Jeowa angelba kʼarebasi Ezequíasʼra

Israeldebema nokʼora (naʉ̃bara erbasi diez tribu) asirioraba ãyi juwa edre baebisi, kõbe nokʼo Asiriadebema Senaqueribʼba iyi juwa edre baebikirãbasi Judá nokʼota (naʉ̃ nokʼobara tribu ũme erbasi). Mawũã pʉwʉrʉ Judádebemara aba abaka iyi juwa edre baebi wãsi. Mamina iya audrera iyi juwa edre baebikĩrãbasi Jerusalén pʉwʉrʉta. Mamina Senaqueribʼbara kʼawua ẽ basi Jeowaba kʼarebabʉta Jerusalén pʉwʉrʉra.

Ezequías Judádebema nokʼobara platata mejãcha diasi nokʼo Senaqueribʼa Jerusalénʼʉ̃me yõ ẽ bamarẽã. Senaqueribʼbara maʉ̃ platara jidasi, mawũãsidu iyi gorogororata zokʼa bʉesi yõi baera. Ẽbẽrarã Jerusalénʼnebemara mejãcha perapanasi ewariza ãyi nejʉrarata kʼaita ba baera. Mawũẽra Ezequíasba jarasi: «Peraraidua, asiriorãra zarea barapanʉ, mamina Jeowara kʼaʉ̃raira audre zarea barabʉ».

Nokʼo Senaqueribʼbara erbasi rabsaketa, maʉ̃ra jarakĩrãkʉasi iyi nezokʼa audre yi zromata, maʉ̃ta zokʼa bʉesi Jerusalénʼena, Jerusalénʼnebema ẽbẽrarã kʼarea ipidamarẽã. Naʉ̃ rabsakera Jerusalén pʉwʉrʉdeba jĩgaʉba jʉrasi: «Jeowabara marara kʼarebabe ẽ. Ezequías yi sewabiraidua, mia abaʉ Daizezeba marara kʼarebabe ẽ daidebara».

Ezequíasbara Jeowaʼa widisi kʼãrẽta oibarata. Jeowaba panʉsi: «Perarãra nokʼo Senaquerib nezokʼaba jarabʉ kʼarea. Senaqueribʼbara iyi juwa edre baebi ẽ bayi Jerusalénʼra». Tẽã Senaqueribʼba kartata dia bʉesi Ezequíasʼa. Mama eda jarachuasi: «Daiare zeidua, marara Jeowabara kʼareba ẽ bayi». Aramaʉ̃ne Ezequíasʼra yiwidʼisi: «Jeowa mʉ̃ bia okʼãrãpe kʼarebara daira. Jõmaʉ̃ba kʼawuadamarẽã bʉtrʉ wãrĩnu Daizeze arata». Mawũẽra Jeowaba panʉsi: «Nokʼo Asiriadebemara Jerusalénʼnera eda ze ẽ bayi. Mʉ̃a kʼarebayi mʉ̃ pʉwʉrʉra».

Senaqueribʼbara krĩchabasi wãrĩnu Jerusalén pʉwʉrʉra iyi juwa edre baebita. Mamina diamasi Jeowaba zokʼasi iyi angelta aba Siria gorogorora tabadamae. Maʉ̃rãra Jerusalén kʼaita tabasi. Jeowa angelbara 185.000 gorogorora makenasi. Nokʼo Senaqueribʼbara aduasi iyi gorogorora audre yibiarata. Maʉ̃ba iyira kʼãrẽ oi neẽbasi deda wãsi, yõne aduasi baera. Mawũã kʼarebasi Jeowabara Ezequíasta akʉza Jerusalén pʉwʉrʉta, iya jarada kĩrãkʼa. ¿Bʉta Jerusalénʼne basibʉrʉ ĩjãkasika Jeowaba jaradara?