¿Kʼãrẽa mejãcha zʉbʉriapanʉ wẽrãrãra?—Daizeze Bedʼeaba jaradiabʉta

«Mʉ̃ warrarabasidera mʉ̃ mebẽãbara mʉ̃ra pobasi akʉza ikayirua jarabasi nrʉemaza. Mʉ̃ mia kʼãĩsidera mʉ̃ pakõrebara mʉ̃ra ikayirua jarabasi akʉza yi kimaʉ̃meba mʉ̃ra iyi nezokʼa kĩrãkʼa erbasi, maʉ̃ kʼarea mʉ̃ra mejãchade krĩchabasi jipa mʉ̃yikʉza beaita» (Madhu,a India).

Organización Mundial de la Salud, maʉ̃raba jarabʉ, naʉ̃ drʉa jõmaʉ̃nẽ wẽrãrãra zʉbʉria opanʉta. Wẽrãra ũbeaʉdebemata aba kaʉ̃ bedʼea ũdubada, zʉbʉria obada, ikayirua jarabada akʉza wawa obada.

Bʉta maʉ̃ne berabaribaribʉrʉ, ikayirua jarabadabʉrʉ akʉza wawa obadabʉrʉ, pobadabʉrʉ, krĩchabʉbaibara badu ewaride mawũã berabarita akʉza. Adewara bʉra maʉ̃ne mawũã berabaribari baera krĩchabʉbaibara wuabema ẽbẽrarãira bʉra zeri ẽãta. ¿Daizezesida mawũã krĩchabʉka bʉ ʉ̃rʉra?

¿Daizezebara sãwũã akʉbʉ wẽrãrãra?

Testo: «Daizezebara yumakẽrãta yuwẽrãʉ̃me [ . . . ] parãsi» (Génesis 1:27).

Kʼãrẽta jarakĩrãbʉ kaʉ̃ bedʼeabara: Daizezebara yumakẽrãta yuwẽrãʉ̃me parãsi. Daizezeitara yumakẽrãra akʉza yuwẽrãra abarikabʉ. Daizezebara jarabʉ yumakẽrãra yi kimara iyikʉza kãgabʉ kĩrãkʼa kãgamarẽã, kãga ẽ yuwẽrã poira akʉza ikayirua jaraira. Adewara nezokʼa kĩrãkʼa erbaira (Efesios 5:33; Colosenses 3:19). Naʉ̃ba ũdubibʉ Daizezebara wẽrãrãra bia akʉbʉta, maʉ̃ba kãgabʉ bia panamarẽã, kʼãrẽ sãwũã berabari ẽã.

«Mʉ̃ wika kirasidera mʉ̃ mebẽrãnebemaba wawa osida mʉ̃ra. Maʉ̃ tẽã jʉ̃nẽã, mʉ̃ poaga 17 baside mʉ̃ patronba jarasi, mʉ̃a iyita erkʼãĩ ẽ bʉrʉ jʉretaita mʉ̃ra mʉ̃ trajodebara. Kõbe atiara mʉ̃ juwa jidada tẽã, mʉ̃ kimabara mʉ̃ra bia akʉ ẽ, mia mʉ̃ yibarirabida akʉza mʉ̃ de kʼaitapanʉrabida sentibipanʉ mia kʼãrẽsida zeri ẽãta mʉ̃ra. Maʉ̃ tẽã jʉ̃nẽã, mʉ̃a kʼawuasi Jeowab ʉ̃rʉ, maʉ̃ne kʼawuasi iyara kãgabʉta wẽrãrãra bia panamarẽã. Maʉ̃ba mʉ̃a ũdubisi Jeowabara mʉ̃ra kãgata akʉza ẽbẽra wẽrã biata iyitara» (Maria, Argentina).

¿Kʼãrẽba kʼarebai bʉta maʉ̃ne berabarisibʉrʉ?

Testo: «Bʉ, neũdukʼawua dayi mebẽãde wueta ãbabʉta» (Proverbios 18:24).

