¿Daizeze Nokʼobara sõbede zokʼa jʉ̃drʉi naʉ̃ Drʉara?

¿KʼÃRẼTA BERABARITA JARASI JESUBARA?

Iya jarasi: «Drua tabʼeta drua awʉrʉta tabʼe bawara zhõnaña, nokʼorãta nokʼorã awʉrʉ bawara zhõnaña. Menajacha nʉmeña ẽjũã ureta, baridu maẽ nʉmeña jarrabata puata» (Lucas 21:10, 11). Abarika ueyaba kʼawuabʉ kĩrãkʼa kʼaita yi ẽbẽrarã, idi ewade nekʼãrẽ mejãcha berabarinʉmʉba ũdubibʉ Daizeze Nokʼora arakʼaitabata. ¿Dayirãbara naʉ̃ta akʉbʉka? ¿Naʉ̃ra drʉa jõmaʉ̃nẽ berabarinʉmʉka? ¿Kʼãrẽta ũdubibʉ kʼãwũã berabarinʉmʉba?

1. YÕTA

1914de yõ baeda kĩrãkʼara wuara neẽbasi. Ẽbẽrarã naʉ̃ ʉ̃rʉ nebʉrapanʉrabara jarapanʉ maʉ̃ poagadeba jõma awuara jʉ̃drʉsita, naʉ̃ yõbara drʉa jõmaʉ̃ta ãrĩ amaesi baera. Maʉ̃ yõ baesidera zokʼasida karru tanke yõbaridebemata, bomba abioneba balbʉepanʉta, põgata, benenota akʉza nekʼãrẽ mia beabarirata. Maʉ̃ tẽã Yõ Ũmenera zokʼasida bomba atomikata mejãcha jẽza wãseabʉta. Poaga 1914deba ʉ̃ta ẽbẽrarãbara ũdu zebʉda yõta badumae akʉza maʉ̃ba mejãcha bea zebʉrʉ ẽbẽrarãta.

2. DRɄA URETA

Ensiklopedia Britannica Academic, naʉ̃ba jarabʉ, poagaza 100 drʉa ure zebʉta maʉ̃bara nekʼãrẽ mejãcha ãrĩseabʉta. Adewara Servicio Geológico de Estados Unidosdebemaba jarabʉ: «Daiba kʼawuapanʉneba poaga 1900deba ʉ̃ta poagaza jʉ̃ãpanʉ 16 drʉa ure zromarata berabarita». Ʉ̃kʉrʉ ẽbẽrarãbara jarapanʉ drʉa urera iyababʉta, awuarabʉrʉ idi ewadera nekʼãrẽbʉta kʼawuaita drʉa ure ʉ̃rʉ, maʉ̃ kʼareabʉrʉ mejãchabʉ kĩrãkʼabʉta. Mamina wãrĩnu bʼaira idi ewadera mejãcha zʉbʉriabʉ akʉza mejãcha beipanʉ naʉ̃ drʉade nekʼãrẽ mitia berabaribʉba.

3. JARRABATA

Naʉ̃ drʉadera mejãcha jarrabatabʉ, yõ kʼarea, plata mejãcha neẽ kʼarea, nezrʉgamiara kʼarea, adewara ẽbẽrarãbara akʉ aʉda ẽ ãyi ne uta akʉza nedʉwʉrʉrata adewara kʼawuada ẽ kʼãrẽta oita bisia mejãchabʉde akʉza kue zroma mejãchabʉde. Programa Mundial de Alimentosba jarabʉ: «Naʉ̃ drʉadera 821 millones ẽbẽrarã jarrababa berabaribʉta, maʉ̃ranebemata 124 millones beiseabʉ» (2018 Year in Review). Poagaza jarrababa beabʉ 3,1 millones wũãwũãrata. Poaga 2011dera 45% wũãwũãra beisi jarraba kʼarea naʉ̃ drʉa jõmaʉ̃nẽ.

4. KAYA MEJÃCHA BʼAITA

Organización Mundial de la Saludba jarabʉ: «Poaga 2001deba ʉ̃ta naʉ̃ drʉa jõmaʉ̃nẽ ũdudaita kayara. Kayara nãã badata akʉza jẽda zesida, naʉ̃rata, kolerata, kaya zromata, piebre amariyata adewara kaya yiwidita ʉ̃tʉ zepanʉ, joga kayiruata, gripa kayiruata, kaya Oriente Mediodebemata, kaya ebolata akʉza zikata». Akʉza yi kaya zroma aranʉeda ũdudata COVID-19ta. Sientipikoraba akʉza medikoraba maʉ̃ kaya ʉ̃rʉ kʼawua wãmina, ãya wabida ũdu ẽ maʉ̃ jõma bebira.

5. DAIZEZE BEDʼEA DRɄA JÕMAɄ̃NẼ JARADIAITA

Jesubara jarasi naʉ̃ drʉa jõbodoarera naʉ̃ta odaita: «Bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kʼawuadʼaya, mobebʉrʉ zeya ewari nʉmʉta jõĩrã» (Mateo 24:14). Naʉ̃ drʉade bedʼea zroma berabarinʉmʉne, 8 millones audrebʉ ẽbẽrarã Daizeze bedʼea jaradiapanʉta Daizeze Nokʼo ʉ̃rʉ 240 drʉade akʉza mil audre bedʼea awuara awuaraka, maʉ̃ kĩrãkʼara ũdukabasi nããrãra.

¿DAYIRÃBARA KʼÃRẼA KRĨCHAIBARA NAɄ̃ DRɄADE BERABARIBɄRA?

Jesuba jaradara idira jõma aripe berabarinʉmʉ. ¿Kʼãrẽa yibia maʉ̃ra dayirãitara? Kĩrãbedaya Jesuba jaradata: «Mawũã berabʼari bʉsadʼewata ũdubʉdadʼera kʼawuaudua kʼaita bata Daizezeta Nokʼodʼebemata» (Lucas 21:31).

Jesuba jaradaba akʉza Daizeze Bedʼeaba nekʼãrẽ arare arare berabariba ũdubibʉ Daizezebara zokʼa jʉ̃drʉbisita iyi Nokʼora ʉ̃tʉ poaga 1914de.a Maʉ̃ poagade iyi Warra Jesukristota nokʼo babisi (Salmo 2:2, 4, 6-9). Aranʉ Daizeze Nokʼobara naʉ̃ Drʉa jõma zokʼayi akʉza jõbiyi naʉ̃ drʉade nokʼorabʉrata, adewara naʉ̃ Drʉara ẽjũã kĩrãwãreã babiyi dayirãta ewari jõmaʉ̃nẽ panamarẽã.

Aranʉ jõma aripe berabariyi Jesuba dayirã jaradiadara, naʉ̃ yiwidʼita padrenuestro: «Zebira bʉ Nokʼota. Bʉa krĩñata odaide bʉa ʉ̃tre obe kĩrãkʼa, mawũã odaide bʉa drʉadebida» (Mateo 6:10). ¿Daizeze Nokʼora poaga 1914deba ʉ̃ta kʼãrẽta obʉ? ¿Kʼãrẽta oi ẽbẽrarã naʉ̃ drʉadebema zokʼa jʉ̃drʉbʉrʉdera?