«Yõra Jeowade»

1999de nokʼo Fraciadebemaba jarasi Betelʼa, kʼãwũã ãyi mebẽrãba plata diabʉta ãyabida diadamarẽã. Daira juezʼra nãã jʉ̃ẽsimina Franciade daibara gana au ẽ basi, maʉ̃ kʼarea daibara jʉrʉsi awuru juezʼrainʉ jʉ̃ẽita, mamina maʉ̃nebida gana au ẽ basi. Maʉ̃ kʼarea nokʼorabara 4.500.000 de euro jidasida (20 mil millones de pesos bade). Franciadebema tribunalrane daita bia wã ẽ basi baera, daira wãibasi Tribunal Europeoidu. Dai maʉ̃ ʉ̃rʉ bedʼeaitakʉanʉne Tribunal Europeodebemaba jarasi ãba yi jʉredaita abogado Franciadebemarabawara akʉza Tribunal Europadebema kʼarebabarirabawara, mawũã jõmaʉ̃ta bedʼea abarika zedai kʼawuaita.

Daiba krĩchasi Tribunal kʼarebabariba daiʼa jaraita mebẽrãba kʼãwũã diabʉdebemata ãyaʼa wiña diadamarẽã, mamina daiba maʉ̃ta osibʉrʉ Daizeze Bedʼeaba jarabʉ kĩrãkʼabʉta oẽ bakasi. Daira mawũã krĩchabʉidu ãya trʉ̃si baera akʉ wãnamarẽã, jʉ̃ẽsi daira, mawũã ãyita wawia ũdubita (Mat. 22:21).

Aramaʉ̃ne Tribunal kʼarebabaribara jarasi dai Jeowa ʉ̃rʉ Kʼawuabipanʉrãbara wiña diaibarabasita mebẽrãba donasione diabʉra nokʼora Franciaradebema. Aramaʉ̃ne daira Jeowa jaure zareaba kʼarebasi jaraita Tribunalbara dai platara nokʼoraba jãrĩsita.

Maʉ̃ kʼarea kĩrʉsi maʉ̃ Tribunal kʼarebabarira nokʼora ʉ̃rʉ. Daiba jaraside nokʼoraba jãrĩsita daiba donasione plata diabʉra. Tribunal kʼarebabaribara mawũã kʼẽãkʉasi nokʼora abogadora akʉza mama jõbisi maʉ̃ reunionʼra. Mama kʼawuasi daibara Jeowa kʼarebadeba ganasita akʉza maʉ̃ba sobia wãsida.

30 junio 2011de Tribunal Europeoba jarasi Jeowa ʉ̃rʉ Kʼawuabipanʉrãba kʼãrẽa plata diaira neẽãta akʉza jarasi nokʼora kʼãwũã Jeowa ʉ̃rʉ Kʼawuabipanʉrã plata jãrĩnara jẽda diadamarẽã, adewara interesbara. Maʉ̃ ewaride berabaridaba idibasidu dai Jeowa ʉ̃rʉ Kʼawuabipanʉrãra mejãcha kʼarebabʉ daiba opanʉta aduʼa odamarẽã. Daiba maʉ̃ ewaride maʉ̃ bedʼeara krĩcha ẽ basi jaraita, mamina maʉ̃ bedʼea jarabʉrʉba daibara ganasi. Maʉ̃ bedʼeara basi Davidba mõgara abaʉba Goliatʼa beada kĩrãkʼa, ¿kʼãrẽa mawũãbasi? Davidba jarasi baera «yõra Jeowade» baera (1 Sam. 17:​45-47).

