¿Kʼãrẽta oibara bʉ sobia bʼaita?

1. ¿Sãwũã bʼaiba wãrĩnu sobia baseabʉ?

¿BɄRA wãrĩnu sobiabʉka? Yi ẽbẽra sobiabʉra iya nekʼãrẽ wika erbʉmina, maʉ̃ba sobiabʉ akʉza Jeowaba iya nekʼãrẽ bia diabʉdeba sobiabʉ. Ãya erbakĩrãbʉta neẽ baera, maʉ̃ kʼarea so kayiruabʉ ẽ, mamina maʉ̃ba jarakĩrãkʉ ẽ maʉ̃ra krĩcha ẽãta. Bari jaradaita, kristianorabara ãya Jeowaita nekʼãrẽ mejãcha okĩrãbʉ (Rom. 12:1; 1 Tim. 3:1). Ãya pribilegio kãgabʉta ze ẽ mina mawũãsidu sobiabʉ.

2. ¿Kʼãrẽ bedʼea zromane eda baeseabʉ dayirãta sobiabʉ ẽ bʉrʉ dayirãba erbʉ kʼarea?

² Daya erbʉba sobiabʉ ẽ bʉrʉ bedʼea zromata ũduseabʉ, ʉ̃kʉrʉra ãya erbʉba sobiabʉ ẽ baera mejãcha trajabʉ ãya kãgabʉ erbaita maʉ̃ nesida ẽ mina. Mamina ʉ̃kʉrʉ kristianorãra ãya kãgabʉ erbai kʼarea nezrugabʉ akʉza ʉ̃kʉrʉba jarapanʉ, «naʉ̃ra mʉ̃ita» o ʉ̃kʉrʉba jaraseabʉ, «mʉ̃a jida kʼãrãpe jẽda diayi tẽã naʉ̃ platara, mʉ̃a mejãcha jʉ̃ãsi maʉ̃ erbaita» mamina Jeowaba mawũã nezruga bʉrara bia akʉ ẽ iyi trʉ̃ ʉ̃rʉ ibia bedʼeabi ẽ baera (Prov. 30:9). Ʉ̃kʉrʉra ãya pribilegio erbakĩrãbʉta neẽ baera Jeowadeba jĩga wãbʉ (Gál. 6:9). Dayirãta sobiabʉ ẽ bʉrʉ dayirãba erbʉ kʼarea Jeowa odebʉmina maʉ̃ nekayiruade eda baeseabʉ.

3. ¿Sãwũã kʼarebaseabʉ dayirãra eda Filipenses 4:​11, 12ba jarabʉdebara?

³ Daya kãgabʉta erbʉ ẽ mina zarea odaibara sobia bʼaita daya erbʉ kʼarea, apostol Pabloba naʉ̃ bedʼeata bʉbarisi: «Nekʼãrẽ badude kʼawuasi sãwũã sobia bʼaita» (akʉra Filipenses 4:​11, 12). Apostol Pabloba naʉ̃ bedʼea bʉbarisidera eda karselde basi, iya nekʼãrẽ badu erbʉba sobiabasi. Edaʉde dayita zareamina daya nekʼãrẽ erbʉba sobia bʼaita, apostol Pablo yizadeba nekʼãrẽ mejãcha kʼawuaseapanʉ. Naʉ̃ artikulode akʉdayi dayirã kʼãrẽba kʼarebaseabʉta daya erbʉ kʼarea sobia bʼaita.

BɄA ERBɄ KʼAREA BIGA DIA KʼAWUARA

4. ¿Kʼãrẽa biga dia kʼawuabʉba sobia panaseabʉ? (1 Tesalonicenses 5:18).

⁴ Biga diabʉta dia kʼawuapanʉbʉrʉ, mawũãra sobiapanañi (akʉra 1 Tesalonicenses 5:18). Bari jaradaita, dayirãba biga dia kʼawuabʉta ũdubidara sobia panañi dayirãba erpanʉ kʼarea akʉza dayirãba pribilegio erbʉta soiduba opanʉbʉrʉ, mawũãra sobiade odayi adewara pribilegio daya kãgabʉta ũdu ẽ mina sobia opanañi, nama Daizeze Bedʼeade jarabʉ, dayirãbara yiwidʼibʉrʉdera Jeowa biga diabʉta ũdubi kʼawuadaibara. Dayirãba biga diabʉta ũdubi kʼawuadara Daizeze neneẽãbʉba kʼarebayi dayirã aduʼa bʼaita (Filip. 4:​6, 7).

5. ¿Israelitarabara kʼãrẽa biga diabʉta ũdubidaibarabasi? (Akʉra potota).

