Badua widipanʉta / Kʼãrẽ ĩjãbʉta / ¿Jeowa ʉ̃rʉ Kʼawuabipanʉrãbara ĩjãpanʉka Antiguo Testamento ʉ̃rʉra?
Ĩjãpanʉ. Jeowa ʉ̃rʉ Kʼawuabipanʉrãbara wãrĩnu ĩjãpanʉ jõma Daizeze Bedʼeadeba zebʉra Daizezeba osita (2 Timoteo 3:16). Maʉ̃ba jarakĩrãbʉ daibara ĩjãbʉta Antiguo Testamento akʉza Nuevo Testamento, ẽbẽrarãba krĩchada ẽ bamarẽã Antiguo Testamento zeri ẽãta, maʉ̃ kʼarea dai Jeowa ʉ̃rʉ Kʼawuabipanʉrãbara jarapanʉ Escrituras Hebreas waya Nuevo Testamento jarapanʉ Escrituras Griegas Cristianas.
¿Kʼãrẽa kristianorabara wãrĩnu ĩjãnaibara Antiguo Testamento ʉ̃rʉra?
Jeowaba jarasi Pabloʼa naʉ̃ta bʉmarẽã: «Nããra nekʼãrẽ bʉdapeadara bʉsida dayirãba kʼawuadamarẽã» (Romanos 15:4). Maʉ̃ kʼarea krĩchaseapanʉ Escrituras Hebreas nekʼãrẽ bedʼea biata mejãcha erbʉta, bari jaradaita mejãchabʉ ũrãgʼara biata akʉza naweda ẽbẽrarã nekʼãrẽ berabarida ʉ̃rʉ, maʉ̃ba idi ewade dayirãra mejãcha kʼarebabʉ.
Ẽbẽrarã naweda kʼãrẽ berabaridata. Escrituras Hebreas maʉ̃ba jara ũrĩbibʉ Daizezeba naʉ̃ drʉa sãwũã parãnata akʉza dayirã sãwũã nekayirua baradata, naʉ̃ba dayirã jaradiabʉ samaʉ̃ba zedata akʉza kʼãrẽa beipanʉta (Génesis 2:7, 17). Naʉ̃ba ũdubibʉ sãwũã Jeowaba ẽbẽrarã nawedabema bedʼea zroma ũdubadara kʼarebasita, dayirã idi ewade bedʼea zroma maʉ̃ kĩrãkʼa ũdupanʉ (Santiago 5:17).
Ũrãgʼara biata. Escrituras Hebreas edabʉ Proverbios librota akʉza Eclesiastés librota maʉ̃ra librorabara mejãcha erbʉ ũrãgʼata idi ewade dayirã kʼarebaseabʉta, bari jaradaita jaradiabʉ sãwũã dayirã mebẽrãbawara sobia bʼaita (Proverbios 15:17). Trajo sãwũã akʉibarata (Proverbios 10:4; Eclesiastés 4:6). Dayi ewari sãwũã zokʼaibarata warraraena (Eclesiastés 11:9–12:1).
Adewara yibia Moisés Ley ʉ̃rʉ estudiaita, maʉ̃rabʉ librora 5bʉde Génesisdeba Deuteronomiobayeda. Kristianora maʉ̃ ley ʉ̃rʉ oi neẽmina maʉ̃ranebema mejãchaʉba kʼarebaseabʉ sobia bʼaita (Levítico 19:18; Deuteronomio 6:5-7).