Franciade bedeabaridatrʉ maʉ̃trʉ gana ẽ basi mebẽrãbara, awuarabʉrʉ maʉ̃ awuara 70drʉadebema awuara awuarakadebema nokʼora religionʼraba akʉza politikoraba ãya kãgabʉta omarẽã kãgapanasi, maʉ̃ kʼarea mebẽrãra akʉza tribunal nãã wãibarabasi. Maʉ̃ne mebẽrãbara Tribunal nãã jʉ̃ẽsidera ganasi 1.225 bese. Mebẽrãba kʼãwũã ganananeba kʼarebabʉ ãya jaradiabʉrʉde aduʼa ẽbẽrarã jaradiaita akʉza nokʼorabara iduaribibʉ kʼãrẽ, mebẽrãba ãya obʉta odamarẽã, adewara obida ẽ bandera izarea bidaita, imno trãita akʉza kẽgʉde wa bʉeita.

Mʉ̃a nãã ʉ̃tre kʼãwũã nebʉrataera, berabarisi Europade, mamina mʉ̃ Europaeda wãi naena mʉ̃ra basi Betel Estados Unidosdebemane. Mʉ̃a jara ũrĩbiyi kʼãrẽa Estados Unidosdeba Europaeda wãsita.

MɄ̃ YIBARIRABARA JARADIASI SOIDUBA JARADIAKĨRÃMARẼÃ

Mʉ̃ yibarira trʉ̃ra George akʉza Lucille, ãyira Escuela Galaadʼdebema 12de graduasi, maʉ̃ne zokʼasida Etiopíaeda. Mʉ̃ra mama tosida poaga 1956de. Daizeze Bedʼeade edachuasi yumakẽrã Daizeze Bedʼea ʉ̃rʉ mejãcha jaradiabʉta, maʉ̃ trʉ̃ra Felipebasi, maʉ̃ kʼarea mʉ̃ yibariraba mawũã trʉ̃gasida mʉ̃ra (Hech. 21:8). Maʉ̃ berabarida poaga aba babʉrʉde nokʼorabara jarasi jaradia ẽ bamarẽã wua. Maʉ̃ne mʉ̃ra wikabasimina mʉ̃a ũdubasi sãwũã mʉ̃ yibariraba Jeowaba kãgabʉta opanasita maʉ̃ra nokʼoraneba chuwea. Mamina poaga 1960de nokʼorabara daiʼa jarasida maʉ̃ pʉwʉrʉ aña wãmarẽã.

Mama Etiopíadera mʉ̃trʉ abapai erpana ẽ basi, awuarabʉrʉ mamabida tosida mʉ̃ nawekau Judyta akʉza mʉ̃ tẽãbʉ Leslieta, maʉ̃ tẽã daira wãsi Estados Unidosʼeda, mamabida mʉ̃ yibarirabara jaradiakĩrã jaradiapanasida ãyi misionerobasi ewaribasidebida. Mʉ̃ yibarirabara jaradiasida mʉ̃aʼa akʉza mʉ̃ mebẽrã Jeowa kãgamarẽã akʉza omarẽã Jeowaba kãgabʉta. Mʉ̃ra buru kʼoesi 13 poagabʉta, maʉ̃ne mʉ̃ 16 babʉrʉde Arequipa pʉwʉrʉeda wãsi daira jaradiade, maʉ̃ pʉwʉrʉra bʉ Perúde.

Mebẽrã 4 panʉta akʉza mʉ̃ta, Betelba zokʼa bʉesi cordillera central de los Andesʼeda wãmarẽã, mamara jaradiadakabasi. Diabara jaradiabarabasi ẽbẽrarã quechua akʉza aimaradebemara, maʉ̃nera mʉ̃ra 18 poagabasi. Adewara daira mejãcha wãbasi karru kaja kĩrãkʼa chude, maʉ̃ kʼarea diaba trʉ̃gasi Arca. Mʉ̃a kĩrãbebʉ daiba ẽbẽrarã jaradiasita Jeowabara jõbita nekʼãrẽ neẽãbʉta, beita akʉza zʉbʉriata (Apoc. 21:​3, 4). Maʉ̃ bedʼea ũrĩbʉrʉba ẽbẽrarã mejãchaʉta Daizeze pʉwʉrʉde besi.

