Mia wawibasimina misionerabasi

Mʉ̃ra tosida poaga 1951ne pʉwʉrʉ Viena, Austriade mʉ̃ mebẽrãra katolikorabasi mʉ̃abida Daizeze ʉ̃rʉ ĩjãbasi akʉza Daizezeʼa yiwidʼibasi mia wawibasimina. Maʉ̃ta mʉ̃ 9 poagabʉde mʉ̃ zezeba Daizeze Bedʼeata kʼawua jʉ̃drʉsi Jeowa ʉ̃rʉ Kʼawuabipanʉrãbawara tẽã mʉ̃ papabida iyaba osi.

Daira audre ẽãne ãba yi jʉrebari eda wã jʉ̃drʉsida Vienane kongregasion Döblingne adewara daibara nekʼãrẽ mejãcha opanasi ãbaʉba, Daizeze Bedʼeata akʉpanasi akʉza audre estudiapanasi, ãba yi jʉrebari eda wãpanasi adewara jʉrʉpanasi asamblea obadamae kʼarebaita. Maʉ̃nera mʉ zezebara mejãcha kʼarebasi daiba Jeowata audre kãga zemarẽã, asta iyi yiwidʼibʉrʉdera iya Jeowa widibasi kʼarebamarẽã mʉ̃ mebẽãta mʉ̃me prekursora ba zemarẽã mamina maʉ̃nera mʉ̃ara maʉ̃ta kãgaba ẽ basi.

JEOWADETA AUDRE OJɄ̃DRɄSI

Mʉ̃ra 14 poagabʉta buru kʼoesi 1965de, mamina mʉ̃itara Daizeze Bedʼea jaradia wãira zarebasi ẽbẽrarã mʉ̃a ũdukaʉ̃me bedʼeaibarabasi baera, adewara mʉ̃ara krĩchabasi wuabemara warrarabara mʉ̃reira nekʼãrẽra audre bia okʼawuapanʉta maʉ̃ba ãyibawara bakĩrãbasi mʉ̃ra, maʉ̃ kʼarea buru kʼoeda tẽãra neũdukʼawuara Jeowa odepanʉ ẽãta jʉrʉsi, mʉ̃ra ãyibawara ãba bakirãbasi mamina bia ẽ basi kʼawuabasi baera ãyibawara ãba babe ẽãta ãyira Jeowa odepanʉ ẽ baera, mamina maʉ̃ idubʉira mʉ̃itara zarebasi, ¿kʼãrẽba kʼarebasi mʉ̃a maʉ̃ra neũdukʼawuara idubʉita?

Maʉ̃nera Dorothée 16 poagabʉta kongregasione nejaradiabaribasi, mʉ̃a ũdusi iyara Daizeze Bedʼeara deza deza jaradia wãkĩrãbʉta mamina mʉ̃ra iyi nãã chuasimina badua jaradia wã ẽ basi, maʉ̃ba mʉ̃yikʉza krĩchasi: «Mʉ̃ yibarirãra Jeowa odepanʉ kõbe Dorothéera abapaikirʉ Daizeze ode akʉza yi papa kayabʉsida akʉibara mawũãsidu Daizeze Bedʼeara jaradiakĩrãne jaradiabʉ». Mawũã ũduiba mʉ̃ta kʼarebasi Daizeze Jeowaita audre oita, mawũãbʉta audre ẽãne dai ũmenaʉba prekursoradota ojʉ̃drʉsida, nããra osida ausiliarta maʉ̃are regularta. Dorothéeba Daizeze Bedʼeata sobiade jaradiabʉ baera naʉ̃ba kʼarebasi mʉ̃abida iyaba sobiade jaradiaita akʉza mʉ̃a ẽbẽra abaʉʼa Daizeze Bedʼea jaradia jʉ̃drʉita akʉza deza deza jaradia wãbʉrʉde pera ẽ jaradiaita adewara ẽbẽra ode wã akʉza badumae.

