Kʼãrẽta oseabʉ dayirãbara yi kayirua yi edebi ẽ baita

1. ¿Jõmaʉ̃ta kʼãrẽ kʼarea zarea opanʉ?

¿BɄA Jeowaba nekʼãrẽ omarẽã kãga ẽã bʉta oita krĩcha zebarika? Mawũã krĩcha zesidera bʉa krĩchasi baibara bʉ abapaibʉrʉ maʉ̃ kayirua oita krĩcha zebʉta akʉza maʉ̃ kʼarea mejãcha sopʉasi baibara mamina Daizeze Bedʼeaba dayirã naʉ̃ta jarabʉ maʉ̃ ʉ̃rʉ: «Dayi kayiruade baebibari krĩchara jõmaita zebʉ» (1 Cor. 10:13). Naʉ̃ testoba ũdubibʉ krĩcha kayirua oita zebʉrʉdera dayi abapaitrʉ mawũãbʉ ẽãta, wuabema mebẽrãsida zarea opanʉta maʉ̃ krĩcha kayirua oita zebʉa yi edebi ẽ baita. Mamina kĩrãbedaibara dayirã maʉ̃ʼa yi edebi ẽ baita zarea opanʉnera dobapanʉ ẽãta Jeowata dayirã kʼawabʉta dayirã kʼarebaita, maʉ̃ba maʉ̃ʼa yi edebida ẽ bayi.

2. ¿Ʉ̃kʉrʉ mebẽrãba mawũã ẽ bʉrʉ Daizeze Bedʼea kʼawuapanʉraba kʼãrẽ mitiata oẽ baya zarea opanʉ? (Akʉra potota).

² Daizeze Bedʼeaba naʉ̃ta jarabʉ: «Awuarabʉrʉ, aba abakaʉba kʼãrẽ krĩcha erbʉba, edebʉ iya kãgabʉ oita» (Sant. 1:14). Naʉ̃ testoba ũdubibʉ ẽbẽra aba abakaʉde krĩcha mitia zebʉra awuarabʉta. Bari jaraita, ʉ̃kʉrʉ mebẽrã Daizeze odebʉbara mawũã ẽ bʉrʉ Daizeze Bedʼea kʼawuapanʉrabara, krĩcha zeseapanʉ Jeowaba kãga ẽãne mia erkʼãĩta maʉ̃ba jarakĩrãbʉ krĩchaita abari yumakẽrãʉ̃me mawũã ẽ bʉrʉ abari yuwẽrãʉ̃me mia erkʼãĩta mawũã ẽ bʉrʉ badu ẽbẽra erkʼãita. Mawũã ẽ bʉrʉ ʉ̃kʉrʉba nãã ẽbẽrarã ãkadabe akʉbada idubʉdata jẽda maʉ̃ta okĩrã zeseabʉ adewara ʉ̃kʉrʉba sigarriyo dobadata mawũã ẽ bʉrʉ chirua kayirua dobadata jẽda okĩrã zeseabʉ mawũã ẽ bʉrʉ ituadomia badata jẽda mawũã bakĩrãbʉ. Mawũã jõmaʉ̃ta krĩcha mitia awuara awuaraka zebʉmina jõmaʉ̃ba iyaba senti zepanʉ Pablode kĩrãkʼa, Pabloba naʉ̃ta jarasi: «Mawũẽ mʉã biata okrĩña bʼʉdʼera bia ẽãta mʉne bʼʉba idaribi ẽã» (Rom. 7:21).

3. ¿Ẽbẽra abaʉta zarea obʉbʉrʉ iyabaʉ krĩcha mitia zebʉta oẽ baya kʼãrẽta krĩcha zeseabʉ maʉ̃bara?

³ Bʉa kayiruata oita krĩcha zebʉrʉde maʉ̃ta badua krĩcha zebʉbʉrʉ, krĩcha zeseabʉ zarea neẽãta maʉ̃ʼa yi edebi ẽ baira akʉza krĩchaseabʉ bʉa mawũã mitiata krĩchabʉ baera Jeowabara bʉra bia akʉ ẽãta mamina maʉ̃ra mawũã ẽ, akʉdaya kʼãrẽa mawũã jarapanʉta. Naʉ̃ artikulode panʉnañi bedʼea ũme, ¿kʼãrẽba mawũã krĩchabibʉ? akʉza ¿kʼãrẽba kʼarebai dayirãba maʉ̃ krĩcha mitia zebʉrʉa yi edebi ẽ baita?