⁵ Krĩchadadrʉ kʼãrẽta berabarisita israelitarata. Bari jaradaita, israelitarabara Jeowa badua jarapanasi ãyira audre bia nekʼobasita Egiptode (Núm. 11:​4-6). Wãrĩnu ãyi drʉa ibʉawabʉde panasidera zarebasi mamina ãya krĩchasidabʉrʉ Jeowaba ãyi sãwũã kʼarebasita biga diabʉta ũdubikasida. Israelitarabara krĩchadaibarabasi ãyi sãwũã Egiptode nezokʼabasita akʉza sãwũã mejãcha zʉbʉriabada ʉ̃rʉ, akʉza sãwũã Jeowaba ãyira ẽdrʉbisita Egiptoeda zokʼabʉeside zʉbʉria zroma diezdebemata, adewara ãyi mamaʉ̃ba wãsidera Egiptoraba nebia erbadata edesida, bari jaradaita orota, platata akʉza wuata (Éx. 12:​35, 36). Adewara Jeowabara israelitarãra kʼarebasi iyi zareaba Mar Rojo kĩrãbaribiside akʉza Egipto gorogororaneba ẽdrʉbiside, maʉ̃ne drʉa ibʉawabʉde wãne Jeowabara ãya diabasi kʼodamarẽã manata. Ãyi Jeowaba mawũã kʼarebabʉidu israelitaraba biga diabʉta ũdubida ẽ basi baera sobiada ẽ basi.

6. ¿Kʼãrẽba kʼarebaseabʉ biga diabʉ ũdubi kʼawuaita?

⁶ ¿Kʼãrẽba kʼarebaseabʉ daya biga diabʉ ũdubi kʼawuaita? Nããra, ewari jʉrʉibara kʼãrẽba sobiabibʉta akʉza dayi kuadernone bʉibara kʼãrẽa biga dia kʼawuaita (Lam. 3:​22, 23). Wuabemara biga dia kʼawuaibara akʉza audre Jeowa dayirãbari nekʼãrẽ obʉ kʼarea (Sal. 75:1). Dayirãba neũdukʼawuara biga diabʉta jʉrʉ kʼawuadara, dayirãbida abarikʼa ãyide kĩrãkʼa oseapanʉ (Deut. 1:​26-28; 2 Tim. 3:​1, 2, 5). Dayirãba biga diaita jʉrʉpanʉbʉrʉ dayirãba nekʼãrẽ wĩka erpanʉbʉsida maʉ̃ kʼarea sokayirua ba ẽ bayi.

7. ¿Acira kʼãrẽba kʼarebasi jẽda sobia bʼaita?

⁷ Krĩchadadrʉ mebẽã Indonesiadebemata iyi trʉ̃ Aci, iya nebʉrabʉ: «Pandemia COVID-19 basidera, mʉ̃a akʉ jʉ̃drʉsi mebẽrã sãwũã bia badata maʉ̃ba mʉ̃ra bia senti ẽ basi. Mamina mʉ̃ra kʼarebasi mʉ̃a krĩchaiba Jeowaba mʉ̃a kʼãrẽ nebia diabʉ ʉ̃rʉ akʉza Jeowa organizasione sãwũã nekʼãrẽ biata ũdubʉta, maʉ̃ kʼarea mʉ̃a Jeowa biga diabʉ adewara maʉ̃ba mʉ̃ra kʼarebasi audre sobia bʼaita». Bʉta sokayiruabʉbʉrʉ nekʼãrẽ mejãcha neẽ kʼarea, kirãbera mebẽã Aci sãwũã berabaridata (Gál. 6:4).

DAYIMABɄTA ODA Ẽ BAIBARA

8. ¿Barucʼra kʼãrẽta berabarisi?

⁸ Barucʼra, propeta Jeremías nezokʼabasi maʉ̃ne Barucʼra sobia ẽ besi iya nekʼãrẽ kãgabʉta erba ẽ basi baera. Iyara Jeremíasʼʉ̃meba jara wãibarabasi israelitara Jeowa bedʼea kʼãwũã ũrĩ ẽ bada kʼarea kʼãrẽ bedʼea zroma ũdudaita, maʉ̃ta ewari aba iya Jeowaba zokʼada okʼaude Barucʼbara okrĩchabesi iyimabʉta. Jeowabara propeta Jeremíasneba jarasi: «Bʉara nekʼãrẽ bia zroma erbaita jʉrʉbʉ bʉitabʉrʉ maʉ̃ra wua jʉrʉrara» (Jer. 45:​3-5). Maʉ̃ne Jeowabara jarakĩrãbasi iya nekʼãrẽ erbʉba sobia bamarẽã. Barucʼba Jeowaba ũrãgʼa diadata ũrĩsi baera, Jeowabara bia akʉsi.

