¿Kʼaiba zokʼai Daizeze Nokʼora?

• Daizezeba jidaibasi. «Mʉ̃a bʉebʉrʉ mʉ̃ nokʼo», «mʉ̃a diayi pʉwʉrʉrata» «akʉza naʉ̃ drʉa jõma» (Salmo 2:6, 8).

• Erbaibasi David nokʼota. «Wũãwũã aba dayirã diasida». «Iyi Nokʼora yi zromabayi adewara neneẽãbʉra jõkabayi David bʉguedera akʉza iyi nokʼodebida, maʉ̃ nokʼora zareabayi» (Isaías 9:6, 7).

• Beléne todaibasi. «Bʉdeba, Belén Efrata» «bʉdeba zeyi Israel zokʼaira», «iyira yi zroma bʼai baera naʉ̃ drʉa jõmaʉ̃nẽ» (Miqueas 5:2, 4).

• Igaradaibasi akʉza beadaibasi. «Igara akʉpanasi, adewara kʼãrẽ ẽ kĩrãkʼa akʉpanasi», «iyi yarama susida dayirã kayirua kʼarea; adewara zʉbʉria osida dayirã kʼayirua kʼarea» (Isaías 53:3, 5).

• Jẽda piradrʉibasi akʉza yi zroma babibasi. «Bʉara amae ẽ bayi bewãrã dedara. Bʉara iduaribi ẽ bayi bʉ nezokʼa kʼẽrẽpabʉba ũduita sobeara», «bʉ juwararera bayi ewari jõmaʉ̃nẽ sobiata» (Salmo 16:10, 11).

Jesura Nokʼo audre yibia

Jesu ʉ̃rʉbʉrʉ maʉ̃trʉ jaraseapanʉ. Angel abaʉba naʉ̃ta jarasi yi papa María: «Daizezebara Reyta bʼʉya David bʼadʼa kĩrãkʼa, zõrã izhi uruta bʼadʼa kĩrãkʼa». «Izhita Reyta bʼʉra jõ ẽbaya» (Lucas 1:31-33).

Jesu nama Drʉade basidera zokʼa ba ẽ basi. Mamina ʉ̃tʉba eda zokʼa jʉ̃drʉyi ẽbẽrarãra, iyara zokʼai baera Daizeze Nokʼota. ¿Kʼãrẽa iyira Nokʼo audre yibia? Akʉdaya kʼãrẽta osita naʉ̃ drʉadebaside.

• Jesubara wãrĩnu krĩchabasi wuabemara ẽbẽrarãra. Kʼarebasi yumakẽrãrata, yuwẽrãrata, warrarata akʉza zõrãrãta, krĩcha ẽ basi samaʉ̃ba zebʉta adewara plata erbʉta akʉza plata neẽãta (Mateo 9:36; Marcos 10:16). Ẽbẽra yaga barabʉba jarasi: «Bʉa krĩñabʉrʉ mʉrã nene ẽã bʼebirua», maʉ̃ kʼarea Jesuba soborekea akʉsi akʉza mawũã bebisi (Marcos 1:40-42).

• Jesubara jaradiasi sãwũã Daizeze sobiabita. Iya jarasi: «Aramaʉ̃ kĩrãkʼa Daizezedʼebema aribʼae ẽã platadʼebemata aribʼae nʉmʉbara». Adewara jarasi wuabemarata edadamarẽã dayirãba kãgabʉ kĩrãkʼa, maʉ̃ra kapũrĩa bedʼeadera jarabʉ Regla de Oro. Adewara jaradiasi Daizezebara bari akʉ ẽãta dayirãba obʉta, awuarabʉrʉ akʉbʉ dayirãba sãwũã krĩchabʉta akʉza dayirã sãwũãbʉta, maʉ̃ kʼarea Daizeze sobiabita bia zokʼa kʼawuaibara dayirã sodebʉta (Mateo 5:28; 6:24; 7:12). Jesuba jarasi dayirã wãrĩnu sobia bʼaira, nãã ũdukʼawuaibara Daizezeba kʼãrẽta kãgabʉta omarẽã, mawũã oũdubita (Lucas 11:28).

• Jesubara jaradiasi kʼãrẽta jarakĩrãbʉta kãgaibara. Iya jarabadadeba akʉza iya obadadeba ẽbẽra soidu jʉ̃ẽbasi. Daizeze Bedʼeaba jarabʉ: «Zhãrãbara bia akʉdruasidʼa bia miã ũrãgʼa bʼʉdʼeba. Aramaʉ̃ne ãzhira ũrãgʼa nʉmasia miã ũrãgʼaita zarea bʼʉba» (Mateo 7:28, 29). Bari jaradaita iya zokʼasi: «Kʉãgʼaudua marã jura bʼera». Akʉza iyira yiwidʼisi iyi beadaita jirpanʉ ẽbẽra ʉ̃rʉ: «Zeze, bedʼea ne ẽã bʼʉkuadua ãzhara kʼawuadʼa ẽbaera kʼãrẽ obʼeta» (Mateo 5:44; Lucas 23:34).

Jesura nokʼo audre yibia. Iya jõma bia zokʼaseabʉ, iyara dayirãta kãga akʉza kʼarebakĩrãbʉ baera. Mamina ¿sõbede zokʼa jʉ̃drʉi iyara?