BEDʼEA YI NÃÃRABEMATA | DAIZEZE NOK’O: ¿NAɄ̃BARA KʼÃRẼTA JARAKĨRÃBɄ?
Kʼãrẽa audre yibia Jesuitara—DAIZEZE NOKʼORA
Jesu naʉ̃ drʉaeda zesidera nekʼãrẽ mejãchabʉ ʉ̃rʉ bedʼeasi. Bari jaraita, iyi kʼaidupanʉra jarasi sãwũã yiwidʼibarata, sãwũã Daizeze sobiabiseabʉta akʉza sãwũã sobiabaibarata (Mateo 6:5-13; Marcos 12:17; Lucas 11:28). Mawũẽra iyira audrera bedʼeakĩrãbasi Daizeze Nokʼo ʉ̃rʉ (Lucas 6:45).
Dayirãba nãã ũduda kĩrãkʼa Jesubara audrera jaradiabasi Daizeze Nokʼo ʉ̃rʉ (Lucas 8:1). Iyira mejãcha zarea osi akʉza iyira jĩrʉne jĩga wãsi Israel pʉwʉrʉde, mawũã maʉ̃ nokʼo ʉ̃rʉ jaradiaita ẽbẽrarã. Ebangeliora kimarebʉra bedʼeabʉ Jesu sãwũã bada ʉ̃rʉ akʉza 100 audre bedʼeabʉ Daizeze Nokʼo ʉ̃rʉ. Mamina Jesura maʉ̃ ʉ̃rʉ audre bedʼeasi (Juan 21:25).
¿Kʼãrẽa iyita maʉ̃ Nokʼo ʉ̃rʉ bedʼeaira yibiabasi? Daizezeba jidasi baera iyi Nokʼota zokʼamarẽã (Isaías 9:6; Lucas 22:28-30). Iya Daizeze Nokʼo zokʼaibasimina jʉrʉ ẽ basi zarea erbaita akʉza wuabemaraba bia akʉmarẽã (Mateo 11:29; Marcos 10:17, 18). Awuarabʉrʉ iya jaradiasi Daizeze Nokʼo ʉ̃rʉ kʼawuabasi baera maʉ̃ba weibasita Daizezeita nebiata akʉza yi kʼaidubemaraita.a
DAIZEZE NOKʼOBA KʼÃRẼ NEBIA OITA JESU ZEZE BARI
Jesubara soiduba mejãcha kãga yi Zezera (Proverbios 8:30; Juan 14:31). Iyara kãga Daizezeba nebia erbʉra, bari jaraita kãgata, so borekea ũdubita akʉza aripe oita (Deuteronomio 32:4; Isaías 49:15; 1 Juan 4:8). Maʉ̃ kʼarea iyara jʉra Daizeze ʉ̃rʉ sewida jarapanʉra, bari jaraita, jarapanʉ Daizezebara ẽbẽrarãra zʉbʉriabibʉta akʉza ãyi ʉ̃rʉ krĩcha ẽãta. Maʉ̃ kʼarea Jesura mejãcha zarea osi Daizeze Nokʼo bia ʉ̃rʉ bedʼeaita: maʉ̃ Nokʼodeba Daizeze trʉ̃ta neneẽã babiyi (Mateo 4:23; 6:9, 10). ¿Sãwũã oi maʉ̃ra?
Maʉ̃ nokʼobara nekʼãrẽ biata mejãcha oyi ẽbẽrarãita. Iyi Nokʼodeba Jeowaba «jõma jõbiyi daʉbara akʉza beira wuara neẽbayi, so zʉbʉriaira adewara zʉbʉria bedʼeaira neẽbayi, pʉa nãã ũdubadara neẽbayi» (Revelación [Apocalipsis] 21:3, 4). Naʉ̃ Nokʼodeba ẽbẽrarãra wuara zʉbʉria ẽ bayi.b
Maʉ̃ kʼarea Jesura Daizeze Nokʼo ʉ̃rʉ bedʼeakĩrãbasi, maʉ̃ Nokʼodeba ũdubi baera yi Zezera ẽbẽra biata, so zʉbʉria akʉbʉta akʉza zarea barabʉta (Santiago 5:11). Mamina naʉ̃ Nokʼobara nebiata oyi Daizeze kʼarea akʉza ẽbẽrarã Jesuba kãgabʉraitabida: iyi kʼaidubemarata.