9. ¿Kʼãrẽta kʼawuapanʉ 1 Corintios 4:​6, 7deba? (Akʉra potorata).

⁹ Mebẽrã mejãchaʉba krĩchaseabʉ Jeowa odebʉraba ãyabʉrʉ erbaseabʉta pribilegio bia awurura diapanʉra, ãyi mejãcha trajabʉ kʼarea, nekʼãrẽ bia okʼawuabʉ kʼarea akʉza Jeowa ode poaga bioba baera. Krĩchara nama apostol Pabloba bʉdata 1 Corintios 4:​6, 7 (akʉra). Jeowaba dayirã pribilegio diabʉ kʼarea akʉza nekʼãrẽ bia obʉ kʼarea akʉ ẽ wuabemaraira dayirãra audre yizromata, awuarabʉrʉ Jeowabara maʉ̃ nebiara dayirã diabʉ iya mejãcha kãgabʉ baera(Rom. 12:​3, 6; Efes. 2:​8, 9).

10. ¿Sãwũã ũdubiseapanʉ dayitrʉ abapai krĩchabʉ ẽãta?

¹⁰ Jesúsʼra Daizeze warrabasimina akʉza zarea mejãcha erbasimina kĩrãbedadrʉ iyara sʉgʉsita iyi kʼaidupanʉra jĩrʉra, adewara Jesúsdeba mejãcha kʼawuaseapanʉ dayikʉza mejãcha krĩcha ẽ baita. Apostol Juanba bʉsi: «Jesúsbara kʼawuabasi Daizezeba iyita zokʼa bʉesita akʉza nekʼãrẽ jõma iyi juwade amaesita adewara Daizezema jẽda wãibarabasita. [ . . . ], mõbe yi kʼaidubemara jĩrʉta sʉgʉ jʉ̃drʉsi» (Juan 13:​3-5). Jesúsbara krĩchaseabasi iyi kʼaidubemarabʉrʉ iyi jĩrʉra sʉgʉseabasita, mamina mawũã krĩcha ẽ basi akʉza iyara krĩchaseabasi nekʼãrẽ nebiata iyabʉrʉ erbaseabasita akʉza bia baseabasita (Luc. 9:58). Jesúsbara iyitrʉ abapai krĩcha ẽ basi, maʉ̃ kʼarea iya nekʼãrẽ erbʉ kʼarea sobiabasi. Iyara dayirãita amaesi yiza biata (Juan 13:15).

11. ¿Dennira kʼãrẽba kʼarebasi yi jẽda sobia bʼaita?

¹¹ Mebẽã aba Países Bajosdebemaba, iyi trʉ̃ Dennisba jarabʉ iyira mejãcha zarea obʉta Jesús bada kĩrãkʼa bʼaita, iyikʉza krĩcha ẽ baita. Iya jarabʉ: «Mʉ̃a asignasion kãgabʉta awurua diabʉdade, mʉ̃ra mejãcha sokayiruabʉ maʉ̃ kʼarea. Aramaʉ̃ta mʉ̃ mawũã krĩchabʉrʉdera JW Library^® de estudiabʉ mʉ̃yikʉza krĩcha bʼa ẽ bai ʉ̃rʉ, mawũã oda tẽã testorata wagabʉ mawũã tẽã mesera ũduita. Adewara diskursorata ũrĩbʉ maʉ̃ bedʼea ʉ̃rʉ jarabʉta mʉ̃ selulardeba.a Adewara mʉ̃ara kʼawuasi dayirãba nekʼãrẽ obʉdeba Jeowa trʉ̃ ʉ̃rʉ ibia bedʼeabiseabʉta, mawũã dayitrʉ bia akʉdamarẽã oẽãta. Mawũẽra jõmaʉ̃ta Jeowaita trajaseabʉ». Ewari abaʉde dayirãta mawũã sobia ẽ bidabʉrʉ krĩchadaibara maʉ̃ mebẽã ʉ̃rʉ, sãwũã zarea osita iyidoba krĩcha ẽ baita. Dayirãba maʉ̃ta odara audre Jeowa neũdukʼawua baseabʉ akʉza sobia baseabʉ (Sant. 4: 6, 8).

JEOWABA KʼÃRẼ NEBIA WEYA ABɄ Ʉ̃RɄ KRĨCHARA

12. ¿Kʼãrẽ nebia ʉ̃ra zei krĩchabʉba kʼarebaseabʉ sobia bʼaita? (Isaías 65:​21-25).

