«Daizeze jaure zareaba ãba babibʉta ãrĩ ẽ baita»
APOSTOL Pabloba kristianora Éfesodebemara jarasi: «Awuantaidua mayirai kãgaba, nekʼãrẽ jõma oidua Daizeze jaure zareaba ãba babibʉta ãrĩ ẽ baita wuabemarabawara aduʼa ãbapanʉneba» (Efes. 4:2, 3).
Pabloba jarasi dayirã kʼãwũã ãbapanʉra Daizeze jaure zareadeba zesita. Mamina iya jarasi mawũã ãbabʉta ãrĩ ẽ marẽãra, nekʼãrẽ oibarata. Mamina, ¿maʉ̃ra kʼaiba oibara? Kongregasione mebẽrã aba abakaʉba jʉrʉibara «Daizeze jaure zareaba ãba babibʉta» sãwũã ãrĩ ẽ baita.
Maʉ̃ bia ũrĩta krĩchara naʉ̃ta: Bʉaʼa bari diadaita karru yiwidita. ¿Kʼaiba akʉibara maʉ̃ra? Bʉa akʉibara maʉ̃ra bʉaʼa diasida baera. Maʉ̃ta bʉa bia akʉ ẽ kʼarea ãrĩra, jararãra maʉ̃ karrura ãrĩsita yi bʉaʼa diadaba bia akʉ e basi baera.
Maʉ̃ kĩrãkʼa kongregasione ãbapanʉra Daizezeba bari diada, mamina dayirã aba abakaʉba bia akʉibara maʉ̃ta ãrĩ ẽ bamarẽã. Maʉ̃ kʼarea dayirãba mebẽã abaʉme bedʼea zromata erpanʉbʉrʉ dayikʉza naʉ̃ta widibara: «¿Mʉ̃a oseabʉta jõma obʉka Daizeze jaure zareaba ãba babibʉta ãrĩ ẽ baita akʉza maʉ̃ bedʼea zroma ara oita?».
«NEKʼÃRẼ JÕMA OIDUA DAIZEZE JAURE ZAREABA ÃBA BABIBɄTA ÃRĨ Ẽ BAITA»
Pabloba jaradadeba kʼawuapanʉ edaʉde mebẽrãbawara aduʼa bʼaira zareabʉta ãya dayima ẽã bʉta opanʉ baera akʉza sopʉabipanʉ baera. Dayirãta mebẽrãbawara ãba bakĩrãbʉ baera, mebẽã abaʉme bedʼea zroma erbʉdera, ¿jʉrʉibaraka maʉ̃me bedʼeaita akʉza jaraita bʉ sãwũã sentibʉta maʉ̃ kʼarea? Mawũã ẽ, bʉyikʉza naʉ̃ta widira: «¿Mʉ̃a maʉ̃ta ora wãrĩnu ara oika maʉ̃ bedʼea zromara, mawũã ẽ bʉrʉ audre kĩrʉbibʉka?». Edaʉde audre biga iyiʉ̃me bedʼea ẽã dayikʉzaʉba kĩrãduaita iya odata (Prov. 19:11; Mar. 11:25).
Bʉyikʉza widira: «¿Mʉ̃a maʉ̃ta ora wãrĩnu ara oika maʉ̃ bedʼea zromara mawũã ẽ bʉrʉ audre kĩrʉbibʉka?».
Pabloba naʉ̃ta jarasi: «Awuantaidua mayirai kãgaba» (Efes. 4:2). Libro abaʉba jarabʉ naʉ̃ bedʼea iyabaʉta kʼãwũã jaraseabʉta «Ãyi sãwũãbʉ krĩcha ẽã kãgaita». Maʉ̃ba jarakĩrãbʉ kʼawuapanʉta mebẽrãra dayirã kĩrãkʼa nemitia omiarata. Wãrĩnu jõmaʉ̃ta zarea opanʉ krĩcha yiwidi erbaita (Efes. 4:23, 24). Mawũãsidu jõma aripe oze ẽ nemitia omia baera (Rom. 3:23). Dayirãba naʉ̃ta kʼawuapanʉbʉrʉ zare ẽ bayi ãya obʉ awuantaita akʉza kĩrãduaita, mawũã Daizeze jaure zareaba ãba babibʉta ãrĩ ẽ baita.
Wuabemarabawara aduʼa ãbapanañi kongregasione mebẽrãba kʼãrẽ aña obʉta kĩrãduapanʉbʉrʉ. Efesios 4:3de griego bedʼeade ãbapanʉ abʉra iyabaʉta jaraseabʉ ligamento Colosenses 2:19de jarabʉ kĩrãkʼa. Ligamentora jʉ̃kara kĩrãkʼabʉ, iyira zareabʉ akʉza iya kʼarebabʉ bʉwʉrʉrata ãba karapanamarẽã. Abarika kãgaba akʉza aduʼabʉba kʼarebabʉ dayirã mebẽrãbawara ãbapanaita krĩcha ẽã dayirãi kʼãrẽ bedʼea zroma erbʉta.
Maʉ̃ba mebẽã abaʉba dayirã sopʉabibʉrʉde, mawũã ẽ bʉrʉ mejãcha kĩrʉbibʉrʉdera zarea odaibara iyi so borekea akʉita iyi ʉ̃rʉ imitia bedʼeai kaude (Col. 3:12). Wãrĩnubaira jõmaʉ̃ta nemitia omia baera edaʉde awururata sopʉabibari. Naʉ̃ kĩrãbeiba kʼarebayi nekʼãrẽ oita mawũã Daizeze jaure zareaba ãba babibʉta ãrĩ ẽ baita.