼãrãpe wuagadamarẽã tẽã zokʼaita. Jesúsbara maʉ̃ yikora balbʉe ẽ basi. Naʉ̃ba dayirã yiza biata diabʉ. Yibarirabara naʉ̃ nebʉrata zokʼaseabʉ ãyi wũãwũãra jaradiaita kʼãrẽãba yibiata nekoi nãã yiwidʼita akʉza awuru ẽbẽrarãsida bia edaita, adewara ãya erbʉdebemata awurura diaita Jesúsba oda kĩrãkʼa.

5. Jesúsba miõba okata obʉ ũdui, ¿kʼãrẽta osida ẽbẽrarãbara akʉza Jesúsba kʼãrẽta osi?

⁵ Ẽbẽrarãbara ĩjã ẽ panasi Jesúsba sãwũã kʼãwũã miõba okata oũdubibasita ẽbẽrarã bebikʉabʉde akʉza iya biʼia jaradiabʉde. Ẽbẽrarãbara kʼawuabasibaibara Moisésba jarada ʉ̃rʉ, Daizezeba propeta biata zokʼaita, maʉ̃ kʼarea ãya krĩchasidabaibara maʉ̃ propeta biara Jesústa (Deut. 18:​15-18). Maʉ̃nera ãya krĩchasidabaibara Jesúsʼra Nokʼo bia baseabʉta ẽbẽrarã yiko mejãcha diaseabʉ baera. Maʉ̃ kʼarea ãyara Jesúsʼra ajuerzade nokʼo babikĩrãbasibaibara (Juan. 6:​14, 15). Nawedara judiorãra romanoraba zokʼabasi, maʉ̃ba Jesúsba judio nokʼo bʼaita ĩjãsibʉrʉ, maʉ̃ politikade edabʉ kĩrãkʼa bakasi. Mamina Jesúsbara ĩjã ẽ basi ãyi nokʼo bʼaira. Daizeze Bedʼeaba jarabʉ iyira katumainʉ wãsita doba bʼaita. Naʉ̃ra ẽbẽrarãba Jesúsʼa jarada ʉ̃rʉ jarapanasimina ãyi nokʼo bamarẽã Jesúsbara ĩjã ẽ basi mawũã politikade eda bʼaira. Naʉ̃ba dayirã nebiata jaradiabʉ.

6. ¿Dayirãbara sãwũã Jesúsde kĩrãkʼa oseapanʉ? (Akʉra potota).

⁶ Idi ewadera dayirãra jarada ẽ bayi miõba okata omarẽã, mia dayirãta nokʼo babikĩrãba ẽ bayi. Mamina ẽbẽra aba nokʼo babibʉrʉdera ẽbẽrarãba dayirãʼa jaraseabʉ naʉ̃bari botamarẽã, mawũã ẽ bʉrʉ maʉ̃are bamarẽã jaradayi. Ẽbẽrarãba iyi mawũã osidamina Jesúsʼra politikade eda wã ẽ basi awuarabʉrʉ iya jarasi: «Mʉ̃ Nokʼora naʉ̃ drʉadebema ẽ». Naʉ̃neba Jesúsba dayirã yiza biata amaesi (Juan 17:14;18:36). Idi ewade dayirãbida nesidapanʉ Jesúsde kĩrãkʼa krĩchaita akʉza iya oda kĩrãkʼa oita. Jesúsde kĩrãkʼa dayirãsida Daizeze Nokʼoare panʉ, maʉ̃ Nokʼo ʉ̃rʉ jaradiapanʉ akʉza yiwidʼipanʉ maʉ̃ Nokʼo zemarẽã (Mat. 6:10). Adewara akʉdaya kʼãrẽta kʼawuaseapanʉta Jesúsba pan wiñabʉdeba ẽbẽrarã mejãchaʉta nidiadadeba.

