¿Kʼãrẽta jarabʉ Daizeze Bedʼeabara Guerra Nuclear ʉ̃rʉ?
Nokʼora naʉ̃ drʉadebemaraba nemejãcha yõbaridebemata erpanʉ akʉza opanʉ, maʉ̃ba guerra nuclearta berabariseabʉ. Ẽbẽrarã maʉ̃ba krĩcha zroma opanʉ kʼawuapanʉ baera yõ zromara zeseabʉta. Adewara perapanʉ nokʼoraba bomba bataideba awuru drʉaeda mawũã naʉ̃ drʉara guerra nuclearba jõbiseabʉ baera. Boletín de los Científicos Atómicos kartaba jarabʉ kĩrãkʼa «dayirãbara badua krĩchapanʉ guerra nuclear berabariseabʉ ʉ̃rʉ».
¿Wãrĩnu guerra nuclearta berabariseabʉka? Maʉ̃ta berabarira, ¿naʉ̃ drʉara jõika? akʉza ¿kʼãrẽba kʼarebaseabʉ krĩcha zroma oẽ baita guerra nuclear kʼarea? ¿Kʼãrẽta jaradiabʉ Daizeze Bedʼeaba?
Naʉ̃ artikulode akʉdayi:
¿Daizeze Bedʼeaba jarasika guerra nuclearta berabarita?
Daizeze Bedʼeaba jara ẽ guerra nuclear ʉ̃rʉ. Mamina, jarabʉ idi ewaridera ẽbẽrarã sãwũã bʼaibasita akʉza kʼãrẽta berabaribarabasita naʉ̃ drʉadera.
Akʉra kʼãrẽne abarikabʉta Daizeze Bedʼeaba jarabʉta idi ewaride berabarinʉmʉmera:
Kʼaseabʉta Daizeze Bedʼeaba: Jesús kʼaidubemaraba iyaʼa widisida: «¿Maʉ̃ra sõbede berabaripe, kʼãrẽta ũdudaipe bʉ ewaridera, adewara naʉ̃ ewarinʉmʉ jõi ewaridera?». Jesúsba panʉsi: «Yõnañi pʉwʉrʉta awuru pʉwʉrʉme, nokʼota awuru nokʼoʉ̃me» (Mateo 24:3, 7).
Naʉ̃ drʉade kʼãrẽta berabarinʉmʉta: Nokʼoraba nemejãcha yõbaridebema erpanʉta zokʼapanʉ yõita awuru nokʼorabawara.
«Aranʉwedaʉba yẽta naʉ̃ drʉadera yõta audre wari wã: ẽbẽra yõmiara audre eaba wã» (El Proyecto de Datos de Ubicación y Eventos de Conflictos Armados).
Daizeze Bedʼeaba kʼaseabʉta: «Ewari jõbodoarera nokʼo surdebemara yõñi nokʼo nortedebemaʉ̃me» (Daniel 11:40).
Naʉ̃ drʉade kʼãrẽta berabarinʉmʉta: Nokʼora naʉ̃ drʉadebemaba akʉza ãyiarepanʉba nemejãcha opanʉ ãyabʉrʉ zarea erpanaita, Daizeze Bedʼeaba jarada kĩrãkʼa. Idi ewaridera pʉwʉrʉ zromarãra yiya yõpanʉ ẽ mina, mawũãsidu ãya nekʼãrẽ yõbaridebemata mejãcha opanʉ mawũã audre zarea erbaita yõbʉrʉde.
«Aranʉwedaʉba yẽta pʉwʉrʉrãra audre yõpanʉta ũdu wãna, nokʼo zromabida kʼareba diapanʉ ãyirai yõpanʉmina» (Programa de Datos de Conflictos de Uppsala).
Kʼaseabʉta Daizeze Bedʼeaba: «Ewari jõbodoarera ũdu wãnañi bedʼea zroma daya obe ẽãta. Ẽbẽrarãbara [...] bedʼea abarika zeda ẽ bayi, awuru ʉ̃rʉ sewa nebʉrʉta jaradayi, ãyi kakua zokʼa kʼawua ẽ bayi, mia beamiabayi» (2 Timoteo 3:1-3).
Naʉ̃ drʉade kʼãrẽta berabarinʉmʉta: Nokʼora edaʉde bedʼea abarika ze ẽ. Akʉza maʉ̃ bedʼea zromara ara oi kaude ãyirai bedʼeakapanʉ. Maʉ̃ba ãya opanʉneba guerra nuclearta berabariseabʉ.
«Bedʼea zromata ara oẽ bʉrʉ, yõra audre ũdu wãnañi» (S. Saran akʉza J. Foro Económico Mundial).
¿Daizezebara iduaribika guerra nuclear berabarimarẽãra?
Daizeze Bedʼeaba jara ẽ. Mamina jarabʉ dayirã ewaridera ũdudaita «nekʼãrẽ dayi daʉperabʉta» (Lucas 21:11). Bari jaraita bomba atómikara bata bʉesida Segunda Guerra Mundialde. Daizeze Bedʼeaba jaradiabʉ Daizezebara kʼãrẽa iduaribibʉta yõta berabarimarẽãra. Maʉ̃ ʉ̃rʉ audre kʼawuaita akʉra bideota ¿Kʼãrẽa Daizezebara iduaribibʉ zʉbʉriara?
¿Naʉ̃ drʉara maʉ̃ kʼarea jõika?
Jõ ẽ bayi. Ẽbẽrarãba nekʼãrẽ yõbaridebemata zokʼapanʉmina, Daizezebara iduaribi ẽ bayi naʉ̃ drʉa maʉ̃ba jõmarẽã. Adewara Daizeze Bedʼeabara jarabʉ ẽbẽrarã ewari jõmaʉ̃nẽ panaita maʉ̃ ʉ̃rʉra.