KʼÃRẼTA KRĨCHAMARẼÃBɄ DIARUBARA

4. (1) ¿Kʼãrẽta krĩchabikĩrãbʉ Diarubara dayirãra? (2) ¿Kʼãrẽa kʼawuapanʉ zarea erpanʉta kayirua yi edebi ẽ baita?

⁴ Dayirãba nemitiata oita krĩcha zebʉrʉdera, Diarubara kãgabʉ krĩchadamarẽã zarea neẽãta maʉ̃ kayirua yi edebi ẽ baira, Jesúsbida iya jaradadeba ũdubisi Diarubara dayirãʼa mawũã krĩchabi kĩrãbasita, maʉ̃ kʼarea kʼãwũã yiwidʼi jarasi: «Eda baebirara kayiruade baebibari krĩchade, awuarabʉrʉ ẽdrʉbira Diaru juwadeba» (Mat. 6:13 TNM). Adewara Diaruba jarasi ẽbẽrarãba nekayiruata oita krĩcha zebʉrʉdera maʉ̃ta odaita Jeoware bʼaita krĩchai kaude (Job 2:​4, 5). ¿Kʼãrẽa mawũã krĩchabʉ Diarubara? Diarubʉrʉ nããra ũdubisi iyira zarea neẽãta nemitia oita krĩcha zebʉrʉa yi edebi ẽ baira maʉ̃ba iyara Jeowa bedʼeara ũrĩ ẽ basi, Jeowa ʉ̃rʉ wãsi iyira maʉ̃ kʼarea, maʉ̃ba jaraseapanʉ Diarubara krĩchabʉta dayirãra iyi kĩrãkʼapanʉta adewara Diarubara krĩchasi iyara Daizeze Warrasida nemitia okata nemitia obiseabʉta (Mat. 4:​8, 9). Mamina dayirãra iyi Diaruba krĩchabʉ kĩrãkʼa, ¿zarea neẽ panʉka maʉ̃ yi kayirua yi edebi ẽ baira? Maʉ̃ra mawũã ẽ dayirãra zareabarapanʉ, Pabloba naʉ̃ta jarasi: «Nekʼãrẽ jõmaʉ̃ita zarea erbʉ, mʉ̃aʼa zarea daibʉdeba» (Filip. 4:13).

5. ¿Sãwũã kʼawuapanʉ Jeowabara kʼawuabʉta dayirãra zarea erpanʉta nemitia oita krĩchabʉa yi edebi ẽ baita?

⁵ Mamina Jeowara jipa awuarabʉ Diaruira, iyara ĩjãbʉ dayirãra zarea erpanʉta yi kayirua oita zebʉa yi edebi ẽ baita, ¿sãwũã kʼawuapanʉ iyi mawũã krĩchabʉta? Iya jarasi baera zʉbʉria zroma zebʉrʉdera ẽbẽrarã mejãcha Jeowa ode kʼẽrẽpapanʉrata ẽdrʉdaibasita adewara Daizeze Bedʼeaba jarabʉ naʉ̃ra ẽbẽrarãra ẽjũã kĩrãwãreãnẽra wua torro jʉ̃panaita, naʉ̃ba ũdubibʉ ãyira Jeowa dabʉ nããra neneẽãpanaita. Dayirãbara maʉ̃ra ĩj̈ãseapanʉ Jeowara sewa oka baera (Apoc. 7:​9, 13, 14). Naʉ̃ jõmaʉ̃neba dayirãba ĩj̈ãpanʉ Jeowabara kʼawuabʉta dayirãra zarea erpanʉta nemitia oita krĩchabʉa yi edebi ẽ baita.

6, 7. ¿Adewara kʼãrẽta krĩchadamarẽãbʉ Diarubara?

