BEDʼEA YI NÃÃRABEMATA
¿Kʼãrẽa akʉi Daizeze Bedʼeara?
«Mʉ̃a krĩchabasi Daizeze Bedʼea akʉira zareata» (Jovy).
«Mʉ̃a krĩchabasi maʉ̃ libro akʉbʉrʉbara masẽita» (Queennie).
«Mʉ̃a Daizeze Bedʼea drazoabʉ ũdubʉba leamabasi» (Ezekiel).
¿Bʉra naʉ̃ra kĩrãkʼa krĩchabasika? Abedaeda bʉa DaizezeBedʼea akʉkĩrãbasimina ũdubʉrʉdera leamabasi. Daizeze Bedʼea akʉita krĩchabʉrʉdera ẽbẽrarãitara jipa zare. Mamina bʉa kʼawuara naʉ̃ librodebʉbara kʼarebaseabʉta bʉ audre sobia bʼaita akʉza bʉ bebʉ audre bia bʼaita, ¿abarika krĩchaika? ¿Bʉa kʼawuara kʼãrẽta oibarata Daizeze Bedʼea masẽ ẽã akʉita, akʉkĩrãika mama kʼãrẽta jarabʉta?
Akʉra kʼãrẽta berabarisita ʉ̃kʉrʉ ẽbẽrarãba Daizeze Bedʼea akʉ jʉ̃drʉside akʉza ãya kʼawuaside naʉ̃ba kʼãrẽ nebia erbʉta.
Ezekiel, 20 poagabʉba jarabʉ: «Mʉ̃a Daizeze Bedʼea akʉ jʉ̃drʉi nawedara jipa kʼawua ẽ basi kʼãrẽta oita mamina Daizeze Bedʼea akʉda tẽã kʼawuasi kʼãrẽta oita. Nama jarabʉba kʼarebabʉ mʉ̃a nrʉemaza oibarade».
Frieda, 20 poaga ʉ̃tabʉba jarabʉ: «Mʉ̃ra mejãcha kĩrʉmia basi mamina Daizeze Bedʼea akʉbʉba kʼarebabʉ mʉ̃ mejãcha kĩrʉbʉta wĩñã wĩñane idubʉ wãita akʉza idi audre erbʉ neũdukʼawuarata»
Eunice, 50 poaga ʉ̃tabʉba jarabʉ: «Daizeze Bedʼea leibara kʼarebabʉ mʉ̃a nãã kʼayiruara obadara idubʉ wãita»
Akʉza Daizeze Bedʼea akʉibara kʼarebaseabʉ bʉsida sobia bʼaita naʉ̃ra ẽbẽrarã berabarida kĩrãkʼa (Isaías 48:17, 18). Maʉ̃ daucha kʼarebayi bʉa nekʼãrẽ jidaide biʼia jidamarẽã adewara kʼarebaseabʉ aukʼara krĩcha ẽ baita, neũdukʼawua bia erbaita adewara wãrĩnuta kʼawuaita dayirã parãna ʉ̃rʉ. Naʉ̃ ʉ̃rʉ kʼawuaita audre yibia. Ũrãgʼa Daizeze Bedʼeadebʉra Daizezedeba zebʉ baera ũrãgʼa biara, iya jarabʉra aña jarabʉ baera.
Naʉ̃ba yibiabayi Daizeze Bedʼea le jʉ̃drʉita. Wuarebema artikuloraba kʼarebayi Daizeze Bedʼea akʉkĩrã akʉita.