Josuéta akʉza gabaonitarata

Ʉ̃kʉrʉ pʉwʉrʉ Canaánʼnebemaba kʼawuasida kʼãrẽta sãwũã berabarisita Jericóde. Nokʼora maʉ̃ra pʉwʉrʉdebemarãra ãba yi jʉresida israelitarabawara yõita. Mamina pʉwʉrʉ aba basi yi trʉ̃ Gabaónta, mamabema ẽbẽrarãbara nekʼãrẽ awuara okĩrãpanasi. Ãyira wua zõrata jʉ̃ kʼãrãpe wãsida Josuéma, mõbe jarasida: «Daira jĩgaʉba zebʉda. Daiba ũrĩsi mara sãwũã Jeowaba kʼarebasita Egiptodera akʉza Moabde. Maraba daita bea ẽ bʉrʉ, mawũãra daira mara nezokʼabayi».

Josuébara jarasi ãyibawara yõ ẽ baita. Ewari ũbea berabarida tẽã, Josuébara kʼawuasi maʉ̃ra sewidabasita, gabaonitarãra jĩgaʉba ze ẽ basita, awuarabʉrʉ ãyira Canaánʼnebemabasita. Maʉ̃ kʼarea Josuéba ãyaʼa widisi: «¿Kʼãrẽa sewa nebʉrʉ osi marara?». Gabaonitarabara jarasida: «Daira perapanasi baera. Daibara kʼawuapanʉ marara Daizezeba kʼarebabʉta. Mʉ̃ bia okʼãrãpe bearãra daita». Josuébara jarasi ãyira bea ẽ baita, maʉ̃ kʼarea bea ẽ basi.

Maʉ̃ tẽã junea, dããra ẽãne nokʼo 5 panʉrata Canaánʼnebemata, ãba yi jʉre kʼãrãpe yõ jʉ̃ẽsida gabaonitarabawara. Josuéta akʉza iyi gorogorobawara neiwari ode wã ʉ̃nadrʉsida gabaonitara kʼarebaita. Israelitara ãyi ode ʉ̃nadrʉbʉeda tẽã diapeda yi ũdusi ãyira kananeorabawara. Mõbe mama yõ jʉ̃drʉsi ãyira, kananeorãra mĩrʉ wẽba mawũãsida, mamina Jeowaba kuetata zebisi. Mawũẽra Josuéba widisi Jeowa bisiata piki jirabemarẽã, ¿kʼãrẽa Josuéba mawũã widisi Jeowa? Iya mejãcha ĩjãbasi baera Jeowa ʉ̃rʉ. Mawũẽra Jeowabara bisiara piki jirabʉsi, maʉ̃ ewaridera kiu ẽ basi israelitaraba kananeora ãyi juwa edre baebiyeda.