12 Krĩchara bʉa kʼãrẽ okĩrãbʉta

¿KʼÃRẼTA OIBARA?

Bari krĩcha ẽ baibara bʉa kʼãrẽ okĩrãbʉta maʉ̃ra iyidoba bʉidu ze e baera. Bʉa okĩrãbʉ oita nãã bia krĩchaibara, ewari amaeibara akʉza zarea trajaibara.

Bʉa maʉ̃ oi krĩchabʉra, ewari bio edeseabʉ mawũã ẽ bʉrʉ wika. Bʉa jʉrʉra ewari bio edebʉta nekʼãrẽ oita wiña wiñane owãibara.

¿KʼÃRẼA YIBIA?

Bʉa jarada wãrĩnu oũdubibʉrʉde maʉ̃ba oyi bʉyikʉza audre ĩjãita adewara erbayi neũdukʼawuara biarata akʉza sobiabayi.

Bʉyikʉza audre ĩjãita. Bʉa nekʼãrẽ wika obʉbʉrʉ, wiña wiñane oseabʉ nekʼãrẽ mejãchabʉsida. Adewara bʉra zareabayi bedʼea zroma ũdubʉrʉdera.

Erbayi neũdukʼawuara biarata. Ẽbẽrarã jõmaʉ̃ta bakĩrã jari ẽbẽra iyi kʼãrẽ obʉ wãrĩnu kʼawuabʉme akʉza jari zarea obʉme iya jarada oita. Adewara ãba trajapanʉbʉrʉ maraba krĩchada oita, maʉ̃ba kʼarebayi audre neũdukʼawuara bia bʼaita.

Sobiabayi. Bʉa krĩchada wãrĩnu obʉrʉde maʉ̃ kʼarea sobiabayi bʉra.

«Mʉ̃a krĩchada wãrĩnu obʉrʉde maʉ̃ba kʼarebabʉ mʉ̃a nekʼãrẽ mejãcha oita akʉza zarea oita. Bʉa krĩchada oira yibia, maʉ̃ kʼarea bʉa krĩcha kʼãrãpe jarabʉ: «Wãrĩnu obʉrʉ mʉ̃ara»» (Christopher).

DAIZEZE BEDʼEABA JARABɄTA: «Pʉãdrʉta akʉbʉbʉrʉ kʼãrẽ uẽ akʉza yi bajã akʉbʉra ne u jʉrepe ẽ bayi» (Eclesiastés 11:⁠4).

¿KʼÃRẼTA OIBARA?

Bʉa krĩchada oira, naʉ̃ta ora.

Jidara kʼãrẽ okĩrãbʉta. Nãã bʉra bʉa krĩchabʉta, maʉ̃are arare arare bʉera bʉa nãã okĩrãbʉta.

Bʉra bʉa sãwũã okĩrãbʉta. Naʉ̃ta ora bʉa nekʼãrẽ oi krĩchabʉrʉza:

• Bʉra kʼãrẽ ewaride jõbita.

• Bʉra wiña wiñane bʉa sãwũã oita.

• Krĩchara kʼãrẽ bedʼea zroma ũduita akʉza maʉ̃ sãwũã ara oseabʉta.

Ojʉ̃drʉra. Bedʼea neẽ bʉa jõma erbʉ ẽ bʉrʉ. Nãã krĩchaibara kʼãrẽ oita, maʉ̃are ora. Maʉ̃ tẽã akʉra bʉ sãwũã wãta.

DAIZEZE BEDʼEABA JARABɄTA: «Yi trajamiaba iya krĩchada oita, wãrĩnu bia oyi; mamina jari yi mesera obʉra, nekʼãrẽ neẽãbeyi» (Proverbios 21:⁠5).