DAIZEZE NOKʼOBA KʼÃRẼ OITA JESU KʼAIDUBEMARA KʼAREA
Jesu naʉ̃ drʉa eda zei naena, ewari biobasi ʉ̃tʉ yi Zeze Jeowaʉ̃me. Iya kʼarebasi jõma parãita: chĩdaurata, dayirã drʉata akʉza maʉ̃rane edabʉta (Colosenses 1:15, 16). Mamina maʉ̃ jõma parãnanebemara Jesubara audre kãgasi ẽbẽrarãta (Proverbios 8:31).
Iya ẽbẽrarãta mawũã mejãcha kãgabasi baera jaradiakĩrã jaradiabasi. Iya jaradia jʉ̃drʉsideba jarasi zesita yi wãrĩnu nesidabʉra bedʼea bia jaradiaita (Lucas 4:18). Jesura bari bedʼea ẽ basi, awuarabʉrʉ oũdubisi. Bari jaraita, ẽbẽrarãba iyi bedʼeabʉ akʉ jʉ̃ẽside, iya ẽbẽrarã kayabʉ ũdubʉrʉde bebikʉasi so zʉbʉria akʉ kʼãrãpe (Mateo 14:14). Ewari aba ẽbẽra mejãcha kayabʉba Jesuʼa jarasi: «Nokʼó, bʉa krĩñabʉrʉ mʉrã nene ẽã bʼebirua». Jesuba kãgata ũdubisi baera akʉza so borekeabʉta ũdubisi baera iya jarasi: «Mʉãrã krĩña bʼʉa, mawũẽ bʉra nene ẽã bʼidʼa» (Lucas 5:12, 13). Iya ũduside iyi neũdukʼawua María Lázaro beida kʼarea jẽgabasita, iyisida abarika jẽgasi (Juan 11:32-36). Aramaʉ̃ta iyara osi miõba okata. Ewari kimare berabarisimina Lázaro beidata, jẽda piradrʉbisi (Juan 11:38-44).
Jesubara bia kʼawuabasi iya ẽbẽrarã bebikʉadata akʉza beidara jẽda piradrʉbikʉadara jẽda beita. Mamina iya bia kʼawuabasi Daizeze Nokʼoba webʉrʉra ewari jõmaʉ̃nẽ bʼaita, maʉ̃ kʼarea bari ewari jʉrʉ ẽ basi ẽbẽrarã bia okʉaita, awuarabʉrʉ iyi zarea jõmainʉba osi Daizeze Nokʼo ʉ̃rʉ jaradiaita (Mateo 9:35). Iya miõba oka odaba ũdubisi Daizeze Nokʼoba aranʉbai kʼãrẽ nebia weita naʉ̃ drʉade. ¿Kʼãrẽta berabari? Daizeze Bedʼeaba panʉbʉ maʉ̃ bedʼeara.
Wuara neẽbayi kayara
«Maʉ̃ ewaridera, dabʉba ũdu ẽã bʉbara jẽda ũduyi, adewara yi kʉwʉrʉba ũrĩ ẽãbʉbara jẽda ũrĩñi. Maʉ̃ ewaridera, wãbe ẽ bʉra pinãdrʉyi beguiba obʉ kĩrãkʼa, yi bedʼea ze ẽ bʉbara sobiaba jʉra teibayi». Akʉza «Mia abaʉ ẽbẽraba jara ẽ bayi: ‹Kayakʉ mʉ̃ra›» (Isaías 33:24; 35:5, 6).