Mʉ̃ prekursora regularbadata poaga aba babʉrʉde zokʼabʉesida mebẽã aba yi trʉ̃ Heinzta, mʉ̃ kongregasione prekursor espesial bʼaita iyara Jeowa ʉ̃rʉ kʼawuasi yi mebẽã Canadáidu bʉta akʉ jʉ̃ẽside, yi mebẽãra Jeowa odebasi. Mʉ̃a iyi ũdubʉrʉdeba kãgatotosi mamina iyira krĩchabasi misionero bʼaita mʉ̃ara maʉ̃ oita krĩchachua ẽ basi, abedaeda maʉ̃ba mʉ̃a ũdubi ẽ basi iyi kãgabʉta. Maʉ̃ta tẽã daira yi kãgasida akʉza juwa jidasida adewara ãbaʉba prekursoradota ojʉ̃drʉsida Austriade.

MISIONERA BʼAITA KRĨCHABɄ

Heinzbara badua jarabasi iyi misionero bakĩrãbʉ ʉ̃rʉ mamina ajʉerzade maʉ̃ odaita jara ẽ basi awuarabʉrʉ mʉ̃a bedʼeata widibasi maʉ̃ ʉ̃rʉ krĩchabita. Bari jaraita, kʼãwũã jarabasi: «Dayi wũãwũã neẽ baera, ¿kʼãrẽa audre oda ẽpe Jeowaita?». Mia wawibʉmina mʉ̃ra prekursorabasi mamina misionera bʼaira mʉ̃itara zarebasi mawũãsidu Heinzbara badua jara edabasi iyi misionero bakĩrãbʉ ʉ̃rʉ mʉ̃a maʉ̃ ʉ̃rʉ krĩchamarẽã adewara iya mʉ̃aʼa ũrãgʼa diadaba mejãcha kʼarebasi, iya jarabasi krĩcha e marẽã mia wawia bʉ ʉ̃rʉ awuarabʉrʉ krĩchamarẽã sãwũã kʼarebaita wuabema ẽbẽrarãta. Mawũã ũrãgʼa diadaba mʉ̃ra mejãcha kʼarebasi.

Mʉ̃ara wiña wiñane krĩcha wãsi misionera bʼaita maʉ̃ kʼarea solisitu birasi Eskuela Galaad eda dia bʉeita maʉ̃ta mebẽã sukursaldebema abaʉba jarasi mʉ̃a ingle kʼawuabʉta audre bia kʼawuamarẽã, aramaʉ̃ta mʉ̃a audre kʼawua jʉ̃drʉsi, ingle kʼawuabʉta poaga ũbea berabaribʉrʉde daira zokʼa bʉesida kongregasion serbocroata bedʼeabʉma Salzburgo Austriade maʉ̃ kongregasione daira jõmaʉ̃nẽ 7 poagabasi Daizeze Bedʼea jaradiapanʉta, 6 poagabayeda prekursorbasi daira akʉza poaga ababayeda sirkuitobasi. Serbocroata bedʼea zareabasimina ẽbẽraʼa kʼawuabipanasi Daizeze Bedʼeata.

Poaga 1979de mebẽrã Beteldebemaba daiʼa jarasida wãnamarẽã Bulgaria eda mamina jarasida daira pasiade wãi kĩrãkʼa wãnamarẽã mamara Daizeze Bedʼea idu jaradiabida ẽ baera akʉza daiʼa jarasida Daizeze Bedʼeara jaradiada ẽ marẽã awuarabʉrʉ dayirã kartara wĩka okʼãrãpe mera ededamarẽã mebẽrã wẽrãra juesomapanʉrama Sofía Bulgaria kapitalde. Mamina maʉ̃ oira mʉ̃ra mejãcha perabasi mamina Jeowaba kʼarebasi maʉ̃ bia oita adewara mʉ̃a ũdusi mebẽrã wẽrãra juesomapanʉrabara wãrĩnu zowaĩnĩgʉata ũdubipanʉta akʉza Jeowadera sobiade opanʉta ãya kʼawuapanasimina polisiaba ãyi jida kʼãrãpe karsel eda bʉeita, ãyi yizaba mʉ̃a so zarea diasi Jeowa organizasionba mʉ̃a nekʼãrẽ omarẽã jarabʉrʉra sobiade oita.

Daibara akʉza solisitu birasida Eskuela Galaadʼeda wãita mamina naʉ̃nera daita trʉ̃sida, daiba krĩchapanasi maʉ̃ kʼarea Estados Unidosʼeda wãita ingle bedʼeade kʼawuadaita mama, mamina noviembre poaga 1981ne Eskuela Galaadʼra osida sukursal Wiesbaden Alemaniane, mawũẽra aleman bedʼeade osida baera mʉ̃itara zare ẽ basi maʉ̃ eskuelade bia ũrĩta mamina, ¿sama zokʼadaibasi daira?