⁶ Adewara Diarubara kãgabʉ dayirãba ĩjãnamarẽã mawũã krĩcha mitia oita zebʉ baera Jeowabara dayirãra bia akʉ ẽãta akʉza ewari jõmaʉ̃nẽ bʼaita dia ẽ baita mamina, ¿kʼãrẽa mawũã krĩchamarẽãbʉ iyara? Diarubara nebiata jʉ̃ãbʉ ẽ, iyira Jeowabara bia akʉbʉ ẽ akʉza iyara ewari jõmaʉ̃nẽ bʼaita dia ẽ bayi (Gén. 3:15; Apoc. 20:10). Maʉ̃ba iya maʉ̃ta neẽ baera kãgabʉ dayirãbida krĩchadamarẽã dayirãsida mawũãpanʉta dayirãbida nebia jʉ̃ã ẽãta, mamina maʉ̃ra wãrĩnu ẽ Daizeze Bedʼeaba jarabʉ Jeowabara kãgabʉta dayirãra ewari jõmaʉ̃nẽ panamarẽã akʉza bia akʉkĩrãbʉta maʉ̃ta ũdubibʉ nama jarabʉba: «Iyara kãgaba jʉ̃ãbʉ maraba kayirua obʉta jẽda krĩchamarẽã mawũã bei ẽ baita» (2 Ped. 3:9).

⁷ Dayirãba kʼawuasida Diarubʉrʉ kãgabʉta krĩchadamarẽã dayirãra zarea neẽãta nemitia oita krĩcha zebʉa yi edebi ẽ baita akʉza krĩchabi kĩrãbʉ Jeowabara dayirãra bia akʉ ẽãta mawũã krĩcha mitia oita zebʉ baera, naʉ̃ kʼawuaiba kʼarebabʉ Diaruba kãgabʉ kĩrãkʼa krĩcha ẽ baita akʉza iya yi sewabi ẽ baita (1 Ped. 5:​8, 9).

NEMITIA OMIA BAERA SÃWŨÃ SENTISEAPANɄ

8. ¿Kʼãrẽta jarakĩrãbʉ nemitiabara? (Salmo 51:5 akʉza akʉra «Kʼãrẽta jarakĩrãbʉ»).

⁸ Diaruba dayirã krĩchabibʉ dayirãra zarea neẽãta krĩcha mitia oita zebʉa yi edebi ẽ baira akʉza mawũã krĩcha mitiata zebʉ baera Jeowabara dayirãra bia akʉ ẽãta, mamina maʉ̃ awuara dayirãra mawũã krĩchapanʉ Adán akʉza Evadeba zesi baera ãyira nemitia omiabasi (Job 14:4; akʉra Salmo 51:5).a

9, 10. (1) ¿Adán Evaʉ̃mera sãwũã sentisida nemitia oda tẽãra? (Akʉra potota). (2) ¿Dayirãra nemitia omiara baera sãwũã sentipanʉ?

⁹ Krĩchadaya Adán Evaʉ̃me sãwũã sentisidata ãya kayiruata osidade maʉ̃neba ʉ̃ta ãyira nemitia omiabasi, ãya Jeowaba omarẽã jaradata oẽ basidera ãyira mirʉsida akʉza jʉrʉsida sãwũã ãyi kakua meraita, ¿kʼãrẽa mawũã osida ãyara? Perspicacia para comprender las Escrituras de naʉ̃ta jarabʉ: «Ãyi nemitia omia basidera bia sentida ẽ basi ãya oda kʼarea akʉza so perasida adewara krĩcha zroma osida». Maʉ̃ ewarideba ʉ̃tara Adánʼra Evaʉ̃mera wua Jeowa neũdukʼawua bia ba ze ẽ basi ãya nekʼãrẽ jõma oseabasi mawũãsidu ãyira bia sentida ẽ bai basi ãya oda kʼarea akʉza so peradaibasi adewara krĩcha zroma odaibasi maʉ̃ kʼarea.

