YI 59
Bʉ pẽwãbʉdadera zarea baseabʉ
Kristianora jõmaʉ̃ba ũduseapanʉ bedʼea zromata mawũã ẽ bʉrʉ pẽwãseapanʉ maʉ̃ kʼarea, ¿dayirãra peradaibaraka?
1. ¿Kʼãrẽa kĩrãmigada ẽ baibara dayirã pẽwãbʉdadera?
Daizeze Bedʼeabara jarabʉ: «Yi ẽbẽra jõma Jesukristo bedʼea ĩjãkĩrãbʉra, pẽwãnaña abʉ» (2 Timoteo 3:12). Jesura pẽwãsida naʉ̃ drʉadebemaba obʉta oẽ basi baera. Abarika dayirãsida naʉ̃ drʉaba obʉta oẽ baera kĩrãmigada ẽ nokʼoraba akʉza religion zeri ẽãraba pẽwãdaimina (Juan 15:18, 19).
2. ¿Kʼãrẽta odaibara dayirã pẽwãi naweda?
Idi wedaʉba zarea odaibara dayirãba Jeowa ʉ̃rʉ ĩjã erbaita, ¿sãwũã oseapanʉ? Ewariza ewari jʉrʉibara yiwidʼita akʉza Daizeze Bedʼea akʉita. Maʉ̃ awuara aduadakara ãba yi jʉrebʉma wãita, maʉ̃ba kʼarebayi badu bedʼea zroma ũdubʉrʉde zareabaita akʉza dayirã mebẽãraba zʉbʉriabibʉdebida. Apostol Pablora badua pẽwãpanasi, maʉ̃ kʼarea iya karta abaʉde bʉsi: «Jeowara mʉ̃ kʼarebabari, maʉ̃ba mʉ̃ra pera ẽ» (Hebreos 13:6).
Dayirãba badua jaradiapanʉne kʼarebabʉ zowaĩnĩgʉa bʼaita, mawũã jaradiabʉba kʼarebabʉ audre Jeowa ʉ̃rʉ ĩjãita akʉza ẽbẽrarã kʼarea pera ẽ baita (Proverbios 29:25). Bʉta kʼãwũãena zowaĩnĩgʉabʉbʉrʉ jaradiaita iduaribi ẽ bayi, nokʼoraba jaradia ẽ bamarẽã jarabʉmina (1 Tesalonicenses 2:2).
3. ¿Kʼãrẽ nebiata ũduseabʉ dayi pẽwãbʉdadera?
Mia abaʉba kãgada ẽ pẽwãnamarẽãra. Mamina dayirã pẽwãbʉdade zareabʉbʉrʉ kʼarebaseabʉ audre daya ĩjãbʉ zarea erbaita akʉza Jeowa kʼawapanʉta kʼawuapanʉ, dayirãba wua oẽãsidu iya kʼarebaita (akʉra Santiago 1:2-4). Jeowara sopʉabʉ dayirã zʉbʉriabʉ ũdubʉde, mamina iyira sobiabʉ dayirãta mapae ẽ bʉrʉ iya kãgabʉ oita. Daizeze Bedʼeaba jarabʉ: «Nebia obʉ kʼarea zʉbʉria odara, maʉ̃ta zarea obʉbʉrʉ Daizezebara bia akʉbʉ» (1 Pedro 2:20). Dayirã jõmaʉ̃ta zarea opanʉbʉrʉ akʉza Jeowaʉ̃me kʼẽrẽpapanʉbʉrʉ iyara diayi dayirã naʉ̃ drʉade ewari jõmaʉ̃nẽ bʼaita akʉza mia abaʉba pẽwãna ẽ bayi mamara (Mateo 24:13).
AUDRE BIʼIA KʼAWUADADRɄ
Akʉdaya ʉ̃kʉrʉ bedʼeaba, sãwũã ũdubibʉta dayirã pẽwãbarabʉidu Jeowaʉ̃me kʼẽrẽpa baseabʉta, adewara akʉdaya dayirã mawũã zarea obʉ kʼarea Jeowabakʼãrẽ nebia diaita.
4. Bʉra zarea baseabʉ, bʉ mebẽãraba Jeowa ode bamarẽã kãga ẽ mina.
Jesubara wãrĩnuta jarasi ʉ̃kʉrʉ dayirã mebẽrãnebemaba kãga ẽ baita dayirã Jeowa ode wãita. Akʉra Mateo 10:34-36, mõbe naʉ̃ta panʉidua:
Ẽbẽra aba Jeowa ode bakĩrãbʉbʉrʉ, ¿yi mebẽãrãra sãwũã krĩchadaiba?
Akʉdaya ʉ̃kʉrʉ mebẽrã maʉ̃ne berabaridata, akʉra BIDEOTA, mõbe maʉ̃ ʉ̃rʉ bedʼeaidua:
¿Bʉara kʼãrẽta oi bʉ mebẽrãba akʉza bʉ neũdukʼawuaba jarara Jeowa ode wã ẽ bamarẽã?