¹² Idi ewade dayirãba mejãcha ũdupanʉ bedʼea zromata, mamina Jeowaba kʼãrẽ nebia weya abʉ ʉ̃rʉ krĩchapanʉbʉrʉ ʉ̃ra zeide maʉ̃ba kʼarebayi dayirã sobia bʼaita. Isaías libroba jarabʉ Jeowara kʼawuabʉta dayirãbara naʉ̃ drʉadera mejãcha ũdupanʉta bedʼea zromata, mamina iya jarabʉ maʉ̃ bedʼea zromara jõbita (akʉra Isaías 65:​21-25). Ẽjũã kĩrãwãreãnẽra dayirãbara de biata erpanañi akʉza bia panañi, trajo biata erpanañi, adewara yikota mejãcha erpanañi akʉza mamara perada ẽ bayi nekayirua berabari kʼarea akʉza dayirã wũãwũãrasida neida berabari ẽ kʼarea (Is. 32: 17, 18; Ezeq. 34:25). Maʉ̃ kʼarea dayirãbara wãrĩnu ĩjãseapanʉ Jeowaba maʉ̃ bedʼea ʉ̃rʉ jarabʉra wãrĩnu berabarita.

13. Kʼãwũã naʉ̃ ewari jõbodoarebʉ baera, ¿kʼãrẽ bedʼea zromata ũdupanʉ akʉza sãwũã kʼarebaseabʉ ʉ̃ra zei ʉ̃rʉ krĩchaiba?

¹³ Idi ewari jõbodoarepanʉ baera akʉza ũdu wã baera bedʼea zromata, krĩchadaibara idi ewade ʉ̃ra zeide kʼãrẽ nebia zei ʉ̃rʉ (2 Tim. 3:1). Jeowabara dayirãra diabʉ kʼãrẽ iyi kʼarebata, iyi zareata, dayirãba kʼãwũã bedʼea zroma idi ewade ũdupanʉta awuantadamarẽã (Sal. 145:14). Edaʉde mejãcha trajaibara deda yiko erbaita akʉza mʉ̃ mebẽrãba nesidabʉ erbaita. Mamina dayirãba kʼawuapanʉ maʉ̃ra ewari jõmaʉ̃nẽ mawũã ba ẽ baita, Jeowaba dayirã jarasi baera ẽjũã kĩrãwãreãnẽra iyara diaita dayirãba nesidabʉta akʉza nekʼãrẽ mejãcha. Maʉ̃ kʼarea dayirãbara krĩchadaibara ʉ̃ra zeidera maʉ̃ra bedʼea zromara Jeowabara jõbita. Mamina Jeowaba dayirã jarabʉ kʼãrẽ, maʉ̃ ẽjũã kĩrãwãreã zeyedara iya kʼarebaita (Sal. 9:18; 72:​12-14). Mawũã ẽ bʉrʉ pʉpʉkaba kayabʉbaibara, depresionba kayabʉbaibara, mamina maʉ̃ba jarakĩrãkʉ ẽ maʉ̃ra kayarara ewari jõmaʉ̃nẽ bʼaita. Daizezeba jarabʉ kʼãrẽ ẽjũã kĩrãwãreãnẽra maʉ̃ra kayara akʉza beita wuara neẽ baita (Apoc. 21:​3, 4). Dayirã ʉ̃rʉ aña jarapanʉmina, kayapanʉmina, dayirã mebẽrãta beisibʉrʉ, mawũã ẽ bʉrʉ badu bedʼea zroma ũdupanʉmina, maʉ̃ nebia ʉ̃ra zeiba kʼarebabʉ dayirãra aduʼa bʼaita akʉza sobia bʼaita. Krĩcha ẽã dayirã sãwũã berabaribʉta, dayirãbara kʼawuapanʉ maʉ̃ bedʼea zromara atiedabʉrʉ mawũã ũdupanʉta, ẽjũã kĩrãwãreãnẽra maʉ̃ bedʼea zromara wuara neẽbayi (2 Cor. 4:​17, 18).

14. ¿Kʼãrẽba kʼarebaseabʉ wãrĩnu ĩjãita nebia ʉ̃ra zeira aripe berabarita?