JARADIASIDA PɄWɄRɄ YÕ MEJÃCHA BɄMAE

Daira zokʼa bʉesida Keniaena mamina sukursalba tẽã widisi Ugandaeda wãseabʉ kʼawuaita Kenia kʼawa, mʉ̃ra perabasi mama wãira, 10 poaga audrebasi Uganda nokʼoba zokʼabʉta general abaʉba jãrẽnata iyi trʉ̃ra Idi Amin, naʉ̃ba zokʼa jʉ̃drʉsidera ẽbẽrarã mejãcha makenasi akʉza mejãcha zʉbʉriabisi adewara poaga 1979de iyi nejʉraraba jãrẽsida iya zokʼabʉra, naʉ̃ jõma kʼarea mʉ̃ra mejãcha perabasi maʉ̃ pʉwʉrʉ eda wãira yõta mejãchabasi baera. Mamina Galaadʼde kʼawuadaba kʼarebasi Jeowa ʉ̃rʉ audre ĩjãita, maʉ̃ kʼarea ĩjãsida Uganda eda wãita.

Ugandadera mitia berabarinʉmasi maʉ̃ta Heinzba jarasi Anuario 2010de sãwũã berabarinʉmasita mama, iya jarasi: «Neẽ basi baniata, luzta akʉza telepononeba sãwũã bedʼeaita adewara mejãcha batabarabasi akʉza mejãcha nezrʉgabaramasi audre nezrʉgabasi diamaside, maʉ̃ kʼarea ẽbẽrarãra diamasi kʼãĩ ẽã piki Daizezeʼa yiwidʼibasi ãyi deda neida berabari ẽ marẽã». Mawũã mejãcha zarea basimina mebẽrãra Jeowaʉ̃me kʼẽrẽpabasi.

Poaga 1982de, Heinzta mʉ̃me jʉ̃ẽsida pʉwʉrʉ Kampala Uganda kapital eda, daira jʉ̃ẽsida Sam akʉza Christina Waiswa deda ãyara erpanasi wũãwũãra juesoma akʉza mamarabasi yi mebẽrã wũãwũãrata, mama panasi daira jedeko juesomabayeda naʉ̃ra mebẽrãra nekoma abapai kiʉbasi, naʉ̃ba ũdubisi daira wãrĩnu bia edakĩrãpanasita, maʉ̃ba daira mejãcha sobiapanasi. Daiba ãyideba nekʼãrẽ mejãcha kʼawuasida. Bari jaraita, daiba ũdupanasi bania wĩkaʉba kʉipanasita akʉza iyabaʉ baniata zokʼapanasita baño tasade edabʉeita, maʉ̃ kʼawuaira daitara yibiabasi misionerora baera. Maʉ̃ta 1983de daiba ũdusida dai bia bʼai deta Kampalade.

Daibara mejãcha sobiade jaradiapanasi Daizeze Bedʼeara, mʉ̃a kĩrãbebʉ jedeko abaʉde daiba dayirã kartarata 4.000 ẽbẽrarã dedekasidata mamina daibara audrera kãgapanasi ẽbẽrarãba Daizezeʼa wawia ũdubipanʉta akʉza Daizeze Bedʼea ũrĩkĩrãbʉta. Heinzba mʉ̃mebara dai aba abakaʉba 10 mawũã ẽ bʉrʉ 15 kʼaiʼa Daizeze Bedʼea jaradiaita erpanasi ãyideba nemejãcha kʼawuapanasi daibara. Bari jaraita, ãyi semanaza ãba yi jʉrebari eda wãira jĩga wãibarabasimina maʉ̃ kʼarea aukarabʉta ũdubida ẽ basi awuarabʉrʉ sobiade wãpanasi.

1985de akʉza 1986de, yõ ũme berabarisi Ugandade, daibara badua akʉpanasi wũãwũãrata zokʼapanasita põgata atʉmarẽã maʉ̃raba kʼawua jaramarẽã ode kʼaita berabariseabʉta akʉza berabari ẽãta. Maʉ̃ poagadera daibara Jeowaʼa widisi krĩcha biata diamarẽã akʉza jʉra kʼawua babimarẽã adewara perabi ẽ marẽã daiba Daizeze Bedʼea jaradiapanʉena. Maʉ̃ta Jeowabara panʉsi daiba widibʉra, daiba ẽbẽrarã Jeowa ʉ̃rʉ kʼawuakĩrãbʉta ũdubʉrʉdera kĩrãduabasi yõbʉra akʉza wua perada ẽ basi.