KʼÃRẼTA JARAKĨRÃBɄ PANBA

7. Adewara, ¿kʼãrẽ miõba okata osi Jesúsbara? Maʉ̃nera iyi kʼaidubemarabara ¿kʼãrẽta jarasida? (Juan 6:​16-20).

⁷ Ẽbẽrarã jõma nidia berabarida tẽã Jesúsba iyi kʼaidubemara jarasi nãã wãnamarẽã Capernaúmʼena jãbade. Maʉ̃enara iyira katumaena wãsi, ẽbẽrarãba nokʼo babikĩrãbasi baera (akʉra Juan 6:​16-20). Jesús kʼaidubemara mawũã jãbade wãne nãgʉ zromata zesi. Jesúsba maʉ̃ta ũdui ãyima wãsi jĩrʉne, mamina pusa ʉ̃rʉ, iyi kʼaidubemara kuidʉ jʉ̃ẽbʉrʉde Jesúsba Pedroʼa jarasi iyi kĩrãkʼa pusa ʉ̃rʉ wãmarẽã (Mat. 14:​22-31). Jesús jãbade baridogode nãgʉra taʉtotosi, aramaʉ̃ta iyi kʼaidubemaraba Jesúsʼa jarasida bʉtrʉ wãrĩnu Daizeze warra (Mat. 14:33). a Marcosba naʉ̃ta jarasi: «Mawũẽ ãzhira kʼãbãẽã perabʉdaba bia akʉdruasidʼa. Aramaʉ̃nerã zhi zromata wadʼi kʼawuadʼa ẽbasia pan wĩkaba kʼabanata nekʼobigadʼamina, maʉ̃ne krĩchadʼaira zare basia ãzhi sora» (Mar. 6:​50-52). Nama jarabʉdebara Jesús kʼaidubemarabara biʼia ũrĩna ẽ basi Jeowaba kʼãrẽãba zarea diasita Jesúsʼa miõba okata omarẽã. Maʉ̃ta kʼawuapanʉ ãya jarasi baera Jesúsʼra Daizeze warrata Jesús pusa ʉ̃rʉ teita ũdubʉrʉdebʉrʉ. Mamina Jesúsba ẽbẽrarã panta diasidera ãyara jarada ẽ basi maʉ̃ra. Maʉ̃ kʼarea tẽã Jesúsbara jara ũrĩbisi ẽbẽrarã nidiada ʉ̃rʉ dayirã awuru nebiata jaradiaita.

8, 9. ¿Ẽbẽrarãbara kʼãrẽa jʉrʉ jʉ̃ẽsida Jesúsʼra? (Juan 6:​26, 27).

⁸ Maʉ̃ nruemane ẽbẽrarã jʉ̃ẽsida Jesúsba ãyaʼa yiko diadama mamina Jesúsʼra iyi kʼaidubemarabawara mama neẽbasi. Aramaʉ̃ta ẽbẽrarãra jãbade barida kʼãrãpe wãsida Capernaúmʼena Jesús jʉrʉde (Juan 6:​22-24). Mamina, ¿naʉ̃ra ẽbẽrarãbara jʉrʉpanasika wãrĩnu Daizeze nokʼo ʉ̃rʉ kʼawuakĩrãba? Mawũã ẽ. Ãyara jʉrʉpanasi Jesúsba ãyaʼa yikota diadamarẽã. Maʉ̃ra, ¿sãwũã kʼawuapanʉ?

⁹ Akʉdaya kʼãrẽta berabarisita ẽbẽrarãba ũdusidade Jesústa Capernaúm kʼawa. Maʉ̃ne Jesúsbara ãyaʼa jarasi iyita bari jʉrʉ zebʉdata yiko koya. Jesúsba ãyaʼa jarasi ãya yiko jʉrʉbʉra ewari jõmaʉ̃nẽ ba ẽ baibasita. Maʉ̃ kʼarea jarasi jʉrʉdamarẽã yiko ewari jõmaʉ̃nẽ babiseabʉta (akʉra Juan 6:​26, 27). Aramaʉ̃ne Jesúsba jarasi Jeowaba diaibasita maʉ̃ yiko ewari jõmaʉ̃nẽ babiseabʉra, ẽbẽrarãba maʉ̃ kʼawuabʉrʉde ĩjãna ẽ basi sãwũã mawũã chuta. Mamina, ¿sãwũã chuasi maʉ̃ yikora akʉza kʼãrẽta oibarabasi ãyara maʉ̃ yiko ũduita?

10. ¿Ẽbẽrarãbara kʼãrẽta oibarabasi ewari jõmaʉ̃nẽ bʼaita?

