Lepanʉraba widipanʉta
¿Kʼai sõbebayeda jaradiadai Daizeze Bedʼeara?
Jesúsba naʉ̃ta jarasi: «Akʉza bedʼea bia Daizeze Nokʼo ʉ̃rʉra jaradiadayi naʉ̃ drʉa jõmaʉ̃nẽ ẽbẽrarãba kʼawuadamarẽã pʉwʉrʉra jõmaʉ̃nẽ, maʉ̃ tẽã zeyi jõĩta» (Mat. 24:14 TNM). Naʉ̃ bersikulode akʉza bersikulo 6 akʉza 13de griego bedʼeade «jõi» jarabʉbara jarakĩrãbʉ Diaruba zokʼabʉta jõita Armagedón ewaride (Apoc. 16:14, 16). Naʉ̃ba jarakĩrãbʉ dayirãba Daizeze Bedʼeara jaradiadaita asta Armagedón jʉ̃drʉyeda pai. Dayirãbara nããra mawũã krĩchapana ẽ basi.
Nãã krĩchapanasi Daizeze Bedʼeara wua jaradiada ẽ baita religion zeri ẽã jõma jõbʉrʉde akʉza zʉbʉria zroma jʉ̃drʉbʉrʉde (Apoc. 17:3, 5, 15, 16). Adewara krĩchapanasi zʉbʉria zroma jʉ̃drʉbʉrʉdera Jeowabara iduaribi ẽ baibasita yi ũrĩkĩrãbʉa jaradiaira (Is. 61:2). Akʉza krĩchapanasi zʉbʉria zromaneba ẽdrʉibasita maʉ̃ jʉ̃drʉi nãã Jeowaʉ̃me kʼẽrẽpa badaratrʉ. Jarapanasi maʉ̃ra ẽbẽrarã bei ẽ baibisita poaga 607de Jerusalén jõside ʉ̃kʉrʉ judiora bei ẽ bada kĩrãkʼa, maʉ̃rãra jidasida baera maʉ̃neba ẽdrʉita Jeowaʉ̃me kʼẽrẽpapanasi baera akʉza jʉra baera nemitia oita (Ezeq. 5:11; 9:4). Mamina naʉ̃ra abarikabʉ ẽ Jesúsba Mateo 24:14de jaradaʉ̃me naʉ̃ testoba jarabʉ ẽbẽrarãbara ewari erbaita Daizeze ode bʼaita jidaita asta Armagedón jʉ̃drʉyeda pai.
Dayirãba Mateo 24:14de jarabʉta bia ũrĩbʉrʉba kʼarebabʉ audre bia ũrĩta Apocalipsis 16:21ba jarabʉta naʉ̃nera bedʼeabʉ ʉ̃tʉba jʉrzoabʉta yelo zromata. Naʉ̃ra testo ũmene bedʼeabʉ ẽbẽraba sãwũã ũrĩbʉta Daizeze Bedʼeata. Bari jaraita apostol Pabloba jarasi yi beideba ẽdrʉraitara bedʼea bia baibasita Daizeze Bedʼeara maʉ̃ba ãyitara nekʼãrẽ tʉ̃ãpobʉ kĩrãkʼa baibasita mamina Daizeze nejʉraraitara Daizeze Bedʼeara bedʼea kayirua baibasita beida kĩrãkʼa ũzeabaibasita (2 Cor. 2:15, 16). Kʼawuabibʉ baera Diaruba zokʼabʉta naʉ̃ drʉara akʉza iya zokʼabʉ jõita arakʼaitabata akʉza ũdubibʉ baera ãya obʉra mitiata (Juan 7:7; 1 Juan 2:17; 5:19).
Adewara Apocalipsis 16:21ba jarabʉ ʉ̃tʉba mejãcha jʉrzoa zeita yelo zromarata naʉ̃ba jarakĩrãbʉbaibara zʉbʉria zroma berabarinʉmʉne audre jaradiadaibasita mawũã Jeowa trʉ̃ audre ũdukʼawuadamarẽã (Ezeq. 39:7). Maʉ̃ ewaridera religion zeri ẽã jõna tẽãra bayi ẽbẽrarã Daizeze Bedʼea ũrĩkĩrãpanʉta ãyitara Daizeze Bedʼeara nekʼãrẽ tʉ̃ãpobʉ kĩrãkʼabayi akʉza ãya kĩrãbeseapanʉ Jeowa ʉ̃rʉ Kʼawuabipanʉrãba nãã religion zeri ẽã jõita jarabadata.
Maʉ̃ kĩrakʼa berabarisi Egiptode 10 plaga berabarida tẽã. Jeowaba Egiptodebema daizeze zeri ẽ zʉbʉria oda tẽã ẽbẽrarã israelitara ẽãra Jeowa pʉwʉrʉma zesi (Éx. 12:12, 37, 38). Naʉ̃ra ẽbẽrarã Jeowa pʉwʉrʉare bʼaita krĩchasida baibara Moisésba 10 plaga bʼaita jarada aripe berabaribʉrʉta ũdubʉrʉde.
Yi ẽbẽrarã Jeoware wãbʉrʉbara religion zeri ẽã jõna tẽãra kʼarebaibara ʉ̃ta wãira wabida nama egorodebʉta mawũã obeja trʉ̃gadamarẽã (Mat. 25:34-36, 40). Maʉ̃ba jarakĩrãbʉ ẽbẽrarãbara Daizeze ode bʼaita jidaseabʉta asta Armagedón jʉ̃drʉyeda paibʉrʉ maʉ̃nera ʉ̃ta wãira nama egorodepananara ʉ̃ta ededayi.
Naʉ̃ba ũdubibʉ Jeowabara dayirãra arigʉ kãgabʉta akʉza so zʉbʉria akʉbʉta. Daizeze Bedʼeaba naʉ̃ta jarabʉ: «Iyara kãgaba jʉ̃ãbʉ maraba kayirua obʉta jẽda krĩchamarẽã mawũã bei ẽ baita» (2 Ped. 3:9).