ZOKʼA BɄESIDA ESTADOS UNIDOS BETELDEMAMA

Mebẽã Zõrãrã Burubiadebemata yi trʉ̃ Albert Schroederta jʉ̃ẽsi Perúeda 1977de. Mama iya mʉ̃aʼa jarabarisi widimarẽã kʼarebaita Betel Estados Unidosdebemane, mʉ̃a iya jarada kĩrãkʼa osi. 17 junio 1977de mama kʼareba jʉ̃drʉsi. Mʉ̃ 4 poaga mama kʼarebaside mʉ̃ara mama nekʼãrẽ mejãcha osi bari jaraita, nekʼãrẽ ãrĩma ara oita akʉza jareita (Departamentos de Limpieza y Mantenimiento).

Junio 1978de asamblea internasional Nueva Orleansde, mʉ̃a ũdukʼawuasi Elizabethta. Elizabethsida abarika mʉ̃ kĩrãkʼa Daizeze ode warisi, iyira 4 poagabasi precursor regularta. Elizabethbida audre diakĩrãbasi Jeowaʼa. Daira yi bedʼeapanasi, mawũã ewari berabari wãne daira yiya kãgasida baera juwa jidasi 20 octubre poaga 1979de. Maʉ̃ tẽã daira ãba Betelde traja jʉ̃drʉsi.

Mebẽrã dai kongregasione nãã bada Brooklyn Spanish bʉraba daira bia edasida. Maʉ̃ tẽã daira jʉ̃ẽsi awuru kongregasion ũbeabʉrainʉ, mamabida mebẽrãbara daira bia edada kʼãrãpe akʉza so zarea diasida dai kʼãwũã Betelde trajabʉ kʼarea. Adewara dai mebẽrãba akʉza neũdukʼawuaraba dai yibarira zõnã badata kʼareba akʉsi. Dai kʼarea kʼãwũã odapeadara jipa kĩrãdua ẽ bayi.

MɄ̃A DEPARTAMENTO LEGALDE KʼÃRẼ OBADATA

Enero 1982de, mʉ̃aʼa jarasida wãmarẽã Departamento de Asuntos Legales Beteldebemaena. Maʉ̃are 3 poaga berabarida tẽã mʉ̃aʼa jarasida estudiamarẽã abogado bʼaita. Mʉ̃ mawũã maʉ̃ne estudiabʉde mʉ̃a kʼawua ẽ badata kʼawuasi. Jaradiapanasi maʉ̃ klasedera sãwũã ẽbẽrarãbara nekʼãrẽ mejãcha oseabʉta nama Estados Unidosde akʉza ʉ̃kʉrʉ drʉade. Maʉ̃ra mawũãbasita Jeowa ʉ̃rʉ Kʼawuabipanʉrãba ganasi baera Tribunalde, maʉ̃ berabaridata mejãcha jarasida unibersidade.

Poaga 1986de mʉ̃ 30 poagabaside Departamento de Asuntos Legales akʉbari babisida. Mʉ̃ra mejãcha sobiabasi ãya maʉ̃ omarẽã zokʼasida baera, mamina warrarabasi bera kʼawua ẽ basi sãwũã oita, maʉ̃ kʼarea mejãcha perabasi.

Mʉ̃ra abogadode garaduasi 1988de, mamina mawũã estudiabʉde bera jĩga wãnebasi Jeowadeba. Kʼãwũã unibersidaeda wãnaba daya krĩchabiseabʉ wuabemarane ʉ̃ta mejãcha kʼawuachuta akʉza nekʼãrẽ mejãcha kãgadogota. Mamina mʉ̃ kima Elizabethbara mʉ̃aʼa kĩrãbebisi mʉ̃ unibersidaeda wãi nãã mʉ̃a nekʼãrẽ mejãcha obadata Jeowa kʼarea mawũã iyi kʼawa bʼaita. Iya mʉ̃aʼa mawũã kĩrãbebibʉrʉba mʉ̃ra zarea osi Jeowa kʼawa bʼaita maʉ̃ba wiña wiñane maʉ̃ta owãsi. Mʉ̃a mama kʼawuasi audre yibiata Jeowa kʼawa bʼaita daya nekʼãrẽ mejãcha kʼawuabʉira, adewara audre yibia daya Jeowaʼa kãga ũdubita akʉza dayirã mebẽrãbida.