Daibara Daizeze Bedʼea jaradiakĩrã basi ẽbẽrarã Uganda eda jʉ̃ẽpanʉraʼa. Bari jaraita, Daizeze Bedʼea kʼawuabisida Murat akʉza yi kima Dilbar Ibatullin, naʉ̃ra Tartaristán Rusia centraldebemabasi. Muratʼra medikobasi, tẽã ãyi ũmenaʉba ĩjãsida Jeowa odepanaita, atiara ãyira kʼẽrẽpapanʉ Daizeze ode. Tẽã mʉ̃a ũdukʼawuasi ẽbẽrã wẽrã Ucranianebemata yi trʉ̃ra Tatjana Vileyska, iyira mejãcha krĩcha zroma obʉ baera krĩchabasi iyikʉza beita maʉ̃ta iyira tẽã buru kʼoesi akʉza jẽda iyi drʉa eda wãsi adewara kʼarebasi kartarata tradusita ucraniano bedʼea eda.a

ZOKʼASIDA JARADIA WÃMARẼÃ AWURU DRɄA EDA

Daira 1991ne Austriade pasiapanasi, maʉ̃ne mebẽrã Beteldebemaba trʉ̃sida mõbe jarasida daira wãmarẽã Bulgaria eda Daizeze Bedʼea jaradiade. Mʉ̃a nãã jarada kĩrãkʼa dai nãã jʉ̃ẽsidera mera edesida kartarata mebẽrãita maʉ̃nera Daizeze Bedʼeara idu jaradiabida ẽ basi. Mamina atiara daira mama zokʼasida Daizeze Bedʼea jaradiade, Europa Estedebema nokʼo zokʼabadara awuruta bʉesida baera idu jaradiabipanasi.

Daiʼa jarasida jẽda wã ẽ marẽã Uganda eda, maʉ̃ba ewari neẽ basi daiba nekʼãrẽ erbada jʉrepeita akʉza mebẽrã jaraita daira wã abarita. Daira jipa wãsi Betel Alemaniaena, mama daiʼa diasida karruta maʉ̃ karrude wãsi daira Bulgariabayeda. Dai jʉ̃ẽbʉrʉde daiʼa jarasida Daizeze Bedʼea jaradiabari 20 panʉrata akʉmarẽã pʉwʉrʉ Sofíade.

Bulgariadera daibara bedʼea zromata ũdusida, mamabema bedʼeara daibara bedʼea be ẽ basi akʉza bulgarodera kartarãra ũmepei erpanasi, naʉ̃ta: La verdad que lleva a vida eterna akʉza Mi libro de historias bíblicas adewara ẽbẽrarã Daizeze Bedʼea kʼawuabira biode zarebasi, mawũãsidu mebẽrãbara sobiade jaradiapanasi. Mamina iglesia ortodoxaba kʼawuabʉrʉde daiba Daizeze Bedʼea jaradiabʉta ãyara pẽwã jʉ̃drʉsida.

Poaga 1994de nokʼoraba jarasida Jeowa ʉ̃rʉ Kʼawuabipanʉrãra religion ẽãta, maʉ̃ kʼarea ẽbẽrarã Bulgariadebemarabara krĩchasida Jeowa ʉ̃rʉ Kʼawuabipanʉrã ʉ̃rʉra ĩjãbe ẽãta, maʉ̃ne mebẽrã mejãchaʉta jidasida. Periodikode, telebisorde sewanebʉrʉta mejãcha jarapanasi Jeowa ʉ̃rʉ Kʼawuabipanʉrã ʉ̃rʉ. Bari jaradaita, jarapanasi Jeowa ʉ̃rʉ Kʼawuabipanʉrãbara ãyi wũãwũãrãra idu beibipanʉta wata kẽgʉde idubʉebida ẽ baera akʉza ãyi neũdukʼawuara mawũã ẽ bʉrʉ ãyi kʼaidupanʉra jarapanasita ãyikʉza beimarẽã, mawũẽra daitara Daizeze Bedʼea jaradiaira jipa zarebasi, edaʉde ẽbẽrarãbara daiʼara jʉra bedʼeapanasi, imitia bedʼea panasi akʉza trʉ̃panasi polisiata maʉ̃ awuara dai ʉ̃rʉ nekʼãrẽta batapanasi. Zareabasi dayirã kartadebemarata Ugandaeda diabʉeira akʉza ãba yi jʉreita de ũduira jipa zarebasi, ewari aba asamblea obarabʉde polisiara eda wã kʼãrãpe jarabasi wua oda ẽ marẽã asambleara. Daira kʼãwũã berabarikabasi, Ugandadera daira bia edabasi ẽbẽrarãbara akʉza ũrĩkĩrãbasi Daizeze Bedʼeara mamina, ¿kʼãrẽba kʼarebasi dai sobiabʉta adua ẽ baita?

