YI 11
¿Sãwũã biʼia kʼawuadai Daizeze Bedʼeaba jarabʉra?
¿Ewari abaʉde bʉra mejãcha krĩcha zroma obarika trajota mejãcha erbʉ kʼarea? Aramaʉ̃ta bʉ trajora jõma drakʉasi wiña wiñane mawũã jõma oita akʉza bʉita zare ẽ baita. Maʉ̃ kĩrãkʼabʉ Daizeze Bedʼea le jʉ̃drʉita, bʉa widiseabʉ maʉ̃ kʼarea: «¿Mʉ̃a samaʉ̃ba akʉ jʉ̃drʉi?». Naʉ̃ne ũduyi ũrãgʼa bia sãwũã Daizeze Bedʼea lekĩrã le bʼaita akʉza sãwũã kʼawuaita.
1. ¿Kʼãrẽa yibia Daizeze Bedʼea ewariza le bʼaita?
Ẽbẽrarã Daizeze Bedʼea ewariza lebʉra mawũã ẽ bʉrʉ «Jeowa ley» lebʉra bia wãñi akʉza sobiabayi (akʉra Salmo 1:1-3). Daizeze Bedʼea le jʉ̃drʉbʉrʉdera wiña oakʉra nããra. Audre kʼawua wãne Daizeze Bedʼeaba kʼãrẽta jarabʉta audre lekĩrã wãñi.
2. ¿Kʼãrẽta oibara bʉra Daizeze Bedʼea lebʉde audre kʼawuaita?
Bʉa Daizeze Bedʼeade jarabʉ audre kʼawuaita, bʉa biʼia krĩchaibara kʼãrẽ ʉ̃rʉ lenʉmʉta. Daizeze Bedʼeara bari lenʉma be ẽ awuarabʉrʉ «biʼia krĩchaibara maʉ̃ ʉ̃rʉ» (Josué 1:8). Daizeze Bedʼea lenʉmʉnera naʉ̃ta widida: «¿Kʼãrẽta jaradiabʉ naʉ̃ testoba Jeowa ʉ̃rʉ? ¿Sãwũã aripe oi nama jarabʉra? ¿Sãwũã zokʼaseabʉ naʉ̃ testo wuabemara kʼarebaita?».
3. Bʉta ewari neẽbʉrʉ, ¿kʼãrẽta oseabʉ Daizeze Bedʼea leita?
¿Bʉra ewari neẽka Daizeze Bedʼea leita? Ẽbẽra mejãchaʉta bʉ kĩrãkʼa berabaribʉ. Bʉa nekʼãrẽ mejãcha oibaramina «jʉrʉibara nebia oita» (Efesios 5:16). Krĩchara ũnadrʉbʉrʉdeba akʉza kiyeda kʼãrẽ ũmadaʉde leseabʉta Daizeze Bedʼeara. Ʉ̃kʉrʉbara lebʉ Daizeze Bedʼeara diapeda mawũã ẽ bʉrʉ kewarare, ʉ̃kʉrʉra ãyi trajodeba enaʉ̃bʉde adewara ʉ̃kʉrʉ ẽbẽrabara Daizeze Bedʼeara lebʉ diamasi kʼãĩ naweda. ¿Bʉara sõbede leseabʉ?
AUDRE BIʼIA KʼAWUADADRɄ
Nama kʼawuadayi kʼãrẽta oibarata Daizeze Bedʼea lekĩrã le bʼaita, adewara sãwũã akʉibarata Daizeze Bedʼea kʼawuai naweda naʉ̃ librodeba.
Bʉa yiko kokabadata kobʉrʉde kãgada kĩrãkʼa, abarika kãgaseabʉ Daizeze Bedʼea leita.
4. ¿Kʼãrẽta oibara Daizeze Bedʼea lekĩrã le bʼaita?
Ʉ̃kʉrʉitara Daizeze Bedʼea le jʉ̃drʉira zare, mamina bʉa yiko kokabadata kobʉrʉde kãgada kĩrãkʼa, abarika bʉa kãgaseabʉ Daizeze Bedʼea lekĩrã bʼaita. Akʉra 1 Pedro 2:2, mõbe naʉ̃ta panʉidua:
¿Bʉmara Daizeze Bedʼeata ewariza lebʉbʉrʉ audre lekĩrãika?
Akʉra BIDEOTA ʉ̃kʉrʉ warrarabara sãwũã Daizeze Bedʼea audre lekĩrãsidata. Mõbe naʉ̃ta panʉidua:
¿Kʼãrẽa zareabasi ʉ̃kʉrʉ warrara bideodebemaitara Daizeze Bedʼea leira?
¿Kʼãrẽba kʼarebasi Daizeze Bedʼea lebʉ idubʉ ẽ baita?