¹⁰ Maʉ̃ra ẽbẽrarãbara kʼawuakĩrãpanasi kʼãrẽta oibarata maʉ̃ yiko ewari jõmaʉ̃nẽ babibʉta ũduita. Ãya krĩchapanasi baibara Moisés leyba omarẽã zokʼabʉta oibarata. Mamina Jesúsba ãyaʼa jarasi: «Marãba kʼãrẽ Daizezedʼeta odʼaira, ĩjãũdua mʉ izha zokʼadʼata» (Juan 6:​28, 29). Naʉ̃ra ẽbẽrarãba ewari jõmaʉ̃nẽ bʼaira ĩjãibarabasi Jesús ʉ̃rʉ. Jesúsbara naweda naʉ̃ ʉ̃rʉ ãyaʼa jaradiamabasi (Juan 3:​16-18, 36). Adewara Jesúsbara tẽãbida jara ũrĩbisi kʼãrẽta oibarata ewari jõmaʉ̃nẽ bʼaita (Juan 17:3).

11. ¿Sãwũã ũdubisida ẽbẽrarãbara yikoara erbaita jʉrʉpanasita? (Salmo 78:​24, 25).

¹¹ Naʉ̃ra ẽbẽrarãbara ĩjãna ẽ basi dayi ewari jõmaʉ̃nẽ bʼaira Jesús ʉ̃rʉ ĩjãibarata. Maʉ̃ba Jesúsʼa jarasida: «¿Bʉara kʼãrẽta ũdudʼakʼata oipe daiba maʉ̃ta ũdudʼape bʉdʼebemata ĩjãnaĩrã? ¿Bʉara kʼãrẽta oipe?» (Juan 6:30). Maʉ̃ tẽã jarasida Moisés ewaridera Daizezebara israelitara diaibasita manáta, maʉ̃ta ãyi yiko basita ewariza (Neh. 9:15; akʉra Salmo 78:​24, 25). Ãya jaradaba ũdubisi ãyimara audre yibia basita ãyaʼa yikoarata diadamarẽã, maʉ̃ kʼarea Jesúsba jara ũrĩbiside manábara ewari jõmaʉ̃nẽ babi ẽ baibasita, awuarabʉrʉ pan ʉ̃tre zebʉba kʼarebaibasita ewari jõmaʉ̃nẽ bʼaita, ãyara mia kʼãrẽsida widida ẽ basi kʼãrẽta jarakĩrãbʉta naʉ̃ba (Juan 6:32). Jesúsba ãyaʼa jaradiabaside kʼãrẽta oibarata ewari jõmaʉ̃nẽ bʼaita ãyara ũrĩna ẽ basi, ¿kʼãrẽa? Ãya ewari jõmaʉ̃nẽ krĩchapanasi baera ãyi bia bʼaita.

KʼÃRẼTA AUDRE YIBIA BAIBARA DAYIRÃITARA

12. ¿Sãwũã ũdubisi Jesúsbara saʉ̃ta audre yibiata?

¹² Adewara Juan yi zroma 6ba dayirã nekʼãrẽ biata jaradiabʉ. Dayirãitara audre yibia baibara Jeowaba zokʼabʉ ũrĩta akʉza iyi neũdukʼawua bia bʼaita. Diaruba Jesústa nemitia obikĩrãside Jesúsba ũdubisi audre yibiata Jeowaba zokʼabʉ oita yikoara jʉrʉira (Mat. 4:​3, 4). Adewara katumane bedʼea bia jaradiade Jesúsbara jarasi audre bigata Jeowa neũdukʼawua bʼaita (Mat. 5:3). Maʉ̃ba dayikʉza widibara: «¿Mʉ̃a kʼãrẽ obʉdeba ũdubibʉka Jeowaba zokʼabʉra mʉ̃itara audre yibiata mʉ̃a nekʼãrẽ bia kãgabʉira?».

13. (1) ¿Kayiruaka dayirãba nesidabʉbari yiwidʼira? (2) ¿Kʼãrẽ kʼãrẽa jʉra kʼawua panaibara israelitara kĩrãkʼa ba ẽ baita? (1 Corintios 10:​6, 7, 11 akʉza akʉra potota).