Beira wuara neẽbayi
«Ẽbẽra biaratrʉ duanañi maʉ̃ drʉadera akʉza ewari jõmaʉ̃nẽbayi maʉ̃ ʉ̃rʉra» (Salmo 37:29).
«[Daizezeba] ewari jõmaʉ̃nẽ jõbiyi beibʉra. Jeowabara jõma jareyi daʉbara» (Isaías 25:8).
Beidarãra jẽda piradrʉyi
«Ewarita zeya, maʉ̃ ewadera beidapeada jou nʉmebara mʉ̃ nemi ũrĩbʉrʉba akʉza jẽda piradrʉyi» (Juan 5:28, 29).
«Daizezebara beidapeadara jẽda piradrʉbiyi» (Hechos 24:15).
Jõmaʉ̃ta de barabayi akʉza trabajota erpanañi
«Wãrĩnu dera parãnañi akʉza mama panañi akʉza wãrĩnu ne u ubata udayi akʉza maʉ̃ netata kodayi. Awuruita de parãna ẽ bayi, awuruita ne upana ẽ bayi akʉza awuruba ko ẽ bayi [...], mʉ̃a jʉrʉdaraba ãyi juwaba odara ãyitabayi» (Isaías 65:21, 22).
Neẽbayi yõta
«[Daizezeba] naʉ̃ drʉa jõmaʉ̃nẽ jõbiyi yõra» (Salmo 46:9).
«Pʉwʉrʉrãra kuchoba yõna ẽ bayi awuru pʉwʉrʉraʉ̃me akʉza wua yõ kʼawuada ẽ bayi» (Isaías 2:4).
Bayi yikota jõmaita
«Naʉ̃ drʉabara diabayi netada, Daizezeba nekʼãrẽ bia mejãcha diayi» (Salmo 67:6).
«Bayi mejãcha netata naʉ̃ drʉade, katuma ʉ̃rʉra audre bayi» (Salmo 72:16).
Neẽbayi wua ẽbẽrarã kʼãrẽ neẽãbʉra
«Nekʼãrẽ neẽãbʉra kĩrãdua ẽ bayi» (Salmo 9:18).
«Iyara kʼarebai baera kʼãrẽ neẽãbʉ Iyaʼa kʼareba widibʉra akʉza kʼaiba kʼarebai neẽãbʉra. So zʉbʉria akʉyi kʼãrẽ neẽãbʉra akʉza kʼaiba kʼarebai neẽãbʉra adewara ẽdrʉbiyi kʼãrẽ neẽãbʉra beidebara» (Salmo 72:12, 13).
Naʉ̃ kʼawua bia akʉda tẽã mõbemata, ¿kʼawuabʉka Jesuitara kʼãrẽa yibia basita Daizeze Nokʼo ʉ̃rʉ jaradiaira? Iyara jara ũrĩbisi Daizeze Nokʼo ʉ̃rʉ jari ẽbẽrarã yi ũrĩkĩrãbʉa kʼawuabasi baera Daizeze Nʼokobʉrʉ jõbita zʉbʉriabʉra.
¿Bʉara kãgaka Daizeze Bedʼeaba nebia weya bʉ ʉ̃rʉra? Maʉ̃ta mawũãbʉrʉ, ¿Kʼãrẽta oibara kʼawuaita Daizeze Nokʼo ʉ̃rʉ? ¿Kʼãrẽta oseabʉ maʉ̃ nebiata ũduita? Wuabema artikulota bedʼeayi maʉ̃ ʉ̃rʉ.
a Jesura piradrʉ kʼãrãpe jẽda wãsi ʉ̃ta. Maʉ̃neba ʉ̃ta Daizeze Nokʼora audre yibia iyitara (Lucas 24:51).
b Audre kʼawuaita Daizezeba kʼãrẽa iduaribibʉta zʉbʉriata akʉra libro ¿Kʼãrẽta jaradiabʉ Daizeze Bedʼeabara?, Jeowa ʉ̃rʉ Kʼawuabipanʉrãba oda.