¿Kʼãrẽta osida Daizeze Bedʼea audre lekĩrã le bʼaita?
Kʼareba ojʉ̃drʉita:
Jidara Daizeze Bedʼea aba bʉa ĩjãseabʉta akʉza bedʼea bʉa ũrĩseabʉta. Leseabʉ Traducción del Nuevo Mundo naʉ̃ta bʉ bedʼeade bʉbʉrʉ.
Bʉa le jʉ̃drʉseabʉ Daizeze Bedʼeade nebʉra bʉya audre kãgata. Bʉa audre kʼawuaita akʉra «Kʼareba Daizeze Bedʼea le jʉ̃drʉita».
Bʉra bʉa Daizeze Bedʼea lebʉrʉra. Zokʼaseabʉ «Sãwũã wã mʉ̃a Daizeze Bedʼea lebʉra», ũduseabʉ naʉ̃ librode.
Zokʼara aplikasion JW Library®. Bʉa ʉ̃tʉzebira bʉ selularde mawũã ẽ bʉrʉ bʉ tabletade, bʉara leseabayi akʉza ũrĩseabayi Daizeze Bedʼea bʉ wãmae.
Zokʼara apéndice de la Traducción del Nuevo Mundo. Nama ũduyi mapa, rekuadro akʉza bedʼea bia jara ũrĩbibʉta Daizeze Bedʼea lebʉde lekĩrã leita.
5. Daizeze Bedʼea jaradia zei naweda nããra bʉyi dobaʉba akʉra
Akʉra Salmo 119:34, mõbe naʉ̃ta panʉidua:
¿Kʼãrẽa yibia yiwidʼita Daizeze Bedʼea lei naweda akʉza naʉ̃ libro bʉyi dobaʉba akʉi naweda?
¿Kʼãrẽta oseabʉ audre kʼawuaita naʉ̃ libro bʉyi dobaʉba estudiabʉde? Naʉ̃ librode yi aba abaka bʉ akʉbʉrʉde naʉ̃ta oseabʉ:
Parrapo jõma lera «Audre biʼia kʼawuadadrʉ» abʉeda.
Testora jõma jʉrʉda, mõbe krĩchara kʼãrẽ ʉ̃rʉ bedʼeabʉta.
Jõma erura yi bedʼea widibʉ panʉbʉta. Naʉ̃ba kʼarebayi audre kʼawuaita bʉaʼa nejaradiabariʉ̃me estudiabʉrʉde.
¿Kʼawuabasika?
Jeowa ʉ̃rʉ Kʼawuabipanʉrãbara Daizeze Bedʼeara bio awuara awuaraka zokʼa zebʉda, mamina audre zokʼapanʉ Traducción del Nuevo Mundo aripe bedʼeabʉ baera, zare ẽ daya ũrĩta akʉza Daizeze trʉ̃ta zokʼabʉ baera. (Akʉra naʉ̃ artikulo jw.org: «¿Jeowa ʉ̃rʉ Kʼawuabipanʉrãbara Daizeze Bedʼeara ãya odata erbʉka?»).
Ʉ̃KɄRɄBA KRĨCHAPANɄTA: «Daizeze Bedʼea leira jipa zare, mʉ̃ra nekʼãrẽ mejãcha oibara, ewari neẽ maʉ̃ akʉita».
¿Bʉara kʼãrẽta krĩchabʉ?
KĨRÃBEITA
Bʉa Daizeze Bedʼeade jarabʉ audre biʼia ũrĩta, jʉrʉda kʼãrẽ ũmadaʉde oita adewara Daizezeʼa widida kʼarebamarẽã bʉa lebʉra bia ũrĩta akʉza bʉidu jaradiai zei naweda bʉyi dobaʉba akʉra.
Panʉnadrʉ
¿Kʼãrẽba kʼarebai Daizeze Bedʼeaba jarabʉ audre kʼawuaita?
¿Bʉara Daizeze Bedʼeara kʼãrẽ ũmadaʉde leseabʉ?
¿Kʼãrẽa yibia bʉidu Daizeze Bedʼea jaradiai zei naweda bʉyi dobaʉba kʼawuaita?
JɄRɄDA AUDRE KʼAWUAITA
Kĩrãbera sãwũã audre kʼawuaita Daizeze Bedʼea lebʉrʉde.
Kʼawuara bedʼea ũbea Daizeze Bedʼea sãwũã leita.
Akʉdaya sãwũã Daizeze Bedʼea lekĩrã ledaita.
Akʉra ẽbẽra Daizeze Bedʼea lebʉ dããrababa jarabʉta.
Sãwũã estudiaibara Daizeze Bedʼeara dayirã soidu jʉ̃ẽmarẽã (2:06)