NOKʼO NÃÃ BEDʼEABɄ IDU JARADIABIDAMARẼÃ BEDʼEA BIATA

Mʉ̃ unibersidade estudia berabarida tẽã krĩcha jʉ̃drʉsi sãwũã kʼarebaita Departamento Legal Beteldebemata akʉza mebẽrã sãwũã kʼarebaita idu jaradiabidamarẽã. Dai organizasione nekʼãrẽ mejãcha awuara ojʉ̃drʉsida, maʉ̃ kʼarea daibara nekʼãrẽ mejãcha oibarabasi, mʉ̃ita maʉ̃ zarebasimina, mamina mawũãsidu sobiabasi mʉ̃ra. Nããrãra dai organizasionbara karta diabʉrʉdera ẽbẽrarãbara platata diaibarabasi daiʼa maʉ̃ bari. Mamina poaga 1991ne jarasida plata widi ẽãta karta diabʉdade ẽbẽrarã, awuarabʉrʉ ãya diaseabʉta diadamarẽã. Maʉ̃ba Jeowa organizasionʼra mejãcha kʼarebasi ʉ̃kʉrʉ impuesto paga ẽ baita, mejãchaʉba krĩchasida maʉ̃ mawũã obʉrʉba zare bʼaita jaradiaita, platara mesera bʼai jõita akʉza ẽbẽrarã mejãchaʉba Daizeze ʉ̃rʉ kʼawua ẽ baibasita, mamina wãrĩnu bʼai maʉ̃ra mawũã berabari ẽ basi. Maʉ̃neba ʉ̃ta ẽbẽrarã mejãchaʉba erbaseabʉ kartara Daizeze Bedʼea ʉ̃rʉ bedʼeabʉta mamina kʼãrẽ dia ẽã. Maʉ̃ kʼarea Jeowa pʉwʉrʉranera mejãchabʉ ẽbẽrarãra. Mʉ̃a ũdubʉrʉ dayirãba kʼãwũã nebia ũdupanʉra Jeowa kʼarebadeba kʼãwũã ũdupanʉta akʉza Zõrãrã Burubiadeba (Éx. 15:2; Mat. 24:45).

Mebẽrãbara ãyi Tribunal nãã bedʼeabʉrʉdera bari ãyi kʼãwũã abogado kʼarea gana ẽ, awuarabʉrʉ nokʼorabara bia akʉpanʉ mebẽrãba kʼãrẽ opanʉneba. Poaga 1998de Zõrãrã Burubiarata ũbea akʉza ãyi kimarabawara wãsi Cubaeda asambleabade, maʉ̃ne nokʼoraba ũdusida maʉ̃ra mebẽrãba sãwũã ẽbẽrarãra bia edasita akʉza sãwũã wawia ũdubibasita. Mama kʼawuasida eda politikade i wã ẽãta. Ãya mawũã odata yibiabasi dai audre bedʼeabʉira.

Nokʼorabawara bedʼeabʉde idu jaradiabidamarẽã maʉ̃ta bedʼea abarika ze ẽ bʉrʉ Tribunal nãã bedʼeapanʉ (Filip. 1:7). Bari jaraita, warrara Jeowa ʉ̃rʉ Kʼawuabipanʉrã Europadebemaba akʉza Corea del Surdebemaba nokʼora jarasi gorogorode eda wã ẽ baita, mamina nokʼorabara maʉ̃ra ĩjã ẽ basi, maʉ̃ba 18.000 mebẽrã Europadebemata akʉza mebẽrã 19.000 Corea del Surdebemata karselʼeda bʉesida wãkĩrã ẽ basi baera gorogorora bʼaita.

