KAPITULO 46
Katuma Carmelode kʼãrẽ berabaridata
Mejãcha nokʼora Israel pʉwʉrʉ 10 tribu ʉ̃rʉ zokʼabadarãra ẽbẽra kayiruabasi, mamina maʉ̃ra nokʼodebema yi audre kayiruabadara Acabʼbasi. Iyira juwa jidasi ẽbẽra wẽrã so kayiruabʉme. Maʉ̃ ẽbẽra wẽrãra Baalʼa yiwidʼibasi, yi trʉ̃ra Jezabelbasi. Acabʼba Jezabelʼʉ̃mebara ẽbẽrarã mejãchaʉta Baalʼa yiwidʼibisida. Akʉza Daizeze propetara mejãchaʉta beasida. ¿Kʼãrẽta osi Jeowabara? Jeowabara zokʼa bʉesi Elíasba Acabʼa bedʼeata jaramarẽã.
Elíasbara jarasi Acabʼra kuera ze ẽ baita Israel pʉwʉrʉdera, iyira jipa ẽbẽra kayiruabasi baera. 3 poaga berabarida audre ne ura pãwãra ẽ basi, maʉ̃ kʼarea ẽbẽrarãra mejãcha jarrababa osida. Maʉ̃ tẽã Jeowabara jẽda jarasi Elíasʼa bedʼeamarẽã Acabʼʉ̃me. Nokʼo Acabʼba jarasi Elías: «Bʉ ũdubʉrʉza bedʼea zromata ũdubʉ mʉ̃ara, bʉ kʼarea kʼãwũã berabaribʉ». Elíasba panʉsi: «Maʉ̃ra mʉ̃ kʼarea mawũã berabarinʉmʉ ẽ, awuarabʉrʉ kuera ze ẽã bʉta Baalʼa yiwidʼibʉ baera. Pʉwʉrʉta akʉza Baal propetarata ãba zebira katuma Carmelode, mama akʉdayi kʼai kʼarea mawũã berabarinʉmʉta».
Pʉwʉrʉra ãba yi jʉresida katuma Carmelode. Mõbe Elíasba jarasi: «Maraba jidaibara kʼaiare bʼaita. Maraba krĩchabʉbʉrʉ Jeowara Daizeze arata, iyi are bʼaidua. Mamina maraba krĩchabʉbʉrʉ Baalra daizeze arata, iyi are bʼaidua. Maʉ̃ kʼarea naʉ̃ta odayi: Baal propetara 450bʉraba, Baalʼita oprendata diayi akʉza Baalta trʉ̃nañi. Mʉ̃abida abarika oyi, Jeowaita oprendata diayi akʉza Jeowata trʉ̃ñi. Daizezeba ʉ̃tʉba tʉbʉ pʉreata zokʼara, maʉ̃trʉ Daizeze ara». Mawũã oita jarasida pʉwʉrʉbara.
Aramaʉ̃ta Baal propetarabara osida oprendata Baalta. Mõbe naewari trʉ̃kisida: «¡Baal ũrĩdua dai bedʼeara!». Mamina Baalbara panʉ ẽ basi. Maʉ̃ kʼarea Elíasʼra ipida kʼãrãpe jarasi: «Audre jʉraidua, iyira kʼãĩnʉmʉbaibara, maʉ̃ kʼarea nesidabʉ abaʉba ʉ̃rʉmamarẽã». Mawũãnʉmʉne ewarira kiʉsi, Baal propetarabara trʉ̃basimina miõba panʉ ẽ basi.
Waya Elíasbara iyi altarde oprenda Jeowaita dia kʼãrãpe baniata mejãcha bʉesi. Maʉ̃ tẽã widisi: «Jeowa ũdubira bʉra wãrĩnu Daizeze arata». Aramaʉ̃ne Jeowabara ʉ̃tʉba eda tʉbʉ pʉreata zebisi, mawũã jõma pʉreabisi oprendara. Ẽbẽrarãra mejãcha jʉrasida: «¡Jeowatrʉ wãrĩnu Daizeze ara!». Elíasba jarasi: «Idu bʉeraidua Baal propetarãra mia abaʉta». Maʉ̃ ewaride beasida Baal propetara 450bʉrata.
Maʉ̃ tẽã puza ʉ̃rʉ ũdusida jãrãra zaketa. Elíasba jarasi Acabʼa: «Uru kue zromata. Bʉ karru ara ope wãra deda». Bajãra jipa pãrĩgʉa totosi, mejãcha bʉsasi pʉãdrʉta akʉza kue zromata zesi. Mamina Jeowaba kʼarebasi Elíasta Acab karruira audre wẽbamarẽã. Mamina, ¿mama jõsika Elías bedʼea zromara? Maʉ̃ta akʉdaya.
«Ẽbẽrarãba kʼawuadamarẽã bʉ trʉ̃arãra Jeowata akʉza bʉtrʉ abapai yi zroma naʉ̃ ẽjũa jõma ʉ̃rʉ» (Salmo 83:18).