¹⁰ Dayirãra Adán akʉza Eva kĩrãkʼapanʉ dayirãra ãyi kĩrãkʼa nemitia omiara maʉ̃ba ãyi kĩrãkʼa bia ẽã sentipanʉ nekʼãrẽ mitia dayirãba obʉrʉde, mawũã ẽ bʉrʉ so perapanʉ mawũã ẽ bʉrʉ krĩcha zroma opanʉ. Adewara Daizeze Bedʼeaba jarabʉ ẽbẽrarãra zʉbʉriapanʉta ãyira nemitia omiara baera, ãya iyabaʉ nemitia Adánba odata oẽ basimina iyaba sentipanʉ (Rom. 5:14). Mamina dayirãra ãyi kĩrãkʼa panʉ ẽ ãyira jẽda Jeowa neũdukʼawua ba be ẽ basi mamina Jesústa dayirãbari beisi baera dayirãra jẽda Jeowa neũdukʼawua baseapanʉ. Jeowaba kĩrãduaseabʉ dayirã nemitiara dayirãba nemitia obʉrʉdera (1 Cor. 6:11). Maʉ̃ba iduaribida ẽ baibara nekʼãrẽ badude krĩchadaita dayirãra zarea neẽ panʉta nemitia oita zebʉrʉde maʉ̃ʼa yi edebi ẽ baira akʉza krĩchada ẽ baibara mawũã nemitia oita krĩcha zebʉ baera Jeowabara bia akʉ ẽãta. Akʉdaya kʼãrẽba kʼarebaseabʉta mawũã sentipanʉne.

11. Krĩcha mitia oita zebʉrʉde zarea neẽ sentibʉbʉrʉ, ¿kʼãrẽta kĩrãbedaibara? (Romanos 6:12).

¹¹ Dayirãra nemitia omiara baera edaʉde krĩcha zeseapanʉ zarea neẽãta krĩcha mitia oita zebʉa yi edebi ẽ baira maʉ̃nera dayi krĩchaba dayaʼa jarabʉ kĩrãkʼabʉ: «Bʉra zarea neẽ naʉ̃ krĩcha mitia zebʉa yi edebi ẽ baira», mamina mawũã krĩchabʉa yi edebida ẽ baibara. Kĩrãbedaibara Daizeze Bedʼeaba kʼãrẽta jarabʉta, Daizeze Bedʼeade jarabʉ dayirãra yi edebi ẽ baibarata kayirua oita zebʉara (akʉra Romanos 6:12). ¿Kʼãrẽta jarakĩrãbʉ maʉ̃ba? Maʉ̃ba jarakĩrãbʉ dayidechuta krĩcha mitia oita zebʉta oita mawũã ẽ bʉrʉ oẽ baita (Gál. 5:16). Adewara Jeowaba kʼawuabʉ dayirãra zarea erchuta maʉ̃ krĩcha mitia zebʉa yi edebi ẽ baira iya maʉ̃ta kʼawuabʉ baera dayirã widisi yi edebi ẽ marẽã maʉ̃ʼa (Deut. 30:​11-14; Rom. 6:6; 1 Tes. 4:3). Naʉ̃ba ũdubibʉ dayirãra zarea barapanʉta krĩcha mitia oita zebʉa yi edebi ẽ baita.

12. Dayirãba krĩcha zebʉbʉrʉ Jeowaba bia akʉ ẽãta, ¿kʼãrẽta odaibara akʉza kʼãrẽta kĩrãbedaibara?

¹² Adewara dayirãra nemitia omia baera edaʉde krĩchaseapanʉ kayirua oita zebʉrʉdera Jeowabara bia akʉ ẽãta maʉ̃nera dayirã krĩchaba dayirã jarabʉ kĩrãkʼabʉ: «Bʉara kʼãwũã aña krĩchabʉ baera Jeowabara bʉra bia akʉ ẽ», mamina ĩjãna ẽ baibara mawũã krĩcha zebʉta. Kĩrãbedaibara Daizeze Bedʼeaba jarabʉta Jeowabara kʼawuabʉta dayirãra todaedaʉba nemitia omiata panʉta (Sal. 103:​13, 14). Jeowabara dayirã ʉ̃rʉra «jõma kʼawuabʉ» maʉ̃ba iya kʼawuabʉ dayirãbara atiaʉde nemitia oita krĩcha zeseabʉta (1 Juan 3:​19, 20). Mamina mawũã krĩcha mitia oita zebʉrʉde zarea opanʉbʉrʉ maʉ̃ta oze ẽ baita Jeowabara dayirãra nemitia oka kĩrãkʼa akʉyi, ¿kʼãrẽa ĩjãseapanʉ Jeowaba mawũã akʉ bʼaita?