¹⁴ Dayirãba bia krĩchapanʉbʉrʉ Jeowaba ʉ̃ra zeide kʼãrẽ nebia weya abʉ ʉ̃rʉ, mawũãra bedʼea zroma ũdupanʉmina sobia panañi akʉza wãrĩnu ĩjãnañi maʉ̃ra aripe berabarita. Krĩchadadrʉ naʉ̃ra yizata, pãrĩgʉanʉmʉnera daya nesida pokota mawũã bia ũna tei bʼaita, maʉ̃ kĩrãkʼabʉ dayirãba krĩchabʉrʉde ʉ̃ra zeida ẽjũã kĩrãwãreãnẽ sãwũã bʼaita. Ẽbẽrarã idi ewade plata neẽãba mejãcha krĩcha zroma opanʉ, mamina krĩchadadrʉ ẽjũã kĩrãwãreãnẽ plata wua nesida ẽ baita akʉza ẽbẽrarã kʼãrẽ neẽãbʉsida nebarabaita, naʉ̃ ʉ̃rʉ krĩchaiba sobia baseabʉ. Dayirãba krĩchabʉrʉde ẽjũã kĩrãwãreãnẽ sãwũã Jeowaba kãgabʉ kĩrãkʼa panaita, mawũãra idi ewade dayirãba pribilegio kãgabʉta erpanʉ ẽ mina sobiapanañi (1 Tim. 6:19). Bedea zroma erpanʉmina maʉ̃ra ʉ̃rʉ wiña wiñane krĩchara zare ẽ bayi maʉ̃ra ʉ̃rʉ ĩjãita ewari berabari wãne.

15. ¿Kʼãrẽta kʼawuaseabʉ Christa nebʉradebara?

¹⁵ Parrapo 11de bedʼeasida Dennis ʉ̃rʉ, waya yi kimara Christa, iya nebʉrabʉ: «Mʉ̃ra kayabʉ, mamina maʉ̃ kayabara mʉ̃ bakararata zare neẽã owã akʉza mʉ̃ yara jõma, maʉ̃ kʼarea mʉ̃ra yi audrera kamanebʉ akʉza siya ruedade jewedabʉ akʉza mejãcha pʉakʉabʉ mʉ̃ yarara. Medikoba mʉ̃aʼa aranʉweda jarasi mʉ̃ra bia ẽ baita akʉza mʉ̃ kʼãwũã kayabʉra audre idra wãita. Mamina mʉ̃a wãrĩnu ĩjãbʉ ʉ̃ra zeide mʉ̃ra bia bʼaita. Naʉ̃ drʉade mʉ̃ kʼawua audre idra wãimina, mamina mʉ̃a kʼawuachu ẽjũã kĩrãwãreãnẽra mʉ̃ra audre bia bʼaita».

«WAWIATA ŨDUBIPANɄBɄRɄ KʼÃRẼ WAE Ẽ BAYI»

16. ¿Kʼãrẽa nokʼo Davidbara jarasi Jeowa «wawiata ũdubipanʉbʉrʉ kʼãrẽ wae ẽ bayi»?

¹⁶ Dayirãra Jeowa odebʉba sobiapanʉ, mawũãsidu jõmaʉ̃ba ũduseapanʉ bedʼea zromara. Krĩchadadrʉ nokʼo David ʉ̃rʉ, iyi wũãwũãra ũbea beasida, iyi ʉ̃rʉ sewa nebʉrata jarasida, iyira sewasida, poaga biobayeda pẽwãsida beadaita, mawũãsidu iyira sobiabasi. Iya naʉ̃ bedʼeata jarasi Jeowa ʉ̃rʉ jarabʉrʉta «iyaʼa wawiata ũdubipanʉbʉrʉ kʼãrẽ wae ẽ bayi» (Sal. 34:​9, 10). ¿Kʼãrẽa maʉ̃ bedʼeata jarasi? Mawũã jarasi iya kʼawuabasi baera Jeowaba dayirãra zʉbʉriabi ẽãta, awuarabʉrʉ iyara kʼarebabʉ dayirãba nesidabʉta erpanamarẽã (Sal. 145:16). Abarika Daividba oda kĩrãkʼa dayirãsida sobiapanʉ kʼawuapanʉ baera kʼãrẽ bedʼea zroma ũdupanʉmina Jeowaba dayirãra kʼarebaita.

17. ¿Bʉra kʼãrẽa sobia bakĩrãbʉ?

¹⁷ Jeowabara kãgabʉ dayirãba kãgabʉta erpanʉ ẽ mina sobiapanamarẽã (Sal. 131:​1, 2). Dayirãba kʼawuatabe baera kʼãrẽta oibarata kʼãwũã sobia bʼaita zarea odaibara biga dia kʼawuaita dayitrʉ abapai krĩcha ẽ baita akʉza krĩchaibara nekʼãrẽ ʉ̃ra zeide nebia erbaita, maʉ̃ta odara naʉ̃ bedʼea jaraseapanʉ: «Kʼawuasi sobia baseabʉta» (Filip. 4:11).