Nokʼo wẽrã jipa so kayirua beasida

Nokʼo Acabʼba erbʉ deta Jezreel pʉwʉrʉde. Iyi dedaʉba akʉbʉ Nabotba ne u erbʉta. Acabʼbara Nabot drʉara kãgabʉ, maʉ̃ kʼarea edakĩrãbʉ maʉ̃ drʉara. Mamina Nabotbara maʉ̃ra nẽdoamabʉ, Daizeze Leyba jarabʉ baera yibariraba drʉata yi wũãwũãita amaesibʉrʉ, naʉ̃ra nẽdo bʉebe ẽãta. Nabotba odara kayirua ẽ basi. Mamina, ¿bʉara kʼãrẽta krĩchabʉ? ¿Acabʼbara wawiata ũdubisika Nabotba mawũã jarada kʼarea? Wawia ũdubi ẽ basi. Awuarabʉrʉ mejãcha kĩrʉsi. Iyi mawũã mejãcha kĩrʉbʉba iyi kuartodeba ãĩ wã ẽ basi akʉza neko ẽ basi.

Acab kimara Jezabelbasi. Maʉ̃ ẽbẽra wẽrãra jipa so kayiruabasi. Iya jarasi Acabʼa: «Bʉra naʉ̃ pʉwʉrʉ nokʼo, bʉara erbaseabʉ bʉa kãgata, kĩrʉrãra maʉ̃ kʼarea. Kaʉ̃ drʉara bʉrebayi, jʉ̃ãkʉara mʉ̃a kʼãrẽ oita. Jezabelbara kartata bʉ kʼãrãpe dia bʉesi zõrãrã pʉwʉrʉdebemara. Maʉ̃ kartadera eda jarabasi Nabotʼra imitia bedʼeasita Daizeze ʉ̃rʉ akʉza maʉ̃ kʼarea mõgaraba bata beadaibarata. Zõrãrãbara osi Jezabelba jarada kĩrãkʼa. Maʉ̃ tẽã Jezabelba jarasi Acabʼa: «Nabotʼra beisi, bʉre baseabʉ iyi ne ura».

Jezabelbara Nabotʼtrʉ abapai bea ẽ basi, awuarabʉrʉ beasi ẽbẽrarã Daizeze ode kʼẽrẽpabʉrata mejãcha. Iyira yiwidʼibasi daizeze zeri ẽã akʉza nekayiruata obasi. Maʉ̃ra Jeowabara jõma akʉbasi Jezabelba mawũã nekayirua obadara. ¿Jeowabara kʼãrẽta oibasi Jezabelʼra?

Acab beida tẽã, yi warra Jehoramba zokʼa jʉ̃drʉsi. Aramaʉ̃ta Jeowabara zokʼasi ẽbẽra aba maʉ̃ trʉ̃ra Jehúbasi, mawũã Jezabel mebẽrãta jõma kʼawua odamarẽã.

Jehúra iyi karrude bari kʼãrãpe wãsi Jezabel bʉidu, Jehoramsida wãsi yi ũduita Jehúʼʉ̃me. Ãyi yi ũdusidade Jehoramba widisi: «¿Dayirãira aduʼapanʉka?». Jehúba panʉsi: «Bʉ papaba nekayirua obʉedara neẽbayi sãwũã aduʼa bʼaira». Jehúba mawũã jarabʉrʉ kʼarea Jehoramʼra wẽba wãsi deda. Mawũã wãne Jehúba enedrʉmaba beasi.

Maʉ̃ tẽã Jehúra jʉ̃ẽsi Jezabel deidu. Jezabelba kʼawuabasi baera Jehú uruta yosi, bʉdasida ara osi. Mõbe bentana ʉ̃trebemane iya akʉbesi. Mawũã Jezabelʼra ibia bedʼea ẽ basi Jehúare. Jehúba jarasi nezokʼara Jezabel kʼawa badara: «¡U balbʉeidua!». Mawũã u balbʉesida, mawũã beisi Jezabelʼra.

Mawũã oda tẽã Jehúbara Acab wũãwũãra 70bʉta beasi. Mawũã osi maʉ̃ pʉwʉrʉdebemaba Baalʼa wua yiwidʼida ẽ bamarẽã. ¿Ũrĩsika bʉara? Jeowabara jõma akʉbʉ akʉza iya kʼawuabʉ kʼãrẽ ewaride kʼawua oita.