Ʉ̃kʉrʉ ẽbẽrarãba krĩchapanʉ aranʉ naʉ̃ drʉara jipa ãrĩ wãita akʉza maʉ̃ne ẽbẽra wikapanaita. Mamina Daizeze Bedʼeaba jarabʉ naʉ̃ drʉara yõ zromaba arĩnara tẽã jõma araoita.
Daizezebara kãgabʉ drʉa kĩrãwãreãnẽ sobiapanamarẽã.
Daizezeba parãsi naʉ̃ drʉara mawũã iyidoba ara omarẽã. Mawũã ẽ bʉrʉ Daizezebara jõma ara oyi naʉ̃ drʉara ẽbẽrarãta ewari jõmaʉ̃nẽ panamarẽã. (Salmo 37:11, 29; Apocalipsis 21:5).
¿Kʼãrẽba kʼarebaseabʉ aduʼa bʼaita guerra nuclear ʉ̃rʉ krĩchabʉrʉde?
Ẽbẽra mejãchaʉba krĩchabʉrʉde guerra nuclear ʉ̃rʉ mejãcha krĩcha zroma opanʉ. Mamina Daizeze Bedʼeaba jaradiabʉba kʼarebaseabʉ aukʼara krĩcha zroma oẽ baita maʉ̃ kʼareara akʉza aduʼa bʼaita. ¿Sãwũã kʼarebaseabʉ?
Daizeze Bedʼeaba jarabʉ naʉ̃ drʉa kĩrãwãreã bʼaita akʉza ẽbẽrarã mama panaira sobia panaita. Maʉ̃ ʉ̃rʉ kʼawuaiba kʼarebaseabʉ nebia jʉ̃ãita akʉza aduʼa bʼaita (Hebreos 6:19 nota). Akʉza kʼarebaseabʉ mejãcha krĩcha ẽ baita ʉ̃ra zeide kʼãrẽta berabariseabʉta. Jesúsba jarada kĩrãkʼa «ewariza mejãcha bʉ baera bedʼea zromara» (Mateo 6:34).
Mamina aduʼa bakĩrãpanʉbʉrʉ jʉra kʼawua baibara ũrĩ ẽ baita, le ẽ baita mawũã ẽ bʉrʉ akʉ ẽ baita guerra nuclear ʉ̃rʉ jarabʉba daya krĩcha zroma obiseabʉta. Mamina maʉ̃ba jarakĩrãbʉ ẽ kʼawuakĩrã ẽãta naʉ̃ drʉade kʼãrẽ berabarinʉmʉta.Awuarabʉrʉ zarea obʉ mejãcha krĩcha zroma oẽ baita daya mia kʼãrẽsida obe ẽãta.
Krĩcharãra bedʼea kayirua ʉ̃rʉ awuarabʉrʉ krĩchara bʉa kʼãrẽ nebia erbʉ ʉ̃rʉ.
Daizeze Bedʼeabara jarabʉ ʉ̃ra zeidera nekʼãrẽ bia zeita.
Daizeze Bedʼeade ʉ̃ra zeide kʼãrẽ berabari ʉ̃rʉ jarabʉba sobiabibʉ akʉza aduʼa babiseabʉ.
¿Daizeze Bedʼeaba jarabarisika zeita Armagedón nuclearta?
Ʉ̃kʉrʉ ẽbẽrarãbara krĩchapanʉ Armagedónʼra iyabaʉta Guerra nuclearʼʉ̃me ãyara krĩchapanʉ maʉ̃nera nekʼãrẽ mitiata berabariseabʉta.
Mamina Daizeze Bedʼeadera bedʼea Armagedónʼra jarakĩrãkʉ nokʼo naʉ̃ drʉadebema jõmaʉ̃ta Daizezeʉ̃me yõitaa (Apocalipsis 16:14, 16). Armagedón yõ ewari zebʉrʉdera ẽbẽrarã jõma bea ẽ bayi bomba nuclearba ẽbẽrarã mejãcha beabʉ kĩrãkʼa, awuarabʉrʉ Armagedón yõ ewari zebʉrʉdera Daizezebara makenañi ẽbẽrarã kayiruaratrʉ akʉza ẽbẽra biara naʉ̃ drʉade panʉrãra aduʼa panañi (Salmo 37:9, 10; Isaías 32:17, 18; Mateo 6:10).
¿Kʼãrẽta jaradiabʉ Daizeze Bedʼeabara yõ jõi ʉ̃rʉ?
Jeowabarab jõma jõbiyi yõra akʉza nekʼãrẽ yõbarirãra jõma jõbiyi maʉ̃ra jõma oyi Daizeze Nokʼoba akʉza naʉ̃ drʉara jõma Daizeze Nokʼoba zokʼa jʉ̃drʉyi (Daniel 2:44).
Daizeze Nokʼobara ẽbẽrarã jaradiayi aduʼa bʼaita akʉza sobiapanaita Daizeze Nokʼoba zokʼa jʉ̃drʉi baera yõra wua neẽbayi maʉ̃ kʼarea ẽbẽrarã yõi nesida neẽbayi (Miqueas 4:1-3). ¿Drʉa kĩrãwãreãnera sãwũã panaipe? «Ãya ne u uba udamae jewedadayi akʉza bakuru iguera edre, adewara miõba daʉperada ẽ bayi» (Miqueas 4:4).
a Akʉra naʉ̃ artikulota «¿Que es el Armagedón?».
b Jeowara Daizeze trʉ̃ ara (Salmo 83:18). Akʉra naʉ̃ artikulota «¿Bʉitara kʼaiba Jeowara?».