Bʉ kʼarebata wẽrãrãra zʉbʉriapanʉita
« NAɄ̃ drʉa jõmaʉ̃nẽ mejãchade zʉbʉria ozebʉda wẽrãrata akʉza wẽrã zakerata. ¿Bʉsida zʉbʉria obadaka? Naʉ̃nera bʉara kʼawuayi Daizezebara bʉra kãgabʉta akʉza wãrĩnu kʼarebakĩrãbʉta, iya bʉra krĩchabʉ baera akʉza iyara bʉra kʼarebakĩrãbʉ baera. Akʉza kʼawuayi iya kʼãrẽta oita maʉ̃ zʉbʉria jõbira».
Internetʼne jw.org de bʉ artikulo kʼãwũã jarabʉta «¿Kʼãrẽa mejãcha zʉbʉriapanʉ wẽrãrãra? Daizeze Bedʼeaba jaradiabʉta». Naʉ̃ artikulo jõdogode ũduyi naʉ̃ karta sama deskargaita PDFde mawũã imprimi kʼãrãpe ẽzadra bedaita. Mebẽã wẽrã aba Estados Unidosdebema yi trʉ̃ Stacyba jarabʉ: «Mʉ̃a imprimisi maʉ̃ kartata mõbe mebẽã wẽrã abaʉ̃meba edesida wẽrãra zʉbʉria opanʉ akʉpanʉ deda, mamara dai kongregasionebemaraba jaradiapanasi».
Ẽbẽra wẽrã mama trajabʉba widisi iyita audre weseabʉ kʼawuaita wuabemara wẽrãra mamapanʉra dedekaita. Maʉ̃ne dedekasida maʉ̃ kartarata 40 akʉza 30 tarjeta zakera jw.org debemata. Tẽã yi maʉ̃ deda zokʼabʉba widisi mebẽrã jara ũrĩbidamarẽã yi mamapanʉra dayirãba Daizeze Bedʼea sãwũã kʼawuabibʉta.
Tẽã mebẽã Stacyʼra awuru mebẽrã wẽrãra ũmeʉ̃me wãsida awuru de wẽrãra zʉbʉriabʉ akʉpanʉma, mama ãyira bia edasida akʉza iyabaʉ kartarata 5 diasida, adewara mamaberaba widisida audre diadamarẽã. Ẽbẽra wẽrã mama trajabʉdebemaba jarasi: «Naʉ̃ kartaba mejãcha kʼarebayi wẽrãra namapanʉrata. Wãrĩnu nesidapanʉ naʉ̃ra». Tẽã ãya akʉ jʉ̃ẽbʉrʉde wẽrãra bio ãba yi jʉresida ãya jara ũrĩbidamarẽã sãwũã kʼawuabipanʉta Daizeze Bedʼeata. Maʉ̃ra wẽrãranebema ũmeba jarasida ãyisida wãkĩrãbʉta ãba yi jʉrebarieda.
Stacyba jarasi: «Daiba ũdusida ẽbẽrarãbara naʉ̃ kartara lekĩrãpanasita. Naʉ̃ karta zake imprimi kʼãrãpe ẽzadra bedada tẽãra bia ũdukida, maʉ̃ba kʼarebabʉ wẽrãra zʉbʉriapanʉraba lekĩrãnamarẽã Daizeze Nokʼoba kʼãrẽ oi ʉ̃rʉ. Ãya mawũã lekĩrãbʉ ũduiba mejãcha sobiabisi daira. Sobiade jʉ̃ãpanʉ ũduita Jeowaba sãwũã kʼarebabʉta jʉrʉpanʉne ẽbẽrarã iyi ʉ̃rʉ audre kʼawuakĩrãpanʉrata».