¹³ Kayirua ẽ dayirãba nesidabʉ kʼarea yiwidʼidaira (Luc. 11:3). Daizeze Bedʼeabara jarabʉ dayi nekoiba, dayi nedoiba akʉza trajabʉdeba nekʼãrẽ bia ũduiba sobia baseabʉta, maʉ̃ra Daizezedeba zebʉ baera (Ecl. 2:24; 8:15; Sant. 1:17). Mamina jʉra kʼawuapanaibara nebiata aukʼara jʉrʉnʉma ẽ baita. Maʉ̃ta kʼawuaseapanʉ apostol Pabloba kristianora jaradadeba. Iyara jarasi israelitaraba oda kĩrãkʼa oda ẽ marẽã (akʉra 1 Corintios 10:​6, 7, 11). Jeowabara ãyaʼa yikota diasi mamina ãyara bia akʉda ẽ basi maʉ̃ra, ¿kʼãrẽa? Ãya nebiata audre kãgapanasi baera (Núm. 11:​4-6, 31-34). Adewara paka zake oro oma yiwidʼisidadera ũdubisida ãyitara audre yibiata nekoita, nekʼãrẽ doita akʉza bia berabarita Jeowaba zokʼabʉ oi kaude (Éx. 32:​4-6). Pʉwʉrʉ Jerusalénta akʉza Jerusalén templo jõita arakʼaita babʉrʉde Pabloba kristianora jarasi jʉra kʼawuapanamarẽã israelitara kĩrãkʼa bada ẽ baita. Abarika idi ewadera dayirãra panʉ naʉ̃ drʉa jõbodoare, maʉ̃ kʼarea dayirãra jʉra kʼawuapanaibara israelitara kĩrãkʼa pana ẽ baita.

14. ¿Kʼãrẽta jarabʉ Daizeze Bedʼeabara yiko ʉ̃rʉra?

¹⁴ Jesúsba jaradiasi dayirãra yiwidʼibamarẽã nruemaza yikota diabamarẽã, adewara jaradiasi yiwidʼimarẽã Daizezeba krĩchabʉta aripe berabarimarẽã ʉ̃tʉ akʉza nama egorode (Mat. 6:​9-11). Daizeze Bedʼeabara jarabʉ drʉa biadera mejãcha bʼaita yikora. Bari jaraita, Isaías 25:​6-8 bayeda jarabʉ yiko warrara mejãcha bʼaita ẽbẽrarãta sobia bamarẽã. Akʉza Salmo 72:16ba jarabʉ: «Bayi mejãcha netata naʉ̃ drʉade, katuma ʉ̃rʉra audre bayi». Adewara bʉa uba ubʉrʉba binota doyi, mawũẽra, ¿bʉara drʉa kĩrãwãreãnẽra kʼãrẽ yiko warrata wia kokĩrãbʉ? (Is. 65:​21, 22). Maʉ̃ nebiara bʉa abapaiba ũdu ẽ bayi.

15. ¿Kʼãrẽta kʼawuadaibara yi ẽjũã kĩrãwãreãnẽ jẽda piradrʉbʉrʉbara? (Juan 6:35).

¹⁵ (Akʉra Juan 6:35). Ẽbẽrarã pan akʉza beda kodabara mejãcha Jesús ʉ̃rʉ ĩjãbʉta ũdubida ẽ basi mamina ãyira jẽda piradrʉseabʉ akʉza dayirãʉ̃me yi ũduseabʉ (Juan 5:​28, 29). Ãyi jẽda piradrʉbʉrʉdera ãyara kʼawuaibara Jesúsba naʉ̃ bedʼea jaradaba kʼãrẽta jarakĩrãbʉta: «Mʉ̃ pan ewari jõmaʉ̃nẽ babibʉra yima zebʉra wua jarraka bayi». Adewara ĩjãnaibara Jesúsʼra ãyibari beisita. Ẽjũã kĩrãwãreãnẽra ẽbẽrarã jẽda piradrʉbʉrʉra Jeowa ʉ̃rʉ akʉza iya krĩchabʉta jaradiadayi akʉza wũãwũãra ʉ̃rabʉrʉ tobʉrʉra. Ẽjũã kĩrãwãreãnẽ dayirãba yiko warra kobʉrʉba mejãcha sobiabiyi, mamina dayirãba kʼarebabʉrʉde ẽbẽrarãta Jeowa neũdukʼawuara bamarẽã naʉ̃ba audre sobiabiyi.

16. ¿Kʼãrẽta kʼawuadai wuarebema artikulodera?

¹⁶ Nainʉ pai dayirãba kʼawuasida Juan yi zroma 6ba jarabʉta mamina Jesúsbara maʉ̃ awa jaradia ẽ basi ewari jõmaʉ̃nẽ bʼai ʉ̃rʉra. Jesúsba ẽbẽrarã jaradiadabara nesidabasi bia ũrĩta iya jaradiabʉta. Dayirãbida abarika nesidapanʉ biʼia kʼawuaita Jesúsba jaradiada ʉ̃rʉ, maʉ̃ kʼarea wuarebema artikulode kʼawuadayi Juan yi zroma 6ba adewara kʼãrẽta jaradiabʉta.