Jeowa gorogorora ʉ̃tʉbemata

Nokʼo Ben-Hadad Siriadebemaba mejãcha jʉrʉbasi yõita Israelʼʉ̃me. Eliseobara badua jarabasi nokʼo Israeldebema mĩrʉ wãnamarẽã, mawũã yõne ba ẽ baita. Maʉ̃ kʼarea Ben-Hadadba miõba kʼawuaena krĩchasi jida edeita Eliseora. Kʼawuasi Dotán pʉwʉrʉdebʉta, mawũã zokʼasi siriora gorogororata, Eliseota jida eda jʉ̃ẽnamarẽã.

Siriorãra diamasi jʉ̃ẽsida pʉwʉrʉ Dotánʼenara. Nrʉema Eliseo kʼarebabariba ũdusi Dotán pʉwʉrʉra gorogororaba audu pʉrranʉmʉta. Mejãcha pera kʼãrãpe jʉrasi: «Eliseo ¿kʼãrẽta odai?». Eliseoba panʉsi: «Audre bʉ dayirãbawara ãyiraira». Aramaʉ̃ne Jeowaba obisi Eliseo kʼarebabariba ũdumarẽã katumane mejãchabasita Jeowa gorogorora kabayo ʉ̃rʉbʉta akʉza ũdumarẽã karru yõbaridebemata tʉbʉ pʉreabʉ kĩrãkʼabʉta.

Sirio gorogororaba Eliseo jidakĩrãbasidera Eliseora yiwidʼisi: «Jeowa mʉ̃ bia okʼãrãpe dabʉ ũdubi ẽ babira». Aramaʉ̃ta gorogororabara kʼawua ẽ totosi ãyira samabʉta akʉpanasimina. Mawũẽra Eliseobara jarasi gorogorora: «Marara awuru pʉwʉrʉeda zesida, zeidua mʉ̃a edeyi maraba ẽbẽra jʉrʉpanʉinʉ». Mawũẽra ãyira Eliseo kʼaidu wãsida Samaria pʉwʉrʉidubayeda. Israel nokʼora Samariadebasi.

Sirio gorogororaba ãyi sama chu kʼawuasidera ãyira kʼãrẽ obe ẽ basi. Nokʼo Israeldebemaba widisi Eliseoʼa: «¿Mʉ̃ara beaika?». Bʉmara, ¿Eliseobara sirioraba iyita beibasi baera abarika oibasika? Mawũã ẽ. Iya Israel nokʼoʼa jarasi: «Bearãra. Yiko diara mõbe idu wãbira». Mawũã maʉ̃ nokʼobara yikota okʼãrãpe idu wãbisi deda.