Daizeze Nokʼo edrera, jõmaʉ̃ta sobiapanañi akʉza neneẽãpanañi.

¿Kʼãrẽa zemarẽã kãgapanʉ Daizeze Nokʼora?

Ẽbẽrarã naʉ̃ drʉade neẽãbʉta parãsidadera, Nekʼãrẽ jõma oseabʉba yi trʉ̃ Jeowaba, iyabʉrʉ abapaiba zokʼabasi naʉ̃ drʉara akʉza kãgade zokʼabasi. Maʉ̃ kʼarea, parãsi ẽjũã kĩrãwãreãta ẽbẽrarãita, maʉ̃ ẽjũã kĩrãwãreã trʉ̃ra Edénbasi, mama mejãchabasi yikota. Adewara trajo biata diasi (Génesis 1:28, 29; 2:8, 15). Dayirãta Daizezeʼa idu yi zokʼabipanasibʉrʉ ẽbẽrarã jõmaʉ̃ta mejãchade sobiapanakasi.

Adán Evaʉ̃mebara Edéne saltota akʉpanʉ. — Nabema ẽbẽrarãbara Daizezeʼa idu yi zokʼabida ẽ basi.

Daizeze Bedʼeaba jarabʉ angel abaʉba ũrĩ ẽ basita (Diaru iyabaʉta Ãtomĩa) jaraside Daizezebara zokʼabe ẽãta. Adewara jarasi ẽbẽrarã audre sobia bʼaita Daizezeba zokʼa ẽ bʉrʉ. Mamina, Daizezeba nããra parãna ẽbẽra Adán Evaʉ̃mera, Diaruare wãsi mawũã Daizezeare pana ẽ basi (Génesis 3:1-6; Apocalipsis 12:9).

Mawũã Jeoware wã ẽ bada kʼarea adewara Jeowa yi zokʼabi ẽ baera, Adán Evaʉ̃mebara aduasida ẽjũã kĩrãwãreãnẽ panaita akʉza ewari jõmaʉ̃nẽ kaya ẽã panaita (Génesis 3:17-19). Ãya jidadaba zʉbʉriata amaesida ãyi wũãwũãraita. Daizeze Bedʼeaba jarabʉ Adán kʼarea «nekayiruara zesi naʉ̃ drʉa jõmaʉ̃nẽ mawũã nekayiruadeba jõmaʉ̃ta beibarita amaesi» (Romanos 5:12). Kayirua odabara awuru bedʼea zromata zebʉ: «Yumakẽrãba ewari jõmaʉ̃nẽ awuru yumakẽrãta zokʼabʉ maʉ̃ kayirua oita» (Eclesiastés 8:9). Naʉ̃ bedʼeabara jarakĩrãbʉ ẽbẽrarãta ãyikʉza yi zokʼapanʉbʉrʉ bedʼea zromabʉta drʉa jõmaʉ̃nẽ.

ẼBẼRARÃBA ZOKʼA JɄ̃DRɄSIDE

Nemrodba ũdubibʉ wuabemara ʉ̃ta krĩchabʉta. Iyi ãbʉde ẽbẽrarãba de drazoata parãnʉmʉ. — Nemrodʼra Jeoware ba ẽ basi.

Ẽbẽra nabema nokʼo badara Daizeze Bedʼeaba jarabʉ Nemrodbasita, mamina iyara Daizezeba zokʼabʉta wawia ẽ basi. Mamaʉ̃ba yẽta ẽbẽrarã nokʼo mejãchaʉba ãya okĩrãta ozebʉrʉ. 3.000 poagaba nokʼo Salomónba bʉdata: «Ũdusi zʉbʉria daʉbata akʉza mia kʼaiba so zarea diapana ẽ basi. Yi zʉbʉria opanʉrãra zarea barabasi» (Eclesiastés 4:1).

Idi ewadebida abarika berabaribʉ. Naciones Unidasba jarasi poaga 2009de ẽbẽrarãba krĩchabʉta nokʼora kayiruaba «zʉbʉria berabaribinʉmʉta ẽbẽrarãra».

KʼÃWŨÃENA OJɄ̃DRɄIBARA

Naʉ̃ drʉabara nesidabʉ nokʼo biata akʉza awuara zokʼa jʉ̃drʉita. Maʉ̃ta jarabʉ Nekʼãrẽ jõma oseabʉbara.

Poto: Kʼãrẽ berabaribʉta ãyikʉza zokʼabʉdeba. 1. Yuwẽrã Asiadebemata ode jewedabʉ ãyira mejãcha jaigʉabʉ, maʉ̃ne juwade erbʉ wũãwũã jẽgabʉta. 2. Ẽbẽra mejãcha zõna babʉta kaya kʼãrãpe ospital kamanebʉ. 3. Gorogororaba batabʉ põgaba yõ barabʉde. 4. Ẽbẽrarã mejãchaʉta kĩrʉ jʉrapanʉ ãyi bedʼeata ũrĩnamarẽã. 5. Yuwẽrã aba yi wũãwũãʉ̃me zebʉrʉde puertade bidriota ãrĩbʉta akʉpanʉ. 6. Pabrikade kougamʉ maʉ̃ awuara kabletabʉ, ãyirabʉ pʉwʉrʉ dayi kayabiseabʉmae. — Nokʼo biarabida ara oẽ naʉ̃ drʉade bedʼea zromabʉra.

Daizezebara Nokʼota erbʉ, maʉ̃ nokʼoʼa zokʼabiyi naʉ̃ drʉa jõma akʉza jõma jõbiyi namabema nokʼorabʉra, «adewara iyitrʉ ewari jõmaʉ̃nẽ bayi» (Daniel 2:44). Naʉ̃ Nokʼota ẽbẽra mejãchaʉba widipanʉ yiwidʼibʉdade padrenuestrota (Mateo 6:9, 10). Mamina naʉ̃ Nokʼodera Daizezeba zokʼa ẽ, awuarabʉrʉ jʉrʉsi nama ẽbẽrane zedata. ¿Kʼaita jʉrʉsi?