13, 14. ¿Kʼãrẽa kʼawuapanʉ krĩcha mitia oita zebʉmina Jeowabara bia akʉbʉta?

¹³ Daizeze Bedʼeaba jara ũrĩbibʉ krĩcha mitia zeira dayirãne chu ẽãta daya kʼawuaẽãne krĩcha zeseabʉ baera mamina maʉ̃ krĩcha mitiata o zeira dayide chuta daya jidaseabʉ oita mawũã ẽ bʉrʉ oẽãta. Bari jaradaita, nawedara ʉ̃kʉrʉ kristiano Corintodebemarabara abari yumakẽrãta erkʼãĩbasi maʉ̃ne apostol Pabloba maʉ̃ta jarasi ãyi ʉ̃rʉ: «Ʉ̃kʉrʉ maʉ̃ranebemabara maʉ̃ta osida». ¿Naʉ̃ba jarakĩrãbasika naʉ̃ra mebẽrãbara ãya mawũã abari yumakẽrã kãgabʉra jipa idubʉsidata wua o zeita krĩcha ẽ basita? Mawũã ẽ, edaʉde ãya maʉ̃ta okĩrã zebasi baibara mamina naʉ̃ra kristianoraba krĩcha mitia oita zebʉrʉde maʉ̃ʼa yi edebida ẽ basibʉrʉ akʉza maʉ̃ta oze ẽ basibʉrʉ Jeowabara ãyira zʉgʉdapeada kĩrãkʼa akʉbasi akʉza bia akʉbasi (1 Cor. 6:​9-11). Abarika akʉseabʉ Jeowaba bʉta.

¹⁴ Kʼãrẽ ẽ bʉa kʼãrẽ krĩcha mitia erbʉra bʉra zarea erbʉ maʉ̃ʼa yi edebi ẽ baita. Maʉ̃ krĩcha mitiara bʉa jipa ãĩbʉe ẽ mina bʉa jidaseabʉ bʉ yaraba omarẽã kãgabʉta mawũã e bʉrʉ bʉ krĩchaba omarẽã kãgabʉta oẽ baita (Efes. 2:3). Akʉdaya kʼãrẽba kʼarebaseabʉta maʉ̃ krĩcha mitia zebʉa yi edebi ẽ baita.

¿KʼÃRẼTA ODAIBARA KRĨCHA MITIA ZEBɄA YI EDEBI Ẽ BAITA?

15. ¿Krĩcha mitia oita zebʉa yi edebi ẽ baira kʼãrẽa dayikʉza yi sewabi ẽ baibara?

¹⁵ Krĩcha mitia oita zebʉa yi edebi ẽ baira biga bayi bʉa kʼawuaita saʉ̃ta maʉ̃ krĩcha mitiara akʉza kʼãrẽne jʉra kʼawua bʼaibarata adewara jʉra kʼawua bʼaibara bʉyikʉza yi sewa ẽ baita (Sant. 1:22). Bari jaraita, ẽbẽra aba itua dokĩrã zebʉba krĩchaseabʉ iya mawũã krĩcha zeira kayirua ẽãta, bedʼea zroma ẽãta maʉ̃ra, bʉ baera awuru ẽbẽrarã iyira audre itua dobʉta mawũã ẽ bʉrʉ ẽbẽra ãkadabe akʉkĩrã zebʉbara krĩchaseabʉ iyira mawũã krĩcha zebʉta yi kimaba iyaʼa audre kãga ũdubi ẽ baera, mamina jʉra kʼawuabaibara mawũã krĩcha ẽ baita. Mawũã krĩchabʉbʉrʉ naʉ̃bara yi kayiruata obi zeseabʉ baera adewara zarea ora bʉyikʉza krĩcha ẽ baita mawũã aña krĩcha zebʉra bʉde chu ẽãta awuarabʉrʉ mawũã krĩcha zebʉta awururaba mawũã obibʉ baera, kĩrãbeibara dayirãba nekʼãrẽ obʉra dayidechuta biata oita mawũã e bʉrʉ biata oẽãta (Gál. 6:7).