Kʼãrẽta jarakĩrãbʉ kaʉ̃ bedʼeabara: Neũdukʼawua biaba kʼarebaseabʉ. Bʉa erbʉbʉrʉ kʼaiʼa jaraita bʉ sopʉabʉ ʉ̃rʉ, maʉ̃ʼa jarada bʉ sãwũã sentibʉ ʉ̃rʉ.

«20 poagabayeda mʉ̃ara kʼaiʼa jara ẽ basi mʉ̃ wawa odapeadara wikakirʉeda. Maʉ̃ba mʉ̃ra kĩrʉ warisi, sopʉa warisi akʉza aduʼa ba ẽ basi. Mʉ̃a ũduside kʼaiʼa jaraita maʉ̃ba mʉ̃ bedʼea ũrĩsidera biʼia sentibisi jipa mʉ̃ra. Zʉgʉa abʉta ãĩ bʉebʉrʉ kĩrãkʼa sentisi» (Elif, Turquía).

Testo: «Mara bedʼea zromara jõma jaraidua [Daizezeʼa], iyara marata krĩchabʉ baera» (1 Pedro 5:7).

Kʼãrẽta jarakĩrãbʉ kaʉ̃ bedʼeabara: Bʉ yiwidʼibʉrʉdera Daizezebara wãrĩnu ũrĩbʉ (Salmo 55:22; 65:2). Iyara bʉra krĩchabʉ baera kãgabʉ bʉa kʼawuamarẽã iyitara bʉra ẽbẽra wẽrã biara jipa.

«Mʉ̃a Jeowa ʉ̃rʉ kʼawuasidera, maʉ̃ba kʼarebasi mʉ̃ra aukʼara sopʉa ẽ baita. Akʉza kʼawuabʉ Jeowabara mʉ̃ yiwidʼibʉrʉdera iyara wãrĩnu ũrĩbʉta mʉ̃ bedʼeata. Maʉ̃ awuara kʼawuabʉ iyira mʉ̃ neũdukʼawuara baera iyira sentibʉta mʉ̃ sãwũã bʉra» (Ana, Belize).

¿Ewari abaʉde jõbika Daizezebara wẽrãra zʉbʉria opanʉra?

Testo: «Mamina bʉara ũrĩñi ẽbẽrarã bia yiwidʼira, Jeowa. Bʉara so zareata diayi akʉza biʼia akʉyi ãyira. Nebiata diayi jẽrãmarãrãra akʉza zʉbʉriapanʉrãra, maʉ̃ba ẽbẽrarã naʉ̃ drʉadebemabara wua zʉbʉria oda ẽ bayi (Salmo 10:​17, 18).

Kʼãrẽta jarakĩrãbʉ kaʉ̃ bedʼeabara: Aranʉ Daizezebara jõma jõbiyi naʉ̃ drʉa jõmaʉ̃nẽ kayiruabʉra, adewara wẽrãra zʉbʉria opanʉra akʉza popanʉra jõbiyi.

«Mʉ̃ra sobiabibʉ kʼawuasi baera aranʉbai Daizezeba jõma jõbita wẽrãra zʉbʉriabibʉra akʉza wẽrã zakera zʉbʉriabibʉra. Maʉ̃ba kʼarebabʉ baita neneẽã» (Roberta, México).

Bʉa audre kʼawuakĩrãbʉbʉrʉ naʉ̃ bedʼea bia ʉ̃rʉ akʉza kʼawuakĩrãbʉbʉrʉ kʼãrẽa ĩjãibarata Daizeze Bedʼeade edabʉta, jarada Jeowa ʉ̃rʉ Kʼawuabipanʉrã akʉde jʉ̃ẽnamarẽã, mawũã jaradiamarẽã Daizeze Bedʼeadebemata.

Naʉ̃ artikulora ʉ̃tʉzebiseabʉ kopia sakaita.