7 julio 2011de, Tribunal Europeo de Derechos Humanosba jarasi warrara gorogororaeda wã ẽãra nekʼãrẽ awuara oseabʉta, maʉ̃ra mawũã berabarisi Bayatyan contra Armenia berabarida kʼarea. Adewara Tribunal Constitucional de Corea del Surdebemabida 28 junio 2018de maʉ̃ba jarada kĩrãkʼa jarabarisi. Warrara Jeowa ʉ̃rʉ Kʼawuabipanʉrãnebemata, mawũã kʼẽrẽpa ba ẽ basibʉrʉ, maʉ̃ra mawũã berabari ẽ bakasi.

Mebẽrã Departamento Legal Betelde trajapanʉra naʉ̃ drʉa jõmaʉ̃nẽbemaba, mejãcha trajapanʉ mebẽrãba aduʼa jaradiadamarẽã akʉza ãya Jeowaba jarabʉ kĩrãkʼa aduʼa odamarẽã. Nokʼorabara mebẽrãra mejãcha pẽwãpanʉ, mamina daira sobiapanʉ kʼãwũã mebẽrã nokʼoraba pẽwãpanʉta kʼarebabʉ baera. Edaʉde mawũã opanʉta gana ẽ bʉrʉ daiba kʼãwũã obʉdeba nekʼãrẽ mejãcha jaradiapanʉ nokʼora akʉza ẽbẽrarã (Mat. 10:18). Dai juez nãã bedʼeade wãbʉrʉdera bari dai krĩchamabʉta jara ẽ, awuarabʉrʉ ũdubipanʉ eda Daizeze Bedʼeaba kʼãrẽta jarakĩrãbʉta. Maʉ̃ta ũdupanʉ juezʼraba nokʼora abogadoraba akʉza ẽbẽra notisiadebemaraba, adewara ẽbẽrarã mejãchaʉba. Ẽbẽrarã Daizeze ʉ̃rʉ wãrĩnu kʼawuakĩrãpanʉraba maʉ̃ta ũdudara kʼawuapanʉ kʼaita Jeowa ʉ̃rʉ Kʼawuabipanʉrãra akʉza wãrĩnu ũdubipanʉta Daizeze Bedʼeaba jarabʉ kĩrãkʼa obʉta, maʉ̃ba ʉ̃kʉrʉta dayirã mebẽã ba zebari.

JEOWA KʼAREBADEBA JÕMA BIA OPANɄ

Mʉ̃ra 40 poaga ba kʼãwũã Departamento de Asuntos Legalesde trajabʉta, maʉ̃ kʼarea mebẽrã pʉwʉrʉ biodebemata kʼareba zebʉrʉ akʉza Tribunal nãã bio wãbʉrʉ. Mʉ̃ara mejãcha kãga mebẽrã kʼãwũã mʉ̃bawara trajabʉra Departamento de Asuntos Legalesde akʉza mebẽrã maʉ̃ne naʉ̃ drʉa jõmaʉ̃nẽ trajabʉrasida. Mʉ̃a mejãcha mawũã nekʼãrẽ bio ozebʉrʉ kʼarea sobiabʉ.

Mʉ kima Elizabeth iyi kayaba zarea jõbi wãmina iyira mʉ̃me kʼãwũã ãbabʉ naʉ̃ poaga 45 bayeda akʉza iyira mʉ̃me kʼãwũã ãbabʉ dai biabʉde akʉza biabʉ ẽãne.

Mʉ̃ kimaba mʉ̃meba ũdu zebʉrʉ, daiba nekʼãrẽ kʼãwũã ozebʉrʉra, dai zareadeba obʉ ẽãta, awuarabʉrʉ Davidba nama jarada kĩrãkʼabʉ dayi zareara zebʉ Jeowadeba. Wãrĩnu «yõra Jeowade» (Sal. 28:8).