16. ¿Kʼãrẽta oseabʉ bʉyikʉza naena krĩchaita kʼãrẽta oita yi kayirua yi edebi ẽ baita?

¹⁶ Dayirãba atia kʼawuasida dayirãkʉza yi sewa ẽ baibarata mamina maʉ̃ awuara dayirãkʉza krĩchaibara nemitia oita zebʉrʉdera kʼãrẽta oita maʉ̃ʼa yi edebi ẽ baita (1 Cor. 9:​26, 27; 1 Tes. 4:4; 1 Ped. 1:​15, 16). Maʉ̃itara bia kʼawuaibara kʼãrẽba akʉza sõbede audre zareabʉta kayirua oita zebʉa yi edebi ẽ baira. Bari jaraita, ʉ̃kʉrʉitara zareabʉ kayirua oita zebʉa yi edebi ẽ baira kewarare mawũã ẽ bʉrʉ ãyi mapaebʉde adewara biga bʉa naena krĩchaita nemitia oita krĩchadogobʉrʉ kʼãrẽta oi mʉ̃ara sãwũã oi maʉ̃ʼa yi edebi ẽ baita. Naʉ̃neba dayirãba kʼawuabʉda kayirua yi edebi ẽ baira naena bia krĩchaibarata kʼãrẽta okĩrãpanʉta (Prov. 22:3).

17. ¿Kʼãrẽta kʼawuapanʉ Josédeba? (Génesis 39:​7-9 akʉza akʉra potota).

¹⁷ Krĩchadaya José nebʉra ʉ̃rʉ Potifar kimaba iyiʉ̃me ãba kʼãĩmarẽã jarasidera Josébara wãña jarasi ãba kʼãĩ ẽ baita akʉza maʉ̃ta pera pera jara ẽ basi (akʉra Génesis 39:​7-9). Naʉ̃ba ũdubibʉ Josébara jʉ̃ã ẽ basita kayirua oita zeita mawũã kʼawuaita kʼãrẽta oita, awuarabʉrʉ naena yi krĩchamabasi iyira awuru kimaʉ̃mera ãba kʼãĩ ẽ baita, ¿kʼãrẽta jaradiabʉ naʉ̃ba dayirã? Dayirãbida jʉ̃ã ẽ baibarata kayirua oita zeita mawũã kʼawuaita kʼãrẽta oita awuarabʉrʉ naena bia kʼawuaibara kʼãrẽta oita. Mawũã bʉita zare ẽ bayi nebia oita bʉa naena krĩchasi baera kʼãrẽta oita.

BɄYIKɄZA AKɄRA

18. ¿Adewara kʼãrẽta oseabʉ krĩcha mitia oita zebʉa yi edebi ẽ baita? (2 Corintios 13:5).

¹⁸ Krĩcha mitia oita zebʉa yi edebi ẽ baira dayirãbara badua akʉ baibara dayikʉza sãwũãbʉta (akʉra 2 Corintios 13:5). Mawũã obʉbʉrʉ naʉ̃ba kʼarebayi kʼawuaita kʼãrẽne audre bia oibarata akʉza kʼãrẽta audre bia krĩchaibarata. Bari jaradaita, bʉa nemitia oita krĩcha zeside maʉ̃ta oẽ basibʉrʉ tẽã bʉyikʉza widira, mʉ̃a naʉ̃ kayirua oẽ basidera, ¿mesera oẽ baita krĩchasika mawũã ẽ bʉrʉ dããra krĩchasi maʉ̃ ʉ̃rʉ? Bʉa maʉ̃ oẽ baita mesera krĩcha ẽ basibʉrʉ maʉ̃ kʼarea krĩcha orãra, jʉrʉra sãwũã audre bia oseabʉta tẽã jʉ̃neane krĩcha mitia oita zebʉrʉde, maʉ̃itara bʉyikʉza widira: «¿Mʉ̃a tẽã jʉ̃neanera mesera krĩchaseabʉka krĩcha mitia zebʉ ãĩbʉeita? ¿Mʉ̃a akʉbʉdeba akʉza ũrĩbʉdeba zareabʉka nemitia oẽ baira? ¿Ẽbẽrarã Jeowaba kãga ẽãne mia erkʼãĩbʉta ũdubʉrʉdera wãña aña akʉbʉka mʉ̃ara? ¿Mʉ̃ara biʼia kʼawuabʉka Jeowaba mʉ̃a nekʼãrẽ omarẽã jarabʉra mawũã jarabʉta mʉ̃ta bia wãmarẽã mʉ̃a maʉ̃ udubi mʉ̃itara zareabʉmina?» (Sal. 101:3).