Akʉra Salmo 27:10 akʉza Marcos 10:29, 30. Maʉ̃ra testora jõma akʉda tẽã maʉ̃ ʉ̃rʉ bedʼeaidua:
¿Naʉ̃ra testoraba bʉra sãwũã kʼarebaseabʉ bʉ mebẽrãba akʉza bʉ neũdukʼawuaraba kãga ẽ bʉrʉ Daizeze ode wãita?
5. Mia pẽwãbʉda kʼarea Jeowa odebara ãĩ wãnakara
Dayirãra zowaĩnĩgʉa bʼaibara, Jeowa ode kʼẽrẽpa bʼaita pẽwãpanʉmina. Akʉra BIDEOTA, mõbe maʉ̃ ʉ̃rʉ bedʼeaidua:
Bʉa bideode ũdudadebara, ¿sãwũã kʼarebaseabʉ zowaĩnĩgʉa erbaita?
Akʉra Hechos 5:27-29 akʉza Hebreos 10:24, 25. Maʉ̃ra testora akʉda tẽã maʉ̃ ʉ̃rʉ bedʼeaidua:
Nokʼoraba dayirã jaradara jaradia wã ẽ bamarẽã akʉza ãba yi jʉrebarima wã ẽ bamarẽã, ¿kʼãrẽa dayirãra zarea odaibara Jeowa ode bʼaita?
6. Jeowaba kʼarebayi so zarea erbaita
Jeowa ʉ̃rʉ Kʼawuabipanʉrã pʉwʉrʉ biodebematabʉ zõrãrãta, warrrarata akʉza wũãwũãrata, Jeowa ode kʼẽrẽpapanʉ ãyi pẽwã panʉinʉ. Kʼawuaita maʉ̃ sãwũã ozebʉrʉta, akʉra BIDEOTA. Mõbe maʉ̃ ʉ̃rʉ bedʼeaidua:
¿Kʼãrẽba kʼarebasi Jeowa ʉ̃rʉ Kʼawuabipanʉrãra ãyi pẽwãpanʉinʉ zarea bʼaita?
Akʉra Romanos 8:35 akʉza 37-39, adewara Filipenses 4:13. Naʉ̃ra testora akʉda tẽã maʉ̃ ʉ̃rʉ bedʼeaidua:
¿Bʉra sãwũã kʼarebaseabʉ naʉ̃ testobara bedʼea zroma zebʉrʉde zarea erbaita?
Akʉra Mateo 5:10-12, mõbe naʉ̃ ʉ̃rʉ panʉidua:
¿Kʼãrẽa sobia baseabʉ bʉ pẽwãpanʉinʉ?
Jeowa ʉ̃rʉ Kʼawuabipanʉrã mejãchaʉta Jeowaʉ̃me kʼẽrẽpabʉ ãyi pẽwãpanʉmina. Bʉsida abakĩrã mawũã kʼẽrẽpa baseabʉ Jeowaʉ̃me.
Ʉ̃KɄRɄBA KRĨCHAPANɄTA: «Mʉ̃ta pẽwãbarabidabʉrʉ Jeowa odebara ãĩ wãñi».
¿Kʼãrẽ testoraba kʼarebaseabʉ ẽbẽra mawũã krĩchabʉra Daizeze ʉ̃rʉ audre ĩjãita?
KĨRÃBEITA
Jeowabara bia akʉbʉ dayirãba zarea obʉra iyiʉ̃me kʼẽrẽpa bʼaita pẽwãpanʉinʉ.
Panʉnadrʉ
¿Kʼãrẽa kristianorãra kĩrãmigada ẽ pẽwãpanʉ kʼarea?
¿Pẽwãbʉdade zarea bʼaita, idiba kʼãrẽta oseabʉ bʉra?
Bʉara, ¿kʼãrẽba ĩjãbibʉ badu bedʼea zroma zebʉrʉmina Jeowaʉ̃me kʼẽrẽpa bʼaita?
JɄRɄDA AUDRE KʼAWUAITA
Akʉra mebẽã aba kʼãrẽba kʼarebasita, iyi karselde eda basimina kʼaiare ba ẽ bada kʼarea.
Kʼawuara juwa jidapanʉra kʼãrẽba kʼarebasita Jeowaʉ̃me kʼẽrẽpa bʼaita ãyi pẽwãpanasimina.
Badu bedʼea zroma ũdupanʉmina Jeowaʉ̃me kʼẽrẽpa panaseabʉ (7:11)
Kʼawuara sãwũã zowaĩnĩgʉa baseabʉta pẽwãpanʉinʉ.
¿Kʼãrẽta kʼawuabaibara nãã dayi mebẽãraba kãga ẽ bʉrʉ Daizeze ode wãita? ¿Adewara dayirãra sãwũã aduʼa baseabʉ akʉza Jeowaʉ̃me kʼẽrẽpa baseabʉ?
«Wãrĩnubara webʉ ẽ, ‹ibiadebaira, awuarabʉrʉ yõta webʉ›» (Jarakabʉ, octubre 2017de)