Daitara mejãchade bigabasi mebẽrãbawara ãba bʼaita, mebẽrãra mejãcha sobiapanasi ãya kʼawuasi baera Jeowa ʉ̃rʉ akʉza daita ãyibawara basi baera adewara dayirãinʉ yi kʼarebapanasi akʉza ãbapanasi. Mawũẽra Heinzba mʉ̃meba kʼawuasida kʼãrẽ ẽãta daiʼa badu asinasionta diabʉrʉta daiba krĩchapanʉbʉrʉ ẽbẽrarã sãwũã kʼarebaita akʉza krĩcha ẽ bʉrʉ daiba bedʼea zroma erbʉta mawũãra daira mejãcha sobia panaita.

Poaga bio berabarida tẽã, nekʼãrẽra audre bia wãsi, poaga 1998de, nokʼoraba Jeowa ʉ̃rʉ Kʼawuabipanʉrãra akʉza jẽda religionrane eda zebisi mawũẽra dayirã kartarãra bulgaro bedʼeade tradusi jʉ̃drʉsida. Poaga 2004de Betel yiwidita osida, idi ewadera Bulgariade kongregasionʼra bʉ 57, jõmaʉ̃nẽ Daizeze Bedʼea jaradiabarirãra bʉ 2.953. 2024de Jesús beida jẽda kĩrãbeita jʉ̃ẽsida 6.475 ẽbẽrarã. Pʉwʉrʉ Sofíade ẽbẽra wẽrãra juesomabadara idira bʉ 9 kongregasion. Naʉ̃ jõmaʉ̃ba ũdubibʉ propesiaba jarabʉra aripe barabaribʉta naʉ̃ta jarabʉ: «Wĩkabʉra mil bayi» (Is. 60:22).

DAIRA KAYASIDA

Mʉ̃ra mejãcha kaya zebʉrʉ, medikoraba mejãcha ũdu zebʉrʉ mʉ̃a tumor bio erbʉta, aba ũdusida burude erbʉta maʉ̃ kʼarea tratamientota osi mamina maʉ̃ra mejãcha pʉbasi. Mʉ̃ra wãsi India eda mediko abaʉba 12 orabayeda operamarẽã maʉ̃ne mʉ̃a tumor burude erbʉta mejãcha ãĩbʉesi maʉ̃ta mʉ̃ beyeda Betel Indiade besi maʉ̃ tẽã jʉ̃nea daira jẽda wãsi Bulgaria eda.

Maʉ̃ enara Heinzra daya ũduka kayaba barisi yi trʉ̃ Huntington yi mebẽrãta maʉ̃ kayaba baribarita basi baera, maʉ̃ kayabara iyira bedʼeabi ẽ basi, wãbi ẽ basi akʉza dayi kakua jõma pirabi ẽ basi, iyi audre izra wãbʉrʉza nesidabasi kʼaiba kʼarebaita, maʉ̃nera krĩchabasi mʉ̃yi dobaʉbara jõma kʼarebabe ẽ baita akʉza mapae sentibasi. Mamina kʉ̃ra abaʉba badua edebasi Daizeze Bedʼea jaradiade akʉza iyara mejãcha krĩcha ẽ basi ẽbẽrarãba kʼãrẽ jarai kʼareara Heinz bia bedʼea ẽ kʼarea akʉza yi kakua bia pirabi ẽ kʼarea. Mʉ̃a kʼareba nesidabʉdera naʉ̃ kʉ̃rabara mʉ̃ra ewari jõmaʉ̃nẽ kʼarebasi, Heinzba mʉ̃me naʉ̃ drʉade wũãwũã baraita krĩcha ẽ basi mamina Jeowaba naʉ̃ kʉ̃rata diasi, mawũẽra daibara iyira dai wũãwũã kĩrãkʼa akʉpanʉ (Mar. 10:​29, 30).

