¿Kʼawuabasika?

¿Saserdoterabara kʼãrẽta obasi altarde nedʉwʉrʉra wabara?

POAGAZA saserdotera israeldebadaraba, beapanasi templode nedʉwʉrʉrata mejãcha. Nebʉra ʉ̃rʉ mejãcha kʼawuabʉba nããrabema judioba jarasi paskua obʉrʉza saserdoterabara beapanasita 250 mil korderorata audre oprenda bama kĩrãkʼa, mamara mawũã nedʉwʉrʉra beabʉba wata mejãcha zarrabasi (Lev 1:​10, 11; Núm. 28:​16, 19). ¿Maʉ̃ wabara ãyara kʼãrẽta opanasi?

Nekʼãrẽ kikibari estudia panʉrabara ũdusida Jesús ewaride templobadata, mama sãwũã saserdoteraba altarde nedʉwʉrʉra beapanaside waba jaigʉ ẽã erpananata. Maʉ̃ templora tega bʉesida poaga 70de D.E.

Akʉdaya kʼãrẽta osidata maʉ̃ jaigʉ ẽã erpanaita:

• Altar badamae osida zobeata: Charles W. Wilsonʼra juesi poaga 1864de templobadaidu, maʉ̃ne iya ũdu kʼãrãpe karta Ordnance Survey of Jerusalem de naʉ̃ta jarasi: «Altarderabasi zobeata, mamina maʉ̃ zobeara juebasi Cedrón koribi drʉaidu, adewara maʉ̃ wara maʉ̃ zobeade wãbasi».

  Bʉ libro ley akʉza judioraba kʼãrẽ obada ʉ̃rʉ bʉta, maʉ̃ librora bʉsida poaga 200 D.E. Maʉ̃ libroba jara ũrĩbibʉ basita zobearãta ũme altar eskinane. Nedʉwʉrʉra wa zʉgʉdadera maʉ̃ra zobearane wãbasi. Maʉ̃ta juebasi Cedrón doeda.

• Baniata mejãchabasi: Saserdoterabara mejãcha erbaibarabasi baniata mawũã maʉ̃ altar jaigʉ ẽã erbaita akʉza maʉ̃ zobeade eda wa zʉgʉ bʉeita. Bania templodebadara iyabaʉ pueblodeba zebasi. Maʉ̃ temploidu bania jʉ̃ẽbadara iyabaʉ pueblodeba zebasi tubodeba maʉ̃ra, ãyara birabasi ponchera zromane. Sientipico Joseph Patrichʼba jara ũrĩbibʉ: «Maʉ̃ templode bania zebada kĩrãkʼara neẽbasi akʉza mawũã wa zʉgʉita».