KAPITULO 47
Jeowaba so zarea diabʉ Elíasʼa
Jezabelba kʼawuaside Baal propetara kʼãrẽ berabaridata mejãcha kĩrʉsi. Maʉ̃ kʼarea naʉ̃ bedʼeata jaramarẽã zokʼasi Elíasʼa: «Nʉra bʉra Baal propetara beida kĩrãkʼa beiyi». Elíasʼra mejãcha pera kʼãrãpe mĩrʉ wẽba wãsi drʉa ibʉawabʉeda. Mama yiwidʼisi: «Jeowa mʉ̃ara wuara awuanta ẽ, mʉ̃ra beikĩrãbʉ». Elíasʼra mejãcha mapaebasi baera kʼãĩsi bakuru edre.
Angel abaʉba Elíasʼra urumabisi akʉza ibia bedʼeasi: «Piradrʉra, nekora». Mama Elíasbara ũdusi pan borokoabʉta mõgara jʉ̃wʉrʉ ʉ̃rʉbʉta akʉza jarrade kʼawa basi baniata. Eliásʼra neko kʼãrãpe akʉza jẽda kʼãĩ wãsi. Angelbara jẽda uruma kʼãrãpe jarasi: «Nekora, bʉara zareata nesidabʉ, jĩga wãibara baera». Elíasʼra nekosi, maʉ̃ tẽã wãsi 40 ewaribayeda Horeb katumaena, mama mõgara zobeata ũdu kʼãrãpe akʉza kʼãĩsi. Maʉ̃ne Jeowaba jarasi: «¿Kʼãrẽa kamachu bʉra Elías?». Elíasba panʉsi: «Israelitarabara bʉaʼa bedʼea oya adara oda ẽ basi. Bʉ altarʼra mãrĩna kʼãrãpe bʉ propetarasida beakʉasida akʉza atiara mʉ̃sida beakĩrãpanʉ».
Jeowaba Elías jarasi: «Ãĩ zera akʉza piki edaʉnʉmera». Aramaʉ̃ta pʉãdrʉ zromata zesi akʉza drʉa ʉreta, maʉ̃ tẽã zesi tʉbʉ pʉreata. Maʉ̃ jõma berabarida tẽã Elíasbara ũrĩsi nemi biabʉta. Aramaʉ̃ta Elíasʼra iyi wuaba kĩrã ana kʼãrãpe, piki edaʉnʉmesi. Jeowaba widisi kʼãrẽa mĩrʉ wãsita. Elíasba panʉsi: «Mʉ̃trʉ abapai zokʼaibʉ bʉ propetaranebemara». Jeowaba panʉsi: «Bʉra abapai bʉ ẽ, wabida bʉ ẽbẽrarã 7.000 mʉ̃aʼa yiwidʼipanʉta. Wãra Eliseoidu, mõbe jarada mʉ̃a iyira jidabʉrʉta bʉare propeta bamarẽã». Aramaʉ̃ta Elíasbara mesera bʼai osi Jeowaba jaradara. Bʉmara, ¿Jeowaba bʉsida kʼarebaseabʉka bʉa iyi bedʼeata ũrĩra? Kʼarebaseabʉ. Atia akʉdayi kʼãrẽta berabarisita kue ze ẽ basidera.
«Mejãcha krĩcha oraidua, awuarabʉrʉ nekʼãrẽ badu berabarinʉmʉne soiduba yiwidiʼdua, bika diaidua akʉza bʉ krĩcha obibʉta jõma kʼawuabira Daizezea» (Filipenses 4:6).