Juwa jidabʉrabara jʉrʉibara Daizezeta

Juwa jidaira Jeowabaa oda. Daizeze Bedʼeabara jarabʉ iya yuwẽrã parãnata mõbebʉrʉ «maʉ̃ tẽã wesi yumakẽrãma». Maʉ̃ kʼãrẽa Adanra mejãcha sobiasi maʉ̃ba jarasi «naʉ̃ra mʉ bʉwʉrʉ omaa akʉza mʉ yara omaa» (Génesis 2:22, 23). Jeowabara kãgabʉ juwa jidaberãra sobiapanamarẽã.

Juwa jidabʉrʉdera krĩchaseabʉ jõma biabaita. Mamina wãrĩnubaira mejãcha yi kãgapanʉsida bedʼea zroma erpanañi (1 Corintios 7:28). Naʉ̃ kartade ũduyi wãrĩnu Daizeze Bed’earadebemata, maʉ̃ba jarabʉta obʉbʉrʉ sobiabayi bʉ kimaʉ̃me akʉza bʉ mebẽrãʉ̃me (Salmo 19:8-11).

1 ORA JEOWABA JARADATA

DAIZEZE BEDʼEABA JARABɄTA. Yumakẽrãra yi mebẽrã buru (Efesios 5:23).

Bʉta juwa jidabʉbʉrʉ, Jeowabara kãgabʉ bʉ kima biʼia akʉmarẽã kãgade (1 Pedro 3:7). Iyara parãsi bʉ kʼarebamarẽã, akʉza kãgabʉ bʉa wawia ũdubimarẽã akʉza kãgamarẽã (Génesis 2:18). Mejãcha kãgaibara yumakẽrãbara yikimara, maʉ̃ba naara oibara yi kimaba kãgabʉra (Efesios 5:25-29).

Yuwẽrãta juwa jidabʉbʉrʉ, Jeowabara kãgabʉ yi kima wawiamarẽã akʉza kʼarebamarẽã yi kimaba jõma omarẽã Jeowaba jaradata (1 Corintios 11:3; Efesios 5:33). Akʉza soiduba kʼarebara iya kʼãrẽ obʉra (Colosenses 3:18). Mawũã ora bigabayi bʉ kimaita akʉza Jeowaita (1 Pedro 3:1-6).

BɄA KʼÃRẼ OSEABɄTA

• Bʉ kima widira kʼãrẽta oibarata bʉ sãwũã kima biabaita, akʉza bia ũrĩra iya jarabʉta adewara krĩchara iya jarada oita

• Awuru sobia bira nesidabʉ ewarita, maʉ̃ba awuantabaibara

2 ŨDUBIRA BɄ KIMA BɄA IYI KRĨCHABɄTA

DAIZEZE BEDʼEABA JARABɄTA. Mejãchade biga bʉ kimaba kãgabʉ oira (Filipenses 2:3, 4). Bia akʉra bʉ kimara, kĩrãbera Jeowabara kãgabʉta iyi odebʉrãra ẽbẽra biabaita wuabemabawara (2 Timoteo 2:24). Krĩchara sãwũã bedʼeaita, Daizeze Bedʼeabara jarabʉ. «Bʉ bi’ia krĩchaẽã bed’eabʉta maʉ̃ba kõbʉ espadade kĩrãk’a, mamina buru bia bed’eabara bebibʉ» (Proverbios 12:18). Jeowa zareaba kʼarebayi ibiʼia bedʼeaita akʉza kãga bedʼeaita (Gálatas 5:22, 23; Colosenses 4:6).

BɄA KʼÃRẼ OSEABɄTA

• Daizezeʼa kʼareba widira bia krĩchaita bʉ kimaʉ̃me bedʼeaina

• Jura kʼawua krĩchara kʼãrẽ jaraita akʉza sãwũã jaraita

3 KĨRÃBERA ÃBAPANɄTA

DAIZEZE BEDʼEABA JARABɄTA. Juwa jidabʉrʉdera, juwa jidadarãra kakʉa ababʉ kĩrãkʼabʉ (Mateo 19:5). Mamina mawũãsidu ẽbẽra ũmepanʉbaera edaʉde krĩcha abʼarika zedaẽbayi. Maʉ̃ba bigabayi kʼawuaita iyi sãwũã krĩchabʉta akʉza sãwũã sentibʉta (Filipenses 2:2). Bedʼea abʼarika zeira ãba panaibara. Mamina ¿sãwũã oibara maʉ̃ra? Daizeze Bedʼeaba jarabʉ. «Ũrãg’a biata jʉrʉra nek’ãrẽra bia oyi» (Proverbios 20:18). Ũrĩda wãrĩnu Daizeze Bed’earadebemaba jarabʉta bʉ kimaʉ̃me nekʼãrẽ oi ʉ̃rʉ (Proverbios 8:32, 33).

BɄA KʼÃRẼ OSEABɄTA

• Bʉ kimaʉ̃me bedʼeabʉrʉdera bari bedʼearãra, awuarabʉrʉ widara iyi sãwũã sintibʉta

• Naa widira bʉ kima, kʼãrẽ oinaẽna