19. ¿Kʼãrẽa yibia nekʼãrẽ wĩkakiru jidaide bia jida kʼawuaira?

¹⁹ Daizeze Bedʼeaba jara ũrĩbibʉ dayirã so sãwũãbʉta jarabʉ nekʼãrẽ jõmaira dayirã sobara sewabʉta (Jer. 17:9). Adewara Jesúsbida naʉ̃ta jarasi: «Sodʼebara ze bʼʉa krĩchata bia ẽãta» (Mat. 15:19). Maʉ̃ba jipade yibia bʉ soa yi sewabi ẽ baita akʉza krĩcha ẽ baita krĩcha mitia zenʉmʉra wãrĩnubaira kayirua ẽãta. Bari jaraita, ẽbẽra aba ẽbẽra ãkadabʉ akʉbadata idubʉdabara ewari bio berabarida tẽã krĩchaseabʉ ẽbẽrarã wua ʉ̃tʉ jʉ̃bʉ mawũã ẽ bʉrʉ jʉ̃ẽbari jʉ̃bʉ akʉira kʼãrẽ ẽãta iyara ẽbẽrarã ãkadabʉta akʉnʉmʉ ẽ baera mawũã ẽ bʉrʉ krĩchaseabʉ kayirua ẽãta awuru ẽbẽraʉ̃me ãba kʼãĩbʉ ʉ̃rʉ krĩchaira iya maʉ̃ta oẽ baera. Kʼãwũã krĩchabʉba ũdubibʉ naʉ̃ ẽbẽra sobara krĩchanʉmʉta sãwũã ozeita iyi yaraba okĩrãbʉta (Rom. 13:14). ¿Bʉara kʼãrẽta oseabʉ maʉ̃ʼa yi edebi ẽ baita? Nekayirua zromata ozeamabʉbʉrʉ zarea ora nekʼãrẽ wiña oide bia jida kʼawuaita.b Mawũẽra zarea ora krĩcha bia ẽã zebʉta ãĩbʉeita maʉ̃bara krĩchabiseabʉ baera nemitia oira kʼãrẽ ẽãta.

20. Ẽjũã kĩrãwãreã zebʉrʉdera, ¿kʼãrẽba sãwũãi krĩcha mitia zebʉra akʉza kʼãrẽ kʼarebata erpanʉ dayirãbara?

²⁰ Dayirãba naʉ̃ artikulode kʼawuasida Jeowaba dayirã zarea diabʉta yi kayirua oita krĩcha zebʉa yi edebi ẽ baita adewara Jeowaba yi Warrata dayirãbari beimarẽã diasi baera jʉ̃apanʉta ewari jõmaʉ̃nẽ panaita ẽjũã kĩrãwãreãnẽ. Maʉ̃nera dayirãbara Jeowaba zokʼabʉra sobiade opanañi neẽ bai baera kʼãrẽa zarea oita krĩcha mitia oita zebʉa yi edebi ẽ baita, mamina maʉ̃ ewari zeyedara dayirãba oseabʉta odaibara krĩcha mitia oita zebʉa yi edebi ẽ baita, mawũã opanʉbʉrʉ Jeowaba dayirãʼa nebiata diayi akʉza kʼẽrẽpa panañi.