Heinzra kayasi kanserba akʉza beisi 2015de. Mʉ̃ mejãcha krĩcha zroma obʉdera iya kʼarebabasi mʉ̃ krĩcha zroma oẽ baita maʉ̃ba iyita neẽ baera mʉ̃itara mejãcha zareabʉ, mʉ̃ara iyira badua krĩchabʉ, mʉ̃itara iyira zokʼaibʉ kĩrãkʼabʉ (Luc. 20:38). Mʉ̃a kĩrãbebʉ iyi mʉ̃a sãwũã bedʼeabadata, kĩrãbebʉ mʉ̃aʼa bedʼea bia jarabadata akʉza ũrãgʼa bia diabadata. Jeowa biga diabʉ ãbaʉba Jeowaba zokʼabʉta obisi baera poaga biobayeda.

BIGA DIABɄ JEOWAʼA KʼAREBASI BAERA

Jeowaba mʉ̃a bedʼea zroma erbʉra mejãcha kʼareba zebʉrʉ akʉza kʼarebasi mʉ̃ misionera bʼaita adewara ẽbẽrarã kãga ũdubita mʉ̃ mia wawibʉmina (2 Tim. 1:7). Jeowaba kʼarebasi mʉ̃a akʉza mʉ̃ mebẽãba ewari jõmaʉ̃nẽ iyideta omarẽã, mʉ̃ mebẽãra yi kimaʉ̃me Europade kongregasionʼra serbia bedʼeade bedʼeapanʉta akʉ wãpanʉ ãyira sirkuito baera. Mawũẽra Jeowabara ũrĩsi mʉ̃ zezeba widibadara dai wĩñabʉ eda.

Mʉ̃a Daizeze Bedʼea lebʉrʉde mʉ̃ra aduʼa sentibʉ akʉza bedʼea zroma ũdubʉrʉza soiduba Jeowa yiwidʼibʉ Jesúsba obada kĩrãkʼa (Luc. 22:44). Jeowaba mʉ̃a widibʉra panʉbʉ mebẽrã kongregasion Nadezhda Sofíadebemaba mʉ̃aʼa kãga ũdubibʉde, mebẽrãbara trʉ̃panʉ ãyibawara bʼaita akʉza ãya mʉ̃aʼa jarapanʉ kʼãrẽãba kãgabʉta, naʉ̃ba mʉ̃ra mejãcha sobiabibʉ.

Mʉ̃a mejãcha krĩchabʉ jẽda piradrʉi ʉ̃rʉ, mʉ̃a krĩchabʉ mʉ̃ mebẽrã jõmaʉ̃ta sãwũã panaita, krĩchabʉ mʉ̃ yibarirãra ãyi juwa jidada ewaride panana kĩrãkʼa jẽda kĩrãwãreãpanaita akʉza mʉ̃ de kĩrãbita edaʉbarabʉta, krĩchabʉ mʉ̃ mebẽãra neobʉta akʉza mʉ̃ kima Heinzra iyi kabayo kʼawabʉta. Mawũã krĩchaiba kʼarebabʉ mʉ̃ mejãcha krĩcha zroma oẽ baita awuarabʉrʉ Jeowaʼa biga diabʉ iya mʉ̃ kʼãwũã akʉ zebʉrʉ kʼarea.

Mʉ̃a krĩchabʉrʉde Jeowaba mʉ̃aʼa kʼãrẽ nebia dia zebʉrʉ ʉ̃rʉ akʉza ʉ̃ra zeide kʼãrẽ nebia diai ʉ̃rʉ, mʉ̃ra David kĩrãkʼa sentibʉ, iya jarasi: «¿Mʉ̃ra sama bakasi, mʉ̃a ĩjã ẽ basibʉrʉ Jeowaba kãga jõka ũdubita ẽbẽrarã zokʼaipanʉ drʉade? Jʉ̃ãra Jeowata; zareabara akʉza bʉ sosida zareabara. Mawũã, jʉ̃ãra Jeowara» (Sal. 27:​13, 14).